مشكلتي مع الرقاق

~اسيل ريحانتي~ · 2013-10-30, 12:01

عندي مشكلة في الرقاق تاع الشخشوخة يعني كي نحب نسقيها تتعجن شكيت في مقادير العجينة يعني ندير نص سميد ونص فرينة وملح ونعجنها حتى نعيا قولولي وين راه الغلط
علاش كي نسقيها بالمرق تتعجن

~اسيل ريحانتي~ · 2013-10-30, 12:14

الحاجة لي راها خالعتني كنت نديرها تخرجلي روعة عندي مدة طويلة ما درتهاش يا ويلي كبرت ولا واش لي صرالي الله يخليكم عاونوني راني حشمت من ابو زكريا

~اسيل ريحانتي~ · 2013-10-30, 13:01

من فضلكن يا طباخات المنتدى عاونوني الله يجازيكم الفردوس

المتألقة دوما · 2013-10-30, 14:53

ام زكريا انا كيما رديتي في موضوعي وقريتي مانعرفش للطبخ مليح
بصح حبيت نقلك انا نعملها بالسميد فقط ومرات ندير فرينة لكن حاجة قليلة برك
وماتتعجنش تخرج روعة
انا نظن تنقصي الفرينة
بغيت برك نعطيك رايي ونشوفو طباخاتنا

عروبتي · 2013-10-30, 15:06

اختي المشكلة ماشي في المقادير لكن اما الرقاق راه يبقى ني واما راه خشين على هذا تعجنلك والرقاق او الفطير يجي بالسميد وحدو ماشي الفرينة

hanadi21 · 2013-10-30, 15:15

ربما يكون المشكل الاول في طريقة التحضير حيث ان الرقاق يكون بالسميد وبس

ثانيا عليك بالعجن جيدا ويكون رطب

ثالثا يكون السمك انتاعو معقول ويكون مطبوخ

رابعا يكون لاصوص خاتر باش ما يتعجنش حطي شوية برك

خامسا شهية طيبة

~اسيل ريحانتي~ · 2013-10-30, 15:44

شكرا على الردود اخواتي الفاضلات الرقاق نخدمه رقيق مثل الديول يخرجو هايلين بصح كي نفتتهم ونفرغ فوقهم المرق يولو لاستيك

sellilou · 2013-10-30, 15:48

اختي حنا الرقاق نديروه بالسميد وزيدي شوفي يفيدوك لبنات

أم محمد تاج · 2013-10-30, 16:07

أم زاكوووو حنونة الشخشوخة تجي غير بالسميد واذا حابة تضيفي الفرينة فغير زوج مغارف فقط باش تعاون الغلوتين يخرج وتجي تتعلك جربي نقصي الفرينة وشوفي تراش

~اسيل ريحانتي~ · 2013-10-30, 16:33

حبيبتي انتي ام محمد الله يبارك راكي شاطرا في كل شيء واش نقولك الله يسعدك في الدنيا والاخرة

رياحين الجزائر · 2013-10-30, 16:41

علابالك اختي صح صراتلي مرة كيفك المشكل في الفرينة ماتديريهاش خلاص ولا كيما قالت الاخت ام محمد مغرف ولازوج يكفي ومرة صراتلي نوعية السميد ثان تلعب دور ساعات تخدميها على الكاتالوق من بعد اتسقي ترجع تتعجن وينا نوع سميدج درتي احنا هنا في باتنة معروف عندنا سميد التل ولا عمر بن عمر هذو الخيار للشخشوخة نتمنى انكون افدتك

*ام رامي* · 2013-10-30, 16:53

نقولك اختي عن تجربة
اولاتنقصي من كمية الفرينة كما قالو الاخوات غير كمية قليلة برك تساعد العجين باه ما يتقطعش كي تكوني تخدمي فيه
ثانيا والاهم الصوص تون خاثرة اذا كانت مرقة اكيد تعجن لك الرقاق خاصة اذا طيبتيه رقيق وشفاف لازم له صوص عاقدة
النقطة الاخيرة وهي انك تحطي الرقاق قبل ما تسقيه في صينية وتدخليه الفرن يسخن احسن من انك تفوريه التفوار في حد ذاته يشربه الماء وتزيدي تسقيه خلاص ولى عجين
جربي ورديلي على ضمانتي
وانا قبل ما نسقيه نحط له قطعة دهان لانه يعطيه نكهة رائعة وزيد ما يخليهش يشرب بزاف

~اسيل ريحانتي~ · 2013-10-30, 16:53

اقتباس:

المشاركة الأصلية كتبت بواسطة رياحين الجزائر

علابالك اختي صح صراتلي مرة كيفك المشكل في الفرينة ماتديريهاش خلاص ولا كيما قالت الاخت ام محمد مغرف ولازوج يكفي ومرة صراتلي نوعية السميد ثان تلعب دور ساعات تخدميها على الكاتالوق من بعد اتسقي ترجع تتعجن وينا نوع سميدج درتي احنا هنا في باتنة معروف عندنا سميد التل ولا عمر بن عمر هذو الخيار للشخشوخة نتمنى انكون افدتك

حتى انا شكيت في السميد على خاطر انا كل خطرا نشري نوع مثل السفينة واوماش وغيرها شكرا حبيبتي رايحة ندير كيما قاتلي ام محمد و نرجعلكم الخبر

ميمنة الجزائر · 2013-10-30, 16:58

نفس نصائح ام رامي يعني الفرينة قد ما تكثري يجيك معجن كي تسقيه المرقة تكون خاثرة وديريلها شوية دهان

وثاني كي تفوريها فوريها بالوحدة على حدى قبل راهي ما تعجنلكش وتجيك مفروقة كامل

وثاني لاعاد عندك مكروووند ديريه شوية قبل راهي تخليه شوية جحاكم روحو لا معندكش دريره شوية برك فوق الطجين شغل تحمصيه برك بصح ما تحرقيهش شوية برك وان شاء الله يجيك احسن المرة الجاية

~اسيل ريحانتي~ · 2013-10-30, 17:03

اقتباس:

المشاركة الأصلية كتبت بواسطة *ام رامي*

نقولك اختي عن تجربة
اولاتنقصي من كمية الفرينة كما قالو الاخوات غير كمية قليلة برك تساعد العجين باه ما يتقطعش كي تكوني تخدمي فيه
ثانيا والاهم الصوص تون خاثرة اذا كانت مرقة اكيد تعجن لك الرقاق خاصة اذا طيبتيه رقيق وشفاف لازم له صوص عاقدة
النقطة الاخيرة وهي انك تحطي الرقاق قبل ما تسقيه في صينية وتدخليه الفرن يسخن احسن من انك تفوريه التفوار في حد ذاته يشربه الماء وتزيدي تسقيه خلاص ولى عجين
جربي ورديلي على ضمانتي
وانا قبل ما نسقيه نحط له قطعة دهان لانه يعطيه نكهة رائعة وزيد ما يخليهش يشرب بزاف

اخت ام رامي ترد عليا والله يشرفني ردك يا فرحي نشكرك بزاف ما عرفت واش نكتب يعطيك الصحة اكيد اكيد راح نطبق كيما فهمتيني