الجزء 63 من واش طيبتي اليوم تزامنا مع عيد المراة

[إلهام07]

وصفة معجون التشوينة

كيلو تشوينة غسلتو مليح ونقيتو من الريش و ساعات نلقى حبات فاسدين نرميهم
ونحكم كل حبة نثقبها 3 او 4 ثقوب بـالكيردان ( عود الأسنان ) ونحطهم في إناء ونصب عليهم ماء ونخليها تبات وكل عدة ساعات نبدللها الماء باش نتخلص من المرارة نتاع القشرة


في الغد نصفيها من الماء ونوزنها ( لانو الباعة ساعات يغشو في الميزان العام اللي فات شريت كيلو كي روحت وزنتو لقيتو 800غ فقط )
لكل 1كغ نستعمل 800غ سكر عادي
نحط التشوينة في كوكوط مع 1 لتر ماء ونغلق الكوكوط ونخليها طيب راهي ماطولش منين دور السفارة نحسب حوالي 15د المهم حتان تطرى القشرة ماشي ترجع روينة
نحل الكوكوط ونحط السكر ونحرك برفق حتان يذوب السكر ونزيد شوية فاني وممكن اللي يحب ينكه ببذور anis ( نجم الارض ) كل واحد واش يحب
ونخليها تغلي على نار متوسطة حتان تعقد
كيفاش نعرفها طابت :
نهز شوية سيرو ونحطو في صحن صغير ونحطها في المجمد تبرد مليح ونشوف إذا عملت خط في وسط السيرو بإصبعي والخط هذاك ماتغلقش بسرعة معناها راهي واجدة نطفي النار
راهي ماتديش وقت بزاف ثم ثم يوجد راهو أسهل معجون درتو في حياتي مايطلب لا جهد لا وقت

كل ماطول وهي تغلي يتحول اللون من أصفر فاتح إلى عسلي أنا نحب اللون العسلي وأيضا كي تخليوها تعقد بزاف ترجع القشرة نتاع التشوينة مكرملة
هذا المعجون راهو بنين وحامض بالنسبة ليا هو المفضل في كل الانواع نستنى التشوينة من العام للعام باش نديرو وناكلو
* ملاحظة : إذا تحبو السيرو يجيكم ثقيل بزاف كي يبرد وقوامو كيما لا جولي زيدو 1شريحة او 2 نتاع ليمون ولازم الليمون يكون فيه بذور
في هذه الحالة ممكن تحتفظو بالمعجون خارج الثلاجة ومايصرالو والو لانو بذور الليمون فيها مادة حافظة تحفظ المعجون من التعفن



بصحتكم مسبقا