واش رايكم في الشاغلوت الي اعملتها

[منارة الوفاء]

السلام عليكم ورحمة الله تعالى وبركاته


عدنا و العود أحمد ان شاء الله
هاذي مدة طويلة وأنا غائبة عن المنتدى يمكن القول ملي تزوجت
فالحقيقة توحشت المنتدى وعضواته المتألقات في جميع الميادين الله يبارك اعليهم وراني نشوف بلي راهم دايرين حالة وكيما غيرتوني بالشطارة ههههههههههههههههه قلت أنا ثاني نغيرهم شوية مايحسبوش مانيش نبان بيا التفنيين هههههههههههههه و الله مخلاف النت هي الي بيا معنديش في داري حتى نجي لدارنا

المهم رايحة نحطلكم تشوفو هاد الشارلوت عندي مدة ملي درتها والي حبت الوصفة تقولي وانهار الأحد ان شاء الله كي نجي لدارنا راني نحطهالها بالتفصيل الممل ان شاء الله

https://

الوصفة
نحتاجو لتحضير هاذ الشاغلوت الأتي:
مول خاص بالشاغلوت كاين عدة أشكال وعدة مقاييس
لي بودواغ
كاس عصير بأي نكهة
سويس رول نقطعو منو 3 بياسات بالمول المستعمل
موس الشكلاطة
شانتي للتزيين
فواكه للتزيين حسب الرغبة
طريقة المونتاج:
نحطو المول المستعمل في صحن التقديم
نحطو البياسة الاولى من السويس رول الي كنا قطعناها في قاع المول
نقطعو لي بودواغ على حساب العلو انتاع المول ونغطسوهم فالعصير ونوقفوهم مباشرة على كامل لوتور انتع المول
نحطو كمية من لاموس فوق السويس رول كطبقة أولى
نحطو البياسة الثانية من السويس رول فوق لاموس
نزيدو نحطو كمية من لاموس ولازم تكون طبقات لاموس متساوية ونحاولو نعدلوالطبقات ونتحفوهم باش كي نقسمو الشاغلوت تجي شابة
نحطو البياسة الثالثة انتاع السويس رول
نحطو فوق البياسة الاخيرة الشانتي كآخر طبقة ونحاولو نملسوها لأنها ستكون وجه الشاغلوت ونزينوها حسب الرغبة بالشانتي أو الفواكه المشكلة أو الشكلاطة المبشورة

أنا في بعض الأحيان لما نحب نحضر هاد التحلية نستغنى عن تحضير السويس رول و لي بودواغ ونكتفي بالقاطوساك الي ينباع يشبه للكاسكروط وهو صغير ونستعملو في مول مربع الشكل و نعمل بيه طبقات بالتناوب مع لاموس و الشونتي بنفس الطريقة
يعني الواحد يخدم حسب الموجود و المقدور

بالنسبة للسويس رول يمكن تحضير أي وصفة معتمدينها مكانش مشكل
أنا استعملت وصفة شفتها في قناة سميرة دارتها وحدة في شاغلوت مثلجة هاد الوصفة هايلة ويتم تحضيرها كالآتي:
المقادير:
4 بيضات
100غ سكر عادي
لافاني
90غ فرينة

طريقة التحضير:
نضربوا 4 بيضات كاملين مع السكر و الفانيلا مليح بالباتور حتى يبياض المزيج و يتضاعف حجم الخليط
في هته الحالة نضيفوا الفرينة المنخولة على دفعتين ونخلطوا بالعقل من الأسفل إلى الأعلى
يطهى البيسكوي لمدة 5-6 دقائق فقط باش كي نقطعوه بعدما يبرد مايتكسرش

وبخصوص لاموس
المقادير:
4 بيضات
لافاني
ملعقة عشاء سكر رطب
ملعقة عشاء زبدة طرية
200غ شكلاكة سوداء منى
50غ شانتي

طريقة التحضير:
نطلعوا الشانتي بشوية حليب باررررررررررررررررررررررررررد كالعادة
من جهة أخرى نحطو الشكولاطة تذوب في حمام مائي ونضيفولها الزبدة
نطلعوا صفار 4 بيضات مع السكر و الفانيلا حتى يتضاعف الحجم و يبياض الخليط نواصلو الخفق مع اضافة الشكلاطة ولما يمتزج الخليط انضيفو الشانتي
وباش تخفاف لاموس نضيفو بياض بيضة كالثلج مخفوقة بشوية ملح للخليط بالعقل ومن الأسفل إلى الاعلى
ونتركو لاموس ترتاح فالثلاجة شوية باش تحكم روحها


نتمنى أني نكون وفقت في وضع تفاصيل الوصفة ، وكان بودي أن تكون الخطوات مصورة لكن ياللأسف مصورتهاش
وفي حالة وجود أي تساؤلات أنا في الخدمة











تحياتي للجميييييييييييييييييييييييييييييييييييييييييييييي ييييييييييييييييييييييييييييييييييع