matkhaf ma walo !! kima kaloli bejaia amliha ou kayane fiha faide !!! koulshi maktoube byade rabii service aw amlihe !!!

السلام عليكم أخي أولا وقبل كل شيء اسم العضو الي راني بيه هو نفسه سطايفي19 يعني نفس الانسان
ثانيا أشكرك وأشكر أيضا كل من ساعدني وأجرهم عند الله
أود أن أستفسر منك قبل ان أجيبك عن أسئلتك
سنك دبلومك وهل سحبت الاستدعاء متطوع أم عادي وهل لديك ملف طبي وماهو نوعه
ثكنت بجاية من حيث النظافة جيدة - المراحيض نظيفة - الهاتف غير مسموح به لكن تلقى حتى السراجن لي في الشالي متعاقدين يعطوك تهدر في ليل تقدر تخبي هاتف وتديه - ساعات النوم 10 ليلا لازم يطفى ضو الشالي وتحب ترقد ولا مترقدش هدي حاشتك 05 صباحا لازم تكزن نايض تراسمبليو و تروحو تفطرو الفطور ساعات زبدة ومربى بالخبز ساعات كرواسو ساعات عصير .......تولو للشالي كل جماعة تنظف المكان لي تنام فيه سواءا غرفة او كولوار هدا في حالة التزاحم 07.30 صباحا راسوملمو جنرال يحسبوكم وتحية العلم 08.00 صباحا يقدرو يخلوكم حتى ساعتين ونتم واقفين تطلعو للشالي هدي راني نحكي في حالة مزال ملبستوش لكومبا لي لبسو يبداو التدريبات 09.00 ويوجدولكم الفطور في صالة الاطعام وكذا الغداء والعشاء ونظافة المحيط على 12.00 تهبطو من شالي رسمبلومو ويدوكم تتغداو وكي توليو تطلعو للشالي تريحو لتما حتن تسمع صوت الانذار 05.30 حتن 06.00 تهبطو ترسمليو ويبدوكم تتعشاو وتولو للشالي حتن 08.00 صوت انذار تهبطو رسومبلومو جنرال يحسبوكم حتن 09.00 تروحو للشالي وهنا ينتهي برنامج اليوم الذي سيكون كسائر الأيام بالنسبة للناس لي مزالتت ملبستش .
النوم الا رحت بكري مع لولين راح تلقى غرف فارغة وأسرة ....... أما الا رحت روطار تقدر تلقى ناس بزاف ويعطوكم أسرة تباتو في لكولوار
قبل دخول الثكنة اتصل بأهلك لطمأنتهم ومتخافش كي تدخل اجراءات ادارية تفتيش وملء استمارات حتن يدوكم للشالي
ادا كان الغاشي مكانش تقدر تفوت على الطبيب في نس اليوم كأقصى تقدير 3 أيام ادا كان عندك ملف طبي قدمو لطبيب الثكنة واشرحلو مرضك وبدوره يديرة انستونس ويبعتوكم ل علي منجلي المستشفلى العسكري قسنطينة
كل مرة يلبسو من 25 فرد الى 50 فرد ولي ميحبش يلبس يحتج وعندو الحق في فحص ثاني
لي عندهم مرص وملف طبي وكبار في السن ومتزوجين خاصة عندهم الحظوظ في الفائض
بجاية فيها الفائض كبير جدا كل مرة وكيفاش 1200 في ماي لي فات لي كان الكل يتوقع عدم دخول عدد كبير نظرا لشدة الحرارة رمصان العيد مسابقة الاساتذة غلقت الثكنة في 27 ماي او 28 ماي ليلا وصرى العكس وصل العدد الى 820 فرد جند منهم 250 والباقي ملف طبي حوالي 200 الى 300 والباقي أكثريته فائض أنا متزوج وعندي ملف طبي يعني كان عندي حظوظ يعني كي يناديو على قائمة لي تلبس 50 فرد مثلا ينحيو منهم لي مزوجين وكبار السن والذين يحتجو لاجراء فحص ثان ذهبنا للمستشفى العسكري قسنطينة في 200 فرد أكل اينابت غير 7 وهدو 7 من بعد خرجوهم مع الفائض
المنظر من الشالي هائل والمدرسة مليحة والمعاملة مليحة اذا كنت حاب تفوت راح تتهنى ان شاء الله عام ويفوت واذا كنت ماكش حاب تفوت راني عطيتك احتمالات الخروج ننصحك مديرش روحك فايق برك
نزيد نعطيك رابط الموضوع لي درناه في ماي الفارط أقراه صفحة بصفحة لأنك راح تستفاد منو كتير
https://www.djelfa.info/vb/showthread.php?t=1768950
زيد كشما عندك قلي درك نجاوبك

