عندما يغيب الرجل

[مشكلتي]

باختصار شديد. انا بنت توظفت خارج المدينة و لازم نكون في مقر العمل على 8 تع صباح لمرة وحيدة فقط و من ثما يكون عملي في اوقات مرريحة اكثر حتى اتمكن من التحويل لمدينتي.

المشكلة هي اني عندي أب و أخ . كل واحد فيهم عندو سيارة و غير مشغول يعني يصبحو راقدين .اصلا ابي متقاعد و اخي لا يعمل .
ولا واحد فيهم حاب يوصلني لمقر العمل مع العلم المدينة تبعد حوالي 100 كلم .

بابا يقولي مانعرفش الطريق . وخويا ممكن يتنازل و يديني بصح بشرط مقابل مادي .يعني نستأجر اخي بش يوصلني و ندفع حق ليسونس تع السيارة ايضا.

راح تقولولي علاه حابة تخدمي ؟ الجواب بسيط و هو انو ابي و اخي ما يصرفوش علينا و كل واحد فيهم أبخل من الثاني و انا في غنى عن التسول منهما.

انا ماعنديش مشكل نروح وحدي و نجي وحدي بصح الوقت مايساعدنيش بش نوصل لمحطة الحافلات لازمني ساعة و الطريق من المحطة الى المدينة الاخرى حوالي ساعتين .يعني نخرجمن الدار اقل شي على 5 تع صباح و هذا غير ممكن لي كفتاة.

بالمناسبة ابي و اخي لا يمانعان عملي بالعكس مشجعان .

المصيبة الأعظم الآن هي أنهم يفكروا يبعثوني مع شاب من العائلة مش من محارمي .و يأتمنوني مع رجل غريب عني طيلة الطريق ذهابا و ايابا منذ 4 فجرا .لا لشيء سوى لانهما كسولان و ماعندهمش رغبة يوصلوني .كلاهما معافى و بكامل قواه العقلية .

نتقبل بخلهم و كسلهم معليش بصح دياثتهم لا. راسي حبس و عجز عن التفكير. فهموني كيفاش لازم نتعامل معاهم و وش لازم ندير ؟؟ و هل غير انا لي عندي النماذج هاذوا في البيت و لا الناس كل تعاني من غياب الرجل .

[محارب الحمق]

سواء كان صاحب المشكلة ومشكلته حقيقية أو مختلقة سأجيب, الرجال مهددون بالانقراض وهذا واضح من لباس نسائهم ومن انعدام غيرتهم لذلك الأمر ليس محدودا أو نادرا, هذا أولا, ثانيا, عليك بالدعاء أولا بأن يعافيك الله مما ابتليت به من سفر وعمل خارج ولايتك وأن يعوضك بما هو أفضل لك ولدينك. ثالثا, عليك بالدعاء بالزوج الصالح الذي يغار عليك ويرعاك. أخيرا: عليك بالدعاء بالهداية لك ولعائلتك

[محمد جديدي التبسي]

أولا انتقالك كل هذه المسافة يعتبر سفر وحرام تخرجي وحدك وزيدي سقسي امام
يبدو انك مستهينة بالأمر في باقي أيام عملك؟؟
الرجال غايبين منذ زمن هذا وين فقت انت؟؟
الرجال قلال لو كان هناك رجال كثر لما كان هذا حال المجتمع
ولما خرجت للعمل اصلا هاذي باينة
لكن عدم وجود رجال لا يجعل سفرك وعملك في الاختلاط حلال؟؟
ربي يفتح عليك

[visa uk]

يابنت لحلال ماكيش نتي فقط كاين حالات مثلك

ربي يجيب الصبر ليك احملي للخدمة وخلاص

[مسرورة بحياتي]

الدياثة موجودة في بعض العائلات ، اما حالتي الحمد لله الغيرة ماشية في دم خاوتي وابي وكانهم ياكلوا في لحم الجمل ، مستحيل انهم يسمحولي نسافر بلا رفقة احد خاوتي ،.

