ساعدوني و لو بدعاء

[مشكلتي]

السلام عليكم و رحمة الله تعالى و بركاته
انا شابة عمري 22 سنة أدرس سنة سادسة طب,, و بقالي عام نتخرج ان شاء الله يا رب.. أبي قاضي و أمي برلمانية
مشكلتي أو بالأحرى " حكايتي "
منذ حوالي 5 أشهر تعرفت على واحد { و علابالي بأنو هذا الشي خطأ },,
شاب -يكبرني ب 8 سنوات - توفي باباه { ربي يرحمو ان شاء الله} كي كان يقرا سنة أولى ثانوي ,,,
للأسف و غصبا حبس قرايتو و بدا يخدم باش يصرف على ماماه و ختو و راكم نهار يخدم و نهار لا لا حتى وين استقر ,,
انا كي عرفتو كان يخدم - روسوفور- في حافلة ,, يسكن في فيلا فيها ايطاج واحد و راه يبني في الايطاج الزاوج يلي على أساس نعيشو فيه ان شاء الله بقالو فقط بضع الصوالح الخفاف ,,
ما نكذبش عليكم والفتو بزااااااااااااف بزاااااااف,,, ملي عرفتو يقولي حياتك ماشي كيما حياتي و انا نقولو ربي سبحانو ماشي كبيرة عليه أنو يرزقك,,
كل يوم يقول نجيب دارنا نجيب دارنا و أنا قاعدة نأجل,, علابالي بلي رح يرفضوه كيما رفضو يلي قبلو ,,,
و بعد صعوبة و خوف كبيييير من ردة فعل والديا جا خطبني على سنة الله و رسوله عليه الصلاة و السلام,,,
و لكن رفض شنييييييييييييع بشع للطرف ,, راني نكتب و دموعي ويدان
ماما يلي كنت حاسبتها تحبني و تحس بيا قاتلي هبلتي تلوحي في روحك للتهلكة؟ كي يبقا هو التالي في الدنيا ما تتزوجيش معاه نتي ما تعرفيش صلاحك,, !!
و بابا شبع عليا ضحك قالي كيفاه أنا بنتي الوحيدة نلوحها للخردة !!,,
مسكين راح يحلل في ماما و يهدر و يبكيلها و اأنا نبكي قالتلو أنا بنتي ما يديهاش واحد كيما نتا
قلبي راه يتحرق و علاه الزوالي ماشي من حقو يعيش في هذا الدنيا؟ ,,
صح نحترم والديا و نحبهم و رضياتهم سبق من كلشي بصح علاه راهم يعذبو فيا هاك و الله ما عرفت و لا فهمت,,, هذا الإنسان محترمني و دايرلي قدر و يخاف عليا و بعد الزواج ياك راح يخليني نخدم و الرزق على ربي سبحانو حتى ماماه مسكينة رغم كامل واش عانات في حياتها بصح ديما البسمة في وجها كي تلاقيت معاها مسكينة قاتلي غير نشوف ولادو قبل ما نموت { تعاني من مرض السرطان } راه حامل هموم و هموم و هو يشوف في ماماه مسكينة تسوفري و باباه في القبر و زيد والديا ماكانش علابالي بلي القسوة في قلوبهم كامل هاكا و حقارين بالعين كامل هاك حقروه ,,,,,و الله ما قدرت,,
فهموني برك كيفاش ندير انا ضركا؟ و واش ندير لوالديا باش يقبلو؟ و يلي يقولي خوذي راي والديك أنا لوكان ناخذ رايهم و الله و يجي يخطبني ملياردير العالم مش رح يقبلو ,, يا ليت يفهمو أنو بنتهم كبرت و راهي تشوف في الصح من الغالط و أنا عرفت روحي غلطت ألوغ أعطوني فرصة نصحح خطأي ,, علابالي لوكان نبقا نتبع فيهم و الله نلحق لسن الخمسين و ما يزوجونيش ,, أنا ماما فكرها متحرر بزااااااااااااااااااااااااااااااااااف و أنا عكسها تمام هي تقولي تقدري تعيشي بدون رجل في هذا الحياة و تحققي كامل أحلامك باش تتزوجي باسكو أنا مام تزوجت في السن 38 و جابتني غير أنا,,,, أوكي ماما أنا حلمي يرجع عندي طفل صغير بين يديا من لحمي و دمي معليش نحقق هذا الحلم ؟ معليش نتزوج ماما؟ ,,,,,
ساعدوني و لو بدعاء
أختكم في الله
سارة

