مساعدة في وصفات بالكرام فراش

شوق الليالي · 2014-10-11, 22:31

السلام عليكم حبيباتي
وعيدكم مبارك للجميع
حبيت تعطوني وصفات طبخ بالكرام فراش ان امكن في اقرب وقت
وربي يجازيكم

أم ياسين الزهراء · 2014-10-12, 08:23

تصلح للغراتان وللعجائن وللمحاشي

شوق الليالي · 2014-10-12, 10:44

ربي يجازيك اختي لو كان تحطيلي بعض الوصفات

إلهام07 · 2014-10-12, 12:40

شوفي انا نستهلك الكرام فراش بكميات كبيرة ضرك نقولك واش ندير بيها عادة :

1- هذي الوصفة تخرجلك روعة ماكانش اللي ماتعجبوش
www.djelfa.info/vb/showthread.php?t=1611293

2- نديرها في الحساء كل أنواعه وهذو بعض الوصفات اللذيذة اللي ماكانش اللي ماتعجبوش :
https://www.djelfa.info/vb/showthread.php?t=1461886
https://www.djelfa.info/vb/showthread.php?t=1525961

3- نديرها في هذا القراتان روووووعة بمعنى الكلمة
https://www.djelfa.info/vb/showthread.php?t=1622749

4- نديرها فوق البيتزا يعني كي ندير الصوص والتزيين نزيد نوزع كميات صغيرة منها فوق البيتزا ونحط الجبن وندخلها للفرن وقريبا بحول الله نحطلكم البيتزا من مطبخي بالتفصيل
الكرام فراش فوق البيتزا ماتخليهاش تنشف

5- قراتان الشفلور وصفة أم محمد تاج رائع حتى اللي مايحبش الشفلور بهذي الوصفة يعجبو بالسيف الوصفة راهي تحت من عند أم محمد بصح أنا طريقتي مغيرة شوية عليها
قراتان الشوفلور باللاكرام فراش مممممممم

مرقي مرقة بيضاء بشوي جاج وخليها تخثار حتان يولي عندك زوج كيسان مرقة واحد نحيه صفيه وزيديلو زوج مغارف فرينة ورديه يخثار كي يخثار ضيفيلو الفروماج روج كمية كبيرة ونص كاس كرام فراش ومعدنوس حسب أفراد العائلة يحبوه ولالالا وخلطي مليح حتان يتجانسو وخليه بجيهة
كي يطيب الشوفلور تاعك يعني غليتيه في شوي ملح أقليه بخلطة البيض والفرينة وأقلي معاه شوي باطاطا لا أولادك كيما ولادي مايحبوش الشوفلووور
ستفي البطاطا تاعك والشوفلور في صحن الفور وهذاك الجاج فتتيه عليهم ولوحي عليهم الكريمة لي خدمتيها وحطيها في الفور كي تحكم روحها أجبديها وبالشوي أسقيها بنص الكاس لي نحيتيه الثاني وعاودي رديها حتان تحمار مليح
اذا حابيتيها ماتجيكمش ناشفة كي تخرجيها كملي نص الكاس تاع المرقة لي بقى انا صراحة خليتها ناشفة كيعاد معاه الشوربة بصح لوكان وحدها راني كملت سقيتها باش نجوزو بيها

6- أيضا ندير بيه ارز بالكرام فراش إذا تحتاجي نكتبلك الوصفة راهو من اروع وصفات الارز هو يجي معاه اسكالوب وفطر مكلف شوية بصح بنة هبال

7- نديرو مع اسكالوب ونقدمو مع بطاطا مقلية أو محمرة أو سوتي إذا تحتاجي طريقتي في الاسكالوب أو في البطاطا المحمرة أو سوتي راني في الخدمة

8- أخيرا يجي فوق لي كيش أو في المعجنات من داخل فوق الحشو مثلا نتاع سزفلي تحطي شوية كرام فراش وتغلقي العجينة باش مايجيش الحشو ناشف

هذا واش تفكرت وأي أسئلة أنا في الخدمة

شوق الليالي · 2014-10-12, 15:53

اللللللللللللللله اكبر شكون ردت عليا هههه
ربي يجازيك يا اختي على ردك ربي يرزقك الجنة يااااااااااااااا رب
يا اختي كملي خيرك واعطيني وصفة الارز عندي الفطر والكريمة
وطريقة الاسكالوب مع الكريمة
نقولك حاجة خرجي كامل واش كاين في جعبتك[

شوق الليالي · 2014-10-12, 15:53

على فكرة تقريبا وصفاتك كامل طبقتهم وخرجولي ماشاء الله

إلهام07 · 2014-10-13, 13:39

اقتباس:

المشاركة الأصلية كتبت بواسطة شوق الليالي

اللللللللللللللله اكبر شكون ردت عليا هههه
ربي يجازيك يا اختي على ردك ربي يرزقك الجنة يااااااااااااااا رب
يا اختي كملي خيرك واعطيني وصفة الارز عندي الفطر والكريمة
وطريقة الاسكالوب مع الكريمة
نقولك حاجة خرجي كامل واش كاين في جعبتك[

مافهمتش علاه تفاجاتي كي شفتي الرد نتاعي

ياخي ماشي " باراك اوباما " هو اللي جاوبك راني عبد كي العباد برك

شوفي وصفة الروز هزيتها من عند هذي الاخت بصح غيرت فيها شوية:
https://www.djelfa.info/vb/showthread.php?t=1458225

انا درت كاس كبير روز حوالي ربع كيلو روز
قليت حبة بصلة شرائح في الزبدة وشوية زيت حتى بدات تتحمر ثم زدت الاسكالوب مقطع + فطر + ثوم وقليت مليح ثم زدت الملح وفلفل الاسود وثوم بودرة قليت غير 1د ومرقت بشوية برك ماء + 2 جومبو وخليتها على نار هادئة تغلي شوية ثم اضفت الكرام فراش وخليتها غلات غير شوية على نار هادئة وخلاص
ماتخلطيش الروز مع الكرام فراش حتى وقت التقديم سحنيها ثم اضيفي الروز وماتخلطيش كلش غير واش رايحين تاكلو فقط

الاسكالوب مع الكريمة نديرو كيما شرحتلك الفوق نفس الشيء

أي أسئلة أنا في الخدمة

شوق الليالي · 2014-10-13, 21:00

لالا يا اختي هدي كانت مداعبة مني ليك وليس اكتر
ربي يجازيك على الوصفة ورايحة نجربها هادي السمانة بحول الله
شكراااوربي يناولك كل ما تتمناي