اللي حاكمة مصروف الدار تتفضل معانا

[موجو جوجو]

المشاركة الأصلية كتبت بواسطة بنت الجزاير الغالية

شوفي أنا راح نعطيك تقسيمي بصح ما نعرف يعجبك أم لا
يا ختي إنت راكي تبني و جايك بيبي حاولي تنقصي هالفليكسي و ها القازوز و غيره باش تقدري تبني و إلا دراهمك كاااااااامل تروح في الماكلة و الشراب
بالنسبة للفاردو تاع الما إشري هذاك الماء الطبيعي تاع الفراك تاع البوادن يشدلك أكثر و أرخص في الثمن
و للقازوز و العصير إشري فاردوات من اللوزين يحسبهالك أرخص إشري 4 للعصير 2 و للقازوز 2 تجيك ب 200 ألف و زيديها 50 ألف للماء هاذوم 250 ألف و 750 ألف إشري بيها الريفيطايمة اللي تحتاجيها هك قفلنا مليون و مليون خليه غير للحوم حطيه في ظرف واكتبي عليه لحوم بشرط ما تفوتيش مليون راه بزاااااااااايد هذاك المليون راه شهرية ناس أخرى يشرو منه كلش المهم ما تفوتيش مليون و المليون الثالث خليه للياؤورت و الحليب و الفورماج و غيره هك 3 ملاين و زيدي 2 ملاين و نص للطوموبيل ولات 5 ملاين و نص و 200 ألف فليكسي إنت 100 و هو 100 يعطوكم القراطوي ديرو بيه هك 5 ملاين و 700 ألف تبقالك مليون و 300 ألف من شهريته إذا راهي 7 ملاين و إذا 8 ملاين تبقالو 2 ملاين و 300 روحي وجدي بيها حوايج البيبي
و أما شهريتك حطيها على جنب سواء تبني بيها أو لأي ظرف طارئ
و إن شاء الله تعجبك طريقتي

بارك الله فيك
لالا عجبتني و راكي عطيتيني فكرة
بصح نزيد نصمط عليك باش تعاونيني شوي
راني درت شوي حسابات
و شوفي نتي و رايي عليا
فالشهر:
5 بوادن ماء 55دج * 5 = 275دج
4 فردوات عصير ifruit القرعة ادير 150دج، و بالفاردو نحسبوها 140 دج * 6= 840دج، * 4 فردوات = 3360دج
2 فردوات قازوز coca cola القرعة 110دج نديروها بالفاردو يحسبوها 100دج * 6= 600دج، 2 فردوات بـ 1200دج
رافيتايمو درتو 5000دج. قوليلي واش نجيب فيه
ياغوت و فرماج 5000دج
خضرة 1000دج كل أسبوع، الشهر 4000دج
ديسار (فواكه) 3000دج كل شهر(نقولو فيه التمر400دج.موز 200دج. تفاح200دج كل اسبوع)
لحم 10000دج
فليكسي 2000دج
طونوبيل 25225دج

المجموع: 59060دج
هكدا نفضل مليون الشهر لي تجي قيه 7، و 2 فالشهر لي تجي فيه 8. و الشهرية تاعي مخبية
مليح
و كي تكمل الطونونبيل ان شاء الله نولي نصرف حوالي 34000دج
و نفضل تان للعقوبة


بارك الله فيك و ربي ينورلك طريقك كيما راكي تنوريلنا طريقنا

فقط اعطيلي لائحة الرافيتايمو