دراستي اين المسار

[مشكلتي]

السلام عليكم عندي امر حبيت نسقسيكم فيه عل و عسى تعاونوني بآرائكم ربي يجازيكم
المهم انا طالبة نهائي جوزت امتحان البكالوريا علوم تجريبية في تندوف مكان اقامتي مع عائلتي المهم انا ان شاء الله معولة على معدل مليح لاخاطر خدمت غاية المهم. كانت امنيتي نقرا طب و الآن تراجعت عليها لاخطر راكو عارفين شقا تاعه والمشاكل هدوك قاع.
المهم بطلت منه بارادتي لكن الى الآن مانيش عارفة واش من تخصص ندير
المهم حلت الجامعة هنا في تندوف و بالطبع والدي الحوا علي اني نقرا فيها لكن فيها غي ثلاث تخصصات: اثنين للأدبيين و الجيولوجيا للعلميين. ماما تخاف علي بزاف وانا ترجيتهم باش نقرا يا لوكان غي في بشار حدا أهلي عند جدودي لكن المشكلة خوالي معقدين مايبغوش البنت للي تتحرك تدخل وتخرج وماما ماهيش حاباني نسمع كاش كلمة من عندهم وهادا علاش ماهيش مخليتني نقرا لهيه.
الحقيقة هاد العام كان عندي استاذ مخير وشجعني بزاف باش ندير تخصص مخير لكن كي قلتلو غاديا نقرا هنا رفض رفضا تاما و قالي حكي معا والديك واذا ماقنعوش عيطيلي نقنعهم لكن انا مانيش حابة نحطهم في موقف محرج.
راني حيرانة بزاف نشوف صحاباتي كل واحدة واش باغية دير وانا نلقا روحي غي هنا رغم ان مستوايا علي بزاف بدون مجاملة وخايفة كاش ماندير تاني نصر على والدي نروح نقرا برا تندوف يتقلقو و خاصة ماما.
عاونوني بآرائكم ربي يجازيكم
شكرا