انا هنا في خدمتكم اصحاب البكالوريا

[المُعادلة الصّعبة]

المشاركة الأصلية كتبت بواسطة same_one

ربي يخليك ان شاء الله
ريان خصني كامل سلاسل الاستاذ مصطفاوي
و الفيزياء راني ضعيفة بزااف جبت 14 بغيت نسقسيك شكون هو الاستاذ لي تبعتي معاه في اليوتيوب
كاش ملخصات عندك في الميكرو فيما يخص المواد الأدبية ابعثيهالي كامل تعيشي
ولا ديري موضوع و طلعي فيه قاع واش عندك منها قاع نستفادوا
ريان مش معولة تعاودي !!واش كنتي حابة ديري صراحةةة

طيب اسيل ضرك نبعثلك السلاسل على الخاص
انا الفيزيا اذا قريتي الرد تاعي في هذا الموضوع قلت باللي اجتهاد شخصي في المنزل بمعونة ربي طبعا
تابعت استاذ شريفي جميع فيديوهاتو وانا ننصحك بيه والله رائع وماتندميش كي تبعيه
وكي تبعيه خصصي كراس تكتبي معاه وش يكتب كامل

حتى الملاحظات الصغيره هاذيك لي يقولها بالدارجة ديري شكل سحابة بلون فاتح واكتبي هذيك الملاحظة
ومبعد كي تكملي تتبعي معاه الدرس لازم تعاودي تراجعيه وحدك باش تتثبتلك المعلومه راجعيه حبه حبه خطوة خطوة ولو جبتي معاه يوم كامل المهم انك تفهمي

صاحا كي تكملي لازم تروحي تشوفي التمارين تاعو والحل تاعو اكتبيه لانو تمارينو رائعة
كي يحل التمارين تكوني ديجا عندك فكرة كبيره على الوحدة هذيك

ديجا انتي هذي المرة الثالثة لي رح تجوزي الباك عندك مكتسبات قبلية معتبره
و ماتنسايش الاسئلة الشائعه لي حطيتهم هذا العام صدقيني يعاونوك ياسر

ومبعد كي تحسي روحك فهمتي الوحدة ابداي بالتمرينات تاع المغني حليهم
كي تلقاي فكرة جديدة اكتبيها في كراس خصصيه للافكار -انا درتها ونجحت معايا بزاف الحمدلله-
لقيتو في اخر العام لقيت فيه الافكار لي جمعتهم من بداية سبتمبر
وللاسف نهار الباك كنت مضغوطة قطعت منو الاوراق الاخيره باش نكمل نراجع في الطريق وفي القسم
الوقت لي بدا الاختبار مديتهم للاستاذة لي تحرس حطته فالبيرو وكي جيت خارجه نسيت نرفدهم والله غاضوني حسيت تعبي راح و انا كنت معولة نصورهولكم
المهم نصورلكم الاوراق لي بقات فيه
المهم دوني الافكار لي تلاقيتي بيها جديدة
وتحاوري مع روحك
مثلا غلطتي في تحويل ولا كاش عفسه ؟ اكتبي في كراسك هكا مثلا : يا اسيل لازم التحويل في الوحدة الفلانية يكون كذا وكذا لانو الغلطه هاذي تكلفك الكثير يا اسيل وممكن تبعدك على النقطة الممتازة
اهدري مع روحك وركزي على اخطائك وين جاية ؟ كي تحلي تمارين شوفي اكثر حاجه تغلطي فيها باه تصححيها واكتبيها في كراس بلي انتي عندك اشكال في الحاجه الفلانية و مالازمش تبقاي تغلطي فيها فهمتيني ؟
وحلي البكالوريات وديري نفس الشي لي قلتلك عليه
اصلا الهدف من حل التمرينات هو انك تعرفي افكار جديدة وانك توالفي على طريقة طرح الاسئلة و انك تعرفي اخطائك و تصححيها
انا الفيزيا قريتها اكثر من جميع المواد وحبيتها حب صادق
جبت 17 ولكن كان بامكاني نجيب 19 نقلك علاش ؟

لاني بديت في الموضوع الاول لي هو جاني سهل سهل جدا يعني اقل حاجه نجيبها 19

بديت فيه وكلش ومبعد فاتت ساعه رحت بدلت الموضوع رحت للي جاني صعيب بسبب سؤال !!
والسؤال هذاك لي بدلت على جالو الموضوع كي صححوا قالوا بلي حذفوه .. يعني حليت موضوع الصعيب وخلطتو بزاف صدقيني خلطت خلطت خلطت والتوتر والخوف اكي علابالك بالحالة موضوع صعب + الوقت فاتت منو ساعه + تردد في تغيير الموضوع والحمدلله جبت 17 رغم اني كنت قادرة نجيب الاكثر ولكن الحمدلله

لا مانيش معولة نعاود
والله ماكنت دايره في راسي والو صدقيني اسيل ماكانش عندي هدف محدد ما بعد البكالوريا لذلك وقعت في اشكال كبير وقت التسجيلات بقيت مترددة ودرتلهم مشاكل فالدار ههههه قلتلهم مانيش حابه والو خلوني نقعد فالدار احسن

كان هدفي المعدل الكبير في البكالوريا كيما قتلك ولكن ماجبتوش لحكمة بالغة لا يعلمها الا الله

الحمدلله