ضحكت عليّ

[مشكلتي]

السلام عليكم ورحمة الله تعالى وبركاته

شكرا على المساحةالطيبة هذه كي شفتها ريحت انا غرضي نحكي همومي ونح على روحي راه تخف بالحكي
بلاك تظهرلكم مشكلتي هينة ، بصح راها عندي دايرتلي القلقة ،نختصر عليكم المشكل ونحكيلكم .
أنا شاب كنت نقرا باكلوريا علمي وجبت الباك تقدير جيد ، ورحت نقرا شعبة علمية ولكن للأسف لظروف نفسية ومالية إلخ ما كنتش جايب روحي واصلا صراولي ضغوطات خللاتني نوقف مساري الدراسي ونحبس عام كامل وبطلت ذيك الشعبة
ومنيش مندم عليها ذرك . لأنو لو عاد الزمن مرة اخرى كنت راح ندير نفس القرار اذن مانيش نااادم اطلاقا .
قريت عامين وحبست عام ...الصراحة في هذو الثلث أعوام جاتني حالة نفسية خلاتني نكره القراية وجد القراية وكل ما يتعلق بيها لكن الأهل والاصدقاء حاولو معايا
باه نروح نعاود نسجل بالباك في شعبة اخرى ونقراها المهم رضخت وروحت نقرا على وجه الوالدة أما ففقدت الرغبة اصلا في القراية
مالا هزيت الملف تاعي وطرقت أبواب الجامعات والكليات لكنهم رفضوني كانوا يقبلوا فقط الباك الجديد
انا في الاخير تأخرت على موعد التسجيل وقربت لشهر ديسمبر فوجدت كلية العلوم الانسانية والاجتماعية اخيرا قبلتني بعد تحلال طويل.
اذن درت شعبة ادبية وقريتها وفي بالي نقرا هكذاك وخلاص ماعندي حتى نفحة في القراية كان الي يسقسيني هذا انت درت شعبة أدبية نقلوا اذا الاساتذة يخلصو قع كيف كيف ها ندير مادة ادبية وخلاص ونعشي استاذ كيما الاخريين تاع الفيزيا والرياضيات .
المهم يخي كملت ودرت الماستر وجات المسابقة وسجلت في الابتدائي لانو عندي الليسانس اما الماستر راني نقرا فيه
كي سجلت نلقى العشرات من الشعب خاصة التقنية والاقتصادية الي معندهم حتى علاقة بالتعليم مع ذلك مشاركين معانا ومزاحمينا مع انهم هم عندهم الفرص في الشركات والمؤسسات وحتى يفتح لروحو
بينما أنا عندي الأمل الوحيد في مهنة المعلم الي بعض الشيء تضمنلي حياة كريمة على الأقل بتعفف .
أنا منيش نلوم في هذو الطلبة لا والله حاشا انما نلوم في الدولة .... يخي على الأقل يعطيونا الأولوية عليهم لا لشيء سوى أن هذه هي فرصتي الوحيدة باه نضمن مرتب قار وكافي .بينما هو عندو فرص كثيرة .
أنا منيش نحكي من خيال هكذاك لأني اليوم فقط رحت ندور على خدمة رحت لوحد المركز تاع فلاحة عارف بلي ماعندهاش علاقة بالشعبة تاعي ولكن قلت ندير ألاسباب وخلاص
مالا دخلت لقيت وحدة تخدم ثم مالا قتلها يا مدام اذا راهم يشدو في ملفات تاع الخدمة ولالا ؟ . قتلها أنا نخدم أي خدم بيرو عساس الي جات مرحبا بيها .نخدم كلش أنا منحبسش . مالا قاتلي انت وش عندك قتلها والو ماعندي حتى ديبلوم أنا جيت هكذاك برك سجليني بالباك .
المهم قاتلي وش راك دير ذرك قتلها نقرا ماستر مالا قاتلي هيه وش داير ليسانس تاعك قتلها التخصص تاعي فلسفة مالا انفجرت بالضحك وتضحك وتضحك وتضحك أنا حسيت بالحرج مالا قعدت نقللها نورمال سجليني بالباك برك نخدم الي جات بثمنيمية راضي ولا حتى ستمية نخدم عساس نورمال ولا نشد أي بيرو راني نعرف للاعلام الآلي .
لكن أنا نهدر وهي تضحك حتى جمعت الخدامة عليا . ومبعد حسيتها ندمت وقعدت تصلح في الغلطة تاعها مالا قاتلي اعطيني نمروك واسمك عطيتملها وجيت خارج .
وانا نمشي مروح للدار حاس بحجرة في صدري حسيت بعمري راح خسارة كي خيرت هذه الشعبة حتى الواحد باه يعاود الباك ويقرا راه راح ليه الحال
نخمم في هذه الدنيا العوجة لوكان جات البلاد مسقمة والمواطن محترم فيهاالديبلوم = منصب ، منحوسش نفهم المهم عطيتني ديبلوم ماتقعدش تضحك عليا انا نحوس توفرلي منصب بيه وإلا الواحد يقرا قراية وبعد يضحكوا عليه على الشعبة تاعو اذن سكرها ونح هذه الشعب مش تدخل فيها الطلبة ومبعد تضحك عليهم وتحقرهم في النهاية
الديبلوم هو الديبلوم مهما كان نوعو في الدول المتقدمة ويحتاجو لجميع التخصصات بنفس الدرجة
في عوض ما يقضو على البطالة في القطاع الاقتصادي يروحو بفتح المصانع يروحو يبعثو الناس دير تعليم المهم يسكتوهم ويشروا السلم الاجتماعي والضحية هو الطالب الي داير تخصص أدبي .
حبيت نفهم جميع الناس أن الطالب الأدبي هوطالب مثقف مثلو مثلك وليس أقل منك درجة بالعكس في الدول المتقدمة هو من نخبة المجتمع الي يقودو الوزارات والجمعيات والأحزاب والسياسة وهوما الي يأسسوا مراكز الدراسات وهوما اكثر شي من صناع القرار في البلد
انا ضد انك تضحك على أي ديبلوم تاع طالب مهما كان نوعو في النهاية هو طالب جامعي مثلو مثل خيوتو.