السلام عليكم
كنت وعدت بالعودة للموضوع وهاني رجعت
ماشي بزاف ملي درت حجاب
ولكن اليوم راني نقول الحمد لله
وندمت اللي مادرتوش بكري
حبيت نحكي قصتي مع اروع حاجة درتها في حياتي
حجابي
منين كنت في المتوسط
قلت منين نربح شهادة التعليم المتوسط راني نديرو
وهادوك لياماتت كان موضة!!!
ربي يستر
ومن بعد منين ربحت الشهادة
قلت لالا مازالني صغيرة
والبحر والتريكويات والبونطالونات
والجيبات وشكون يلبسهم!!
قلت ايوا حتى للعام الجاي
وهكدا حتى ربحت الباك
في العام تاع الباك
كنت نقول مور الباك نديرو
ساعا جاتني قرارات وحدخرا
كنت رايحة نقرا في الخارج
اين ممنوع الحجاب
قلت حشومة نديره ونعاود نحيه
وزيد انا حابة نديرو عن قناعة ....
ربحت الباك
وطلعت للجامعة
وهناك ...المكان الدي يغرك فيه الشيطان
اما الهاوية
واما طريق الحق
مانحكيش على الجامعة راكم تعرفوها خير مني
سورتو في تلمسان عندنا والله
اللي مادايرينش الحجاب
منين تشوفهم تقول ماراكش في بلاد مسلمة
تقول راك في اوروبا ...!
قعدت فكرة الحجاب تدخل في دماغي وتتعمق
وزيد وكانه كان هادوك ليامات اللي نلقاه يهدر على الحجاب
وحتى في المنتدى ....!
تقول كانو الناس يعرفو واش راني نخمم
اه نسيت نقول حاجة في الليسي الاستاد تاع العلوم شرعية
كان دايما يقولي
لبنى انتي طفلة ماشاء الله
بصح مازال ناقصاتك حاجة
وكان حكالي على قصة التفاحة
تفاحة بلا قشور = طفلة بلا حجاب
في البداية تكون شابة وبيضاء
ولكن مع الوقت يروح جمالها
والتفاحة مع القشور = طفلة بحجابها ...
وهي اللي تقعد تلمع ولو مرت الايام ...
في الجامعة كنت قريت واحد الموضوع هنا بمنتدى الجلفة
والله زادني اصرار
دوك نحوس عليه ادا لقيتو ونجيبو
ماعقلتش على عنوانو ...!
المهم يوم الجمعة من العام الفارط
قررت وضع حجابي
سبحان الله
بين ليلة وضحاها !
وماكاش عندي حتى الالبسة تاع حجاب
لبستي من قبل كانت مستورة
بصح يومها
نهار قلت نروح غدا بحجابي
رحت نقول لماما وبابا
قالولي استناي حتى تشري شوية البسة وديريه
قلت لالا
لانني لو لم اجرؤ يومها
لزدت في التعطيل
وربما لا سمح الله
كنت ليومي هدا وانا من دونه
كانت اختي شيراز حدثتني هي الاخرى عن احساس الطفلة بحجابها
وزادتلي الكوراج
وحمادة المصري ايضا
قررت يومها
واعلنت وضعي لحجابي بالمنتدى هنا
وشحال فرحت منين لقيت بزاف اعضاء فرحوا معايا
ربي يخليهم
خاطر في اول ايا الحجاب البنت تحس روحها
شوية ماشي نورمال
ولازملها شوية تدعيم
لقيت الدعم من المجتمع تاعي
واخواني بالمنتدى
واليوم راني نقول
يا ريتني وضعت حجابي قبل داك اليوم
ولكن الحمد لله
ان ياتي القرار متاخرا
خير من عدم وصوله ابدا
شكرا اخي كمال على الموضوع المميز
اتمني اتمنى واتمنى
لو ان بنات المنتدى
كامل يديرو حجاباتهم
ويفرحونا
وراح نكون من اولى مدعميهم
سلااااااااااام
( تقرير عن مشاركة سيئة )، و الموجودة أسفل كل مشاركة .
2010-01-16, 15:56
العرض المتطور