شكرا اخ سطايفي وفي انتظار صاحب الموضوع حبيت نسقسيك سؤال مستعجل وعندي تخوف بسبب حالتي
انا عندي مرض التهاب اظافر القدم والمرض واضح اقصد الالتهاب واضح جدا وانا نمشي بشوية صعوبة لكن الجري ابدا ما نقدرش نجري لان الالتهاب الجلد يزيد حتى الحذاء ما نلبسهش كما قالي الطبيب
والحقيقة راني متخوف اني راح نعاني في الكازيرنة لاني كما قلتلك المشية نمشي عادي بصح اذا طولت ما نقدرش
سؤالي حالة كما هذي هل يبعثوني للمستشفى العسكري او لانها واضحة فقط يكتفي الطبيب الثكنة باصدار القرار
وهل نطول باش نخرج لاني واضع فاصمات وكل يوم لازم نغيرهم
وكذلك ماهي الاوراق اللي تنصحني ناخذهم معايا ولا اذا كانت الحالة واضحة ما نحتاجش اوراق
وراني نفكر نروح اول يوم اي 15

وبارك الله فيك وجعلها الله في ميزان حسناتك

بسب الحالة احيانا نفكر انتظر المحكمة احسن لكن ماعنديش فكرة عن ايهم اسهل

في انتظار اجابتك اخي وشكرا على المساعدة

يا اخي في الثكنة تحتاج كل شيء ادي معاك اي وصفة راديو سكانير ادوية ورقة مواعيد عند طبيبك تقارير طبية حول مرضك
طبيب الثكنة لايمكن له ان يخرجك مباشرة من الثكنة معندوش الحق هذا ان كنت ليسانسي اما ان كنت مادون الليسانس يقدر يخرجك على الفور
ادعي ربي برك يبعتوك لقسنطينة لان فيها حظوظ كبيرة ونوصيك كي تقابل طبيب الثكنة متتفلفجش يعني مجيكش الرجفة اشرحلو مرضك واعطيلو المفيد في دقيقتين على الأكثر 5 د
ان كان ملفك قويا روح اليوم الأول تقدر تفوت 6 ايام وتخرج اينابت اما ان كان مرضك او ملفك ضعيفا روح الايام الاخيرة 26 ماي....28 كاقصى حد تقدر تخرج فائض لكن حتى وان لبست الكومبا لقدر الله تقدر تزيد دير احتجاج ثان
وفقك الله

اولا بارك الله فيك على الرد و جزاك الله الف خير وربي يعاونك

صح انا عندي ليسانس للاسف واضح الامر صعيب شوي

في رايك اخي الكريم ما هي الاسباب لرفض الملف الطبي هل الطبيب يشك انك مريض فعلا انا في حالتي المرض ظاهر للعينين او نوع المرض وما هو الفرق بين طبيب الثكنة والمستشفى العسكري من حيث الاسئلة والاجراءات ياريت تشرحلنا


