حسبي الله ونعم الوكيل ,انصحوني جزيتم خيرا,

[Studdy]

السلام عليكم

عذرا على التطفل

اخي مروان الحمد لله انه قد تحسن حالك يا رب تكمل هاك

في الحقيقه حبيت نوجه ردي الى وئام

للاسف ماعنديش بزاف الوقت للاسف راكي تعرفي لكن كي قريت و الله حسيت بيك و ماحبتيش نبخلك كيما نتي مابخلتي عليا بوالو ربي يرضى عليك

ختيتي ركزي معايا
انا دخلت المنتدى اواخر مارس افريل و ملي دخلت نشوف ردودك نقول ماشاء الله البنت هادي متهليا في قرايتها عملك منظم الله يبارك و زيد كريمه درتي خير كبير و اني متاكده انك اجتهدتي

و ماتقوليش مادرتش هادي و تهاونت في الفتره هادي الخ لانها صارتلنا كامل الكمال لله انا وحده و الله و الله فطنت كي دخلت للمنتدى

كنت نقرى قيس قيس لكن بعدها فطنت
للاسف شويه متاخره كان مستواي كارثه الرياضيات ابسط الامور مافهمتهاش اومبعد كي قررت ندور ليها خليت العلوم لي كنت هايله فيها ضاعتلي من يدي دركا ندمت شويا
الفيزياء دائما كانت نقطتي السوداء لكن الحمد لله عندي استاذ بدا معايا من الصفر

المواد الاخرى تصدقي قبل حوالي شهر ماكانش على بالي شكون خروتشوف و بلغانين و كيفاش صار الاتحاد الاوروبي و حتى تفاصيل الثوره لي قريناهم من الابتدائي نسيتهم على الجال استاذ ما يستحقش يتسمى استاذ لكن ربي يسامحو إن شاء الله

فرنسيه و انجليزيه الحمد لله دائما متفوقه لكن هاذ العام اهمتهم

و خلي و خلي

حكيتلك هاد الشي باش نقولك انو حالتك مستحيل تكون اسوا من حالتي و الله ههه و نزيدلك انا لي سبقولني في عائلتي في الباك ماكاش لي جاب تحت 16 يعني اتصوري الصراع الداخلي و الظغط لي راني فيه

و نزيدلك جبت البيام ب 17 و الآن راني ندور في 13 ايضا مانحكيلكش احتقار النفس لي وصلت ليه و و و و

خلي و خلي
و كي نشوف الوالدين تغيدهم نفسهم كي يشوفو نقاط مايعجبوش لوكان نلقى الارض تنشق و تبلعنييييييييييي

و حالتي المرضيه،، و الصدقاء لي خلاوني في اصعب اللحظات

شفتي هادا كامل؟ شفتي؟ مالا نقولك مع هذا قاع مافقتش الامل

و ماراحش نفقدو
و الباك نجيبو و معدل مليح

نخلع قاع لي شككوا في قدراتي
و قاع لي ستشفاو كي طاح المستوى تاعي

و نشرف والديا
و نفرح لي دارو ثقتهم فييا

و نسترجع عزه نفسي

هاذي هيا ختي امسحي عليك هاذوك دموع الهم و نوضي تقراي واجهي صعوباتك ماتحسبيش شحال مازال قولي انا راح نلحق نكمل و نخدم مليح و بس

آسفه اذا كان التدخل تاعي في غير محلو و اذا زدت عليك بمشاكلي هه ماشي هذا المقصود لكن برك باش نقولك بلي كاين لي كثر منك لكن مازال واقفيين هه

بالتوفيق