يا اهل الخبرة ممكن مراحل الزواج

[ايمان نور الجزائر]

السلام عليكم ورحمة الله وبركاته
وعليكم السلام ورحمة الله
ساقدم لك تعريفات بسيطة تساعدك على الفهم فارجو ان اتمكن من افادتك


بعض المصطلاحات:

الشوف
هي الرؤية الشرعية ..اي تروح نتا والعايلة نتاعك تدو معاكم قاطو وتشوف لعروسة بمرافقة محرم
تتكلم معاها وتعرفها بيك وتتعرف بيهااا
حط اليد
اذا عجباتك تمد الموافقة نتاعك ...وحنا عندنا امااا تمدلها خاتم او دراهم نتا ونيتك
الخطبة
الخطبة الرسمية كيما الشوفة برك يتم فيها مراسم اكثر مثلا تزيد البوكي دو فلور انواع القاطو وهدية
وطبعا عايلتك يعرفو كتر
كيفة تتم الخطبة وماذا تحظر في يدك وماذ تعطي للزوجة
كيما قلناااا الفوق ...تدي معاك خاتم الخطوبة وتمدو لامك او اختك تلبسو لهاا++ تعطي للزوجة زجاجة عطر + مصحف او ساعة +مصحف نتا ومقدورك
ماهي انواع الخواتم بالنسبة للرجل والمرأة
الخاتم المتعارف عليه يسمى لاليونس تلقاه عند الصائغ بالنسبة للمراة ويجي متكون من قطعتين
قولو خاتم خطوبة ونتا خير
اما الرجل فالخاتم المتعارف عليه هو الفضة تشتري العروس او انت ويجي بشكل محبس
المهيبة
هادي تعتمد على عادات كل منطقة احناا في الوسط ما عندناش السماطة هادي هههه يعني متلا مرة في عيد الفطر مرة في عيد الاضحى وكفى ++يدولها جبة او روبة او انسومبل
هل تذهب لزيارة خطيبتك في منزلهم ومتى هل في المناسبات فقط وهل تذهب وحدك ام مع والديك
نعم في المناسبات فقط وتدي معاك امك او اختك او كليهمااا وحتى جدة وخالة وعمة
وممكن في حالات تكون مقرب او صديق للعائلة تقدر تروح وحدك
تعليقة الشورة
ماذا تحظر الزوجة معها الى الغرفة ومتى
الزوجة تجيب كل جهازهاا من افرشة ..ملابس ...بعض الاواني وذلك يوم قبل تصديرتها في بيت اهلهاا
مثلا تزف بالخميس تدي حوايجها بالاثنين ههه
كيفية معرفة مبلغ الدفوع ومن يقول لك عن ثمنه المرأة في الهاتف قبل الحظور او الاب
المبلغ يقولك عليه المسؤول عنها والدها او اخوها
كيفية الفاتحة
كل منطقة وكيفاش في الوسط تروح العايلة نتاع العريس ماشي كل++يدو معاهم قاطو وهدية وايضااا
اهم عنصر الامام وما يطولوش
هل تحظر المراة لرؤية الغرفة ام لا
الاغلبية ما يروحوش سيرتو اذا كان راح تسكن مع العايلة اما اذا تسكن وحدها فيمكنها مرافقة عايلتها لتنظم شؤونها
كيفية تحديد يوم الزواج
يتم عن طريق اتفاق بين الزوج والزوجة متلا الزوج يمدلها الشهر ولكنها تختار اليوم
كيفية العقد في البلدية
قبل مدة مليحة من العرس تروح لمكتب العقد تطلب الاوراق اللازم احضارهااا وتقوم نتا والزوجة بكل الفحوص واستخراج الاوراق الضرورية
بعدها تاخذهم للبلدية باش يفيريفيوها وتدي موعد من اجل العقد وتروح مع الولي والشهود وتجي العروس مع الولي
ماهي الشهاداة الطبية اللازمة
يمكن استخراجها من اي مشفى

ماذا تفعل انت يوم الزواج اين تذهب وماهية احسن ساعة للدخول للقاعة
في فصل الشتاء الساعة 20.00
في الصيف على 21.00 الى 22.00
وكل منطقة وكيفاش++ كل قاعة وقوانينها

ما معنى الصبوح ومن يحظر فيه
في الوسط لا يوجد صبوح وانما فطور وقهوة المساء
متى تذهب الزوجة لزيارة اهلها بعد الزواج
بعد 20 يوم زواج

ماذا تنصحونني لكي اتجنب الناس الواعرة يعني السحارين حيث سمعنا عنهم كثيرا وانا ليس لي اي خبرة لكي اقي نفسي
- الحفاظ على اغراضك وترتيبها
- الحذر عند استعمال الحناء وعدم مشاركتها الغرباء
- الاذكار الصباحية والمسائية
- عدم التهاون في اداء الصلوات
- الاكثار من الدعاء
- التخلي عن الاغاني الماجنة والاكتفاء بالاناشيد والمدائح
- توكيل الله في كل الامور
بارك الله فيكم ان شاء الله تعم الفائدة لكل شخص اراد اكمال نصف دينه

ان شاء الله