لنتشارك تدابيرنا و تنظيفاتنا اليومية في بيوتنا

[ام مرية]

السلام عليكم ورحمة الله وبركاته
هاني رجعت كيما وعدتكم نحكيلكم مسلسل الميناج

الحلقة الاولى
نبدى مني شفت البيت نتاعي من داخل يعني داخل الخزاين و البلاكرات و اليزينيمو والبيبيوتاك الخ الخ..................اول شي عملتو زعفت على روحي شوية وعيطت عليها ومن بعد عملت ليستة بكامل العمل الي راح نقوم بيه بشكل منضم ومرتب يعني كل يوم نخدم حاجة ما نخلطش كلش معا بعضاه ورحت رقدت بكري باش نوض بكري
الحلقة الثانية
نضت بكري صليت وقريت الاذكار ورحت عملت فطور لزوجي وبلعت الباب على مرية باش ماينوضها الحس وتهبلني تحب تخدم معايا هههه ب سميت بسم الله و بديت اول شي بغرفة نومي فرغتها من القش كامل خليت غير الخزانة وحطيت طابلة في الوسط وبديت نخرج القش الي فيها ووضعتو في غرفة اخرى وسحبت الخزانة غير بشوية ونضفت من وراها ومن داخل وعلى اللجناب وعملتلعا دورة بالبونيش كامل ساير داير ومسحت من وراها ورجعتها لمكانها ومن بعد مسحت المرايات ديالها وسحت االارض وخليتها تنشف ورحت طبقت كامل الحوايج وحطيت كل مجموعة على حدى مثلا الجبات بجيه والتنانير بجيه حوايج شهريار بجيه على فكرة انا مسميا راجلي شهريار ما نعرف علاه هههه وهكذا نضمتهم باش يجوني ساهلين في الترتيب رميت الي رميتها وخليت الي تصلح وما لقيتش حاجة تحتاج للخياطة من بعد رجعت الطابلة في نص الدار كي نشفت وعطرتها وبديت نحط عليها الحوايج بالترتيب الي عملتولهم حطيت التلايق على ليطاجور وديت القدم للغسيل وبديت نحط الحوايج بالترتيب جيهة لراجلي وجيها لية وجيهة للدراوات والشورات وهكذا والملابس الي تحتاج تعليق علقتهم وبلعت الخزانة ورحت للكوافاز التسريحة نفضت القجور ورميت الي تترما سيرتو كي مرية جايينها ساهلين غير تشك فيهممن بعد مسحتهم بالخل ومن بعد البونيش ومسحت المراية رجعتو لمضربو وبدلت لي نابرو وحطيت اخرين وهذوك الى الغسالة وشبحتو بالي قارني تور...راكم تعرفو ...ورحت للي تابل دينوي عملت معاهم نفس الشي ورجعتهم كيما كانو وسرير نفس الشي وحطيت الماطلة في بلاستها وغيرت الدراوات والكوفرولي وديت القدم للغسيل ونفس الشي للمخايد وحطيت زربية صغيرة في الالوصط وبلا ما ننسا نضفت الثرية ورشيت عطر على المصابيح وكذلك عملت مع الفيوزات من بعد بخرت الدار بعد ما غلقت النوافذ النو البرد قتلني بصح نستاهل

الحلقة الثالثة
بيت القعاد او كيما تقول بنتي بيت الميكرو هههههههههه هادي جاتني ساهلة مسحت المكتب ديال الميكرو وسيقت الدار ورجعت الميكرو فرشت فراش خفيف وتوجهت لبيت مرية كذلك ساهلة فرغة الخزانة وعاودت طبقت الحوايج ومسحتها مليح رجعت الحوايج ورفعت الفراش وغسلت الي تتغسل منو مدرتها تنشف ومسحت البيت وخليتها تنشف ورحت عملت الفطور وفطرت انا وزوجي ومرية غسلت الماعن ورجعت للعمل فرشت الدار ورجعت قش مرية والعابها في مكانهم وهي راحت تقيل في بيتي مع باباها و توجهت للبلاكار نتاع الحيط كي لقيت روحي مانيش عيانة حطيت القش وطبقتو وخليتو بجيه ومسحتها من داخل ومن برى ورجعت الفراش فيها وغلقتها وسقهويت ورحت انريح والعشى كاين من الفطور

الحلقة الرابعة

وهي اهم حلقة لاني لحقت للمطبخ لي عودة ان شاء الله راني عييت غير من الهدرة هذاك الشغل ما نعرف قاع كيفاش خدمتو ههههه