حدث في أيام الجامعــــــة.......... - الصفحة 3

morad81 · 2012-10-05, 17:38

اقتباس:

المشاركة الأصلية كتبت بواسطة عميروش الحر

انا الحمد لله الاساتذة ما مداسرهم ما نعرفهم ما يعرفوني كاين لي يعطيني حقي وكاين طبعا لي ينقص وكاين لي يزيد .. مخليها لربي وخلاص .. ولكن في حياتي ما نتوسل استاذ نقولو زيدلي نقاط كيما يديرو الطلبة الاخرين ...

هاداك هو الصح وهكذا تتحرج متهني عى حساب لقرايا اللي قريتها .......شكرا عميروش

morad81 · 2012-10-05, 17:40

اقتباس:

المشاركة الأصلية كتبت بواسطة فلال باك

مازال ما بديت القراية في الجامعة...........الله يسلكها على خير......ان شاء الله.....

ماتتقلقش دير حسابك وقرا مليح على روحك وتوكل على ربي .....ربي يسهل

soha1987 · 2012-10-05, 17:42

انا كانت ايام الجامعة مليحة وجامي داولي حقي وانا كنت مانحضرش بعض المقاييس خلاص مي كونت نجيب فيهم نقطة كبيرة وخاصة فالعام الرابع مقياس الطاقة المتجددة ماحضرتش خلاص ربما 3 حصص لااكثر ولما يوصل الاختبار البروف ظل يشوف معابا قالي انتي تقري عندي قتلي هيه مسكين حار انا درت زوج وراقي تاع الاجابة وكي كملت قعد يقرا فيها وكي خرجت قالهم راهي جابتها واعطالي 16 مسكين ماكونتش نحضرو خلاص لانه ممل يهدر على روحو ودارو مزعج بزاف وانا من النوع المتخفي لااسئلة لاهم يحزنون غير نكتب ونخرج مايعرفوني مانعرفهم مي مشاكل صراولي مع لبنات المزعجات دارو فيا حالة فالاعمال التطبيقية حتى رفعت المشكل الى الاستاذ وبدلني من الفوج لانو شافني محقورة والله تحماو فيا في3بنات مايخليونيش نحكم الوسائل وهوما صديقات عمر المهم كرهتهم اما الاساتذة لا مشاكل معهم

morad81 · 2012-10-05, 17:45

اقتباس:

المشاركة الأصلية كتبت بواسطة سعاذ

السلام عليكم
الحمد الله انا قريت في الجامعة ماشاء الله الاساتذة تاعها معروفين على مستوى الوطن صح نقطة مانجيو نديوها بسيف كيما نقولوا مايديها غير لي يستهلها و جامي كان هناك تميز بين لبنات و ذكور.مشكلتي انا في الاختصاص تاعي انوا موديل لي ناس مايديوش فيهم انا كنت ماجوري بصح لي موديل لي ناس كانوا يعوضو بيهم انا تقريبا ندي اسوء العلامات
حجا لي مازلت تحرق في قلبي حتى الان انوا خطرى نرمالموا و الله اعلم استاذ غلطلي سيري كامل و انا نجري باش نشوف ورقة تاعي بصح ماشفتهاش صح في سيري 2 ديت اكبر علامة بصح بقات تحرق في قلبي علامة الاولى
و تاني كان عندنا استاذ لماجور لي يدي عندوا 5 و انا و صحباتي كنا ناوين نكسروا القاعدة مالهيتك سرنا ليل كامل و حنيا نقراو و نحلوا في التمارين و ذي المرة اولي لي مانرقدش غير ساعة و كي افيشلنا نقاط خيتكم دات 0.5 و من هذي العلامة و تجربة حلفت مانزيدش نسهر
و تاني انوا دخلنا نقراوفي 750 شخص من مختلف الولايات بصح كي تخرجنا كنا 150 شخص
دمتم في رعاية الله و حفظه

الحمد لله اللي كملتوا و هه سنة الجامعة ....انشاء اله راكم ملاح من بعدها...............شكرا سعاد

morad81 · 2012-10-05, 17:51

اقتباس:

