الرد على اهل المخطوبة؟؟؟

[سجل أنا جزائري]

المشاركة الأصلية كتبت بواسطة الفلة البيضاء

المهم انك رديت عليهم و طمنتهم و الرؤيا الشرعية هي مجال للخطيبين انه يشوفو بعضهم و تكون الراحة النفسية و ما حيرني انه الشاب بدت عليه علامات الاعجاب كان كثير النظر و كثير التبسم و تحدث مع الفتاة و اعطاها مبلغ من المال وقال "ماشاء الله" و قال"ماعندنا مانقولو ناس فاميليا" حتى وهو خارج من الباب زاد نظر اليها و كل هذا لم تعجبه ؟؟؟؟ اريد فقط ان اسالك هل يجب ان ترد الجواب بالسلب ام انك تطنش حتى لا تجرح البنت و اذا كانت اعجبتك هل حقا عندما يكون لك ظرف لا تستطيع الرد بالايجاب ؟؟ ارجو ان ترد على سؤالي و جزاك الله الف خير امممممممم لحظة سؤال اخير البنت الي قلت رحت وشفتها هل شكلها فقط الي ماعجبكش ام لها ميزات اخري كالتدين ولاخلاق والعلم؟؟؟؟؟ اسمحلي على الاطالة

طبعا لازم الرد مادام انا اللي رحت خطبت أكيد ينتظرو جوابي لمن في حالة كان الرد سهل لأنو كان كاين وسيط بيننا

لكن في حالتك نورمالمو حتى و هو حشم يوصوي امو ترد

- اثناء الخطبة ما تقدري تحكمي هل هو قابل او لا ممكن هو عجبتيه لكن بعد لما يخرج يتناقش مع أمو على حوايج ما قالوهملكش و مبعد يبدل رأييو
- لا لا انا سقسيت مليح في الأخلاق و الدين لكن ناحية الشكل لم ارتح لما رأيتها

[سجل أنا جزائري]

المشاركة الأصلية كتبت بواسطة الفلة البيضاء

نزيدلك سؤال هل كي شفتها مديتلها مبلغ من المال كاين الي يقولو حق الشوفة وكاين الي يقولو كي تعجبه يعطيلها مبلغ من المال

ايه عطيتلها انا ما كنش نعرف العادة هذي لكن ما قالوليش كي تعجبك برك مدلها

قالولي حق الشوفة


لكن شيء اللي حيرني ردو لي المال اللي عطيتولها

اذا عندك اسئلة اخرى تفضلي

[الفلة البيضاء]

المشاركة الأصلية كتبت بواسطة سجل أنا جزائري

ايه عطيتلها انا ما كنش نعرف العادة هذي لكن ما قالوليش كي تعجبك برك مدلها

قالولي حق الشوفة


لكن شيء اللي حيرني ردو لي المال بعد رديت الجواب

اذا عندك اسئلة اخرى تفضلي

شكرا اخي و لكن ما اضحكني انهم ردولك المال من الاصول مايردولكش ........افهم من كلامك انه حشم يقول ليماه توصللنا الخبر بالسلب ؟ هذا امر عادي وحتى البنت عندها الحق بالرفض......هو والد الشاب لما جا رايح سال والد البنت قاله كيفاه نديرو فوالد البنت قاله خليها للنساء هما يتفاهمو و هما ماداوش رقم هاتف والدتي عندهم غير رقم والدي ..........و والدته قالت كي نتلاقاو في وحد العرس ولكنها ماجاتش و صراحة هذا امر محير انها لم تاتي و مابانش كامل خبرهم..........كاين بزاف الي قالولي بالاك عندهم ظروف او انهم خلاو الرجال يزيدو يتفاهمه لانه مادام اعطاني مبلغ من المال وقال ماشاء الله انه راضي.............

[sarah1424]

ala hassb wech rani nchouf raki m9al9a bzffff
alr kalmouhom 9oloulhom rahom jawha khatabba okhrine
wech 9oltou??? mais koun jit f plaçtek wallah man9yamhom
l yebghik yejri alik whouma l lazem yrodoulk

[الفلة البيضاء]

المشاركة الأصلية كتبت بواسطة sarah1424

ala hassb wech rani nchouf raki m9al9a bzffff
alr kalmouhom 9oloulhom rahom jawha khatabba okhrine
wech 9oltou??? Mais koun jit f plaçtek wallah man9yamhom
l yebghik yejri alik whouma l lazem yrodoulk

ماردوش خلاص فهمت انهم ماقبلوش ماعندي مانديرلهم مانعيطلهم ما نحوس عليهم

[wawaa]

المشاركة الأصلية كتبت بواسطة سجل أنا جزائري

ايه عطيتلها انا ما كنش نعرف العادة هذي لكن ما قالوليش كي تعجبك برك مدلها

قالولي حق الشوفة


لكن شيء اللي حيرني ردو لي المال اللي عطيتولها

اذا عندك اسئلة اخرى تفضلي

اخي هل في الشوفة تلبس الطفلة الحجاب ام ماذا راني حايرة و اول مرة يجوني ؟؟؟؟
و هل يرى شعرها ام لا ؟؟؟
طرحت السؤال لانك رجل و نظرة الرجال تختلف عن المراة و حين يرى فتاة بالحجاب او العكس يختلف ............

