صديقتي اختي

[مشكلتي]

السلام عليكم و رحمة الله و بركاته
أرشدوني لأساعدها ليس لأنها مجرد صديقة بل هي اختي و اكثر من ذلك
عندي صديقة و هي احتي في نفس الوقت و هي مخطوبة الآن و الانسان لي خاطبها انا لي كنت سبب في جمعهم
الحمد لله انا كانت نيتي صادقة و حبيت يجتمعو في الحلال و يتهناو
المهم كيفاه كان هذا.. انا كان وحد الصديق يقرا معايا و هو حاليا يخدم تلاقينا صدفة و صديقه كان حاب يخطب و قالي اذا تعرفي وحدة بنت فاميليا و وووو ... انا قلتلو على صحبتي و هذا بعد مشاورتها طبعا و انا على حساب واش قالي عليه قلت انو انسان طيب و حاب يدير الحلال و فيه معاني الرجولة و يصلح باش يكون الراجل لي يعوضها حنا والدها ربي يرحمو .. و كان عندها مشاكل فالدار حبيتها تخرج منهم و تشوف انسان لي يعينها في هاذي الدنيا و هي كانت مريضة و لكن مع الرقية تحسنت
و تعرفو و حكاتلو كامل حكاية مع مرضها و كلشي و هو ماقال والو حتى هوما ف دارهم كاين مثل هذه المشاكل و انا بدوري كنت نقلها حاباتك تدخلي بالحلال و مانيش حابة تحكي معاه غير هكذا قاتلي اوكي
و راح لدارهم في الاول ماحبوش لخاطر يسكن بعيدو خافو عليها راكم تعرفو تخمام الام و هي ظغطت على دارهم و قاتلهم لازم تقبلو هذا انسان مليح و ولد فاميليا و جاب والديه و خطبو عادي
و قلت الحمد لله تمت على خير و انا كنت خايفة مانحبش ندخل روحي بزاف ففي هاذي المواضيع نعرف بللي المفاهمة صعيبة شوية ... و هو بعد اسبوه من الخطبة قالها اني حاب نديرو الفاتحة و العقد .. قاتلو اوكي
و مبعد كل مرة تجي سبب و مرة هو ماشي واجد .. و مع الوقت كان يسقسي عليها بزاف و يعيطلها كل وقت و يتقلق عليها و هي حتى و اذا كانت مشغولة ترد عليه و ماتقدرش تقولو مانقدر نحكي معاك
و بعد مدة و بما انو يخدم بعيد على دارهم راح ف عطلة و من هذاك الوقت لاحظت بلي تبدل بزاف و ماولاش يعيط كيما كان ولا يتقلق من حوايج كيما كان من قبل مثلا كاش واحد يعيط عندها و يقلقها يقولها اعطيني نيميرو تاعو ووو ....
المهم هو ظهرت فيه بزاف تغيرات و حتى بدا يكذب بزااف و وقت لي مايعيطش يقولها كنت نخدم ووقت آخر هو يكشف روحو ... المهم من هاذاك الوقت و ماراهش يهدر على الفاتحة او العقد كيما تفاهمو و هي باش تقولو حاشمة منو .. قاتلي انا حكيت معاه ماشي كل وقت نعاودها هاذي ماشي هدرة لي تتنسا و وصلت وين قاتلي حابة نبطل الخطبة انا ماكنت نظن يكون بهاذي العقلية لانو فالاول كان انسان ماشاء الله
انا قلتلها ماتتسرعيش في اخذ قراراتك و بالاك صح راه عندو ظروف .. لكن ماشي كامل هكذا صح راه يخصر بزاف
طولت فالهدرة ان شاء الله تكونو فهمتو شوية
انا قولولي دوك واش نقولها و واش ندبر عليها و الله صديقتي و اختي و نتمنالها كل خيــر مانيش حابة تدير خطوة تندم عليها