المشاركة الأصلية كتبت بواسطة الواثق

بالنسبة لي لم اتعرض لاي استاذ سوى استاذ واحد في مادة الفيزياء الحرارية .........اخذت الاختبار الاول 2 من 20 فقلت الرترباج اكيد ولاني غير معتاد بالرترباج درت القلب قلت الاختبار الثاني نخدم ونشفا خرجت الكتب حتى باللغة الروسية وقديمة وقريت المادة حتى اصحابي يقولولي راهو جاء الترمو ديناميك تاعنا .........المهم فوتت الاختبار وخرجت فرحان وصدمت بعدها بالنتيجة 1.5 من 20 وقال لي الاستاذ راك حافظ الحل ؟؟؟؟.............فتخاصمت معه وهو استاذ معروف بتعنته وطرده للطلبة وقال لي حاسبني عند ربي الدنيا راك ماتقدرليش .......فقلت له الحساب عند الله اكيد ووكلت عليه ربي خرجت منهارا يومها ولكن بعدها بيومين ظهرت نتائج العمل المخبري وتحصلت على اعلى علامة وخرجت ذلك المقياس ب 5 من 20 وخرجت من النقطة الاقصائية ................كما ان هذا الاستاذ وضعني في حصة اعمال مخبرية لوحدي واختار بنتين ليعملا معي شغل زكارة والله المستعان

وكانت استاذة علم النفس تحب مناقشتي كثيرا واذا تغيبت تسأل عني وفي الاختبار بدون مراجعة نلقا 15 16 من 20 بالرغم اني نقدتها في كل مواضيعيها لكنها كانت طيبة وتحب الاراء الدينية اغلب زملائي يدو عندها تحت العشرة

والله هناك الكثير من الاساتذة روعة ..........وتذكرت استاذ مخبر الالكترونيك كاين اي واحد يغضبه يرمي المقاومات والوشائع في الطالب هههه وهو قبايلي الفرنسية والعربية والقبايلة جاملهم كامل ويهدر بيهم وارواح انت وفهمو

ذكريات رائعة

الله يكون في العون لكل التخصصات العلمية .........أخي الواثق صحيح الجامعة تجربة من تجارب الحياة ...لكن يست عادة بين التخصصات العلمية والأدبية .....نفس المعطيات لمختلف التخصصات .....يعطيك الصحة وربي يوفق في الحياة العملية

morad81 · 2012-10-05, 17:57

اقتباس:

المشاركة الأصلية كتبت بواسطة soriaalg

السلام عليكم للاسف هذي هي الجامعة اتذكر ايام الامتحان كنت نرقد على 12 ونوض على 2 صباحا كنت نرقد زوج سوايع برك ولما نستيقظ انزل لأتوظأ اجد بعض البنات مازالو يقصرو ويحكو ويلعبو كنت نستغرب ولما يجي وقت النتائج الحمد لله ننجح وكل سنواتي ب 2 كونترول وهم رغم استهتارهم لكنهم ينجحون كانت ديرلي علامة استفهام كبيرة في راسي
بالنسبة لاساتذة لي قراوني نعم فيهم هذا الصنف لكن الحمد لله ربي فكني منهم انجح بجهدي ولم احتاج يوما لهم حتى لي ما يعطينيش حقي يمدلي 10

الدراســــــــة في الجـــــــــامعة كبر عليها اربعـــــا

ملاحظة للاخ الواثق ههههه فكرتني في الترمو ديناميك + نقاطك تدل على انك قراي لانو ديت قاعدة في راسي وخاصة بالنسبة للشعب العلمية لي ما داتش اصفار في الجامعة مش قرااااااااااي

نتمنى تكون لقيتي الجواب للتساؤل نتاعك ......وكيف هي الأحال بعد التخرج ......شكرا لك على المشاركة

morad81 · 2012-10-05, 18:00

اقتباس:

