الجزء 1 : كُوزِينَةْ الأَكْلْ الصِحِّيْ ........... مع زُخْرٌفَةٌ

[zokhrofa]

كيفاش اطالة اختي ام عبد الرحمن راكي كي ما تمريش نتوحش ردودك و الله

اهلا بيك في كل وقت

تامني بربي طليتي على النقطة تاع الضعف تاعي انا شخصيا اول ما حملت حسيت بوحد المسؤولية كبييييييرة اتجاه بناتي و نحس بلي لازم نخيرلهم غير الحاجات الملاح

و ان شاء الله ربي يقدرنا على انو نهار نتحاسبو ما يحاسبناش على ولادنا

[oumelabedmh]

بارك الله فيك اختي زخرفة على كلامك الجميل. حبيت نزيد تاني بالنسبة للحبن كاين الحبن الطبيعي الي مخدوم من حليب البقر كاين الي يقولولو بوهزة وكاين الي يقولو الجبن انا ندير كرات ونغمروا بزيت الزيتون في علبة زجاجية ونجبد حسب الحاجة لعمل شطائر للاولاد وانا اولهم بصح نزيد هريسة نحب الحار

[زينب 83]

مساء الخير غالياتي
بعيدا عن الكلام العلمي اللي راه يخوف بزاف عضوات انا في رايي الاكل الصحي يتلخص فينا يلي و هاذي تجربتي لسنوات

التقليل من الابيضين الملح و السكر
التقليل الدقيق الابيض
التقليل من الدهون بانواعها و كذا المعلبات و الاطعمة الجاهزة
الطهي بطريقة صحية الفرن او المرق از البخار او الشواء لكن ليس على الفحم
الباقي صعب نوعا ما على كثير من العائلات
شراء خضر و فواكه عضوية و لحوم عضوية و زيت زيتون و عسل حرة وووو قد لا يكون في متناول الجميع لكن نصيحتي للاخوات لي مضطرات ياكلو من الموجود يحاولو يقللو من كميات الاكل و يشربو الماء بزااااااف لانو يصفي الكبد من السموم

لكن يا ريت في اقتراحاتكم تحطو في بالكم العائلات لي قدر الحال باه حتى هوما
يقدرو ياكلو بطريقة صحية

[zokhrofa]

صباح الخييييرات خواتاتي العزيزات

صحيتي اختي ام عبد الرحمن على الوصفة هايلة

اختي زينب شكرا على مرورك العطر و طبعا رانا ناخذو بعين الاعتبار الجيب حتى اذا لاحظتي وصفاتي كامل الناس تقدر عليها اضن طبعا

[zokhrofa]

صباح الخيييييرات واش راكم عزيزاتي

اليوم حبيت نهدرو عن بعض الخطوات لي تنقلنا الى الأكل الصحّي

تدريجيا حتى ما نخلعوش أهل البيت ديالنا و يكرهو كلمة أكل صحي و يولو ربما حتى ياكلو في الخارج قبل الدخول الى المنزل هههههه

لذلك انا ننصحكم تبداو بلعقل درجة درجة حتى ما يفيقوش و يولي أكلهم 100 ب 100 صحي

كيفاش ديري ؟

1-- أوّل خطوة : هي أنك تحكمي كااااااااااامل الأغذية الغير صحية في بيتك و تستبدليها بأغذية صحية، حاولي تشري خضر أكثر و تنوعي في كل ما هو طبيعي في مكان كل ما هو معلّب.

2- ثاني خطوة: كل الأطباق لي موالفة طيبيها معليش طيبيها لكن حاولي دخلي عليها خضر أكثر، مثلا الساندويشات وووو

3- ثالث خطوة: هي استبدال كل المشروبات و العصائر بالماء... خاصة انو رانا جايين على الصيف و الواحد يعطش بزاف و اذا شربنا عصائر راح تكثر نسبة السكريات في جسمنا.

4- رابع خطوة: اتعلمي كل اسبوع كيفاش طيبي طبق صحي لكن جميل و مبهر في نفس الوقت باش ماطيحيش في الغلطة تاع انو الاكل الصحي حتى تقديمو لا يعطي الرغبة في أكله.

جاهزين ؟ باش نكملو الدرس ؟

[oumelabedmh]

رانا معاك زخرفة

[قرويجة]

شكرا زخرفة يشهد الله انك أحب الأحباب على قلبي .............. أنت ذكية

[zokhrofa]

السلام عليكم

نواصل خواتاتي اذا سمحتو طبعا

كنا قلنا بلي نبداو التغييرات بلعقل بحث ما يفيقوش اهل البيت بلي كاين تغيير جذري

نبداو اليوم بطبق السلطة لي هو اوّل حاجة ناكلوها في وجبة الغذاء او العشاء


اوّل شيء : الصلصات المضافة

طبعا كامل علابالنا انو مكوّناتها الرئيسية هي الخضر مع ذلك تقدر تكون سلطة ماش صحية كي نبداو نحطو عليها صلصات لي تكون فيها سعرات حرارية بزاف كبيرة
ولا فيها مايونيز او كيتشاب

لذلك باش نحافظو على السلطة الصحية لازم ندخلو فيها صلصات صحية و أوّلها زيت الزيتون

و نقدرو نضيفو نكهات جديدة و بنينة مثل الخل الاسود او خل البالزاميك لي راح يعطو طعم مخلط بين المخلل و الحلو في نفس الوقت و هذا راح يكون شيء جديد على عايلتك

تقدري دخلي تان الخردل

و حتى رُّبْ الرمان يعطيك ذوق بنين

هذه صلصة مليحة تعطيك ذوك شباب

كاس ممزج بين زيت و زيت الزيتون

+ ربع كاس خل

+ نص كاس ماء دافي

+ شوية معدنوس حب

+ 2 فص ثوم

+ زعيترة

+ ملعقة قهوة معمرة تاع موتارد

+ القلييييييييل من العسل

+ ملح

+ فلفل ابيض



ثانيا التوابل :

لازم نخرجو شوية من المُتَعَوَّدْ عليه انو السلطة فيها فقط زيت و ملح و خل

نقدرو نضيفو بزاف توابل ينكهولك السلطة و ترجع حاجة بنينة بزاف

مثلا : اضافة النعناع

او زعتر ناشف

او زعيترة

او شوية من عروق الميرمية

الآن كل وحدة منكم ياريت تقوللنا كيفاش موالفة تقدم السلطات دياولها بشكل صحي

[oumelabedmh]

السلام اختي زخرفة اولاراسمحيلي البارح باه نرد عليك مع هرج الاولاد ماقدرتش.
اما بالنسبة للسلطات فعندي شوية انواع:
الاولى: كي ندير ماكلة في الفرن خضار اوودجاج ندير خيار مقطع صغير مع ياؤورت طبيعي ورشة ملح ونعناع يابس منعشة واذا ماتوفرش اليابس عادي الفريش.
الثانية :خيار وطماطم وجزر وفلفل حلو وشوي معدنوس وشوي نعناع والصلصة هي ليمون وزيت زيتون ورشة ملح.هادي جنب الاطباق الي نحسها ناشفة شوي كيما الارز.