[siliine]

بدون ان نناقش الموضوع اعطيك اقتراح مادام لاخيك سيارة فاستاجريه ليوسلك ال العمل وهكدا احسن من ان تركبي مع واحد غريب عنك مادام هو لا يعمل يحتاج ال نقود للبنزين وهدا اخف الضرر وربي معاك

[زبدة ذايبة]

شقيقك أولى أنك تستأجريه بما أنه على هذا الشكل

وأعطيه المبلغ مضاعف حتى يوصلك

المال يتعوض

وشرفك لاعوض له

[kacimo.samy]

سلام
رجال ؟ انقرضوا وحتى نسا
كيما نتي تطيبيلو ياكل بلا ثمن مام هو من واجبو يديك خوك
بصح عاونيه في ثمن البنزين فقط
ربي يفرج

[رندة.]

انا من رأيي أنه تتفاهمي مع أخوك يوصلك مقابل مبلغ مالي تتفقوا عليه. وبالتالي رايحة تكون مصلحة مشتركة أنتي توصلي لخدمتك في الوقت ومع أخوك وهو يكون عنده مصروف مادام راهو عاطل عن العمل.
ربي يفرج عليك ويرزقك الزوج الصالح ان شاء الله الي يعينك ويهنيك.

[قدور بن عاشور]

واش اداك أنت تخدمي 100كم على الدار؟
هل عليك دين أو أطفال تحت مسؤوليتك؟
على حساب الحكاية لا.

أنا رجل و لا يمكنني أن أعمل بعيدا 100كم عن بيتي و إذا اضطررت فسأرحل إلى مكان العمل
اذا عملتي 8 ساعات يوميا ستكون أقل شيء 11 ساعة يوميا بين العمل و التنقل، و ستصلين إلى البيت منهكة.
و فيما يخص شقيقك فطبيعي جدا أن يطلب منك ثمن البنزين،
يمكن يوصلك الشهر الأول على حسابه لكن بعدها تدفعين و لاحرج عليه.
فالمسألة ليست فقط البنزين، فهناك السياقة، التعب، maintenance تاع السيارة.
يعني تدفعين ثمن البنزين الذي تستهلكينه و تزيدي تشكريه
المهم المشكلة الكبيرة و الكارثة العظمى هي أنهم يفكروا بارسالك مع رجل أجنبي تقضي معه ساعتين على الأقل يوميا في السيارة.

أنا من رأيي انساي هذه الخدمة و اصبري و ابحثي عن عمل آخر بمدينتك

[nihal159]

الحل على المدى البعيد هو أنك تتعلمي تسوقي و تتكلي على روحك؛ أما على المدى القريب؛ قولي لخوك يوصلك و اتحملي نفقات السفر أفظل من أنك تسافري مع رجل أجنبي.

[FATIHA131]

يوصلك اخوك وخلصيه واش فيها
وزيدي خلصيه ويعلمك تسوقي
ربي يرزقك الزوج الصالح لي يغير عليك

[Simsim.rd]

مدي الدراهم لخوك حق البنزين و تعلمي السياقة تعودي تروحي وحدك .ربي يفرج عليك و يرزقك

[زايدي أمحمد]

الله أكبر الله يهدي ماخلق

[نجمة الأمــــــل]

الأحسن أن تستأجري أخيك أرحم

مع أني رافضة لفكرة العمل في مدينة اخرى وانتي غير مستقرة ، لكن على الأقل أخوك ارحم

يوجد الكثير هكذا لكن افرضي رايك وطالبيهم بتوصيلك مهما كان الثمن
موفقة

[ninaricci]

ياختي انا راني استغربتك انت وليس اخوك او ابوك كيفاش تحبي يوصلوك بلا ما تمدي حق البنزين هذا اكيد و لازم حقهم راهم رايحين يكونوا شوفور نتاعك شوفي حق المواصلات قداه و زيدي شوفي حق كراء سيارة ليوم قداه واقسمي بيناتهم و مدي لخوك واذا حب حق كراء سيارة اعطيلوا و راهو حقو هذي ما راهيش دياثة كيفاه تحبي يبقى على جالك يوم كامل يستنى فيك و ما تعطيلوش انا لو منك لوكان يطلب شهريتي كامل نمدهالوا لانه رايح يكون سبب في اني نستحفظ على عملي راكي مباعد تمديهم للزوج و يقولك مامديتي والوا علاه تخدمي