المشاركة الأصلية كتبت بواسطة soso sirin

في الجامعة كاين شيوخة بزاف مايصلحوش و ولات عندهم النقطة تبزنيس و طريق يوصلهم للشي الي باغيينو.كاين ناس كنت معاهم و الله الباب تاع لونفي مايعرفوه وين جاي و كي نلقاهم مخرجين العام نتشوكا.انا الشيخ في حياتي ماتبعتوش و لا قتلو زيدني نص نقطة .انا قريت دويا على هكا كان لازم نجيب عامي نيشان باه نقدر نكمل ليسونس .وحد المصيبة قراتني انجليزية من زهري المليح ماحملتنيش ماعلاباليش علاه من نهار الاول كرهتني انا الصح ماقيمتهاش لانو علابالي قادرة نسلك راسي معنتها تبغيني تكرهني هذاك شغلها.في الافيشاج تالي لالة افيشاتلي 8 في الاختبار و انا خدمت مليح قعدت نحوس عليها نهار كامل و ماصبتهاش جراتني كيما الهم شقيت حتى للشيوخة الي قراوني و وصيتهم عليها غدوة منذاك تلاقيتها قتلها باغية نشوف ورقتني لالة واش تقولي ماتشوفيهاش هاذيك نقطتك قتلها من حقي نشوفها قاتلي امالا فوتي قدامي و بالزعاف تقول راهي تصرف عليا قلت ماعليش كي جابتهالي تحسب راهي تخرج البترول من حاسي مسعود قاتلي شوفتيها قتلها مديلي نموذج التصحيح باه نقدر نقارن قاتلي انا مانمدولكش قتلها و هاذي كيفاه قاتلي راهي قدامك الادارة و روحي تشتكي شفت فيها قتلها نقلك حاجة انا مانشتكيش لعبد لانو ماعندو مايديرلي مي روحي انتي سلكيها مع مول العبد ان شاء الله .قتلها و اذا بعينك على النقطة انا مانحتاجهاش لانو عامي راه خارج و الحمد الله و خارج بمعدل مليح.كرهتها ذيك الشيخة و الله مانسمحلها.اما الشيوخة الي قراوني والله الحمد الله الا كاين الي باين نيشان.وحد النهار كي هبلونا قتلهم كون غير روبو يولي يصحينا وراقينا على الاقل هنا نضمنو حقنا نيشان و بلا حاجات وخدخرى .

ماعليش يا سوس هذي تدخل في الخبرة .......و اليوم لازم تسمحيلها راهو فات الحال ...........ونقولك كاين اللي ابندوناو كامل لقرايا بسباب هذا لنوع من الاساتذة

morad81 · 2012-10-05, 18:06

اقتباس:

المشاركة الأصلية كتبت بواسطة رجاء الخير

وعليكم السلام ورحمة الله وبركاته
ذكرتنا بالذي مضى .. كانت أياما جميلة وكانت مشاغباتنا كبيرة ..
الحمد لله لم أتعرض لظلم من أي أستاذ سواء في نقطة أو معاملة ، لكني كنت مشاغبة كثيرة النقاش ، كان أحدهم يقول لي أنت مصيبة " أقول مصيبة من محقة أو من بلية ، يقول الاثنين " ، فإن شاء الله يكونوا هم راضين عني

ما عليش كل اللي فات يبقى ذكرى ونتمنى تكوني اليوم عاقلة ...وتكون اجتهادك بالأمس له فائدة اليم في مجالك ......رجاء الخير ...نرجو من الله أن يجعل فيك ومنك الخير

soriaalg · 2012-10-05, 18:14

اقتباس:

المشاركة الأصلية كتبت بواسطة morad81

نتمنى تكون لقيتي الجواب للتساؤل نتاعك ......وكيف هي الأحال بعد التخرج ......شكرا لك على المشاركة

السلام عليكم نعم وجدت الاجابة على تساؤلي والله العظيم عندهم الحق بعد التخرج كامل رانا كيفكيف لي لعب ولي بات ساهرا لي تخرج بمعدل كبير او لي طلع اعوامو كامل بالراتراباج عندهم الحق وتأكدت ان الجامعات الجزائرية مش محتاجة كل هذي الجدية لاو المستوى اصفار

بارك الله فيك على التعقيب شكرا لك

morad81 · 2012-10-05, 18:17

اقتباس:

المشاركة الأصلية كتبت بواسطة soha1987

انا كانت ايام الجامعة مليحة وجامي داولي حقي وانا كنت مانحضرش بعض المقاييس خلاص مي كونت نجيب فيهم نقطة كبيرة وخاصة فالعام الرابع مقياس الطاقة المتجددة ماحضرتش خلاص ربما 3 حصص لااكثر ولما يوصل الاختبار البروف ظل يشوف معابا قالي انتي تقري عندي قتلي هيه مسكين حار انا درت زوج وراقي تاع الاجابة وكي كملت قعد يقرا فيها وكي خرجت قالهم راهي جابتها واعطالي 16 مسكين ماكونتش نحضرو خلاص لانه ممل يهدر على روحو ودارو مزعج بزاف وانا من النوع المتخفي لااسئلة لاهم يحزنون غير نكتب ونخرج مايعرفوني مانعرفهم مي مشاكل صراولي مع لبنات المزعجات دارو فيا حالة فالاعمال التطبيقية حتى رفعت المشكل الى الاستاذ وبدلني من الفوج لانو شافني محقورة والله تحماو فيا في3بنات مايخليونيش نحكم الوسائل وهوما صديقات عمر المهم كرهتهم اما الاساتذة لا مشاكل معهم

أصعب شيء أنك تكون تعاني من مضايقات في مكان العمل او مكان الدراسة ...........

