تارت بالشكلاطة من اختراعي... اقتصادية سهلة و بنينة ياسر

remadna · 2011-12-21, 13:55

بسم الله الرحمن الرحيم

السلام عليكم و رحمة الله

منذ سنوات كنت نعمل هذه التارت بالعجينة المكسرة la pate brisée
و كانت تعجب كل العايلة و كل من يذوقها
هذه اول مرة نديرها بالعجينة المورقة و المفاجأة عجبت الجميع بدون استثناء و الآن راني حاصلة طيبتها 4 مرات خلال 10 ايام و مازال الكل يطلب فيها و ما زال ما شبعوش منها ، ثمن الاختراع
و السبب انني طبخت الورقات لكي نعمل المليفاي (بطلب من العائلة) و جاتني الفكرة القديمة تاعي تاع الشكلاطة و الميرانغ و جربتها مرة خلاص الجميع نسى فكرة الميلفاي و قالو لي هيا كملي لنا الورقات بالإختراع الجديد و بطلنا ما ناكلوش الميلفاي
البنة ما عندي ما نقول احسن و ابن تارت ذقتها في حياتي التقرميش و البنة روووووووووووعة
نخليكم مع الوصفة

المكونات:
1- ورقة كبيرة عجينة مورقة مطبوخة مسبقا، هنا الطريقة و الحجم و الكيفية ( من مطبخي طريقتي الخاصة في صنع الميلفاي من الألف إلى الياء (بالخطوات المصورة) )
2- كريم باتسيير استعملي نصف الكمية : نصف لتر حليب و 2 م ك نشاء ، و تستبدلي الشكلاطة ب 1 م ص زبدة ( كريم ديسير بالشكلاطة ساهل اقتصادي و بنين ياسر )
3- ميرانغ: 4 بياض بيض، 200غ سكر احرش، ملح، فانيلا: خبطي الجميع بالخلاط الكهربائي حتى تثقل كما في الصورة
فكرة : البياض كان عندي في الفريز، في الدار نستعملو الصفار عادي و نحطو البياض في الفريز في كاس او بلارة عادي كل مرة نضيف 1 بياض
و من ثم نلقى كمية كبيرة تاع بياض و ندير بيها الميرانغ او الكلاصاج، و نفس الشئ بالنسبة للصفار دائما نحطوه في ساشي في الفريز عادي
astuce عفسة صغيرة: ضعي الكل (السكر و البياض و الملح) في ايناء مدة 20 دقيقية حتى يذوب السكر مليح مع البياض لكي يطلع لك بالخف و ما يتعبش الخلاط و لا يديك تاعك

الطريقة: ضعي الكريم باتسيير على الورقة المطبوخة مسبقا ، خليه يبرد مليح ، ضعي الميرانغ و اصنعي امواج بالملعقة

ضعيها تحمر في الفرن مشعول من الأعلى

تقص و تقدم تفضلو تاكلو بالصحة و الهناء
تقرمش روعة مممممممممممممم

ملاحظة: تؤكل دافئة في يومها مقرمشة و اذا باتت ليلة راح تفقد التقرميش تاعها و لكم الاختيار في الذوق

تذكروني في الدعاء لي و للمسلمين و المسلمات جميعا

kokotg · 2011-12-21, 15:05

لك مني هذه

اعطيني طريف ههههههههههههه
بصحتكم

remadna · 2011-12-21, 15:10

اقتباس:

المشاركة الأصلية كتبت بواسطة kokotg

لك مني هذه

اعطيني طريف ههههههههههههه
بصحتكم

جزاك الله خيرا لردك الطيب أختي
راهي قدامك تفضلي تاكلي بالصحة و الهناء
راكي انت الأولى تفدري تهربي بالبلاطو

*سماح 94* · 2011-12-21, 15:20

الله يبارك ختي الفحلة يعطيك الصحة ............مبدعة

remadna · 2011-12-21, 15:28

اقتباس:

المشاركة الأصلية كتبت بواسطة nokia2007dz

الله يبارك ختي الفحلة يعطيك الصحة ............مبدعة

الله يبارك فيك نوكيا لمرورك الطيب
الله يسلمك

my lamis · 2011-12-21, 15:31

إممممممممممم هايلة يطيك الصحة نشالله نجربها بعجينة أم ميدو الي وراتها

remadna · 2011-12-21, 15:38

اقتباس:

المشاركة الأصلية كتبت بواسطة my lamis

إممممممممممم هايلة يطيك الصحة نشالله نجربها بعجينة أم ميدو الي وراتها

الله يسلمك ام لميس
جربي و خبرينا على التجرية
اذا كنت في عايلة صغيرة ديري عجينة صغيرة على قد العايلة تاعك لانها اذا باتت راح تفقد التقرميش تاعها
بالتوفيق

*أم كوثر* · 2011-12-21, 15:56

امممممممممممممممم اممممممممممممممممم تشهي بارك الله فيك
صراحة تعجبني مقدماتك في مواضيك تخليني نتخيلك و انت طيبي و العايلة دايرين بيك ههههههههههههههه ربي يحفظكم من كل شر
بصحتكم

remadna · 2011-12-21, 16:08

اقتباس:

المشاركة الأصلية كتبت بواسطة *أم كوثر*

امممممممممممممممم اممممممممممممممممم تشهي بارك الله فيك
صراحة تعجبني مقدماتك في مواضيك تخليني نتخيلك و انت طيبي و العايلة دايرين بيك ههههههههههههههه ربي يحفظكم من كل شر
بصحتكم

و فيك بارك الله ام كوثر
الله يحفظ لك بناتك و يكبرن على طاعة الله
صراحة دائما و راء كل وصفة نديرها مغامرة و اختراع و نحب نحكيها لكي اشجع الاخوات لكي لا يخفن من تجربة الوصفات الجديدة