مخلعة بشار...المختومة الهقارية...الصفيحة السورية...فطائر الجبن...بالصحة على قلوبكم

اسمهان79 · 2015-05-27, 15:05

السلام عليكم ورحمة الله وبركاته
تحياتي لكل الاحباب الحاضرين والغايبين عندي شحال من وصفة نتمنى يعجبوكم
مخلعة بشار

المختومة الهقارية

الصفيحة السورية

فطائر الجبن

مخلعة بشار
اول شيئ وجدي الحشوة
اللي هو بصل الاخضر مقطع رقيق نذبلو في شوية زيت ثم نضيفلو ملح فلفل اسود افاح فلفل احمر زنجبيل ثوم حبة طماطم مرابية وشوية طماطم مصبرة وشوية لحم مرحي وطرف صغير شحمة ماشي بزاف نخلط كلش مع بعض حتى تنشف نخليها تبرد
العجينة

500 فرينة
ملح وفلفل اسود
شوية خميرة الحلويات
نلم بالماء حتى نتحصل على عجينة نخليها شوية ترتاح ومن بعد نعجنها شوية ونشكل كريات نخليهم والي ربع ساعة ثم نطرحهم قرصات صغار نطرح فيهم الحشوة بلا ما نلمس الجوانب ثم نلم الى الوسط شغل راكي تبليي ثم لفيهم في الفرينة واقلبي على الجيهة اللي سكرتي منها غطيهم وخليهم يستراحو على قد ما تقدري

بعد ما برتاحو اطرحيهم غير بالشوية ثم طيبيهم في طاجين لحديد او في مقلا نتاع ليكراب المهم لازم تدهني الطاجين او المقلا

قدميهم سخونين امممممم مع شوية هريسة ما شاء الله
شوفي كيفاش خفاف وفراغة من الوسط

المختومة الهقارية
هذه الوصفة كنت شفتها في قناة سميرة عجبتني الطريقة وحسيت فيها بنة خاصة قلت نجربها وكي عجبتني حبيت نفيدكم بيها بلاك تعجبكم الاكل اذوااااااق
نوجد الحشوة نتاعها واللي هو بصل مقطع هلالات مذبل في الزيت ونضيفلو ثوم فلفل احمر حار يابس وحبة طماطم مرابية شوية هريسة ملح فلفل اسود فلفل احمر افاح 1 م ص طماطم مصبرة طرف صغير خلاص غرس نخلط كلش مع بعض ثم الدبشة في الاخير

العجينة
كيلة فرينة وكيلة سميد ملح وماء نرنخها وفي نفس الوقت نحرك بيديا نحرك مليح باه ما يجوناش فيها الكرابع لازم تجي شوية جارية ما بين لمسمن والبغرير ونخلط مليح مليح باليد جيك جارية وشوية فقط ثقيلة
ناخذ مقلا او طاجين نحطوه على نار متوسطة ثم نهز باليد العجينة ونفرغ شغل فرغتي البغرير او ليكراب وبسرعة نمرر يديا عليها نتحصل على قرصة
راهي ساهلة خلاص في طيابها او في حشوتها منخلوهاش طيب بزاف على خاطر رايحين نعاودولها الطياب مع الحشوة

نطيب ونحط بجيه

لما نكمل ناخذ بالوحدة ونحط فوقها الحشوة ثم ناخذ شوية من العجين الجارية ونحط على الجوانب اربع نقاط ونغلق بعجينة واحدة اخرى من اللي طيبناهم من قبل

ثم نزيد نلوحهم في الطاجين مرة اخرى على الجيهتين في زوج
وهي سخونة نلفها وتمتعي بيها وباكلها

الصفيحة السورية
العجينة
كاس حليب دافي اعملي معاه 1 م ك خميرة الخبز ملح
1 م ك سكر 2 م ك كرام فراش ثقيلة وكاس فرينة وربع كاس زيت نخلط كلش مع بعض نخليه يخمر ثم نضيف باقي الفرينة حتى نتحصل على عجينة مثل البتزا نشكل كريات صغار ونخليهم يخمرو ثم نطرحهم بشكل اوفال او قرصات صغار ورقاق ونحطلهم الحشوة واللي هي لحم مرحي متبل بالملح والفلفل الاسود والافاح والزنجبيل توابل الكاري دبشة ثوم شوية زيت 1 م ك كرام فراش ونخليه على النار حتى ينشف
ونحطو على الصفائح اللي وجدناهم من دون ما نوصلو للجوانب
طبيبيهم عادي كيما البيتزا

فطائر محشوة بالجبن

العجينة

200 غ فرينة بيضة واحدة شوية مبشور الليمون ملح 2 مك كرام فراش ثقيلة 1 خمير الحلويات نخلط كلش مع بعض ثم نلم بالحليب الدافئ حتى الحصول على خليط نوعا ما جاري نخبطو مليح باليد يعني نطلع ونهبط حتى تشوفيه يبرق وتحسيه ارطب
بهاذ الشكل

خليه يرتاح في الثلاجة مدة 20 د ثم حطي مقلا نتاع ليكراب او اي مقلات المهم ما تلصقش فرغي غير بالمغرفة لكن قبل حطي قدامك كاس فيه ماء كل ما تحبي تهزي لوحي المغرفة في الماء وحطي بالواحدة وزيدي لوحي في الماء واطرحي هاذوك اللي حطيتيهم
ملاحضة لازم تدهني المقلا نتاعك حتى لو ما تلصقش

كي تشوفيهم نشفو قلبيهم اول مرة واضغطي عليهم بالشوية لما يحمارو زيدي اقلبيهم

نحيهم وحطيهم فوق مشبك باه ما يعرقوش
وجدي الحشوة

طرف جبن طري الاحسن بربار خلطي معاه معدنوس ملح فلفل احمر مرحي حبات نتاع الخيار المخلل كورنيشو مبشور شوية كرام فراش سائلة او حليب وخلطي مليح
ادهني هاذوك الفطائر بالجبن

وزينيهم كيما تحبي

وبالصحة والراحة
في امان الله

*أم جابر* · 2015-05-27, 15:12

اممممممممم بارك الله فيك اسمهان ربي يجازيك كل و الله يعطيك ما تتمناي ما شاء روووووووووعة كعادتك
اختك ام اسيد سابقا

ام ظافر · 2015-05-27, 15:17

الله عليك
تنوعي في الاطباق من منطقة لاخرى وهوالمطلوب فعلا لاسرتنا حتى مايملوش
جار التجريب ان شاء الله
بارك الله فيك

أم ياسين الزهراء · 2015-05-27, 15:48

اواه يااسمهان انت مبعوثة من عند وزن الدببة باش نولو كيفهم قتلتيني بالسخفات والشهيوات الله يبارك فيك اللي نشوفها ننسى الاخرى بادن الله نجرب الصفيحة راهي في خاطري