من عاداتنا فى العيد الاضحى

[bassamat]

حبيت كل وحدة من الاخوات تحط عاداتها فى عيد الاضحى
يعنى فى اليوم الاول واش طيب واليوم الثانى و اليوم الثالث اسماء الاطباق و اذا حبت تستفسر اى وحدة على الوصفة تطلب ذلك
شاركونى بالاراء

[omo mazen]

شكرا علي الموضوع و فكرتيني في العيد الاضحي و العائلة و الاهل و اللهي الدمعة هبطت انا من الاوراس و عادتنا نحضر الشخشوخة الصباح طبعا القهوة و الحلويات و عنما ندبحو كل واحد يدير حاجة واحد يغسل الكرشة و المصارن و واحد اشوط بوزلوف و واحد يغسل الاواني اما الوالدة التي توحشتها بزاف اطيب الكبدة و تلوي عليها الشحمة و مبعد تحطهم يتشواو هدا انقولولو البولفاف و هو لديد جدا و تمد لوالدي العزيز هو الاول بما انه هو رب الاسرة الدباح و نتلموا كامل ناكلو من ادين الولدة الغالية و لما انكملوا اشغلنا ونغسلوا كلشى انحطوا الشخشوخة الي طيبناها الصباح للغداء لانو بعد الشوا التاع البولفاف تبغي حاجة حارة و كي انكملو نبداو في الزيارات و في المساء انطيبا البوزلوف اما حاليا فانا في نيو يورك فالحال مختلف جدا

[sarsora777]

السلام عليكم
اختي انا في الاصل من الشرق العيد يفوت عندنا هايل خاصة مع لمة العائلة و الاحباب
في صباح العيد نروحو نصليو نسمعو التسابيح و نسبحو يا الاهي فكرتيني المهم ومن بعد نجيو من الصلاة نسلمو على بعض و نقولو عيدك مبارك ومن بعد يذبحو الرجال الخروف ويجيبولنا الراس نشوطوه ونتعاونو نغسلو الدوارة وفي هاذ الوقت تشويلنا ماما الكبدة وتبدأ ب بابا ربي يرحمو وتكون الكبدة هي اول حاجة تدخل فمنا نديرو السنة نبداو بالكبدة
ومن بعد نشويو الكبدة والكرشة والقلب و المصارن...... ويكون هذا هو غدانا ومن بعد نوجدو القهوة و القاطو ونتزوقو وتبدأ الزيارات وفي المساء نديرو الراس نحمروه في الفور مع البطاطا كيما قالت ام مازن نديرو بولفاف
اما في اليوم الثاني الصباح لازم نفطرو بخبز الدار و القاطو ومن بعد نديرو الغداء شخشوخة ونبداو نشويو في اللحم على الجمر وفي الشواية électrique وكي يجيونا ضياف نحطولهم الشواء ومن بعد القهوة و القاطو ياك نقسمو الجزرة على ثلاثة للصدقة وأهل البيت و نحطو للناس وهذا هو العيد في البلاد
اما هنا وين راني ماكان حتى عيد الخروف ما نشوفوهش خلاص عشية العيد يجينا مذبوح و مقصوص وساعات مجمول واحنا نقصوه يجي بلاشي راس ولا دوارة تحسي روحك شريتي لحم ماشي خروف هههههه وما كان لا حباب لا عائلة نزوق روحي ونقعد وحدي في الدار من قبل كنت نروح نصلي صلاة العيد ملي زيدت عدت ما نقدرش.
والله في هاذ المناسابات ماكانش قد البلاد الغربة مش مليحة*

[miri_27]

