السلام عليكم وكيفاه راكي اختي ان شاء الله ماتكونيش زعفانة عليا برك واسمحيلي راه دخولي للمنتدى اصبح محدود جدا بسبب ظروف
المهم اختي راني حاطة وصفة المخبز في المنتدى وشرحتها على قد مانقدر ان شاء الله تكوني قريتيها واذا ماقريتيهاش نزيد نشرحهالك ماشي مشكل
اول شيء جيبي اللوز تاعك نظفيه بفوطة مشمخة شوي ونحيلو الغبار وممباعد اقليه شوي برك وحاولي ترحيه ملييييح مليح وكل مرة غربليه وزيدي ارحيه حتى يولي كي الدقيق كيلي 3 كيلات لوز مع كيلة سكر عادي ومن الاحسن تعملي نص كيلة برك هكدا قراونا فيه بصح انا نحب الحلاوة نعمل كيلة سكرونزيد معاهم زاست ليمون اصفرلانه يعطي طعم احسن من اليمون الاخضروكذلك لان العجينة من المفروض تجي صفراء وحطي معاهم 2مغارف سمن لانه يطري العجينة و2مغارف معجون مشماش هو ايضا يعطي طراوة للعجينة ومغرفة فاني وبيض حسب الحاجة
اول شيء تخلطي السكر والزاست والمعجون والسمن وتدعكيه مليح ثم اضيفي البيض وللامانة اختي في الدرس نحطو بيضة و2 صفار باه العجينة تجي صفراء بصح انا نحط بيضة وصفار واحد برك ولك الاختيار وكملي خلطي ثم اضيفي اللوز وشوفي واش تزيديلو بيض وكيما قوتلك بيضة و2 صفار او بيضة مع صفار وخلطي واعجنيه مليح باه يذوب السكر بس انتبهي لازم العجين يكون حاكم روحو ماشي مطلوق خليه يريح او اعجنيه في الليل والصباح شكليه وشكليه بالنشاء فوق صاشي واطبعي بالمول اللي حبيتيه فوق صاشي ايضا باه الحبة تجي بومبي والحواشي معدولين وتقدري ترفدي الحبة من غير ما تفسدلك وحطيها في سينية مفرشة بالفرينة وسمك الفرينة يلحق حتى 3 الى 4 سم وخليه ينشف ويحكم لافورم مليح ممباعد دخليه للفور وطيبيه من 10 الى 15 دقيقة برك على درجة 180 درجة للفور تاع الغاز اما تاع تريسيتي من 130الى 140 درجة ومالازمش يحمار وممباعد خليه يبرد وشوفي اذا حبيتيه يجيك طري زيدي عسليه واذا ماتحبيش ديريلو القلاصاج اما المقروط لازم يتعسل وسكريه بالسكر قلاص مرتين المرة الاولى عسليه واغطسي الحبة في السكر كااامل وخليها مدة 10 دقائق وممباعد حاولي تنزعي السكر الزايد وزيدي سكريه للمرة الثانية في سكر نظيف ممزوج مع الفاني وكذلك اعدلي الحبة مليح ونحي الزايد وفي الاخير اعملي السكر في الصفاية وذرذي من الفوق ورشي عليه ملمع
واذا حبيتي تلوني السكر ويجيك مقروط ملون ديري شوي سكر وزيديلو الملون اللي حبيتيه وزيديلو شوي ماء الزهر وخلطي مليح ثم ابداي تزيدي في هاداك السكر الملون للسكر الابيض وادعكيه مليح بين يديك وكل منين تشوفي اللون تاعك ناقص زيدي من السكر الملون وكي تخلص وتتحصلي على اللون المطلوب غربليه بغربال رقيق وخليه ينشف على الاقل يومين ووقت الاستعمال زيدي غربليه واضيفيلو الفاني اما القلاصاج راح نمدلك القلاصاج تاعي وجربيه وصدقيني راح تدعيلي
اعملي كيس ونص سكر قلاص المرجان وزيديلو 500غ فوندون بعد ماتكوني وضعتي العلبة في حمام مائي باه يتطلق شوي وزيدي معاهم عصير قارص حق ماتجمعي العجين وتتحصلي على كرة سكر ممباعد اعجنيها ملييييح وزيديلها كاس الا ربع زيت وماتحطيهش في مرة لا زيدي الزيد واعجني وزيدي الزيت واعجني حتى تخلصي كل الكمية انزعي جزء من العجين وزيديلو الفاني وعطر اللوز والسكر واستعمليه لتشكيل وردات او ورقات للتزيين وراهي تبقى طرية ماشي كيما المشرية ثم نرجع للجزء اللي قعدنا هدا نضيفلو بياض 3 بيضات ماشي مضربين وراهي تبدى تتطلق وباه تزيدي تطلقي العجين زيدي شاربات ثقيلة شويحتى تتحصلي قلاصاج مطلوق وماشي بزاف يعني تقدري تغطسي فيه الحبة ومايطيحش واذا حبيتي حطي حبات القاطو تاعك فوق شباك تحتو صاشي وارفدي القلاصاج بالمغرفة وضعيها فوق حبة القاطو هادي طريقة نظيفة وسريعة واللي يسيح من القلاصاج راح تلقايه في الصاشي عاودي نحيه وخلطيه مع القلاصاج اللي قعد
اتمنى اني نكون افدتك اختي واسمحيلي على تاخري في الرد واي استفسار اواي وصفات اخرى راني في الخدمة
( تقرير عن مشاركة سيئة )، و الموجودة أسفل كل مشاركة .
2013-02-04, 11:00
عاجل للاخت nousa 06و zineb- saib بخصوص المخبز
العرض العادي