[oumelabedmh]

الثالثة :نفس السابقة ونزيد عليها طحينة شوي جنب السمك هايلة تجي شوي حامضة.
الرابعة الي يقولولها اخوتنا في المشرق الفتوش يعني نفس مبدا الخضر لكن نخمص الخبزالسوري في الفرن مش نقليه ونحطو فوق السلطة ومرات نزيد قطع جبن فيتا.
الرابعة: سلطتنا العادية خس وطماطم وزيتون لازم مع الاطباق التقليدية.
الخامسة: الماسيدوان مانحطش الروز ونخلي الجزر نيءومانكثرش المايونيز غير مغرف للطعم.
الاخيرة بكل سهولة الخس والطماطم والخيار على حالتهم يعني مغسولات جيدا ومحطوطين في الصحن نديرها جنب القليان او مرات كي نكسل ندير سلطة واتعودوا عليها الاولاد هك يحبوها.

[oumelabedmh]

رب الرمان نحطو على زوائد الدجاج يعطيها حموضة بنينة لكن في السلطة ماجربتوش

[zokhrofa]

صحيتي صحيتي اختي ام عبد الرحمن بزاف متنوعين صراحة ابهرتيني

حسنا مادام عندك جربيه و قوليلي

[oumelabedmh]

السلام.عليكم وينك اختي زخرفة ولفتينا بطلتك الزينة. طمنينا عنك

[عطر و مطر]

مشكووورة بزاف زخرفة على هاذ الموضوع الثري
انا الحمد لله مانعانيش من السمنة و لا اي من مرض الحمد لله
ومع هذا نتبع نظام غذائي صحي ونبعد على كل ماهو مضر

و دايما يقولولي علاه ماتاكليش علاه مدايرة ريجيم ياخي ماشي سمينة و ما عندك حتى مرض
للاسف بعض الاشخاص يربطو الغذاء على حسب مرض الشخص و يظنو انو تقدري تاكلي اي شيئ بلا حساب
والحقيقة او اول خطوة نحو صحة جيدة هو الاكل الصحي والمحافظة على نظام غذائي مفيد طوال السمنة وماشي في اوقات متنوعة

[oumelabedmh]

راني ورا زيادة المشاركات الوقت برك يخونني مع المسؤوليات

[oumelabedmh]

كلامك صحيح اختي

[zokhrofa]

اهلا أختي ام عبد الرحمن منوّرة بنوركم والله كنت مع شغالات اسمحولي

جيا اختي كلامك جد صحيح مع الاسف حتى يطيحو في الفراش او يروحو للمستشفى باش يحبسو واش كانو يديرو

و الكارثة لمدة اسبوع او اقل ههههههه ويعاودو يولو لواش كانو يديرو و ربما اكثر

[أم البراء 2017]

السلام عليكم
جبتلكم طبق خفيف وصحي نوعا ما هههههه
تشكيلة من الخضار مقطعة مكعبات تحطيها في طنجرة وتزيدي عليها حبة طماطم مرحية وسنينات ثوم وملح والتوابل اختيارية
تحطيها على نار هادية حتى طيب الخضار وتزيديلها كسبر اخضر وشوي فرماج رابي وتخلطي اربع بيضات وتفرغي عليها وتقدم

[zokhrofa]

مممم هاذي مليحة فالصيف نولي مانحبش المراقي و الشرابي يعطيق الصحة

[zokhrofa]

سلام خواتاتي واش راكم

حابة نعرف كل وحدة فيكم واش دارت تغييرات ملي شافت هذا الموضوع ؟

[ام جهاد2008]

االسلام عليكم كامل زخرفة حنونتي قوليلي الا نقدر نخدم بالخميرة لي حطيتيها كل المعجنات او تاني قدرة الطين نقدر نطيب فيها كل شي يعني حبوب جافة بوزلوف شوربات حبيت نطلق لاكوكوط ربي يجازيك بكل خير يا احلى زخرفة

[zokhrofa]

اهلا اهلا ام جهاد اختي

نعم كل العجائن شوفي راه جاي الصيف راح تعاونك لكن في الشتاء ردي بالك ما تخمرلكش

راني وصيتكم تجربوها في نهار ما تكونوش تاكلين عليها يعني يا اما ديريها في وقت قبل بزااااااااف من لي موالفة ديري فيها الفورية يا اما تجربيها نهار يكون عندك الخبز على الاقل تتعلمي تخدمي بيها اولا

اما قدرة الطين طبعا اختي انا ما عنديش كوكوطة و نطيب كلش راكي شفتي بعض اطباقي لكن الفرق الوحيد هو وقت الطياب في الكوكوطة اقل بكثير من القدر

و لازم يكون غطاء القدر ما يخرجش بزاف البخار والا تنشف الماكلة و الحبوب مزال ما طابتش

و التمراق تاع القدرة يكون ضعف تاع الكوكوطة

[zokhrofa]

خطوة تغيير الشورَبَة

خرجت موضة جديدة في الشربات في وقتنا هذا و هي انو يضيفو الكريمة عليها

لذلك من الاحسن كثري الخضر باش تولي الشربة ثقيلة احسن من انك تحطي كريمة باش تثقال

[muhibbat rrasoul sws]

خطوة تغيير الشورَبَة

خرجت موضة جديدة في الشربات في وقتنا هذا و هي انو يضيفو الكريمة عليها

لذلك من الاحسن كثري الخضر باش تولي الشربة ثقيلة احسن من انك تحطي كريمة باش تثقال


يعطيك الصحة

فقط شيء الأخت زخرفة، رمضان راح يجي في الصيف، علاش نحبوا الماكلة تقيلة؟ و راح يكون العشا متأخر!! و الله مرات ما نفهمش الناس واش تحب.

الأخوات، راكم معروضات لقراءة مكونات الكريمات في الأسواق....

[zokhrofa]

اهلا اهلا شكون زارني القمرة محبة الرسول

مممممم شوفي في الشربة يعني هي اذواق انا ماما ما تحبهاش ثقيلة و انا نحبها ثقيلة هههه ماشي بالمكونات وانما هي كي ترحي الخضر تزيد الماء و انا لا نحبها ثقيلة شوية

هذا هو معنى ثقيلة عزيزتي

[أم سدرة]

مسااااااء الخير زخرفة اتاريكي مدايرة موضوع للأكل الصحي ونا لاخبر يعطيك الصحة عندي شوية أطباق صحية من بعد نحطهم إن شاء الله سلام لكل المشاركات

[zokhrofa]

نعم نعم بصح راه راقد كامل ما فهمتش علاش

هاتي هاتي مذابية انا و الاخوات ان شاء الله

[أم سدرة]

شفتي زخرفة بلاك راهم مع تحضيرات رمضان
جبتلكم شكشوكة الباذنجان
بصلة مقطعة مربعات حبة كبيرة طماطم مقطعة مكعبات ثوم قصبر ملح وفلفل اسود انا نستعمل الأبيض فلفل احمر كمون زيت شوية ماء قيس 3 مغارف نخليهم يتقلاو ومن بعد نحط الباذنجان لي نكون قطعتو مكعبات ونخلي الكل يطيب على نار هادئة وكي يطيبو لي تحب دير البيض ولي تحب ماديرش انا مادرتش واسمحوا الصورة محاها ابني

