هل من فحلة تعلمنا فتيل الطعام

[غزالة الصّحراء]

المشاركة الأصلية كتبت بواسطة ام ورود

سلام اختى .شكرا على النصيحة نتاع التفوار والسميد.اما بالنسبة الغرابل انا عندى ثلاثة الاول عينو مفتوحة بزاف لنعملو بيه البركوكس
والاخرين اقل منو في الحقيقة شريتهم باش نعمل طعام الزعتر نحن في جيجل نعمل طعام بالزعتر للمراة بعد الولادة صحي كثير ويبدو انو يخصني الغربال الرابع لى عينو رقيقة.

يا أهلا ومرحبا بأم ورود. إن شاء اللّه اتكوني استفدتي وأخذتي نظرة خاطفة عن الفتيل. ما يكون غير الخير الأمر بسيط بالبزاف. رحمة ربّي واسعة والنّاس لملاح مازلوا كاينين، والتكنولوجيا راهي ثاني اتعاون في الكلّ.
بصّح يا أختي ام ورود ، أنا نستعمل غير 3 غرابل. واش هي قصّة الغربال الرابع؟؟؟ أحنا الغربال الثالث هو الي عيونو ارقيقة. على خاطر فيه الي اتكون المرحلة النّهائيّة. فيه ألي رايح تتحصّلي على الطعام، ثمّ تنشريه في الدّْرَا.
الغربال الأوّل قلت لك لازم فتحاتو ثاني ايكونوا اصغار اشويا باش ايجيك الطعام ارقيق.
غير ماتقلقيش روحك رايح تتعلمي وتولي سيّدة لفتيل، وكاليوم اتقولي ، واللّه غير غزالة الصّحراء قالت. واش رايك؟