انا بديت بالمقروض والمقرقشات وانتي باه بديتي

غيداق · 2013-07-31, 12:08

صح رمضانكم يا بنات الجلفة واش رايكم لوكان تشاركونا بوصفاتكم نتاع القاطوات اللي رايحين ديروهم للعيد او حضرتوهم وخلصتو هكذا نديو افكار من بعضانا وما نتعبوش في التخمام انا حضرت البارح مقروض النقاش ومقرقشات الوردة ايا شوفو واعطوني رايكم

هذو المقرقشات اسمحولي يا لبنات ما راهمش لام راميراني غلطت راني هزيتهم من منتدى فتكات ما نقولكمش على الهشاشة والبنة ويا عيني على الخدمة نتاعهم ................

وهذا مقروض النقاش بالوصفة العادية نتاعو يعني اللي ماولفا نديرو كل عام

ايا لبنات لازم تتفاعلو مع الموضوع العيد قرب

ام اياد · 2013-07-31, 12:27

بارك الله فيك احتي ممكن رابط تع المقرقشات

ام اياد · 2013-07-31, 12:29

بارك االله فيك ممكن الرابط تع المقرقشات

دينا10 · 2013-07-31, 12:38

ايعطيك الصحة
من فضلك اختي اعطيني مقادير ووصفة المقروط

فـــرح · 2013-07-31, 12:40

السلام عليكم

انا بديت ب:
الصابلي
حلوى محشية بالنسلي
سكندرانيات
مشكلة

ساوافيكم بالصور

بيْـدباَ · 2013-07-31, 12:51

بارك الله فيك خرجوا شابين

غيداق · 2013-07-31, 13:03

اقتباس:

المشاركة الأصلية كتبت بواسطة ام اياد

بارك االله فيك ممكن الرابط تع المقرقشات

حبيبتي ام اياد المقرقشات هزيتهم من منتدى فتكات ونحطلك مقاديرهم وطريقتهم بالتفصيل

مايكون غير خاطرك هذو المقرقشات من اروع ما يكون اولا اقتصادية وخفاف وبنااااااااااااااااااان يهبلوالمقادير: انا حطيت نص كيلو فرينة وعليها 3 بيضات كبار او 4 صغار مع مغرفة نتاع القهوة ملح مع 4 مغارف زيت مع مغرفة قهوة نتع خميرة نوارةتخلطي كامل المكونات مع بعض وتبلي غير بالشوية نتاع الماء حتى تتحصلي على عجينة تكون طرية وما تلصقش في الايد حطيلعجينة على رخامة واعجنيها مليح حتان تولي ملساء غلفيها بالنيلون وخليها ترتاح نص ساعة قسمي لعجينة نتاعك الي كرات بحجم اكبر بقليل من البيضة وغلفيهم واجبدي بالوحدة وحليها فوق المايدة مغلفة بالنيلون باش ما تلسقلكش وراهي ما تحتاجش النشاء حليها بطول 20سم وسمك 1ملم من بعد جيبي الجرارة نتاع الحلويات وقطعي اشرطة بعرض 1.5سم وجيبي العود نتاع الشواء واحكمي طرف الشريط اللي عندك ولصقيه في العود تقدري تستعملي الما باش تلصقلك مليح وهزي هذاك الودبيد واليد لخرى هزي بيها باقي الشريط والى المقلة الي تكوني حطيتى فيها كمية معتبرة نتاع الزيت وسخنتيها مليح ونقصتي للطبونة حطي الجزء اللي على العود يتقلى ودوري عليه الشريط في كل مرة حتى توصلي للنهاية دزيه شوية للحافة نتاع المقلاة باش يحكم روحو وما يتفسخش نحي العود وخليها تاخذلون ذهبي ونحيها هاااااااااااااااااااااا راني شرحتلك بالتفصيل نتمنى تكوني فهمتي وتطبقيها وتحطينا نشوفوها

غيداق · 2013-07-31, 13:15

اقتباس:

المشاركة الأصلية كتبت بواسطة دينا10

ايعطيك الصحة
من فضلك اختي اعطيني مقادير ووصفة المقروط

شكرا حبيبتي على المرور الطيب مقادير المقروض هي :2 كيلات ونص سميد متوسط مع 1كيلة سمن مدينة مخلط معاه كاس اتاي زيت شوية نتاع الملح تخلطي مليح المقادير بدون عجن وتبلي بفنجان ما زهر وتكلي بالما العادي حتى تتحصلي على عجينة سهلة بصح بدون ما تعجنيها خليها ترتاح لمدة ساعة حتى يتشرب السميد كامل السوائل في هذيك المدة حضري الغرس انا درت نتاع البلاكة عاودت رحيتو وعجنتو بالما زهر وخلطت فيه شوية جلجلانية محمصة حطيها وهي سخونة باش يظهر القو نتاعها في الغرس وزيدي الطيب مرحي وشوية قرفة مع مغرفة نتاع قهوة مرغرين واعجمي مليح حتى تتحصلي على قوام طري بشكل جيد كوني منو حرابيش وحطيه بجهة وارجعي للعجين ديري منو حربوش وحطي فيه الغرس وروليه حتى تتحصلي على الحجم المطلوب قصي حبة المقروض وشوفي اذا كان حجمها يناسبك انقشيها كيما تحبي واستعمليها مقياس تقيسي بيها باقي الحبات باش يجيوك قدقد طيبيه على نار 180 درجة ودوري البلا في كل مرة حتان يصفار من تحت ثم شعلي عليه من فوق وراقبيه حتى ياخذ اللون المطلوب وبالصحة والهنا

ام اياد · 2013-07-31, 13:16

شكرا لك بصح ماقلتيلش ياك تعسليهم

غيداق · 2013-07-31, 13:17

اقتباس:

المشاركة الأصلية كتبت بواسطة فـــرح

السلام عليكم

انا بديت ب:
الصابلي
حلوى محشية بالنسلي
سكندرانيات
مشكلة

ساوافيكم بالصور

صحيتي يا الفحلة راكي جبتيها ربي يبارك فيك رانا نستناو الصور

ام تقوى 2009 · 2013-07-31, 13:19

مقادير المقرقشات من فضلك

غيداق · 2013-07-31, 13:24

اقتباس:

المشاركة الأصلية كتبت بواسطة ام اياد

شكرا لك بصح ماقلتيلش ياك تعسليهم

لالا ام ايد هذو ما يتعسلوش احفضيهم في ناشفين وكيما تقدميهم عسليهم وزينيهم كيما تحبي راهم خفاااااااااااااااف وما راهمش كيما قريوش

غيداق · 2013-07-31, 13:26

اقتباس:

المشاركة الأصلية كتبت بواسطة ام تقوى 2009

مقادير المقرقشات من فضلك

شكرا ام تقوى اعلى المرور مقادير المقرقشات راني حطيتهم في الرد على ام اياد مع طريقة التحضير

غيداق · 2013-07-31, 13:31

راني لقيتلكم رابط وصفة المقرقشات من منتدى الجلفة للاخت ام راضية بعنوان حلوي سهلة لسهرات رمضان بصح ما عرفتش ندرجو

نانا الحيرانة · 2013-07-31, 15:00

يعطيك الصحة على الافادة

أنا راح نبدى غدوة راني روطار مي راح نحكمها من ورى بعضاها

نعمل قاطوا بالشوكولا ، من بعد المقروض ، لعرايش ، حلوة محشية بالنيسلي ، غريبة

وآخر حاجة البقلاوة