[أم سدرة]

زخرفة حبيت نسقسيك انا نطيب بزيت الزيتون الخاصة بالطبخ هل هي صحية أم لا وهادي الصورة
http://www.m5zn.com/newuploads/2017/05/16/jpg//m5zn_ec97173dfbee15b.jpg

[zokhrofa]

يعطيك الصحة ام سدرة على الوصفة توالم سواسوا الصيف انا ما نحبش حاجة سخونة في الصيف ههههه

اما على زيت الزيتون طبعا هاذي الفرق بينها و بين لي نشروها من عند المعصرة هي انها منزوعة المادة التي تسبب انحراق الزيت

يعني تقدري حتى تقلي فيها عادي

عكس زيت الزيتون تاع المعصرة مباشرة تجي تنحرق بسرعة علابيها ينصح انو تحطي المكونات من بعد تحطي زيت الزيتون و ليس العكس

اما زيت لي عندك تقدري تسخنيها شوية ثم تحطي المكونات دون ان تصدر البخار تاع الانحراق

و الفرق بينها و بين الزيت الاخرى لا يوجد هذا هو الفرق الوحيد بيناتهم

[أم البراء 2017]

سلام لبنات
وين وصلتوا فالاطباق الصحية
كاش جديد؟

[zokhrofa]

اهلا اختي ام البراء اقراي واش فاتك ههههه

[نور الصباح]

صباح الخير زخرفة الكوزينة هاايلة انا نموت على الاكل الصحي بصح الله غالب بيا مع عائلة الشيح موش حكمي

حنا عدنا شجرة الزيتون كي يطيب زيتونها نحوه و ندوه للعصارة يعصروه ويبعثوهنا والله غير. بنتو وحدها قع
يعطيك الصحة

http://www.up.djelfa.info/uploads/149499882289261.jpg (http://www.up.djelfa.info/)

[أم سدرة]

صباح النور واش راكم
زخرفة شكرا على المعلومة من بعد نحط غراتان السلق والبطاطا

[zokhrofa]

صباااااااااااااح الخيرات خواتاتي

نور الصباح مممممممممممم غيرتيني ما شاء الله اللهم لا حسد ههههههه

ام سدرة راني نستنى

انا عندي الشفلور ما نعرف واش ندير بيه مليت من الغراتان تاعو

[أم سدرة]

هههههه زخرفة ديريه طورطة لي حطتها حياة شوفيها بلاك تعجبك

[أم سدرة]

هاو ليك الرابط
http://www.djelfa.info/vb/showthread.php?t=2066913

[zokhrofa]

آه ضرك نشوفها صح بلاك تساعدني

[أم سدرة]

تفضلي غدايا قبل مايطيب ههههه راهو صحي والبلاط راهو اينوكس ماشي المنيوم هههه
http://www.m5zn.com/newuploads/2017/05/17/jpg//m5zn_d4d5070e3f40a4d.jpg

[zokhrofa]

ههههههه الله يبارك و باش راكي رايحة تغطيه ؟

[أم سدرة]

غطيتو بورق الخاص بالطياب وفوقو ورق الألمنيوم طريقة مليحة ولا لالا

[zokhrofa]

هايلة

كيفاش يجي هذا الورق تقدري توريهولي بلاك نلقاه ؟

[ام هدول]

سلالالالام لبنات ...امممممم دخلت على صنية ام سيدرة وووينك توحشنا طيباك في الكوزينةولا بدلتنا ....ماعجبكش طايبنا ماش صحي ..هههه على فكرة طيرقتك كنت نديرها مرة على مرة تجي ررروعة بصحتك حنونة

[ام هدول]

زخرفة جبتلك حلوى مانعرف الا صحية هي مافيهاش السكر بززاف والمكون الاساسي مفيد جدا للصحىة ..وبنينة تهبل ...امممممممم

https://a.top4top.net/p_5026nvxg5.png (https://up.top4top.net/)

https://c.top4top.net/p_502jkcu31.jpg (https://up.top4top.net/)

https://d.top4top.net/p_502ztrxw2.jpg (https://up.top4top.net/)

https://e.top4top.net/p_502e9snq3.jpg (https://up.top4top.net/)
تارت اولات ..بالمانجا ...وعصير المونق ....الوصفة للشاف منال العالم ...

[zokhrofa]

و الله غبتي و جبتي الجديد يا ام هدول الزينة

طبعا صحي ياك تفاهمنا انو كل مصنوع في المنزل بأقل مواد مصنّعة = صحي

عجبتني بزاف الوصفة

قوليلي غير كيما تان شفت بوضة بالمانجا و حبيت نجربها ما عندكش فكرة شحال راه يدير ؟

[ام هدول]

اهلين زخرفة ..انت الاروع والازين ....ربي يخليك ..شوفي حبيبتي ..المونق بما اني في الصحرة متوفر بكثرة اكثر من التل وسومتو اقل ....كما الدلاع دكة را هو عندنا الحبة بخمسة لاف كبيرة ولا صغيرة وحلو علكيف ...الومنق واالله ما علابالي ...حتى نسال زوجي خخخخ ساعات مانحبش نفهم ....هههه بيناتنا برك ...اشششششششششش

[zokhrofa]

ههههههههههههه عندك الحق ولاه تفهمي انا برك نحب كي نطلب حاجة نكون نعرف السومة باش نشقى نديرها ولا تستقاملي كيما نشريها هههههههه

من بعد نحطلك الوصفة تاع البوضة بيها مادام عندكم متوفرة بلاك تجربيها و تحطيلي حقي ههههه

[أم سدرة]

ياعمري أم هدول واش راكي حتى انا توحشتكم وتوحشت طيباتكم والله والو ياخي كنت نوجد هبطت للبلاد في العطلة تاع الربيع وكي جيت ديراكت التنظيف هادا وين عدت ندخل شوية ومارانيش نصور بزاف علابيها ماحبيتش ندخل بيديا فارغين هههه اصبري نلم شوية صور وندخل حنونة مالا حتى انا نجرب التارتولات المانقا عندنا رخيص زخرفة غير حطي الوصفة بلاك نجربها
اصبري هادا وين جيت من القراية ههههه ودوك يجو الأولاد كي نكمل معاهم نحطلك واش قلتيلي الصباح

[نور الصباح]

زخرفة ما شاء الله كوزينتك هايلة

[zokhrofa]

حسنا اختي ام سدرة من بعد نحطلكم الوصفة ان شاء الله

[zokhrofa]

نور الصباح انتي الاحلى اختي اهلا بيك معانا

[نور الصباح]

زخرفة ماجيتش ويديا فارغين

http://www.up.djelfa.info/uploads/149502830968021.jpg (http://www.up.djelfa.info/)

[zokhrofa]

مممممممممممممم يعطيك الصحة انا فاكهتي المفضلة كانت الخوخ لكن الان ما نعرف واش هي ههههه حاسة ما ولاش عندي فاكهة مفضلة بعد الحمل

[zokhrofa]

هذا هو رابط بوضة المانجا

http://www.djelfa.info/vb/showthread.php?p=3996850172#post3996850172

[أم سدرة]