وذا كان تحسبيها العقلية هذي غير اقعدي فدار احسنلك راكي ما تنجحي لا مع داركم و لا مع زوجك المرا اللي تخدم لازم تعمل بعقلية طاح راح يعني اللى يقصدك يلقي عندك بحكم انو راكي مرا معندكش مسؤوليات هكذا تعيشي متهنية والاخ راهو نعمة كبيرة احسن حتى من الزوج انا راني نهدر عن تجربة و العنوان ما عجبنيش خلاص على جال انهم كي طلبوا حقهم منك قلتي عندما يغيب الرجل

لوكان جيتي متزوجة مستحيل يخليك الراجل تخدمي بعيدة 100 كم حتى لو كان ابخل البخلاء و اذا خلاك راح ينحيلك شهريتك ولا ثم رايحة تغضبي عند باباك و خوك وتقولي راهم رجال والله غير عيب عليك اما بالنسبة لنهم اقترحو عليك رجل غريب هذا لبخلك انت كي ماحبيتيش تعطيلهم حقهم قالولك ادي سيارة كرية عندهم الحق باش تشوفي لمزية اللى كانو راحين اديروها فيك وانتى تشوفي من الجانب السلبي

انا لوكان منك نمد لخويا زيادة على حق سيارة اجرة كفاية انو محرم ليا و نحكملو هذا الجميل طول عمري

[سيرين راجي]

كامل رانا هكذاك الخاوة تموتي ولا تحياي ما علابالهمش بيك اخر الزمان

[visa uk]

سمحولي انا نمد رايي صراحة انا تفكيري اني عندي خيات واله مانوصلهم ليس حقدا او كرها وووو بل لانها متزوجة دبر راسها كامل تتمحن هي راجلها قاعد شوماج او حتي نشوفو يبريكولي و يخم كلونديستان از بريكولات اخري شايفهم بزاف هاك عاطل تماما او يبريكولي يعني يبركولي عند روحو او يخدم سائق لمرتو الخ انا يدبرو راسهم مانديهم مانوصلهم كامل رجالاتهم يدبرو راسهم كامل تزوجتي اتهردي ياربي نجري علي حياتي وهمي نعم مانجريش ومالاباليش بيهم

[ابو سليمان10]

عندما يغيب الرجال...انت رجل الله يبارك...من يعمل على بعد 100 كلم و في مكان ليس فيه مواصلات جيدة راه راجل و لايخشى عليه
و ثايا هذه انانية...واحد يصور الدراهم و الاخر لازم يوصله 100 كلم ذهاب و 100 اياب و مجانا

الناس التي لا تمتلك سيارة تظن ان السيارة تمشي وحدها ...السياقة متعبة+ تكاليف البنزين التي ترتفع باستمرار + الصيانة + السيارات ارتفع ثمنها يعني الذي لديه سيارة فل يحافظ عليها لانه لن يستطيع استبدالها بسهولة كما في الماضي+ الوقت المهدور لما تبدا توصل و تدي و تجيب وقتك يروح كله...و من اجل هذا توجد وظيفة اسمها سيارة الاجرة

[ندوشةة]

ديري رخصة سياقة و سوقي وحدك بالسيارة تاع باباك

[aiche]

أخوك ليس مجبر على إيصالك يوميا مجانا، من الأفضل أن تستأجريه هو يستفيذ، بحيث سيكون له مدخول يومي وأنت تستفدين بحيث تكون لك رفقة آمنة، فهو محرم لك وحامي عرضك، أنا كل مشاويري مع أحد من اخوتي حتى ولو مشوار قصير، من باب أن تذهب دراهمي إلى جيب أخي وأنا في حمايته، أفضل بكثييير من اقتناء طاكسي والركوب مع أجنبي، إذا كان أخوك كسول من منظورك فلا تكوني بخيلة ومستهترة، ومع مرور الوقت بكثرة السفر مع أخيك سيزيد الود بينكما وستقدرين تعبه، وسترين أن ما تدفعينه له، هو مجرد مبلغ زهيد في مقابل الخدمة الجليلة التي يقدمها لك.