السلام عليكم انا من عين الدفلى من الوسط الجزائري.
في يوم العيد نروحو في الصباح الباكر الى المقبرة لزيارة قبر اخي رحمة الله عليه، و هذا بعد صلاة الفجر ثم ننتظر ابي حتى يأتي من المسجد بعد صلاة العيد نتجمع حوله مع امي واختي الصغيرة نسومة ونقبل عليه بعد ذلك نستناو الذباح و لما ننحر الخروف اغسل الدوارة و امي تشوط البوزلوف لانه من اختصاصها اما فيما يخص الكبدة و الرية فلا ننزعها في اليوم الاول فحسب راي ابي هذه من العادات التقاليد ، اما المصارين توع الخروف بعدما نغسلوهم جيدا نقطعوهم رقيق و نقليهم مع البصل و الثوم و نضيف لهم البهارات و في الاخير نضيف كمية من الطماطم و بعد ما يتجمر راه ايجي طبق شباب بزاف اما فيما يخص الدوارة نعملوها عصبان او بكبوكة و هذا في العشاء اما البوزلوف فابي يحبو بزاف نعملوهلو مرقة او مفور في الكوشة و يجي طعمو هايل ايهبل بعدما نحشيه بالثوم و البهارات و الزعيترة و غيره و في اليوم الثاني نشويو الكبدة على الجمر و نعمل الملفوف او نشوها على الطاجين فوق النار بعدما ايكون الكسكسي جاهز وهذا طبق امي اللذيذ الي تحضرونا مع اللحم و في الاخير انشاء الله كل عيد ايعم علينا الفرحة يارب

[bassamat]

المشاركة الأصلية كتبت بواسطة omo mazen

شكرا علي الموضوع و فكرتيني في العيد الاضحي و العائلة و الاهل و اللهي الدمعة هبطت انا من الاوراس و عادتنا نحضر الشخشوخة الصباح طبعا القهوة و الحلويات و عنما ندبحو كل واحد يدير حاجة واحد يغسل الكرشة و المصارن و واحد اشوط بوزلوف و واحد يغسل الاواني اما الوالدة التي توحشتها بزاف اطيب الكبدة و تلوي عليها الشحمة و مبعد تحطهم يتشواو هدا انقولولو البولفاف و هو لديد جدا و تمد لوالدي العزيز هو الاول بما انه هو رب الاسرة الدباح و نتلموا كامل ناكلو من ادين الولدة الغالية و لما انكملوا اشغلنا ونغسلوا كلشى انحطوا الشخشوخة الي طيبناها الصباح للغداء لانو بعد الشوا التاع البولفاف تبغي حاجة حارة و كي انكملو نبداو في الزيارات و في المساء انطيبا البوزلوف اما حاليا فانا في نيو يورك فالحال مختلف جدا

والله نقرا و جسمى يقشعر ربى يعينكم على الغربة
اما الشخشوخة هل هى ضفر او رقا ق ويكفيكم الحال انكم ديروها الصباح
ربى يفضلك والديك ويحفضك ليهم ودوم عليكم النعمة

[bassamat]

المشاركة الأصلية كتبت بواسطة sarsora777

السلام عليكم
اختي انا في الاصل من الشرق العيد يفوت عندنا هايل خاصة مع لمة العائلة و الاحباب
في صباح العيد نروحو نصليو نسمعو التسابيح و نسبحو يا الاهي فكرتيني المهم ومن بعد نجيو من الصلاة نسلمو على بعض و نقولو عيدك مبارك ومن بعد يذبحو الرجال الخروف ويجيبولنا الراس نشوطوه ونتعاونو نغسلو الدوارة وفي هاذ الوقت تشويلنا ماما الكبدة وتبدأ ب بابا ربي يرحمو وتكون الكبدة هي اول حاجة تدخل فمنا نديرو السنة نبداو بالكبدة
ومن بعد نشويو الكبدة والكرشة والقلب و المصارن...... ويكون هذا هو غدانا ومن بعد نوجدو القهوة و القاطو ونتزوقو وتبدأ الزيارات وفي المساء نديرو الراس نحمروه في الفور مع البطاطا كيما قالت ام مازن نديرو بولفاف
اما في اليوم الثاني الصباح لازم نفطرو بخبز الدار و القاطو ومن بعد نديرو الغداء شخشوخة ونبداو نشويو في اللحم على الجمر وفي الشواية électrique وكي يجيونا ضياف نحطولهم الشواء ومن بعد القهوة و القاطو ياك نقسمو الجزرة على ثلاثة للصدقة وأهل البيت و نحطو للناس وهذا هو العيد في البلاد
اما هنا وين راني ماكان حتى عيد الخروف ما نشوفوهش خلاص عشية العيد يجينا مذبوح و مقصوص وساعات مجمول واحنا نقصوه يجي بلاشي راس ولا دوارة تحسي روحك شريتي لحم ماشي خروف هههههه وما كان لا حباب لا عائلة نزوق روحي ونقعد وحدي في الدار من قبل كنت نروح نصلي صلاة العيد ملي زيدت عدت ما نقدرش.
والله في هاذ المناسابات ماكانش قد البلاد الغربة مش مليحة*