شكرا زخرفة على الوصفة ساهلة هنا يسمها sorbet راني جبتلك صورة ورق الطهي
http://www.m5zn.com/newuploads/2017/05/17/jpg//m5zn_76d7d54bb8a3dbd.jpg

[أم سدرة]

وهادا غدايا بعدما طاب
http://www.m5zn.com/newuploads/2017/05/17/jpg//m5zn_45699441df7cd13.jpg

[أم سدرة]

غراتان سلق بالبطاطا
نكرفج بصلة مع سنات ثوم وطماطم شوية زيت ملح فلفل اسود وفلفل أحمر وشوية طماطم مصبرة ونخلوهم يتقلاو ومن بعد نزيدو السلق ونخلوهم حتى يطيبو
من جهة أخرى نقشر البطاطا نقصها مكعبات ونفورها انا كنت نقليها بصح حبست القليان وكي طيب السلق نخلط معاه البطاطا ونكسر عليهم البيض العدد كيما تحب نخلط كلش ونحطهم في الفرن
هنا نسيت عليه حمارلي بزاف ههههه
http://www.m5zn.com/newuploads/2017/05/17/jpg//m5zn_7319ff2b0d35ef0.jpg

[zokhrofa]

ممممممممممممممممممممممممم يشهو يعطيك الصحة اختي ام سدرة

قوليلي هذاك ياك الورق المشمع ياك ؟ لي نديروه تحت القاطو ؟

ما نعرف شكون قاتلنا ماشي مليح ههههههههه و الله غير نسيت

نقولك طريقة مليحة احسن حطي غطاء اي حاجة حطيها فوق طبق الفرن و من بعد ديري الالمنيوم هكذا ما يكونش عندو احتكاك مع الاكل

[أم سدرة]

هههههه زخرفة هادا ثاني ماشي مليح واش نديرو انا نعتمد عليه بزاف بصح خير من ورق الألمنيوم

[zokhrofa]

لا انا ما علاباليش اذا كان مليح او لا هههههه قلت كاين وحدة قالت ماشي مليح حبيت نتأكدو من المعلومة اذا راهي شافية تقوللنا الدليل

[zokhrofa]

السلام ناس الطياب البنين و الكوزينة الزاهية و الأكل الخفيف و الظريف

ان شاء الله كامل تكونو بخير

وين لحقتو في التطبيقات ؟

[zokhrofa]

السلام لبنات اليوم جبتلكم المدربل الصحي

http://www.up.djelfa.info/uploads/149523143606511.gif

هذا هو رابط الوصفة

http://www.djelfa.info/vb/showthread.php?p=3996855431#post3996855431

[zokhrofa]

وهذا رابط سلطة الشفلور الصحية

http://www.up.djelfa.info/uploads/149523192579622.gif


http://www.djelfa.info/vb/showthread.php?t=2069365

[نور الصباح]

صباح زخرفة هاهو عشايا البارح

http://www.up.djelfa.info/uploads/149525711345231.jpg (http://www.up.djelfa.info/)

بطاطا مطبوخة ومرحية ومورصو دجاج مطبوخ وفلفل حلو وطماطم كليت غير البطاطا

واااع حقا عارفتني كرهت كلش قاالبطاطا اللي مزال اللحم وكرهتو

[نور الصباح]

يعطيك الصحة زخرفة باين بنين

[zokhrofa]

السلام عليكم

مممممممممممم نور الصباح هههههه كان بعثتيلي هاذيك الفلفلة مياااااااام باينة تشهي و انا كنت حابة نديرها البارح و عجزت نشويها ههههه

معليش المهم تاكلي حاجة مع الوقت راح تولي تاكلي لكن اللحم ما نضمنلكش

جربي الحوت ؟ معليش مجمد

[zokhrofa]

اليوم نهدرو على طريقة تجميد اللحم بطريقة صحيّة

تجميد اللحم نعم هو خطر لكن لو درتيه بطريقة صحيحة لن يكون كذلك

كيف ؟

تحكمي طرف قماش معقّم و تحطي فيه اللحم بعدها تغلفيه بفيلم غذائي و تحطيه في كيس التجميد و هذه هي الطريقة الصحيحة لتجميد اللحم لكي لا يكون على اتّصال مباشر مع البلاستيك و بهذا لن تكون هناك اي ضرر.

الضرر هو ان تخرجي اللحم من المجمّد و يذوب ثمّ تعيدي تجميده

يعني هذه معلومات دقيقة تجعل طريقة التجميد هي الخطيرة على جسم الانسان و ليس المجمّد بحد ذاته

[أم سدرة]

صباح الخير شكرا زخرفة على المعلومة حبيت نطرح أسئلة لي تعرف جاوني
انا مللي جيت لهاد البلاد لقيت زوجي يستعمل السكر البني هل هو أحسن من الأبيض ولا كيف كيف
زيت عباد الشمس أو دوار الشمس هل هي مليحة ولا لالا مع اني نستعملها في البيتزا والكسرة والقليان فقط هههعع رزخرفة راني نقلي مرة في الشهر فقط كي نتشهى الفريت

[أم سدرة]

راني رجعت زخرفة تفكرت ورق الشمع صح ماشي مليح لأنو مغلف بطبقة من الشمع وبالتالي ماشي مليح كي يدخل للفرن
أما هاداك لي حطيت راهو ورق الزبدة وتقدري تستعمليه في الطهي

[أم سدرة]

... الفرق بين ورق الزبد وورق الشمع واستخدامات كل منهما


(Wax paper) بالنسبة للورق الشمعي أو الشمع

نوع من الورق مطلي بطبقة من الشمع مثل فول الصويا أو البارافين
لامع لا يتحمل الحرارة المباشرة

إستخداماته

يستخدم في لف السندويتشات
تغليف الكيك
عند تحضير الطعام سواء عند البشر أو التقطيع أو نخل الدقيق
مثلا للتسهيل عملية التنظيف بعدالتحضير
يُستخدم عند تسخين الطعام في الميكروييف
يُستخدم عند تزيين الفاكهة بالشكولاتة حتى تجف

**********************************

(Parchment paper) لورق الزبدة أو الخبز

فهو مطلي بطبقة من السليكون المقاوم للحرارة والالتصاق
بدون لمعة
لايمتص الدهون

إستخداماته

يستخدم لتبطين صاج وصواني الفرن بدون دهن
يستخدم كعازل بين الطعام ولفائف القصدير - الألمنيوم
حتى لا يتأثر الطعام بالاستخدام المباشر للقصدير
كمغلف لطهي الطعام والتقليل من التنظيف.

