راني حاير

[مشكلتي]

السلام عليكم ورحمة الله تعالى وبركاته

اناشاب عمري 30 متزوج وعندي طفلة عمرها سنة المشاكل كبيرة بين الزوجة والاهل والله كرهوني وليت مانحبش نروح لدار ديما الصراخ والبكاء والشتم الاهل يتهموها بلي تسحر وكيما نهدر معاها تحلف وتقول والله ما نسحر ومانكدبش عليكم راهم يدربوها درب مبرح وكيما ندخل روحي يقولي بابا اسكت ولا نخرجك من الحانوت مع العلم راني نخدم في الرزق تاع بابا بصراحة حاب نستقل بدار وحدي بصح مانيش مكون روحي ومن اسبوع قالي بابا ويما لازم تطلقها انا تفاجئت وقلتلهم هدي لحاجة في يدي وانا لي نقررها قالي بابا كي وليت هك كون ماتطلقهاش تخرج من الدار وماتزيدش تخدم في لحانوت تاعي قلتلهم اعطيوها فرصة اخيرة ماحبوش هوما اصلا من الاول ما يحبوهاش ومام نخرج بداري وحدي متاكد يبقاو هك من الاول حابين يطلقوها والله ما لقيت كيفاه ندير ساعات نخمم نقول نطلقها وخلاص هي تتهنا من لمشاكل والضلم تاعهم وحنا نتهناو وفي نفس لوقت مانيش حاب تتربا بنتي بعيدا علياما م زوجتي راهي مليحة معايا ومانيش حاب نخسرها و تاني كون نحبس لخدمة في لحانوت تاع بابا نضيع اصلا ماعنديش مستوى في الدراسة ومستحيل نلقا لخدمة راني تعبت من التخمام ومالقيتش حل الاهل مصرين على قرارهم وما حبوش يتنازلو عليه تعيشو دبرو عليا واش ندير

[رهف هبة الرحمان]

السلام عليكم
مادامك مليح مع مرتك وهي مليحا معاك ننصحك مطلقهاش وزادا راه عندك طفلة ومالازمش تتربا بعيد على واحد فيكم حاول مع اهلك واقنعهم حتى تصيب خدمة ولا خليها في دار اهلها حى حسن امورك عندك عندك طلق مرتك هدي باينة بنت فاميليا لوكانجات وحدخرا كون قالك طلقني وخليني نروح لدارنا ................. ربي يوفقك وان شاء الله تتحسن امورك

[Zaki Dilmi]

خمم على بنتك مكان حتى حاجة مهمة كيما هي معندهاش ذنب باش تطلق يماها
ادعي ربي ان شاء الله تتصلح الامور و ان شاء الله رزق على ربي مشي غلى باباك و لا فلان اذا رحمت طفل صغير لي هي بنتك ان شاء الله ربي يرحمك و يفرجها علييك
ادعي ربي

[حبيبة امها]

امر محزن حين يقع الشخص في الوسط لكن ان ضد الطلاق حرام البنت والزوجة ايضا انا ننصحك يا اخي استقل بحياتك في الاول اكيد تتعدبو وكل الناس تمر بالمحن وبادن الله ربي يرزقك بالعمل ولو لم يكن جيد لكن لو تستقل وتحس بطعم الراحة النفسية لن يهمك ابدا نوع العمل يمكن ان الوالدين يضغطان عليك بهده النقطة خصوصا لهدا فك القيود عنك وعن زوجتك وتحمل المسؤولية وبادن الله ربي يوفقك لانك لم تظلم احد

[ام اماسي]

السلام عليك ما طلقش مرتك و اهدر مع باباك قلو انا ما رانيش حاب نكسر كلمتك مي ما رانيش حاب نخلي بنتي تتربا بعيد عليا وحاول تقرب من ولاديك ومرتك قلها تقزب يماك بلاك تفرج امورك وادا بقاو في رايهم ارض ربي واسعة ورزق بيدو لي خلق ما يضيع و ادا خرجت من دار اخرج بلا زعاف وخلي ماليك لي يندمو ماشي انت وعسى ان تكرهوه شيء خير لكم بلاك مرتك يجي نهار هي ترفد ولديك ربي يصلح الاحوال وان شاء الله تفرج

[الصديق قروف]

ربي يفرج عليك من هاذ الهم الكبير
مطلقش كيما قالو
حوس على خدمة و لي خلق مايضيع

فيما يخص اقوال اهلك هل انت متاكد انهم يفترون عليها فقط ؟

[أم أماني أريج]

المشاركة الأصلية كتبت بواسطة الصديق قروف

ربي يفرج عليك من هاذ الهم الكبير
مطلقش كيما قالو
حوس على خدمة و لي خلق مايضيع

فيما يخص اقوال اهلك هل انت متاكد انهم يفترون عليها فقط ؟

عفوا اخي لوكان جات صح ساحرتهم لوكان ما يلحقو يضربوها و ضرب مبرح ثان !!!!!!

و إلى صاحب المشكلة و الله يا أخي الظلم ظلمات يوم القيامة و الله زوجتك شقت قلبي يعني هل ترضى يلحق أبوك أو أمك يمدوا يدهم عليها و الله حرام .......
أنا رأيي أبوك و أمك على العين و الراس و بر الوالدين واجب لكن مش لدرجة أنك تهين نفسك و تجلب الذل لنفسك و زوجتك و أولادك ....و ما تنساش أن المؤمن كيس فطن و لا طاعة لمخلوق في معصية الخالق ......
أنت حلك تستقل بحياتك الخاصة و حوس على خدمة يا لوكان بسيطة المهم أنك تعيش عيشة كريمة و الرزق على الله و صدقني أخي حتى و لو طلقت هذه المسكينة و تزوجت غيرها فستبقى السيطرة مستمرة ..........
ربي يكون في عونك .........

