~|[ « النظر هو الحياة.... كل ما يتعلق بالعين,النظارات, العدسات اللاصقة, الزجاج ستجد له اجابة هنا ان شاء الله» ]|~

[سطايفية بكل فخر]

السلام عليكم مجددا اخي رمضان
بعد ان اجبتني على اسئلتي التي طرحتها عليك استطيع ان اجيبك الان

المشاركة الأصلية كتبت بواسطة رمضان جمال

شكرا لإهتمامك و ردك السريع

الآن سوف أجيبك على الأسئلة التي تفضلت بها:

بحلول السابع و العشرين جويلية يصبح عمري 32 سنــة إن شاء الله


1- هل تعاني من الم في الراس او الاكتاف او الرقبة وهل تصاحب الام عينك ؟

حاليا لا أعاني من آلام لكن أحيطك علما أني في السابق كنت أعاني من آلام في سن العقل و أحيانا يأتي ألم عبارة عن وخز في العين اليسرى فقط حتى قبل ظهور ألم ضرس العقل.

2- هل الالم يخص العين اليسرى فقط او ينتقل للعين الاخرى وهل تحسن ان راسك يولمك من جهة العين اليسرى؟

أحيانا يأتي ألم عبارة عن وخز في العين اليسرى فقط دون ألم في الرأس و هذا قبل ظهور ألم ضرس العقل و بعد ظهور ألم ضرس العقل أصبح الإثنين معا.

3- هل تحس انك نقصت في روية الاشياء البعيدة او القريبة فقط؟

أعاني من نقص البصر في الأشياء البعيدة فقط و إذا ركزت كثيرا في شيء بعيد أحس بضباب خفيف أما الأشياء القريبة فأراها جيدا دون غشاوة أو ضباب مصحوب.

4- لما تنظر للونين الاحمر والاخضر ايهما تستريح فيه عينك ؟

أحب اللون الأحمر لكني أستريح كثيرا كثيرا للون الأخضر خاصة المساحات الغابية الخضراء.

5- هل زرت طبيب عيون من قبل ومتى كان ذلك ؟

لا لم أذهب

لكني أذكر يوما أني ذهبت للصيدلية عندما كنت أحس بإلتهاب طفيف مصحوب بإحمرار في العين اليمنى فقدم لي الصيدلي ( bacicoline + clomycin ) وهنا لدي سؤال - ماهي الفائدة الطبية من إستعمال دواء bacicoline و هل له أعراض جانبية إذا أستعمل لفترات متذبذبة متباعدة دون التقيد بنصائح الطبيب ؟



أنتظر ردك الكريم أختي الفاضلة

اخي لما قلت لي ان عين واحدة فقط كانت تولمك توقعت ان تكون ليس منها تحديدا وانما مشكل اخر وقد خفت ان تكون الشقيقة لكن الحمد لله مش هي لانو ميجعكش راسك وراك قتلي بلي الضرسة اخي يعني تاكدنا انو مكانش خلل والحمد لله في العين اليسرى
هذي من جهة
من جهة اخرى سالتك عن عمرك وهل تشوف للبعيداو للقريب واين المشكل لانو عين الانسان تنقص بمرور العمر وتبدى متشوفش مليح للقرب ابتداءا من 42 سنة فما فوق حسب كل انسان كيفاش
مي انت راك مزلت في ريعان شبابك ومتعانيش من هذا المشكل الحمد لله
ومن هنا تعرف بلي مشكلتك هي الحاسوب والعمل اخي
انت تستعمل الحاسوب كثيرا وتركز كثيرا فيه بحكم عملك اخي وهذا ما جعل عينيك تقومان بجهد اكبر فاصبت بتعب العينين fatigue oculaire من اعراضو الاحساس بجفاف العيون وخز في العيون ضباب العيون والحساسيةلي تسبب الاحمرار والحكة ايضاالام في الاكتاف والرقبة وايضا التحسس من اشعة الشمس وانت راهي عندك بعض هذي الاعراض اخي
وكونك عندك مدة وانت تخدم بالحاسوب بلا متروح للطبيب ولا دير نظارات احتمال كبير تكون نقص النظر عندك لذلك لم ترى جيدا لما تفرجت اخي
+
بالنسبة للسوال الثاني اخي حول النظارات الشمسية للاسف نظارات السوق راهي تاذي العين بزاف وتبانلكم راهي تفيدها راهي تخلي جميع الاشعاعات فوق البنفسجية للشمس تمر للشبكية لي هي عضو حساس جدا للضوء ومع مررور الوقت رايحة تحرقها وتعرض الانسان لخطر العمى
ديما نقولها ونعاودها العين تحمي نفسها من الاشعة احسن من نظارات السوق وديما ننصحكم اما ديرو نظارات طبية او مديروش نهائيا احسن ما تعرضو عينيكم للخطر وان شاءالله رايحة نديرلكم موضوع خاص باخطار نظارات السوق هكا باش واحد متزيد تكلحو هذي النظارات
+
بالنسبة لسوالك حول الادوية لي عطاهالك الصيدلي متخافش منها هي ديزونيبيوتيك واونتي انفلاماتوار مدهالك باش تخففلك الحساسية لي في عينيك ومتخافش منها لكن لازم تروح لطبيب باش يمدلك دوا يناسب الحساسية لي في عينين لانو الحساسية انواع