[zokhrofa]

صباح الخير شكرا زخرفة على المعلومة حبيت نطرح أسئلة لي تعرف جاوني
انا مللي جيت لهاد البلاد لقيت زوجي يستعمل السكر البني هل هو أحسن من الأبيض ولا كيف كيف
زيت عباد الشمس أو دوار الشمس هل هي مليحة ولا لالا مع اني نستعملها في البيتزا والكسرة والقليان فقط هههعع رزخرفة راني نقلي مرة في الشهر فقط كي نتشهى الفريت

اهلا اهلا ام سدرة

اختي بالنسبة للسكر البني نعم هو احسن لكن للأسف فاقو المصنعين و ولاو يصبغو الابيض باش يحسابو بلي بني لذلك لا عليكي المهم انتي خلي استعمالك للسكر حاجة محدودة وخلاص يعني لا افراط

اما جمييييييع الزيوت غير مضرة اذا ما لم تسخن اكثر من 180 درجة

يعني انتي لو تقلي طبعا مرة في الشهر البطاطا حاولي ان لا تصل الزيت الى درجة 180 و ما تحمريهاش يعني اقليها و تبقى بيضاء كل ما ولات ذهبية كل ما ولات مضرة

[zokhrofa]

راني رجعت زخرفة تفكرت ورق الشمع صح ماشي مليح لأنو مغلف بطبقة من الشمع وبالتالي ماشي مليح كي يدخل للفرن
أما هاداك لي حطيت راهو ورق الزبدة وتقدري تستعمليه في الطهي


اووو معلومة هاااااااااايلة

نلقاه في الجزائر ؟

[zokhrofa]

... الفرق بين ورق الزبد وورق الشمع واستخدامات كل منهما


(wax paper) بالنسبة للورق الشمعي أو الشمع

نوع من الورق مطلي بطبقة من الشمع مثل فول الصويا أو البارافين
لامع لا يتحمل الحرارة المباشرة

إستخداماته

يستخدم في لف السندويتشات
تغليف الكيك
عند تحضير الطعام سواء عند البشر أو التقطيع أو نخل الدقيق
مثلا للتسهيل عملية التنظيف بعدالتحضير
يُستخدم عند تسخين الطعام في الميكروييف
يُستخدم عند تزيين الفاكهة بالشكولاتة حتى تجف

**********************************

(parchment paper) لورق الزبدة أو الخبز

فهو مطلي بطبقة من السليكون المقاوم للحرارة والالتصاق
بدون لمعة
لايمتص الدهون

إستخداماته

يستخدم لتبطين صاج وصواني الفرن بدون دهن
يستخدم كعازل بين الطعام ولفائف القصدير - الألمنيوم
حتى لا يتأثر الطعام بالاستخدام المباشر للقصدير
كمغلف لطهي الطعام والتقليل من التنظيف.


يعطيييييييييك الصحة يا أم سدرة و الله معلومة جديدة و مفيدة راني اضفتها في اول الموضوع

[نور الصباح]

صباح الخير زخرفة و ام سدرة

جبتلكم عشايا البارح ماتضحكوش

http://www.up.djelfa.info/uploads/14953445858571.jpg (http://www.up.djelfa.info/)

هههه تشيشة وااااااع جربت كل اللحوم وكامل كرهتهم اللي شاهيتني بزااف تعرفي المعقودة هااذيك وتعووود مااالحة وحاارة هاذيك ندور عليها بصح راني كل مرة كيفاش

يعطيكم الصحة

[zokhrofa]

اهلا صباح اختي بصحتك ههههه

معليش هذه الفترة راح تقدري تاكلي غير العجائن

لكن ننصحك الطماطم نحيلها الزريقة و القشور راهم يعيو المعدة و يسببولك بقرحة و القشور و الزريعة تاع الطماطم اصلا الانسان العادي لازن ينحيهم باش ياكل طماطم خاطش اذا لاحظتي ما يتحللوش في المعدة

[نور الصباح]

صحيتي زخرفة راها مكرفشة مافيهاش الزريعة والقشرة
ماكنتش عارفتها مش مليحة
يعطيك الصحة

[zokhrofa]

مزية مالا ايه هي ماشي مضرة الى حد كبير فقط تفاديا للمشاكل

انا شخصيا ما وليتش نقدر ناكلها بالقشور من وقت حملي

[zokhrofa]

طبق صحي الخضر في الفرن

http://www.up.djelfa.info/uploads/14954506131491.gif


http://www.djelfa.info/vb/showthread.php?t=2069902

[أم سدرة]

مساء الخير زخرفة اليوم غدايا يشبه لغداك واقيلة خاوة ههههه درت بطاطا وباذنجان وقصيت بصلة وسكرفجت الطماطم والثوم والتوابل والزيت والما وحطيتهم في الكوشة
http://www.m5zn.com/newuploads/2017/05/22/jpg//m5zn_1395e6a1144b7c5.jpg

[zokhrofa]

ههههههههههههه واقيل انا نعاندك عندي الباتنجال

قوليلي في واش درتيهم ؟ في طبق ولا كيس ؟

[أم سدرة]

هههههه زخرفة درتهم في طبق

[zokhrofa]

هيا مليح راح نشوف واش ندير بالباتنجال -

[أم سدرة]

صباح النور زخرفة يادرا واش درتي بالبادنجان
انا راهو عندي السلق راني نخمم واش نديرو

[zokhrofa]

صباح النور ام سدرة شوفي انا مادرتهاش هههه

درت حاجة وحدوخرا

شوفي السلق اغسليه و قطعيه و جيبي طنجرة و ديري فيها زيت و ثوم مقطع ماشي مهروس و جزر مقطع صغير كي تذبال الجزر حطي السلق بلا ما تفوري ما تغليه

لكن حطي بالشوية يعني كل ما تذبال لي حطيتيها زيدي عليها حتى تكمليه

و من بعد ديري شوية ملح ردي بالك راه السلق مالح

و فلفل اسود و فلفل احمر و شويييييية كمون

و كي تكونو تاكلو لازم يا اما تعصرو عليه القارص الليمون يا اما تشربو عصير الليمون بدون سكر

خاطش كان ما تاكليش مع السلق فيتامين سي ماراحش تستفادي منو

[zokhrofa]

انا درت سلطة الفلفل الحلو مع بطاطا مقلية

http://www.up.djelfa.info/uploads/149553227282971.jpg


الطريقة :

تقطعي الفلفل الحلو مربعات

تقطعي البصل مربعات

و تفوريهم تحطي الفلفل و فوقو البصل مع رشة ملح مليحة و تغطي الكسكاس بغطاه

و تخليه حتى يطيب كلش

بعدها تنحيه و تحطيه يبرد تماما

من بعد تحضريه سلطة

تقطعيلو الطماطم مربعات

و تضيفي عليهم ملح و زيت زيتون و خل

و بالصحة و الراحة

[أم سدرة]

امممممممم لذيذ
انا درت السلق بالروز من بعد نحط الوصفة راهي من اختراعي هههههه درتو قبل مانشوف الوصفة لي حطيتيلي راني مع الكوزينة غسلت الثلاجة ونزيد نغسل 2 حيوط بقاو ونكمل كي نقعد نحط الصورة تاع الروز بالسلق

[zokhrofa]

ههههههههه عرفتها بلي كنتي طيبي معليش هاتي الوصفة نتعلمها من عندك

[أم سدرة]