عزيزتى سرسورة
اولا ربى يرحم باباك ويسكنو فسيح جنانه
لاه راكى فى فرنسا
اذا ماكيش حابة دقولى اتفهمكى اختى
والله كى دجى تشوفى تعبو
طريقة الغرب احسن و انضف
ربى يعينك ويحفضك لعايلتك

[bassamat]

المشاركة الأصلية كتبت بواسطة miri_27

السلام عليكم انا من عين الدفلى من الوسط الجزائري.
في يوم العيد نروحو في الصباح الباكر الى المقبرة لزيارة قبر اخي رحمة الله عليه، و هذا بعد صلاة الفجر ثم ننتظر ابي حتى يأتي من المسجد بعد صلاة العيد نتجمع حوله مع امي واختي الصغيرة نسومة ونقبل عليه بعد ذلك نستناو الذباح و لما ننحر الخروف اغسل الدوارة و امي تشوط البوزلوف لانه من اختصاصها اما فيما يخص الكبدة و الرية فلا ننزعها في اليوم الاول فحسب راي ابي هذه من العادات التقاليد ، اما المصارين توع الخروف بعدما نغسلوهم جيدا نقطعوهم رقيق و نقليهم مع البصل و الثوم و نضيف لهم البهارات و في الاخير نضيف كمية من الطماطم و بعد ما يتجمر راه ايجي طبق شباب بزاف اما فيما يخص الدوارة نعملوها عصبان او بكبوكة و هذا في العشاء اما البوزلوف فابي يحبو بزاف نعملوهلو مرقة او مفور في الكوشة و يجي طعمو هايل ايهبل بعدما نحشيه بالثوم و البهارات و الزعيترة و غيره و في اليوم الثاني نشويو الكبدة على الجمر و نعمل الملفوف او نشوها على الطاجين فوق النار بعدما ايكون الكسكسي جاهز وهذا طبق امي اللذيذ الي تحضرونا مع اللحم و في الاخير انشاء الله كل عيد ايعم علينا الفرحة يارب

ربى يرحم خوك و يسكنو فسيح جنانه
ونعمة التقاليد
ويارب ادمها فرحة
واحفضلك والديك

[سلمى_2008]

السلام عليكم ورحمة اله وبراكته انا يا اختي شاوية وبالضبط من ام البواقي
حنا نهار العيد ماما وبابا يروحو يصليو في الجامع وانا نعدل الصالون ونسجيلهم السنيتاع القهوة مع الحلوات منكثروش منهم بويسك عيد الحم ههه العيد الصغير هو الي نكثرو فيه الحلوات اما عيد الفطر نديرو مقرود وكروكي وغربية وبقلاوة بويسك نموت عليها لازم كل عيد تكون حاضرة المهم كي يروح بابا وماما من الجامع نسلمو عليهم ونقعدو كامل نشربو قهوة كي نكملو يروح بابا يدبح الكبش وديما انا وماما الي نعاونوه ومباعد كل وحدة حاجة ماما تشوط الراس وانا واخواتاتي نغسلو الدوارة ومباعد كي نكملو نسيقو الكوزينة مليح ونبداو نسجيو الغداءاليوم الاول نديرو قليان كبدة والقلب والرية ....... مع القازوز طبعا كي نكملو اختي تغسل لماعن وبابا يروح يغف لعمامي بويسك هو الصغيرفيهم لازم هو الي يروح و في الليل نديرو شوا ويجيو عماامي كامل يتعشااو عندنا والغدو الصباح دير ماما شخشوخة تاع الضفر تغداو ومباعد نروح لدار جدتي ام الام نغفرو لخوالي ونديولهم قسمتهم تاع اللحم وفي الاخير انشاء الله كل عيد ايعم علينا الفرحة يارب