هذا اخي واش فهمت من اجوبتك وحالتك نجيو الان للنصائح
اخي لازمك تروح لطبيب باش متتازمش حالتك وتنقص في نظرك هو رايح يفحصك ويمدلك مرطبات للعين ويمدلك دواء للقضاء على الحساسية وجهد العين وان شاء الله تتحسن منها
ايضا احتمال يمدلك نظارات يساعدوك في تعب العينين ويريحوك ولازم عليك ديرفيهم زجاج اونتي روفلي لانو يناسبك كونك تعمل كثيرا بالميكرو
+
كونك حساس للشمس اشري نظارات شمسية طبية وراهي بها الوان بزاف وتلقا اكيد وشا تحوس وفيها ليمارك بزاف ريبان بوليس كاريرا وغيرهم والسعر حسب كل ولاية حنا في سطيف عدنا من 500 حتى 3 ملاين حسب النوع والمركة
وكاين نوع جديد اسمو polarisées هذا النوع اخي يخليلك الروية واضحة جدا اكثر خاصة لما تكون تسوق ان شاء الله ثاني رايحة نديرلكم موضوع نشرحلك الخاصية لي فيها فقط امهلوني بعض الايام لاني منشغلة قليلا
ن=مابين تروح لطبيب العينين حاول تحافظ شوية على يعينيك وتريحهم
حاول ترقد مليح
ايضا حاول تنوض من الميكرو كل نص ساعة وتعمل جولة خفيفة وترجع هكا باش تريح عينك ومرات اغلق عينيك وابقى في الظلمة باش يستراحو شوية
التفراج متتفرجش في الميركو خاصة الان اتفرج في التيليفيزيون ومن المستخسن تكون بعيد عليه ومش لفترة طويلة
هو نورمالمون التلفاز يكون بعيد من العين 4 متر لكن حنا في دزاير معدناش وين نحطوه ههه كامل نعانيو من الضيق ولي زاد الطين بلة انو شرينا الاكسترا بلا والاشدي وجماعتهم
اياض اشري سيروم من عند الفرمسيان واغسل بيه عينيك
تجنب الورائح الكريهة والغبار وكل نسببات الحساسية
اذدا كنت من الناس لي تقرا او تستخدم الكتاب في عملك
اقرا في اضاءة جيدة بشا مترهقش عينك
ونقص من شدة الاضاءة في الميكرو

نورمالمون اجبتك عن كامل الاسئلة
روح للطبيب وقولي وشا قالك واكتبلي الكوراكسيون لي مدهالك وان شاء الله رايحة نعاونك باش تخير الكادر المناسب ليك
ربي يشفيك ان شاء الله