مساء الخير
روز بالسلق
قطعت البصل إلى مربعات صغار حطيتو يتقلى في الزيت ومن بعد حطيت فوقو 2 حبات كلمار كانو في المجمد يستناو مكتوبهم ههههعه خليتهم تقلاو مليح ورابيت عليهم الثوم وزدت طماطم مقشر ومقطعة مربعات وشوية طماطم مصبرة ملح فلفل أبيض كمون فلفل احمر وتوابل الكاري وزنجبيل مطحون والسلق لي قليتو في شوية زيت وثوم حتى نشف من الماء كي تقلاو مليح مرقت حاجة قليلة برك ونخليها طيب
نرجعو الروز غليتو في الما والملح 5 دقايق ومن بعد غسلتو بالما البارد وقطرتو وعاودت فورتو ومن بعد خلطت الروز والمرقة وحطيتهم يجمرو في الكوشة غير شوية على خاطر كلشي طايب وباش مايجيش الروز ملبز
الصورة جات مضببة صورت بسرعة هههههع
http://www.m5zn.com/newuploads/2017/05/23/jpg//m5zn_8ff219f76489c4b.jpg

[أم سدرة]

زخرفة نسيت نقولك أنا نشري السلق المجمد لأنو هنا قلييييييل وين نلقاو الفريشكا هل هو صحي أم لا هادي هي صورتو
http://www.m5zn.com/newuploads/2017/05/23/jpg//m5zn_abd972ca96ff0bc.jpg

[zokhrofa]

ام سدرة ههههه راني درت شوية خالوطة اليوم بالروز

قليت القرعة و درت الروز يغلي و سكرفجت الطماطم و زدتلها مغرف طماطم علبة + ملح + فلفل + رند + زعيترة + زعتر + اكليل

و ستفت طبقات

[zokhrofa]

السلق مجمد يبقاو فوائده ؟

[ملاك روحي]

فكرة راااائعة ربي يجازيك كل خير أختي

[zokhrofa]

اهلا اختي شكرا على الاطراء ياريت تفيدينا

[zokhrofa]

ام سدرة هاوليك طبق الروز لي حكيتلك عليه البارح

http://www.up.djelfa.info/uploads/149557862976131.jpg

الطريقة بالتفصيل

http://www.djelfa.info/vb/showthread.php?t=2070228

[ميااار]

mr66 beaucoup

[zokhrofa]

merci à vous pour votre passage

[أم سدرة]

مسااااااء الخير زخرفة والاخوات الجدد الروز راهو يشهي بصحتك
مالا مزية لي السلق تبقى الفوائد تاعو يجمد شكرا

[zokhrofa]

مساء النور ام سدرة انا سقسيتك اذا يبقاو فيه فوائد

[أم سدرة]

هههههه زخرفة حسبتك جاوبتيني درك نحوس في النت ونشوف

[oumelabedmh]

السلام عليكم. شكرا ام سدر ة لاثراء الموضوع.

[oumelabedmh]

اليوم حبيت نحكي على لب الكوسا الي الكثيرات يرموه. كاينة وصفة ساهلة ماهلة تقطعي البصل قطع صغيرة وتذبليه في زيت زيتون وتحطي لب الكوسا وتحركي وعلى نار نااااقصة يطيب وتحركيه واذا خفتي يتحرق حطي شوي برك ماء وكي يطيب ملحي وحطي فلفل اسود وكاري. ممكن تاكليه هك او تكسري عليه بيض او طماطم حب مقطعة ويولي شكشوكة. الي يبننها هو زيت الزيتون

[oumelabedmh]

الكاري الي عندي مافيهش جوزة الطيب.اسمه كاري مدراس

[zokhrofa]

هههه ام سدرة مادام ما علابالكش كل حاجة مجمدة تفقد القدر الكبير من قيمتها الغذائية ماشي غير السلق

واش رايك تغرسيه اذا عندك حديقة ؟

[zokhrofa]

اهلا ام عبد الرحمن فكرة هايلة نحب بزاف هكذا اطباق هههه ساهلين و بنان

على فكرة انا كلمة نرمي لا توجد في القانون هههه انا نستعملها في الشربة

[أم سدرة]

مرحبا بيك أم عبدالرحمن شكرا على الوصفة
اختي جوزة الطيب راهم يقولو حرام

[أم سدرة]

الخضر والفواكه الطازجة والمجمدة


قد يصدم الغالبية العظمى منا عند سماع هذه المعلومة, و لكنها في الواقع سليمة بنسبة 100%, هذه المعلومة أعلنتها و أكدت على صحتها مؤسسة الغذاء و الدواء الأمريكية, فحسب قول المؤسسة, إن الفواكة و الخضار المجمدة لا تفقد أي من خواصها الصحية و الغذائية عند التجميد, و أن ما تحصده من فائدة نتيجة تناولها هي نفس الفائدة التي تتحصل عليها حين أكلها طازجة.

و لكن المؤسسة رجحت كفة الفواكة و الخضار المجمدة على كفة تلك الطازجة لسبب هو أن هذه الفواكة و الخضار حين شرائها طازجة من أي مكان قد تكون فقدت جزءا من خواصها الصحية, نتيجة التغليف, و النقل, بالإضافة إلى أن بقائها مقطوفة لأيام قبل تناولها سيؤثر على قيمتها الغذائية, أما تلك المعدة للبيع مجمدة فهي عادة ما تقطف و تعلب و تجمد في نفس اليوم, و لا تتعرض بشكل مباشر للظروف الجوية المختلفة أثناء عرضها أو نقلها, إذ تعرض و تنقل مجمدة, فبالتالي ستحتفظ بكم أكبر من العناصر الصحية و الغذائية.

كما نصحت المؤسسة في حال استخدام الخضار المجمدة, و التي نتناولها مطبوخة في العادة, إدخالها دون تحليلها داخل الطعام, و تركها لتتحلل أثناء الطبخ, فهي بذلك ستحتفظ بجميع مواردها الصحية و الغذائية داخل طبقك, و كأنك قد تناولتها بشكل مباشر من المزرعة.
منقوووووووول

[oumelabedmh]

ايه على هاديك قلت بلي كاري مدراس مافيهش جوزة الطيب لانو مرة اخوات جابو سيرتها وقالو بلي الكاري فيه جوزة الطيب

[oumelabedmh]

ههه تعجبيني زخرفة لا لرمي النعمة. انا نخبيها في المجمد ووقت مانحصل واش نطيب نجبدها وكنت نسلقها لولدي كي بدا ياكل والحق قبل كنت نرميها ربي يغفرلنا

[oumelabedmh]

بالنسبة للسلق انا كي يجيب زوجي يجيب بزاف نولي نضطر نفرز منو بصح مانقطعوش نقطرو مليح ونحطو اوراق في اكياس التفريز وكي نحتاج نجبد ونقطعوا وهو جامد ونطيبو

[zokhrofa]

اهلا ام سدرة واش من ماريكان هههههههه يا مرأة ؟ هوما يعرفو ياكلو باش نديرو عليهم

ادخلي ليوتيوب و اكتبي محمد الفايد – هل الأطعمة المجمدة والمعلبة في البلاستيك مسمومة؟ الجواب هنا-Mohamed Elfaid ‬


ام عبد الرحمن والله ديري كيما انا ههههه هذا دليل على انو رانا في الطريق المستقيم ان شاء الله

[zokhrofa]

هذا عشايا البارح ممممممممم صحي و بنين

جا هايل

http://www.up.djelfa.info/uploads/149566533710171.jpg

http://www.djelfa.info/vb/showthread.php?t=2070499

[مسرات]

بارم الله فيك اخية على المعلومات القيمة 😄😄😄😄😄

[مسرات]