[harachia]

السلام عليكم
حنا ليلة العيد نروحو لدار جداتي نباتو باش الصباح بابا يلقا روحو واجد وزيد باش يصلي فالجامع اللي قدام الدار في هاديك اليلة نعمرو الباسينات ديال الماء باش ادا نقس الماء نلقاوه واجد ونهار العيد الصباح بابا و عمي وزيد راجل عمتي يروحو يصلو صلاة العيد و حنا النساء نخملو الدار كي يجيو من الجامع ما ياكلوش حتى يذبحو الكبش باش يدوقو شوية كبدة حنا ندبحو 3 كباش واحد ديالنا وواحد ديال عمي و التالت ديال عمتي يبداو بديالنا لان بابا هو الكبير امبعد يذبحو و يمدولنا البوزلوف و الرجلين ماما تحكم الراس و مرت عمي الرجلين وانا انقي المصارن و الدوارة وهكا حتى نكملو الكباش في 3 امبعد ماما تنود تدير الفطور تقلي البطاطا و الكبدا الريا و نفطرو بيهم كي نكملو الفطور اندورو لهاديك الدنيا و نتعاونو و نسيقوها و نبدلو و نستقبلو الدياف و فاليل نتعشاو بالبوزلوف ولا العصبان و فاليل نروحو لدارنا وغدوا منداك نديرو الشوا وطعام كاين اللي يحبو ياكلوه كي يجو لعندنا والله يجوز العيد بزاف هبال مع العائلة مع انو جداتي عندها عامين ملي توفات مي قعدنا نروحو نعيدو في دارنا القديمة في وسط الاحباب اسمحولي اني سمت و طولت عليكم و صحى عيدكم

[bassamat]

المشاركة الأصلية كتبت بواسطة harachia

السلام عليكم
حنا ليلة العيد نروحو لدار جداتي نباتو باش الصباح بابا يلقا روحو واجد وزيد باش يصلي فالجامع اللي قدام الدار في هاديك اليلة نعمرو الباسينات ديال الماء باش ادا نقس الماء نلقاوه واجد ونهار العيد الصباح بابا و عمي وزيد راجل عمتي يروحو يصلو صلاة العيد و حنا النساء نخملو الدار كي يجيو من الجامع ما ياكلوش حتى يذبحو الكبش باش يدوقو شوية كبدة حنا ندبحو 3 كباش واحد ديالنا وواحد ديال عمي و التالت ديال عمتي يبداو بديالنا لان بابا هو الكبير امبعد يذبحو و يمدولنا البوزلوف و الرجلين ماما تحكم الراس و مرت عمي الرجلين وانا انقي المصارن و الدوارة وهكا حتى نكملو الكباش في 3 امبعد ماما تنود تدير الفطور تقلي البطاطا و الكبدا الريا و نفطرو بيهم كي نكملو الفطور اندورو لهاديك الدنيا و نتعاونو و نسيقوها و نبدلو و نستقبلو الدياف و فاليل نتعشاو بالبوزلوف ولا العصبان و فاليل نروحو لدارنا وغدوا منداك نديرو الشوا وطعام كاين اللي يحبو ياكلوه كي يجو لعندنا والله يجوز العيد بزاف هبال مع العائلة مع انو جداتي عندها عامين ملي توفات مي قعدنا نروحو نعيدو في دارنا القديمة في وسط الاحباب اسمحولي اني سمت و طولت عليكم و صحى عيدكم

