لماذا ترفضين ابني ؟؟؟؟؟؟

[جسور المحبة]

السلام عليكم والله يا جماعة راني في حيرة ما بعدها حيرة وسادخل مباشرة في الموضوع
في شتاء العام الماضي تقدملي واحد من جيهتنا ونوعا ما عندهم قرابة بالعايلة تاعنا بصح مش نفس العايلة ورفضتو لاسباب تخصني وبعدما انهيت دراستي الجامعية عاود بعث يماه ورفضت وبعدها بفترة كانت تجي يماه لدرانا لامي ومرات نتصادف بيها في المنزل انا نقولها السلام واحيانا لما تشوفني ما تحبش حتى تقولهالي رغم انها في بيتنا وانا نطول بش نقولها وغير بش نتاكد وصح ما تقولهاش ونقولها انا ونحسها تكرهني والحمد لله ما عندي حتى مشكل مع الناس وسمعتي مليحة وبعدما تزوج بنها ولات عادي تهدر معايا

وقبل رمضان خطبني واحد من عايلتي ورفضتو لانني اكره زواج الاقارب اولا ولضروفي الخاصة ثانيا وتخيلو اليوم تلاقيت بامو وقتلها السلام ما ردتش ونفس الشي تكرر لعشية زوج مرات وانا نقولها فيها ماحبتش ترد وهي امامي مباشرة وقريبة ليا صراحة تشوكيت وما فهمت والو راني حاسة روحي كائن غريب عن الارض واول مرة نتعامل مع بني ادم

نتمنى تفسرو لي هذا الشي خاطر مخي راه تبلوكا وقلبي تشوكا وما فهمت والو وفي نفس الوقت حابة علاقتي تبقى كيما يامس كيما اليوم

الموضوع للنقاش