ارجو المساعدة فى البقلاوة

[بسمة الرحمان]

السلام عليكم
اخواتى من فضلكم عندى مشكل فى البقلاوة وارجو المساعدة
انا ندير المقادير المعتادة وهى 3 كيلات فرينة بكيلة سمن وشوية ملح ونعجن والحشو 3كيلات كوكاو او لوز بكيلة سكر مع الماء زهر عادى يعنى وكانت تجينى هايلة ولكن للاسف صار عندى مشكل وهو انو كى تكون فى الكوشة يخرجلى السكر ما بين الحبات تاع البقلاوة ويحرق ويصير لونه مثل الكرامبيل
وبعد ما طيب ييبس عليها فارجو المساعدة ارجوكم لانى حابة نطيبها فى العيد انشاء الله
الله يوفقكم ويعتقكم من النار.

[ياربي اني راضية]

يااختي ربي اجازيك انا هدا المشكل الي عندي ودايما اجوايه نتاع الحبة نصيبهم محروقين ومعرفتش منين مليح كي درتيها عندي هدا الرابط والاخت ام سامي دايرة سكر قلاصي ماشي السكر العادي https://87.98.243.211/vb/showthread.php?t=646503

[lofi]

سلام هدا المشكل كان عدي ولقيتلو الحل وأنا مجرباتو
راكي تكثري في السكر بزاف
لازم ديري السكر بشوي بشوي وخلطي
إذا بدات تبان حبيبات السكر توقفي

[kamouna]

المشكل هو انك تعملى ماء زهر بزاف لازم تديرى غير
قيس ما يبلل الحشوة فقط ما تزيديش
خاطر كى تطيب تفيض و يخرج السكر من فوق

[امل العاتر]

أختي يا إما راكي مزودة السكر وإما الحشوة طرية يعني مزودة ماء الزهر ياسر والله أعلم

[asma_83]

راكي مكثرة ما الزهر لهذا راهي تفيضلك

[❣سڪڕ❣]

وسؤالي كيفاش نعرف الكمية المناسبة للحشو
أحيانا تجيني طالعة بزاف وأحيانا هابطة
هل على حسب حجم السنيوة يكون الحشو ؟

[بسمة الرحمان]

شكرا لكن على المرور اخواتى
ولكن انا تانى كنت نظن انى نكثر فى الماء زهر او السكر وقللت منهم وانما ما كاين حتى نتيجة والمشكل انى كنت نديها من قبل وبنفس المقادير وتجى هايلة
ودرك ماعرفتش السبب
ربما نديرها كيما قالت الاخت ( ياربى انى راضية) ربما تنجح وشكرا لها ولكن جميعا

[الكوثر2]

الالكيلات تاع الباقلاوة 4 كيلات بكيلة والحشو توجديه قبل بنهار باه يدوب السكر وينشف من الماء
الحشو يكون فيه كواكاو ولا لوز مرحي شوية خشين باه يمد حخم للباقلوة وشوية رقيق باه يشد روحو
ودرجة الحرارة تكون قاوبة والفور يكون سخون كيتحطيها وسطو خاطر كييكون ماسخونش بزاف العجينة تبقى طرية والحشو يدوب ويطبع العجينة ويخرج
كيما راني نشوف ليام هادو الكهرباء راهي ناقصة والفور ضعيف
سمحولي على الاطالة

[بسمة الرحمان]

المشاركة الأصلية كتبت بواسطة الكوثر2

الالكيلات تاع الباقلاوة 4 كيلات بكيلة والحشو توجديه قبل بنهار باه يدوب السكر وينشف من الماء
الحشو يكون فيه كواكاو ولا لوز مرحي شوية خشين باه يمد حخم للباقلوة وشوية رقيق باه يشد روحو
ودرجة الحرارة تكون قاوبة والفور يكون سخون كيتحطيها وسطو خاطر كييكون ماسخونش بزاف العجينة تبقى طرية والحشو يدوب ويطبع العجينة ويخرج
كيما راني نشوف ليام هادو الكهرباء راهي ناقصة والفور ضعيف
سمحولي على الاطالة

شكرا اختى الكوثر راح تانى نجرب كيما قلتى ربما هدا هو المشكل لانى ما نخليش الحشو يرتاح .
شكرا مرة ثانية ولكل الاخوات على المساعدة
صح فطوركم

[sonia.morchid]

شوفي أختي مقادير البقلاوة نتاعك راهي صحيحة نقول تبع الخطوات التالية وبربي انشاء الله تنجح معك ,
1- الحشوة لازم تكون متماسكة شويا ماهي جارية ما هي يابسة(من الاحسن حضريه بوقت وحط فالثلاجة)
2- الكاوكاو أو اللوز يكون مرحي خشين ليس بودرة
3- الطبقة لي تحط فيها الحشوة ما لازمش تدهنيها
4- ما تتقبيش الطبقات نتاع البقلاوة
5- المارغرين ولا الزبدة لازم تغليها مليح عل نار هادئة حي يتبخر الماء لي فيها وتصفيها وتدهن بها الطبقات
6- لما تجي تقص البقلاوة ما تضغطيش بزاف (نقص بلا ما نفصل الحبات)
أي استفسار أنا في الخدمة

[بسمة الرحمان]

المشاركة الأصلية كتبت بواسطة sonia.morchid

شوفي أختي مقادير البقلاوة نتاعك راهي صحيحة نقول تبع الخطوات التالية وبربي انشاء الله تنجح معك ,
1- الحشوة لازم تكون متماسكة شويا ماهي جارية ما هي يابسة(من الاحسن حضريه بوقت وحط فالثلاجة)
2- الكاوكاو أو اللوز يكون مرحي خشين ليس بودرة
3- الطبقة لي تحط فيها الحشوة ما لازمش تدهنيها
4- ما تتقبيش الطبقات نتاع البقلاوة
5- المارغرين ولا الزبدة لازم تغليها مليح عل نار هادئة حي يتبخر الماء لي فيها وتصفيها وتدهن بها الطبقات
6- لما تجي تقص البقلاوة ما تضغطيش بزاف (نقص بلا ما نفصل الحبات)
أي استفسار أنا في الخدمة

شكرا لكى اختى وبادن الله راح نجرب كل طريقة ما كنتش درتها من قبل وشكرا مرة ثانية على الرد
صح فطورك وربى يجعلك من عتقائه من النار فى هدا الشهر الفضيل.