أمي والعائلة بأكملها في خطر عظيم..

[مشكلتي]

سلام
مشكلتي بدون مقدمات هي أني نخمم في حال أمي. هي كبيرة شوي -60سنة- كبرتنا وعلمتنا كامل رغم أنها أمية يعني توصينا ديما على القراية حتى نجحنا كامل والحمد لله كل واحد في بلاصتو. المشكلة أنو هي مازالت أمية وتغيضني أنو ما نقصت علينا والو وحنا عيينا نعلموها. بكري كيكنت فليسي ديما نحاول معاها في كل خطرة بطريقة مختلفة وفي كل خطرة تردني وتصدني بقوة وتقولي خليني أنا ما بقاليش ومانيش راح نهز. وهي صعيبة شوية نخافها كيتتقلق.عييت معاها تروح للمسجد والو خاصة و أنو النسا لي يقراو لهيه كامل عندهم بزاف ملي بداو وراهم متعلمات لاباس دوك. ولحد الان مالقيتش فوج جديد تبدا معاه. وأصلا ظروف الدار ما تسمحلهاش تقرا على مدى العام لأنو رغم أنو كبرنا كامل بصح كامل عندنا شغالاتنا. لي يقرا ولي يخدم والأغلبية نخرجو خارج الولاية. وتبقى وحدها مع الدار. والله نتأسف على هاذ الشيء خصوصا وأنو حانتحاسبو قبلها عند ربي سبحانو. ولي يحرقلي قلبي كتر أنها تعبي وقتها بالقال والقيل وكينقولولها حرام والحسنات لي تكسبهم من صلاتها وكلش يروحو فهاد الشي ماتشتيش وتلقالنا ديما أعذار تقوللنا مثلا راني نعاود وش كاين منيش نكذب ولا ساعات تنفي بلي هدرت في فلان وفلانة أصلا. والله عيينا نفهموها بلي مالازمش هكا. انصحوني خاوتي بارك الله فيكم كيفاش ندير بش نقدر نقنعها بلي كاين لي في عمرها ويهزو ويتعلمو نورمال. وكيفاه نقدر نعلمها وانا نقرا في ولاية بعيدة على ولايتي. وكيفاش نقدر نحيلها الغيبة هادي ونقنعها بلي حرااام.
جزاكم الله خيرا