وصفات يوم الأربعاء24-04-2013
شرمولة القرنون:
2 حبات بصل مقطع مربعات و نرشهم بشوية فرينة ، ملعقة زبدة و فنجال شاي زيت و صدر دجاج مربعات و فنجال شاي ماء دافئ و 2 حبات طماطم مقطعة مربعات و ملعقة أكل طماطم مصبرة محللة في الصلصة التالية: نص كاس ماء دافئ و 2 ملاعق زيت و 2 سنات ثوم و معدنوس و حبة طماطم مطحونة نحتاج عصيرها و فلفل عكري.
و نحتاج كمشة كبيرة معدنوس و كاس روز مغلي و كيلو قرنون منظف و مغلي و مقطع دوائر و القنون نغلوه في ماء و ملح و فرينة و خل و قطعة ليمون.
في مقلة ندير زبدة و الزيت و نقلي البصل مدة 15د ثم نضيف الملح و الفلفل و فلفل عكريو شوية كمون و صدر الدجاج مقطع صغير و نزيد نقليهم 15د أخرى ثم نضيف 2 طماطم مكعبات و ملعقة أكل طماطم المحلله في الصلصة السابقة و معدنوس رقيق و فنجال ماء سخون و الروز و القرنون المقطع و المغلي و نخليهم 10د و نطفي.
طمينة بلمسة عصرية:
في طاجين نحمص رطل سميد بعدها نحطوه قي ليان و نرش عليه فنجال أتاي ماء زهر بالتدريج و نخليه يرتاح 15 أو 20د
في ليان آخر ندير 250غ غرس و نطروه بشوية ماء زهر + ذرة قرفة و قرنفل مطحون و 2 ملاعق أكل سميد محمص و نخلطهم كلهم و نديرهم كريات صغار قد حبة الحمص و نخلوهم يريحو.
بعدما ارتاح السميد نزيدلو نص كاس زبدة ذايبة + 2 ملاعق أكل حلوة ترك و كاس عسل عاقد و 2 ملاعق أكل معجون مشمش و نخلط الكل.
نعمل كرات طمينة و ندير في وسطها حشوة الغرس و نغلق عليها مليح و كي نكملهم كلهم ندير عليهم قطرات عسل ثم نرش عليهم بيستاش أو أي مكسرات و نحطهم في لي كيسات.
طاجين الحلو :
كي نحبو نحضرو طاجين حلو نجرب هاد الطريقة و قال الشاف انو يجي رووووووووعة
ناخذ كمية العينة ( البرقوق) و المشماش الجاف و الزبيب نحطهم في كاسرونة و ندير معاهم الماء و فنجال خل و مغرف ملح و ننقعهم نص ساعة ثم نصفيهم من الماء و نلاحظ الماء أصبح اللون تاعو أسود ثم نعاود نشللهم بماء آخر و نصفيهم و نحطهم في طاجين + سكر + قشور الليمون+عود قرفة+قشور برتقال و نطيبهم 10د و نمرق عليهم إما بنص كاس ماء بارد+ نص كاس ماء زهر أو نص كاس ماء زهر + نص كاس عصير برتقال و ممكن نديرلو تفاح مفور و شوية زبدة و نحطوه فالطبق و نحط عليه الحلوة تاعنا.
بسبوسة:
2 كيسان خبز يابس مرحي ، نص كاس سميد حرش، 4 بيض ، كاس سكر ، مغرف قهوة قشور ليمون ، خميرة حلوة ، فنجال أتاي زيت ، و نخلطهم و نفرغهم في مول على ورق زبدة و نثقبها فالوسط ( نخلط المواد الجافة ثم نزيد عليها السوائل) و نغطيها بورق ألمنيوم و نثقبها و نطيبها 30د و كي اطيب نديرلها الشاربات
أكلة للصغار من سنتين إلى 3 سنوات:
2 حبات بطاطا مقطعة مربعات و مفورة ، نحطها في مقلة مع ملعقة زبدة و نديرها على النار حتى تحمار شوية ثم نديرها في مول الغراتان و ندير عليها جبن أبيض و شوية ملح و فلفل و ندير عليها صفار البيض و ندخله الفرن 5د و نطفي عليه و نقدمها مع سلطة خس.
تم بحمد الله
لا تنسوني بدعوة خير