أجبيــــــني أيتها العفيييفة...

[مريم الصابرة]

المشاركة الأصلية كتبت بواسطة بن عمير 22

السلام عليكم ورحمة الله تعالى وبركاته...

أريد من كل امراة ان تجيبني بصراحة ودون لف ولا دوران اريد اجابات منطقية ....


لماذا ...تشترطين سكنا خاصا بك..؟ الم تكبرين في وسط عائلي مع والديك واخوتك...؟


حاليا ما تشرطت ما شرطو عليا مازال راني وحدي والحمد لله لكن لو ربي كتب الاكيد ما راحش نشرط داري وحدي اللّهم إذا كان مكتوب ندي راجل ساكن وحدو هناك امر آخر
المرأة تكبر في دار اهلها والراجل يكبر في دار اهلو حاجة واضحة علاه هو يتربى عند الجيران الراجل ايضا يدي الطفلة من دار والديها ويحب يرجعهم غرباء عليها ويمنعها عليهم هذي ما شفتهاش

هل ترضييين عندما تكبرين وتصبحين عجوزا لا تسطعين النهوض ان يتزوج ولدك ويتركك...؟

والله كي نكبر تزوجت راجلي نلقاه ويلقاني اما ولادي يعيشو حياتهم كان قامو بيا خير وبركة كان لالا راحا ندعي ربي يهنيهم وما نكونش انانية كل وقت ووقتو ومن حق اولادي يعيشو صغرهم كيما عشتو انا والشيبوخ نتاعي يبقى معايا نرفدو ويرفدني كان مات قبلي خير ومزية كان لالا رانا مع بعض حد وين ربي يدي امانتو ما تخممش بن عمير ختك مريم دير حسابها لحد وين تكبر
لماذا ... تشترطييين عملك رغم ان زوجك يوفر لك كل شيء...؟ هل هو الخروج للتنزه...؟


والله لو نتزوج محال ندي راجل يخليني نخدم وكل وحدة حرة إحترامي للجميع نحكي على نفسي لانو الواجبات هذي للزوج ماشي ليا لكن نقولوها بكل صراحة راجل يدي مرا يديرها فالدار ويقولك انا نصرف تلبس مرة فالعام تاكل ربع ماكلة تعيش ربع معيشة المرا محتاجة امور لو ما عندوش عذر الله وما واجبها توقف معاه لكن كاين عندهم وحارمين نساهم عليها المرا تحب تخدم تقوم بروحها وتشري واش تحب اما التنزه خبرني وين تتنزه فمكاتب العمل وين راهي اللي تحب تتنزه قاع العام صيف وشتا علاه نتوما رجال ما تتنزهوش يا حسراه إنتوما تزيدو منا تبداو تتنزهو

ام هي الظروف الاجتماعية الصعبة..؟ فقارينها بما عاشه اجدادنا واباؤنا...؟



نعم مرات الظروف صعبة يا بن عمير وليس كل من يلبس سروال رجل او يحترم المرأة بزاف داو بنات الناس وعايشين معاهم معيشة المر وهذا واقع كاين حقارين
وهل عقلية جدك زايد فال 1916 ليك إنت
رجال الماضي غير رجال اليوم وحتى النسا الزمن تغير لازم تفطنو من الرقاد


لماذا ...تصرخين في وجه والدة زوجك..؟اترضين ان تصرخ زوجة اخيك في وجه امك...؟


مازال ما تزوجت باه نصرخ في وجها وانا علاه نصرخ في وجها عندي السبع نتاعي نزهر في وجهو هي ما عندها علاه وما نوصلش إن شاء الله ليها
اما زوجة اخي لو عيطت على يمى وانا حاضرة كون هاني يجي يلقاها فالإستعجالات هذا كان لقاها

لماذا... تسمعين كلام ناس ولا تسمعييييييين كلام زوجك..؟ام انه حب التسلط...؟



ووعلاه فهمني الرجل متسلط دايما وما يسمعش لمرتو الزواج مشاركة الاكيد لازم المرا تسمع لكلام زجها لكن هو ايضا ماراهش متزوج كرسي او طابلة فالدار او آلة طبخ راهي شريطة حياتو يا اخي انا ندير معاه معاهدة نسمع كلامو يسمع كلامي ما سمعش ما نسمعش هذي هي لا تسلط لا والو ما يحقرني ما نحقرو دورها غربة ندورهالو نزوح ريفي
لماذا ...لا تصبرييييييييييييين ايتها العفيفة الكريمة مع زوجك ....؟ام فقد صبرك...؟

وشكون قالك المرا ما تصبرش يا اخي الواضح ما عندكش إحتكاك بالمجتمع او راك محاط بالمحبطين فالزواج عليها ما تزوجتش خوفوك
شوف اخي كاين رجال مرضى ونساهم قايمين بيهم ورافدينهم كاين رجال ماشي خدامين ونساهم باعو كل شي على جالهم
كاين نسا سكنو مع رجالهم فالقصب وللشتا والبرد والجوع وتحملو هذا واقع ما تقوليش ماكانش إنت ما تعرفش حنا نعرفو كاين رجال مسجونين ونساهم يربو فولادهم برا ويديلهم فالقفة
اما الراجل مرتو تسعل يروح يعشق عليها برا
تموت يا حسراه مولي من الجنازة يخطب
لو تتشلل يا حسراه يتبرى منها هذا واقع ويقولك هذا حقي وحقها هي وينو ما نغطوش الشمس بالغربال المرا فالامور نتاع الصبر افضل من الراجل بزاف

لك الخط ايتها الجميلة العفيفة

شكرا على الموضوع وما تقيسوش الامور بوحدة على كل النساء المجتمع فيه وعليه الناس عقليات ما لازمش كل مرة المرا هي اللي فيها كل الديفوهات لانو كالراجل كالمرا فيهم الصالح والطالح شكرا

[اسلام انس]

المشاركة الأصلية كتبت بواسطة مريم الصابرة

شكرا على الموضوع وما تقيسوش الامور بوحدة على كل النساء المجتمع فيه وعليه الناس عقليات ما لازمش كل مرة المرا هي اللي فيها كل الديفوهات لانو كالراجل كالمرا فيهم الصالح والطالح شكرا

كيف حالك اختي مريم ان شاء الله بخير وربي يشافيك ويعافيييييييييك يا رب

انا لا اعمم هي مجرد اسئلة وانتم تجبون ربما كثيرا مر بهذه الظرووووف

جزاك الله كل خير

[مريم الصابرة]

المشاركة الأصلية كتبت بواسطة بن عمير 22

كيف حالك اختي مريم ان شاء الله بخير وربي يشافيك ويعافيييييييييك يا رب

انا لا اعمم هي مجرد اسئلة وانتم تجبون ربما كثيرا مر بهذه الظرووووف

جزاك الله كل خير

السلام عليكم اخي بن عمير اهلا وسهلا بعد غياب
شكرا اللّهم آمين شكرا على سؤالك عني بلغني ذلك جزاك الله كل خير
اعلم انا اجبتك وهناك من مر وتمر به سواء رجل او إمرأة المجتمع فيه الراجل والمرا ومش المرا وحدها
ربي يجازيك شكرا