فلنحكي لهم ...أجمل حكاية

[ابداع جزائرية]

فقط حبيت نقول أنه حكيتها بعفوية بهاذ الشكل
فكل أم تقدر تغيّر في طريقة الكلام بما يناسب طريقة حوارها وأطفالها
وبالنسبة لي أحسن وقت مناسب للحكاية..
كان قبل مايرقدو ...
وكنت نحكي من الجهاز ...وهوما يشوفو بعض الصور ويعلّقو

نبدا على بركة الله ...



الحلقة الأولى:

كان يا ماكان ...


وماتحلا القعدة غير بذكر النبي عليه الصلاة والسلام ...

وش يقولو الولاد القافزين؟

عليه الصلاة والسلاااام ....ممتااااز

هيا حبوباتي قولولي السّع ؟.تعرفو شكون هو احسن واحد في الدنيا ؟...سيدنا محمد؟

نعم...سيدنا محمد ...

سيدنا محمد هو اللي بعثه ربي سبحانه باه يعلّمنا الصحّ والخطأ

...الحلال والحرام ...

ربي سبحانه اختاره من بين كوووووول الناس باه يوريلنا الاخلاق الحسنة ...والاعمال الطيبة

ويعلّمنا ديننا ..ديننا :.الاسلام

واللي يحب سيدنا محمد ..ويسمع كلامه ...
ربي سبحانه يحبّه ويرضى عليه

ويدخّله الجنة ...



الجنة هاذي حبوباتي مكان جمييييييييييل ...

فيها كل اللي نتمنّاو ..ومهما فكّرنا في الحوايج اللي نتمنّاوهم ..

راح يكون في الجنّة احسن منهم ..

كان بكري..بكري خلاااااص ..
لما كان سيدنا ابراهيم وولده اسماعيل ...يبنيو في الكعبة


....وقف سيدناا ابراهيم يدعي ربي سبحانه من قلبه ...

انه يبعث للناس واحد ...رسول ...ينعّت للناس الصح من الغالط ....


الحلال من الحرام ...ويعلّمهم الخير ...

ربي سبحانه استجاب لدعوته ...

واختار سيدنا محمد صلى الله عليه وسلّم باه يكون هو المعلم...


اللي يعلّم الناس الخير ...يعلّمهم أوامر ربي سبحانه ...

سيدنا محمد كان اسم أبيه عبد الله بن عبد المطلب ...

وش كان اسم باباه أمّي؟ عبد الله ابن ؟ جيّيّيّد ... ابن عبد المطلب

(لازم الطفل يعاود معاك ...وكي يقول ...ندعوله دعوة خير بابتسامة :

ربي يحفظ وليدي او بنتي ...ربي يرضى على وليدي...

ولو ماشفاش عليها مليح عاوديها برك مرّات )

وماماه وش كان اسمها ؟شكون يعرف؟ ...

كان اسمها آمنة بنت وهب ....

آمنة بنتُ؟...وهب (يعاودو معاك)

لمّا كان سيدنا محمد بيبي صغييييير في بطن ماماه ...

أبوه عبد الله مات ...

وماشافوش خلاص لأنه هذاك الوقت كان مازال مازادش...
سيدنا محمد زاد في عام الفيل ...
تعرفوا ماما علاه سمّاوه عام الفيل؟

سمّاوه عام الفيل لأنه ابرهة الشرير كان حابّ يهدّم الكعبة بالفيل الكبيييييييير اللي جابه

لكن ربي سبحانه ماخلاّهش وعاقبه هو والجنود نتاعه كي رسل عليهم طير ابابيل (كيما نقراوها في سورة الفيل )

المهم ...كي زاد سيدنا محمد...
ماماه (امنة بنت وهب) بعثت لجدّه ...ابو باباه ...
(جده اسمه كما قلنا عبد المطلب) ...
جا جدّه عبد المطلب وشافه لقاه طفل بااااااهي وحبّووووب ...
وأم سيدنا محمد آمنة قالتله : كي كنت بالحمل نمت حلم جميييييييل ...الحلم كان فيه نور يخرج من جسمي وينوّر الدنيا كااامل ..
فحسّ جدّه عبد المطلب بلّي الطفل هذا مش طفل عادي ...وبلّي كي يكبر راح يعلّم الناس وينور قلوبهم كما ينور النور الدنيا ...

فجدّه قال ...انا راح نسمّي هاذ الطفل محمّد...
وماكانش هذاك الوقت خلااص اللي سمّى ولده من قبل محمد...
فالناس حارت وقالتله وش معناه: ...محمد...؟
قالهم معناه ربي في السماء يحبّه ويحب اخلاقه الطيبة والناس في الارض تحبّه وتحب اخلاقه الطيبة.

ضركا... سيّدنا محمد راح يبقا مع جدّه ؟...ولاّ مع ماماه؟... ولاّ في بلاصة اخرى ؟
هذا اللي راح نشوفوه مع بعض في الحلقة الثانية من القصة الجميييييييييييييييلة ...

صلّو على نبينا المختار ....

اللهم صل وسلم وبارك على نبينا محمد