راني عارف خويا ثقلت عليك بالاسئلة بصح راك تعرف الوضع صعيب ويطيح المورال

الله يسترنا

راني معك يا خويا هل الطبيب تاع الثكنة صعيب ام تاع الفص المضاد

ما هو الفرق بين ملف خفيف و ملف ثقيل

بلا مزية اخي لك الشطر الكبير وراني نعاوهن كيما عاونوني الناس
طبيب الثكنة يليكيدي بزاف كون متمدلوش سبب مليح يقنعو وتهدرلو باختصار وبدون قلق ورعونة راح تكون عندك فرصة الذهاب للمستشفى العسكري فيه طبيب يسقسيك مليح وكانك عند طبيب من الخواص يسقسيك ويقلك احكيلي وفهمني اما الوقت معاه يطول شوي مقارنة بطبيب الثكنة على العموم ادا عطاك طبيب المستشفى العسكري ايناب رايح تروح في اليوم الموالي وادا جاتك فرصة الذهاب الى المستشفى العسكري راع تعفي 99 بالمائة
ان شك طبيب الثكنة بلي راك تكذب ولا يتلهوث لسانك وانت تهدر ولا مرضلا يعيق عملك في الثكنة يديرك ابت
خمم مليح واش تهدر وكون جملة مفيدة وكلمات صريحة

الملف الخفيف مافيهش اوراق ومستندات واضحة ومبررة لمرضك اما الثقيل فالعكس
المهم ماشي خفيف ولا ثقيل لانك قد مادرت الاوراق بزاف في ملفك وتعتقد ان طبيب الثكنة سيقرأها فالعكس قادر مايشوف حتى ورقة

خلتين

خويا حاب نسالك بما انك ما شاء الله عندك معلومات
انا عندي ركبتي داخلتين بزاف بحيث انا ما نقدرش نطول بزاف و انا واقف هل نقدر عليهم ملف طبي

اخوتي بارك الله فيكم
أنا لم أجري الفحص الأول يعني حين أصبح سني 18 سنة
وفي جانفي 2015 سوية الوضعية نتاعي بدون أن أجري فحص فقط عطيتهم شهادة مدرسية أولى جامعي وعطاوني سورسي نتاع عام يخلاص في 31 ديسمبر 2015
في أوت هذا روحت كا متطوع أعطاوني الاختيار اخترت مركز التدريب للمشات بعين أرنات-سطيف في 15 سبتمبر نركب
عندي ملف كامل نتاع كفالة
الوالدين ماهومش خدامين
كاين غير أنا وخويا صغير عمرو 17 سنة
وأنا نخدم على العايلة
سؤالي ممكن ندي معيا ملف الكفالة للكزيرنة ويتم دراسته..؟
أما بخصوص مركز عين أرنات هل من معلومات عليه كافية من حيت فترة التدريب 45 يوم والهياكل الموجودة فيه والمعاملة على مستواه؟

أجركم على الله

دير وادي اي حاجة تفيدك انا مفاتتش عليا كيما هدي الحالة لكن دير في بالك انو كي كنا في الثكنة ناس بزاف ندمو وقالو يالوكان جبنا اي ورقة طبية معانا على الأقل نفوتو فحص مضاد ننصحك كي تفوت على طبيب الثكنة متحشمش اشرحلو مرضك في ظرف قصير واطلب منو يبعتك فحص مضاد

نصيحة ليك يا اخي حظوظك ضعيفة جدا
ملف الكفالة في الثكنة دراسته تطول ولا ياخد بعين الاعتبار ان كنت مازالك تقرى غير كمل دراستك لعل من على 3 سنوات يخرج قانون في صالحك وتدي الاعفاء او جيب ليسانس يبعتوك لمدرسة معروفة بالفائض تقدر تخرج
ملف الكفالة يقبل في حالة طلاق او وفاة احد الوالدين لا قدر الله
مركز عين آرنات لا يطاق وزيد انت هكدا راح تروح صف ضباط يعني راح تعاني
نصيحتي لك متروحش وخمم مليح

بارك الله فيك خويا على كل ما تقدمه
انا رايح للحراش اذا عندك معلومات على الطبيب و على الفحص الضاد افدني
اكرر بارك الله فيك خويا