[hodayena]

انت ضعيف الشخصية ووالديك يتحكمو فيك ربي طيحك في بنت حلال باين صابرة معاك والديك يضربوها وانت ساكت وهي لوكان مرا في بلاصتها لوكان راهي راحت وخلاتك انت في بالك كي طلقها راكي رضيت والدك المتسلط وحاسب في روحك ربي راح يرضى عليه بالعكس راح تعطي فرصة لوالديك يزيدو يدلوك واخرتها يحاوزك من الحانوت عارف علاه لانو تبيعات الطلاق لا انت لا باباك قادرين عليها
قبل هادا لوكان جيت قد روحك قالك نحاوزك حطلو المفاتح وادي مكرتك لدارهم وروح حوس خدمة وخليهم يسبعو يقعدو وحدهم وكي يقطعو لياس منك يعيطولك يعيطو ظالمين وربي راح يعاقبكم في تجال الطفلة المسكية
روح اخدم حمال روح اغرس في الحقول جيب 100دينار في النهار ومتظلمش مرتك لخطرش من ترك شيءا لله عوضه خير انت مراحش تغضب باباك كي تخرج بالعكس راح ترضي ربي انك متضلمش مرتك انت حسبالك الدنيا ساهلة تتعب وتشقى ومن بعد الصبر تنال ايما تقعد في الحانو دليل اما تعيش بكرامتك وعلاه كي طلقها وتتزوج راح تجيك مرة كيما زوجتك قسما بالله راح جيك عرة العراة الي تخلص في والديك دنوب زوجتكم الاولى انفض الغبار على روحك والي خلق مايضيع وراح نقولهالك ادا باباك محاوزكش هاد المرة وطلقت زوجتك راح يحاوزك يحاوزك صافي اربح مرتك وبنت ورضى ربي قبل

اه تفكرت الطلاق ادا جاك ساهل انا نقولك راح تخلص على الاقل 30ملليون تبعات الطلاق ونفقة البنت والسكن كل شهر من مليون ونصف حتى زوج ملاين

[ام افنان48]

يااخي إياك والطلاق لوكان تطلق يجئ نهار وبنتك تكرهك لاخاطرش خليت يأمها تنظلم وانت ظلمتها بطلاق والرزق على ربي لاطاعة لوالدين في امر يغضب الله يااخي المشكلة النسا برك وبابك يسمع لامك سي نورمال. يدي اخي قنع والديك ودي مرتك بعيد كون جات ساحرة صح كون مارهيش تنضرب كون راهي هي مولات الدار هدا المتطق

[عبد الله 22]

السلام عليكم انصر أخاك ظالما أو مظلوما ، من المفترض انك رجل وانت المسؤول على زوجتك ، والرزق على ربي ليس من عند ابك ، بصراحة من المفترض هي من تطلب الطلاق مدام تتعرض لضرب الذي يمنع حتى على الحيوانات في هذا الوقت في الكثير من الدول والله يكف ان تتعرض لضرب وصابرة معك ، للأسف الكثير من العائلة تزوج أبناءها ثم تستعبد زوجتهم بطريقة لا يرضها إنسان

[نورسين.داية]

أخي أعتبر نفسك قاضي للحظة ...
و إسئل نفسك عن عدد التهم الموجهة لزوجتك ...و الأدلة المادية التي تثبت إدانتها إن كانت فعلا موجودة

و لا نتسى أن الله عز وجل سوف يسألك عنها يوم القيامة ..............و ان الظلم ظلمات يوم القيامة

أنا شخصيا أراك أنت لا تستحقها ......لأنك إعترفت بنفسك أنه لا يوجد دليل على ما يدعيه أهلك ....خصوصا مسألة الضرب .....تستطيع أن ترفع دعوى عليك و على أهلك على الإعتداء الذي تتعرض له أنت ساكت زعمى راجل

[0ibtissam]

انصحك بستأجر منزل كما قالو الاخو الرزق على ربي اكيد بابا راه يقلك اخرج من حانوت بدافع الغضب انت حطلو لمفاتح وخرج انت مرتك انا متأكد انو يرجعك تخدم عندو مستحيل يقلى واحد يخدمو مثل وليد ربي ان شاء الله يفرج همك وياك وطلاق خاصة مدام زوجتك راه صبر معاك

[amine eco]

اخي ماش شرط تخدم في حانوت و متبدلش زوجتك وبنتك بالفاني لانك راح تندم

انصحك بمشكن خاص حتى يفرج ربي ربي

ورزق على ربي مش على يد اباك ولا غيرو

[salem1985]

السلام خويا واش نقول لك تمسك بمرتك وبنتك وربي بنتك على يديك خير من الي تندم طول حياتك رانا نشوف اباء ما شاء الله وبناتهم راضهم جايحين لانو ترباو بعيد عليهم وامهاتهم ما قدروش ليهم كي يقولوا لك طلق الي قال ليك قول له انت ثاني طلق مرتك راهي ما عجبتني وشوف ردو والصح راك راجل رفد مرتك وبنتك وهيم على راسك راهي البلاد طويلة وعريضة والصحراء كبيرة ومرحبا بك على العين والراس الي يدير الخير موش يولي يحكم هو المرة انتاعك ما يحكوش معاها اصلا راهم ما يعطوها دعوة الخير ولا الشر وزيد لو كان ما جات متربية والله غير خاوتها وباباها يوقف فوق راسكم ويرد لك الصاع صاعين المهم لعن الله معيشة الذل وارض الله واسعة اروح للصحراء كاش تلقى حل ورانانعاونوك

[thawizat10]

مقدرتش نكمل يضربوها ضرب مبرح وتهدر فيها نورمال