[هـــدوء]

أميل كثيرا إلى عدم تصديق هذه القصة!

[ع.عيسى]

22 عام تقراي سادسة طب ؟؟...الله يبارك ...... عندما قرأت قصتك احسست انها مأخوذة من فيلم هندي ..... على اي حال اذا كانت قصتك حقيقة وهي طبعا مستبعدة الله يعينك ،

[محارب الحمق]

لو افترضنا أنك نلت الباكالوريا في سن 17, 17 + 6=23. المهم, ما بني على باطل فهو باطل. العلاقات قبل الزواج محرمة. نقطة الى السطر

[المطمئنّة]

وعليكم السّلام ورحمة الله وبركاته
مادمتِ تعرفين أنّكِ مخطئة فعليك أن تقطعي علاقتك مع هذا الشّاب وهذه أوّل خطوة يجب أن تقومي بها، فالزّواج رزق كما تعلمين وإنّ الرّزق يُقطع عن العبد بسبب الذّنوب، وتذكّري أنه من ترك شيئا لله عوّضه الله تعالى خيرا منه وأنّه من يتّق الله يجعل له مخرجا ويرزقه من حيث لا يحتسب.
بعد هذه الخطوة عليك بصلاة الإستخارة واللّجوء إلى لله تعالى بالدّعاء، فمهما كان موقف والديكِ صارما إلّا أنّ الله على كلّ شيء قدير وبيده تدبير أمورنا كلّها والحمد لله أن ذلك بيد الله وليس بيد البشر، تذكّري أنّ الله تعالى معكِ إن اتّقيتِه ثمّ أحسنتِ الظّن به.
أرجو من الله تعالى أن يعينكِ وأن يرشدكِ لما فيه خير لك في دينكِ ودنياكِ.
في أمانِ الله وحفظه

[الفتاة السعيدة]

علاقات.قبل.الزواج.محرمه

[لمسة ابداع]

{وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُونَ} [البقرة: 216]}.
واش رايحة نقولك خليها على ربي لعاد كاتبلك رايحة تديه
عليك بالدعاء فسهام الليل لا تخطء

[رندة.]

ربي يفرج عليك ويوفقك في قرايتك ان شاء الله
والزواج مكتوب ربي، ان شاء الله ربي يرزقك الزوج الصالح

[{ حديث الوجدان }]

بلا مانكمل نقرا قصتك حبيت نسقسيك

انت ديتي الباك في كرش امك ؟

[فافا مينوشة]

ههههههههه تاثير مسلسلات الترك والخليج راه مفعولو لحد الهلوسة كيما قال الاخ ويقتا ديتي الباك ورجعنا لنفس الافلام انا غنية ذات مستوى وحبيت واحد فقير ومش لاحق ورفضوه والديا هههه

[قدور بن عاشور]

أبوك قاضي و أمك برلمانية!!!!!!
و الله مهنة الروسوفور الحلايلية أشرف من مهنة والديك معا.

[الباحث الجديد]

22 سنة قرا سنة سادسة طب !!!!!!!!!!!!!!!!!!!!!!!!!!!!!!!!!!!!!!!!!!!!!

[red23i]

ربي يفرج عليك اختاه

[زهرة جوري]

ربي يهديك على هذه الموضوع