bon !!
بدات المغامرة من مكتب المدير ، بانلي عاقل بزاف لدرجة دخلني الشك أنه مدير
قلت بلاك راهو يمثل قدام بابا برك ، بصح كي راح بابا وخلاني وحدي ماتبدل والو
ديت عليه أول إنطباع : إنسان يخدم خدمتو بعقالة ( انطباع أولي فحسب )
المهم مدلي ورقة وقالي روحي للرقابة
قلت في قلبي ياعيني يا ليل ، راني في الثانوية لاول مرة يا سي ! وين علابالي بالرقابة تاعك
المهم خرجت من عندو وهبطت في الدروج وبديت نحوس في الادارة
الغاشي رايح جاي ، هاذو ورق ، هاذو ملفات ، هاذو مصنفات
وضع فوضوي بالكامل
وطبعا تفكرت القاعدة الاساسية في ايجاد الرقابة ومكتب المراقبين
تبعي السيل الازرق
وش هو السيل الازرق ؟
هوما الذكور يالي توخروا في الحضور و جاو يدو ورقة الدخول
المهم رحت نتما وعديت عشر دقائق وأنا نستنا
كي جا دوري بعتوني لوحد المكتب ، يالي بدوره شاف في الورقة يالي كانت عندي وعطاني زوج ورقات نعمرهم
تاع المعلومات و باتاتي وباتاتا
كي خلصت بعتني للمقتصد
المقتصد ؟ هنا لازم نتبع الاولياء ، رحت وفعلا وصلت للمكتب
بصح زاد بعتني لمكتب آخر ، خلصت حقوق التمدرس و مديتلها ورقة وجيت راجعة للرقابة
لقيتها فارغة !!!
خرجت من البيرو ورميت عيني منا ومن لقيتو في المكتب تاع المستشارين
ولقيتو يتضارب مع المستشار
ماحبيتش ندخل و وقفت قدام الباب
لقطت شوي كلمات من الهدرة ولقيتهم يحكوا هدرة على المدير هزها المستشار على المقتصد و قالها للمراقب يالي قاعد يدافع على المدير
>> اينشتاين ومايفهمش لحكاية
ههههههههههــ
المهم جاو انطباعات جديدة
المقتصد ( سامط وبياع )
المستشار ( على حقو يضرب بالفاس )
المراقب ( مايحبش المشاكل )
كي شفت الحالة مطولة ، طبطبت ودخلت
كي شافني المراقب قالو افري المشكل تاع الطفيلة ( سخيلت روحي قزمة )
ساع قالي أرواحي يا لفحة و بدا يسقسيني على معلوماتي وكي خلصنا طلعني للقسم
وحد المتاهة يا ستار ، في الطريق تلاقينا وحد الــjeune قالي بضحكة مرحبا بيك ، كاش ما تسحقي المستشار تاع التوجيه راهو جارك ودخل للمكتب ، أول انطباع لي عنه أنه شخص مرح زي فرح XD
كي جينا داخلين للقسم ، شفت السبورة ، قلتلوا هذا سنة أولى
قالي ايه ، قلتلو ديجا ولات السبورة جريدة ؟!
ساع قالي بضحكة : welcome to the high school
>> عييت
نكمل مغامرة القسم ممبعد
( تقرير عن مشاركة سيئة )، و الموجودة أسفل كل مشاركة .
2012-09-11, 21:37
العرض المتطور