بالعكس اختى انتى تحكى و انا نتخيل
ما طولتى ما والو كلامك جميل
ادامها الله عليكى نعمة وربى يحفضلك العائلة

[omo mazen]

المشاركة الأصلية كتبت بواسطة bassamat

والله نقرا و جسمى يقشعر ربى يعينكم على الغربة
اما الشخشوخة هل هى ضفر او رقا ق ويكفيكم الحال انكم ديروها الصباح
ربى يفضلك والديك ويحفضك ليهم ودوم عليكم النعمة

شكرا اختي بسمات و اما الشخشوخة هي رقاق و نديروا الرقاق ليلة العيد و الصباح غير نطيبوا المرقة

[المعلم78]

سلام لكل الاخوات والله فكرتينا بالعيد احنا في واد سوف نعمل هكا في الصباح نقوم من الفجر انا وسلفاتي الاثنين نبداو في ترتيب البيت والتسياق حتى نكمل ونبدو فى اخراج كل المتطلبات من قصاعي واوانى و....والطابونة وكلش عجوزتي كل عيد تبدا في ارسال صحون القاطو للجيران تبادل الصحون هههههه انا ابدا تلباس اولادي ربي يحفضهم اوالرجال راهم في المسجد والتسابيح عاملة حالة عند قدوم الرجالة من المسجد نعيدو على بعضانا وبابا اب زوجي يبدا يدبح 3خرفان ثم ينادوه الجيران باش يدبح كباشهمونحن نتقاسم السغل بين تشواط الروس وتنصيف الدوارةوعجوزتى وطفلتي اخت زوجي يشووالكبدة واللحم على المراوكل الاعمال تكون خارج ولاندخل الاشياء الا بعد تنضيفها هكدا قانون السلفات حتى تبقى الحالة نضيفةونكون نضفنا الروس وغسلناهم نخبيهموتبدا روائح الشواء متصاعدة والاولاد يحومو والشاي على الجمر ونكونو حضرنا السلطة والقازوز وتجتمع الافراد اسلافي ويرجع بابا للدار ونعملو جلسة الكل موجود وناكل اللحم والسلطة والمشروب فقط تم الشاىوثم يقسم بابا الكباش ويرسل لكل نصيبة والباقي يديره في الثلاجةوننضف الحالة البرا مع ان الداخل يبقى نضيف ونوجدو حانا لزيارة الاعمام والاخوال ونرجعو كان مع المغرب نوجد مقرونة للعشاء مع الزيارات وهكدا لكن الراس نطبخوه بعد3ايام وكدلك الدوارة نصف نعملوه عصبان والاخر يتقلى في الكوكوط مع شوي بصل وتوم وبهارات وطماطم حب وتجى روعةوهكدانتعونونكملو بكري وصح عيد الجميع

[bassamat]

شكرا عزيزاتى نورتونى بعاداتكم مع اختلافها وهذا هو الشىء الاجمل sami_2008
المعلمharachia 78
يعطيكم الصحة

[majda archi]