[الفلة البيضاء]

المشاركة الأصلية كتبت بواسطة wawaa

في الشوفة اخي تلبس الطفلة الحجاب ام ماذا راني حايرة و اول مرة يجوني ؟

اختي انا قبل مايجي يشوفني حوست وسقسيت بزاف حتى اقتعنت و خليته يشوفني بدون خمار فقط و لكني سترت جميع بدني يعني لبست الطويل و لكن عندما ماردوش الجواب ندمت لانه حتى واحد مالازم يشوف زينتي و شعري و انتي زيدي سقسي

[مريم الصابرة]

المشاركة الأصلية كتبت بواسطة سجل أنا جزائري

ايه عطيتلها انا ما كنش نعرف العادة هذي لكن ما قالوليش كي تعجبك برك مدلها

قالولي حق الشوفة


لكن شيء اللي حيرني ردو لي المال اللي عطيتولها

اذا عندك اسئلة اخرى تفضلي

السلام عليكم خويا
ههههههههههه والله ضحكتني ربي يجازيك راني متأكد الطفلة لو لقات لو ضرباتك مش ردتلك الدراهم برك يعني إنت رفضت واش دير بدراهمك هذي عندها النيف نستعرف بيها ربي يوفقك اخي يرزقك اللي راك متمنيها موفق

[الفلة البيضاء]

واقيلة انا ثاني نردله دراهمه و الورد الي ولى يابس ههههههههههههههههههههههه و القاطو كليناه هههههههههههههههههههههههههههههههههههههههههههه

[مريم الصابرة]

المشاركة الأصلية كتبت بواسطة الفلة البيضاء

اختي انا قبل مايجي يشوفني حوست وسقسيت بزاف حتى اقتعنت و خليته يشوفني بدون خمار فقط و لكني سترت جميع بدني يعني لبست الطويل و لكن عندما ماردوش الجواب ندمت لانه حتى واحد مالازم يشوف زينتي و شعري و انتي زيدي سقسي

السلام عليكم اختي
انا لما تخطبت فالأول وهو جاري ربي يرحمو ما شافش شعري بقيت بخماري فالبداية كانت امو وخوتاتو عادي شافوني بلا خمار لكن كي جا هو درت خماري الشرعي طويل وشافني لأنو يعرفني وكل يوم يشوفني هو حب يقرعج برك لكن ننصح البنات المتحجبات ما تنحيش خمارها لانو خطيبي ربي يرحمو قالي هكذاك زدت كبرت في عيني لما ما نحيتيش الخمار وهذي نصيحة لكن ربي يوفقكن جميعا

[wawaa]

المشاركة الأصلية كتبت بواسطة الفلة البيضاء

اختي انا قبل مايجي يشوفني حوست وسقسيت بزاف حتى اقتعنت و خليته يشوفني بدون خمار فقط و لكني سترت جميع بدني يعني لبست الطويل و لكن عندما ماردوش الجواب ندمت لانه حتى واحد مالازم يشوف زينتي و شعري و انتي زيدي سقسي

ربي يصبرك و ربي خير و يجيك سعدك ان شاء الله حنونة ما تتقلقيش وماتعلقيش عليه امال انسايه خلاص و يجيك خير منو

[مريم الصابرة]

المشاركة الأصلية كتبت بواسطة الفلة البيضاء

واقيلة انا ثاني نردله دراهمه و الورد الي ولى يابس ههههههههههههههههههههههه و القاطو كليناه هههههههههههههههههههههههههههههههههههههههههههه

السلام عليكم
ههههههههههههههههه شوفي إستناي شويا ما ردوش خبر عيطلي نرجعهملو نقول شد وردك ودراهمك بنتنا مصلية وجايبة عمرة وحجة الله يبارك تتمنى تنال رضاها روح ربي يسهل عليك
لالا إستناي يا رب يا رب ما تعرفيش شعال راني نستنى يردولك الخبر إن شاء الله وتفرحينا وتسمعيني منا نزغرتلك

[الفلة البيضاء]

شفتي انا فرطت في خماري هاذي الي راهي غايضتني رجل اجنبي شاف شعري و الله واحدمايستهل يشوف شعري ضحكتيني ختي كي قلتي نقوله هاك وردك و دراهمك ههههههههههههههههههههههههههههههههههه زعمة كاين امل يردو خبر فاتت 15 يوم ؟؟؟؟؟ قوليلي انا بديت نفقد الامل لانه كاين الي يعيطولهم في نهارهم و انا خلاوني نحسب في الوقت ماشي حق عليهم

[مريم الصابرة]

المشاركة الأصلية كتبت بواسطة الفلة البيضاء

شفتي انا فرطت في خماري هاذي الي راهي غايضتني رجل اجنبي شاف شعري و الله واحدمايستهل يشوف شعري ضحكتيني ختي كي قلتي نقوله هاك وردك و دراهمك ههههههههههههههههههههههههههههههههههه زعمة كاين امل يردو خبر فاتت 15 يوم ؟؟؟؟؟ قوليلي انا بديت نفقد الامل لانه كاين الي يعيطولهم في نهارهم و انا خلاوني نحسب في الوقت ماشي حق عليهم

السلام عليكم اختي
راني حاسة يكون الرد عن قريب بالإيجاب إن شاء الله تفائلي خير ودعواتي ليك يا رب تفرحي وتفرحينا يا رب إن شاء الله
ما تتقلقيش كاين يطولو شوية لكن اكيد يردو خبر إصبري ودعي ربي موفقة
وي كان ما ردش وجديلي دوزانو نرجعهملو

[الفلة البيضاء]

انتي دايما هكذا تبعثي في قلبي الاطمئنان و الصبر اختي سارة ربي يعطيك ماتتماناي بالصح علاش مانتفاهموش انا وياك على الدراهم مانعطوهملوش و نتقاسموهم و نشرو بيهم مصاحف للمسجد هكذا راني ناوية اذا ولاو نشري مصحف ليا وليه واذا ماولاوشنشريهم مصاح للمسجد لعلها تكون صدقة مقبولة