[ خاطِرة ] السلم

[العاشق المصرى]

يروح وزير ييجى غيره
على دربه وخط سيره
واللوائح هى هى ..؟!
والقرار فى الوزارة ...!
زى شارع جوه حارة..!
وفكر يهدم مليون حضارة ...!

يا متعلمين يا متنورين :-
حد يقولى مصر رايحه على فين؟!
هى رايحة ولا جاية ؟!
حد فيكم يكون فاهم يقول ..!
من جوه قلبه كلمة يحيى بيها العقول
إحنا بنبنى ولا بنهد دولة القانون ؟!
أيوه القانون اللى ولعها فى بورسعيد..!
القانون اللى أباح دم الشهيد .......
اللى مرمغوا على الأرض مرسى وعبدالمجيد
ولا قانون خلاها نار فى عز الجليد...!!
شيب الشعر فى راس ...الوليد

يا أمنا كل يوم تظهر جماعة
يا مصر بقينا مليون جماعة
وأنا المواطن بستظل باليأس ومتلفح بالكآبه
ليه يا أمى .....ربيتى ولادك يكونوا ديابة
وخلوا الوادى الجميل يبقى غابه.....

كنت فاكر الثورة غنوة و كلمة شهادة
لقيتها راية سودة ومدرعة بتبيد إبادة
شباب يموت ويصرخ هى دى قمة العبادة
ومصاب يئن جرحة يبحث عن طبيب أو عيادة
وأنا خايف يا مصر تبقى ديه عادة

يا مصر تاهوا ولادك
وأنا فى أيدى الحل
الرضا
والسلام