بالنسبة للعيد عدنا في تقرت
ليلة العيد نبعثو نمضو السكاكين والساطور ويروح بابا عند الدباح باه يوصيه بش يجينا مور صلاة العيد.وفهداك الوقت نكونو نظفنا الدار و فرشنا صالون وفي الليل نديرو الحنة لخواتاتي الصغار في يديهم.صباح العيد يروح بابا وخويا للمسجد وتبنا الابتهالات (الله اكبر اله اكبر ...لا اله ا لا الله...) نهيو طاولة القهوة مع خبز دياري وكي جي بابا نروحو نجرو نعيدو عليه وبعدها نشربو القهوة ويدقدق الباب اجرو جا الدباح وفي لاكور يدبحوه ويجبلنا بابا الدوارة والقلب والكبدة وتبدا كل الواحد يدير في قضية انا نقسم الكبدة والقلب ونغلفهم ويعودو ملفوف واختي تشوي الفلفل فالمقلاة ويكون مقطع صغير مع فلفل الحار بالطبع وكي يتشوا ديرلو زيت زيتون +خل +ملح بالطبع.كذلك سلاطة طماطم بالبصلة الخضرة وسلاطة الجزر المفورةوبعد نزيدولها طماطم مقطع صغير و ثوم وكروية وكمون وتتشوح في المقلاة .وكي يروح الدباح نعلقو الكبش المسلوخ وماما تشوط الراس وبابا يبدا يشوي فاسياخ الملفوف (الكبدو القلب )وانا نبدى نغسل الكرشة و المصارين .وكي تكل ماما تشواط تهز جلد الكبش تنضو من الدم و الاوساخ وديرلو الملح الخشين مع الشب وتحطو فالشمس
بعدها خوتاتي الصغار ينظفو لاكور والكوزينة.ونحطو الطاولةونتلمو كامل على الشواء والسلاطات والبطاطا المقليةوالقازوز وفهدا الوقت يكون ابريق الشاي يطيب فوق الجمر نتاع الشواء.لكن غالبا نهار العيد نتغادو حتال 2 بعدها نغسلو الماعن نلبسو لبستنا والى نروحو لدار جدتي نقعدو ويتلمو عمومي وعماتي نتعشو كسكسي باللحم و قلاية والتي هي دوارة طايبة مع ثوم وطماطم و الحمص يعني مرقة حمرة ومرشوش عليها الدبشة (حشيش مقطفة) وبعدها نروحو لدار ومن غدوا نقطعو الكبش ونمدو منو ونشو مع 10 اللحم والي يجي نحطولو .اما الكرشة نقسموها على 2 نصف للعصبان لي نحشيو فيه السلق والروز والنعناع اليابس وشوي من مصارن والكلوتين والبهاراتونخيطوها ونطيبوها في وسط الشربة باه تتشرب مليح وبعدها نحوها ونحطو العصبان والجاري فالغداء ونروحو نعيدو على خوالي وخلاتي .وفالعشاء نشويو كوطلاطعلى الجمر.اما نهار ثالث يشرف سي بوزلوف للكوشة بعد ما داويناه ونتغداو بيه.صح عيدكم مصبقا

[أم يحي صهيب]

السلام عليكم لبناات كي دايرين خير
بما انني جديدة في المنتدى لقيت الموضوع يناديني
والله والله انا نقرا في ردوودكم وابكي بحرقة والله وقلبي معطووب
تفكرت العيد في بلاادي وفي داارنا مع والديا لعزااز يا يما الغربة شحال اصعيبة وكيما العادة خهادي المرة تاني راح نعيد هنا ما درتش حساابي من قبل حيت مشيت في جويلية وراني غير ما جيت في 16سبتمبر ولكن قدر الله ما شاااء فعل قعدت 3 شهووووور في البلااد وما كرهتش نزيد نقعد حيت بااطل والله

وانتوما حسستوني بلدة البلااد والعيد الاضحى والتكبير صبحية العيد والحولي منين نديرولو الحنة ويوم عرفة يا ويلي مالي نبكي راه رااسي وجعني
ما كرهتش نعيد في البلاااد ولكن الظروووف ان شااااء الله خير

ايوا عندي 5 سنين ما عيدتش مع العااايلة وعجوزي حتى هي في البلااد وراح نعيدو كي العاادة وحدنااا وبراااسنا
ايوا العيد بفرنسا يا اخواااتي ما في شئ نروح للمسجد ونجي نرقد الا دبحتي ما تحسي بيه ولا تشوفيه والله
والله المستعاان
ايوا لبناات يا ريت كل اخت تحسسني بالعيد هون

اختكم سارة المغتربة