رااااائع مواضيع مهمة

[zokhrofa]

شكرا اختي شاركينا بمعلوماتك

[نور الصباح]

يعطيك الصحة زخرفة باين بنينة

[zokhrofa]

الله يسلمك اختي نور الصباح

[نور الصباح]

مساء الخير
زخرفة واش راكي ؟؟مابنتيش اليوم ان شاء الله المانع خير

حبيتك تعطيني وصفة دولمة الكورجيت والصوص نتاعها
شكرااا

[zokhrofa]

اهلين لا غير الخير راكي تعرفي الجمعة و شغالاتها

شوفي تنقي الكورجات و تملحيها من الداخل عكس هذا راح تجيك صامطة و ما تعرفيش علاش

في اناء تحطي لحم مفروم + ملح + فلفل اسود + قرفة مرحية شوية برك + معدنوس مفروم + بصل مسكرفج في الصغيرة ولا مرحي + حبة بيض + 3 ملاعق كبار ارز خلطي بيدك حتى تتجانس

من بعد تعمري الكورجات على فكرة تقدري تزيدي معاها البطاطا

و نفس الطريقة ديري بيها الدولمة تاع القرنون و البطاطا و تزيدي اضافة جلبانة

في طنجرة حطي كمية تاع الزيت و شوية سمن فقط و ديري بصل مرحي و تقليه مليح و من بعد تستفي بشكل واقف الخضر و ترشي البهارات الملح و الكركم و راس الحانوت و عود قرفة صغيييييييييييييير بزاف و حمص و تخطيها 3د من بعد تمرقي حتى تتغطى الخضرة و كي تغلي المرق تنقسيلو كامل و تخليه يطيب حتى تنقس المرقة و تولي خاثرة يعني ماشي ماء و ماشي ناشفة

[نور الصباح]

بارك الله فيك زخرفة على الوصفة
واش رايك في هاذ القاطو

http://www.up.djelfa.info/uploads/149582361543481.jpg (http://www.up.djelfa.info/)

[zokhrofa]

ممممممممممم هو شباب ههههه لكن غير صحي فيه بزاف السكر

كولي حبة برك في الصباح

[أم سدرة]

السلام عليكم ورحمة الله وبركاته
رمضان مبارك للجميع ربي يتقبل منا ان شاء الله
زخرفة جبتلك تطبيقي لبوضة المانجا تفضلي الرابط
http://www.djelfa.info/vb/showthread.php?t=2070930

[oumelabedmh]

السلام عليكم. كيف حالكم البنات وينها زخرفة غابت طمنونا

[مريم السامية]

جزاك الله عنا خيرا

[zokhrofa]

سلام رمضان كرييييييييييييم

اهلا ام سدرة اختي رائع ربي يعطيك ما تتمناي

اختي ام عبد الرحمن انا راني غارقة في برنامج رمضان مع الخدمة و الدار ووووو

اختي مريم اهلا بيك شاركينا بوصفاتك


هاااااااااااااا لبنات يادرا رمضان صحي ولا ؟؟؟؟؟؟؟؟؟؟؟

[aya lina]

يعطيك الصحة اختي زخرفة فكرة ماشاءالله

[zokhrofa]

اهلا اختي مرحبا بيك في كوزينة الاكل الصحي

[oumelabedmh]

السلام عليكم. صح رمضانكم.اختي زخرفة راكي تعرفي مع الجريات مانقعدش رلي يعيننت جميعا.الحمد لله رمضان نوعاما صحي هههه حاليا ملتزمينن بخبز النخالة او الشعير مرتاحين عليهما ومانجوعش في النهار مع انو اكلي خفيف بالصح درت رايي في الدلاع ربي يستر بدل ما ننقص نزيد في الميزان هههه.صح فطوركن

[zokhrofa]

ههههههههههه اهلا اهلا اختي ام عبد الرحمن بصحتك خبز النخالة ادعيلي نلقاها و نعاندك زوجي مزال مالقاش وين تتباع لازم سيارة باش يروح يجيبها من مدينة اخرى و مع الصيام قتلو مكلاش تشقى في الحافلة

لا العكس الدلاع مكاش كيما هو و فالحقيقة رمضان انا لا اضن نقدرو ننقسو فيه ههههههههههه انا شخصيا كان ما ناكلش مليح ما نقدرش نكمل 17 ساعة

لكن اكلي صحي يعني بعدت على المقليات قدر المستطاع

مثلا بطاطا المقلية مزال كامل ما درتهاش

و المشروبات رانا نشربو الماء فقط مزال ماشريت لا شربات لا والو

الحلويات درت مرة فقط قلب اللوز و البارح درت زلابية صحية كاش نهار نحطلكم الطريقة ان شاء الله

[oumelabedmh]

بالنسبة للقليان قليت بطلب من الزوج بصح المعسلات قللت بزاف كنت ناكلهم بزاف.الماء لا غنى عنه وهو وحدو يروي العطش ومع الحمل نلزم روحي نشرب بكثرة وفي السحور وليت ناكل نص موزة فعلا طريقة فعالة لمنع العطش

[oumelabedmh]

وياريت يانوارة الجلفة زخرفة العزيزة تحطيلنا طريقة هاد الزلابية الصحية بالاك يعطيني ربي القوة ونجربها لاخاطر بديت نذبل ههه

[امّ اياد]

صح فطوركم
ام عبد رحمان خبز نخالة راكي تخبزيه وحدو ولا ديري معاه فرينة وثاني خمارة واش راكي دري
زخرفة بصحتك قلب اللوز وزلابية انا زلابية لذرك مجاتش في فمي بصح قلب اللوز مقدرتش نقاوم والله سخفت عليه وكليت منو معنديش ماء زهر كن خدمتو فالدار

[zokhrofa]

مممممممممم معليش كولي كي تكون مرة في الاسبوع ماشي مضرة

لكن انا نحير فالناس لي كل يوم حلويات يا الله ربي يعينهم

[oumelabedmh]

اختي ام اياد الحق الخبز نشريه واجد وناوية ان شاءالله نولي نخبزوا في البيت. كاين وصفات للخبز للمبدعة زينب 83 في قسم المخبوزات فبهم تاع الشعير والنخالة وواحد باليقظين ماشاء الله.