المشكل يا سهى في الناس اللي ماكانوش يحضروا و تلقاهم قبلك وما يعرفوا فيها والوا.....

أما النوع الي مثلك كاين بزاف لأنك يمكن ما تخضرش المحاضرة و تقرا في التطبيقية ....شكرا ...كيف هي الأحوال بعد التخرج

morad81 · 2012-10-05, 18:24

اقتباس:

المشاركة الأصلية كتبت بواسطة soriaalg

السلام عليكم نعم وجدت الاجابة على تساؤلي والله العظيم عندهم الحق بعد التخرج كامل رانا كيفكيف لي لعب ولي بات ساهرا لي تخرج بمعدل كبير او لي طلع اعوامو كامل بالراتراباج عندهم الحق وتأكدت ان الجامعات الجزائرية مش محتاجة كل هذي الجدية لاو المستوى اصفار

بارك الله فيك على التعقيب شكرا لك

عندك حق كل اللي تخرج كيفكيف كيما اللي سهر كيما اللي كان راقد .....

نتذكر في احدى المسبقات الشفوية قالي راك عرف كيفاش التنقيط قتلو ا لالالا قالي خسب المعدل الأخير .....عندك 10 نعطوك 0.5 عندك 11 نعطوك 01 المهم هكذا .....قتلوا أنا كنت نجيب العام في العام ماشي في الدياس و الراترباج .......قالي كيف كيف قتلوا لازم تطرحو هذا المشكل ...قالي انتوما طرحوه ....على جمعية الطلبة و التنظيمات .......قتلوا نظن أنت ما دخلتش الجامعة وماعندي كيفاش نفهمك....وخرجت.....شكرا

morad81 · 2012-10-05, 18:26

اقتباس:

المشاركة الأصلية كتبت بواسطة لينا الجنة

السلامعليكم و رحم الله

رجعتنا بالزمن الى الوراء و يا لها من ذكريات

اتذكر انه في عامي الاول استاذ الاحصاء رفض اعطائي العلامة لانني اقطن منطقة سياحية و رفضت ان اجلب له السردين بما ا ن منطفتنا مشهورة به و كان سابقا طلب مني ان اجلب له كمية و قت له " ماعدناش شالوتيي و لا اربور تجيبلنا السردينة " منذ تلك اللحظة وضعني في الخانة السوداء و كل نقاطي كانت 3 حتى في الامتحان مع انني انا م نقاف بحل الموضوع و ارسلته لكل الطلبة

اما باقي الاساتذة لم يكن لي اشكالا معهم

هو درس حقيقي حول الوضعية الحالية ....تجيب تدي ماتجيبش راك تمّ.........ربي يوفقك....ليناالجنة

شوق الجنة · 2012-10-06, 18:16

انا عن نفسى لم احبذ الجامعة من اول يوم دخلت لها والحمد لله لن ادرس بها لانى رايت فيها اشياء لا تروقنى من كل الجوانب

soha1987 · 2012-10-06, 20:18

اقتباس:

المشاركة الأصلية كتبت بواسطة morad81

أصعب شيء أنك تكون تعاني من مضايقات في مكان العمل او مكان الدراسة ...........

المشكل يا سهى في الناس اللي ماكانوش يحضروا و تلقاهم قبلك وما يعرفوا فيها والوا.....

أما النوع الي مثلك كاين بزاف لأنك يمكن ما تخضرش المحاضرة و تقرا في التطبيقية ....شكرا ...كيف هي الأحوال بعد التخرج

انا بين الخدمة والدار ولكن اجواء العمل مزعجة من المدير ياحفيظ على هاداك المدير المصيبة ونائبه الشرير لي ينقلو فالاخبار الى مجالس القعدة والتمنشير مع الزميلا استغفر الله والخدمة نتاعنا ماهيش خدمة بعقود الادمان هاديك وايام العطل نرجع لخدمة الكوزينة وحروبي المستمرة مع القدرة كل يوم باختراع ههههههههه خاوتي مرضو بليستوما ههههههه هي يومياتي بعد التخرج
شكرا اخي مراد

morad81 · 2012-10-07, 17:21

اقتباس:

المشاركة الأصلية كتبت بواسطة شوق الجنة

انا عن نفسى لم احبذ الجامعة من اول يوم دخلت لها والحمد لله لن ادرس بها لانى رايت فيها اشياء لا تروقنى من كل الجوانب

لكن فيها ما ينفع لمن أراد ....خاصة اذا كانت في مقر سكناك ......وكل واحد راه عارف اللي يوالموا ...شكرا