تطبيقي لطاجين البسباس المحشي

[إلهام07]

السلام عليكم

بعد التطبيقات الفاشلة السابقة ، درت الكوراج و قلت نزيد نجرب حاجات أخرى بالاك المورال يطلع هههههه.
البارح شفت وصفة طاجين البسباس المحشي للأخت dadou mascarienne ، دارتلي النفحة قلت نجربها ، شريت العشية شوية لحم مفروم و شوية بسباس وإلى المطبخ ، غيرت في الوصفة ( كي العادة ههههه ) لأن كل واحدة عندها أسلوبها الخاص ، درت المرق أحمر وأضفت البهارات اللي جي في المرق الأحمر ( كسبر و فلفل أحمر و هريسة ورند وطماطم مصبرة ) و حمرت بطاطا ( حوالي 1 كغ ) مقطعة إلى أرباع وشوية جزر مقطع مايل وأضفتها للمرق 5 دقائق قبل ما نطفي و زينت بالمعدنوس.
بقى عندي قلوب البسباس و شوية أرز مغلي فاضلين من الطبخة قلت ندير بيهم سلطة أحسن ما نرميهم ، ما لقيت عندي لا زيتون أخضر و لا أسود ولا ذرة ولا جلبانة و لا تونة ، كامل خلاصو ، درتها سلطة نتاع فقراء هههه وزينتها بالريش نتاع البسباس و السيقان نتاع البسباس احتفظت بيهم في كيس في الثلاجة من بعد نستعملهم في مرق خضار ، حاجة ما طيشتها هههه و صورتها قبل ما نحطلها لاصوص والمايونيز .
أترككم مع الصور :







هذا رابط الوصفة للي تحب جربها : https://www.djelfa.info/vb/showthread.php?t=1212319