[zokhrofa]

صباح الخيرات

انا ما لقيتوش يتباع واجد و حتى و نلقاه راهم يبيعوه بزاف غالي ما نعرف علاش

من نهار عرفو انو صحاب الريجيم ياكلو شي صوالح ولاو يزيدو فيهم حتى زريعة الكتان زادو فيها ربي يحفظ

[oumelabedmh]

هاديك.هي بالذات انو غالي المليح في رمضان انو الواحد ماياكلش بزاف على هاديك استهلاكنا قليل ليه لكن بعد رمضان ان شاءالله نولي نحوس نجيب المكونات ونعملو في البيت لكن الطحين البر او الاسمر ماعرفتش منين نجيبو

[zokhrofa]

صح عندك الحق استهلاك قليل في رمضان للخبز

كاين وحد الماركة كانو يديروها في التلفاز ماشفيتش اسمها لكن طلعولها شانها بزاف

قالك بلي حقا حقا تتباع بالمعرفة و توصي عليها و ما نعرف كيفاش

حبو يرجعونا لعصر الجوع

قلت لزوجي ما تحوس عليها ما نندب بيها اذا ولات الفرينة تاع النخالة يطلعولها شانها ربحت عليا

لكن للأسف الشعب يحب هاذ العفايس ههههههه ما نعرف تجيه حلوة

[oumelabedmh]

هههههه والمشكل كي تمشي السلعة ويزيد الطلب تغلى وتفسد النوعية ماتبقاش كيما الاول.الله المستعان.انا كنت قبل نخلط النخالة مع الفرينة وندير ابخبز بصح درك مادا بيا نلقى بيا نلقى الطحين البر.تعرفي فترة خدم زوجي في منطقة ريفية بسيطة كنا نلقاو هاد الحوايج بسهولة بصح كي رجعنا للمدينة بح او بصعوبة وتحوسي باه تلقاي

[zokhrofa]

صحة على قلبكم الفطور

ايه اختي ام عبد الرحمن المشكل انو حتى اهل الريف عادو فيهم ما يكفيهم ههههههه يبيعو الحاجة على حساب اللهجة

عندي واحد في فاميلتي يخدم في وحد المنطقة كي يقول لمول الحانوت شحال الحاجة بالعاصمية يقولو سعر و صاحبو راح عندو قالو شحال بلهجة المنطقة عطالو سعر آخر ههههههههههه

[oumelabedmh]

ههههه سبحان الله

[zokhrofa]

واش درتو اليوم خطوة جميلة نحو الأكل الصحي بنات ؟

[امّ اياد]

مس الخير
ام عبد الرحمان وزخرفة ربي يحفضكم على الجواب انشاء الله نلقاهم يبيعو فيه انا ذايقتهم في زوج تاع القمح يجي بنين واي واحد يقدر ياكلو بصح تاع شعير يجي شوي بصح مفيد اكثر
زخرفة راني ناكل فالصحي بالسيف عليا البارح راجلي شرالي لاكريم قتلو علاه تشري فيها مناكلهاش استغرب على خاطر مضاري مهبلاتو عليها ناكل زوج في ضربة حتى شيكولا والياؤرت حبستهم

[zokhrofa]

سلام

ههههههههههه ضحكتيني اختي ام اياد والله مقبيل برك زوجي قالي نشريلك لاكريم قتلو لالا بدا مخلوع معايا ههههه قتلو كي نشري بلاندار نولي ندير وحدي لاكريم

[faty05]

ابحث عن فرينة القمح الكامل في باتنة ما لقيتهاش
راني بديت الاكل الصحي منذ شهر و الحمد لله ارتاح القولون تاعي راني في تحسن
ان شاء الله نستفادو

[zokhrofa]

اهلا وسهلا بك اختي فاتي هاذي غيبة

ان شاء الله ترتاحي اكثر و اكثر

ابحثي عن الشوفان

[أم حمزة السلفية]

السلام عليكم والله حقا موضوع يستحق التقدير محتاجين بزاف توعية غذائية صحية ونتمنى من الأخوات الخبيرات في هذا المجال مايبخلوش علينا بالنصائح
ربي يوفقك ويجعل هذا الركن في ميزان حسناتك أنت والأخوات أختك أم حمزة

[kader001]

شكرااااااااااااااااااااااااااااا

[Mouna Amrani]

44444444444444444444444444444444

[zokhrofa]

عفوا خواتاتي دعواتكم بالخير ارجوكن

[koozinti]

مع اقتراب عيد الأضحى أقدم لكم مجموعة من تشكيلات للحلوى السهلة و البسيطة بنكهات مختلفة و لكن بعجينة واحدة :mh31::mh31::mh31::mh31:
https://kooozinti.blogspot.com/2017/08/4.html

[zokhrofa]

شكرا على مروركم الطيب

[zokhrofa]

السلالالالالالالالالالالالالام

هاذي غيبة

راني حطيت هنا سلطة صحية فقط في مكان زيت عادي حطو زيت الزيتون

http://www.djelfa.info/vb/showthread.php?p=3997160181#post3997160181

[chez biba]

السلام عليكم ورحمة الله وبركاته
نتمنى تكونو كامل بخير
حبيت نبشركم أني فتحت قناة في اليوتيوب لي تحب وصفاتي دير متابعة وان شاء الله نكون عند حسن ظن الجميع
هذا هو الرابط Chez Biba

https://www.dztu.be/channel/UCbNZ-mFSymXMzIwF3jn1itQ

حضوركم يدعمني

[zokhrofa]

شكرا اختي على مرورك اهلا ومبارك القناة ان شاء الله تنال النجاح

[chez biba]

شكرا اختي على مرورك اهلا ومبارك القناة ان شاء الله تنال النجاح

ان شاء الله ربي يبارك فيك
لاحظت انو الكوزينة مهجورة :confused:

[zokhrofa]

اذا حبيتي نتعاونو و نرجعوها لنشاطها

خاصة و انك عندك قناة يمكن طبقي الاطباق الصحية و تحطي الرابط هنا ما رأيك ؟

[zokhrofa]

اذا حبيتي نتعاونو و نرجعوها لنشاطها

خاصة و انك عندك قناة يمكن طبقي الاطباق الصحية و تحطي الرابط هنا ما رأيك ؟

[chez biba]

اذا حبيتي نتعاونو و نرجعوها لنشاطها

خاصة و انك عندك قناة يمكن طبقي الاطباق الصحية و تحطي الرابط هنا ما رأيك ؟

شرف ليا حبيبتي والله .. لكن المشكل في ضيق الوقت وتحميل الصور يأخذ وقت كبير على هذا معظم المشتركات يحطو في الفايس لسهولة النشر .. ان شاء الله راح نحاول نكون حاضرة
بارك الله فيك .. توحشت المنتدى واللمة وحباباتنا لي كنّا عايلة وحدة

[zokhrofa]

للأسف انا ما عنديش فايسبوك

لكن تقدري ديري الوصفة هنا بدون صور تحطي الرابط تاع الوصفة في القناة و المشاركات يشوفو

مدامك هنا معناها انتي تحبي الاكل الصحي

احكيلنا على يومياتك مع الاكل الصحي واش تقدري تفيدينا ؟

[zokhrofa]

السلام عليكم خواتاتي

اليوم حبيت نبهكم لحاجة مهمة جدا والكثير ما علابالهمش بيها


الزعفران المرحي لي رانا نشروه راه ملّون برك ماشي كامل زعفران

لذلك لي تقدر تلقى زعفران الشعرة هذاك هو زعفران تاع الصح

[*أم سجى*]

موضوع قيم بارك الله فيكم

[zokhrofa]

اهلا اختي امل في كل وقت

[ليمونة مجنونة]

يعطيك الصحة فكرة روعة

[ليمونة مجنونة]

يعطيك الصحة روعة

[zokhrofa]

شكرااااااااااااااااااا

[عالم حواء للجمال]

شامل وجميل

[zokhrofa]

اهلا و سهلا شكرا على مرورك

[zokhrofa]

وين راكم يا نساء ؟ هاجرين الاكل الصحي ولا كيفاش ههههههههههه

[rimaas]

السلام عليكن.بارك الله في كل واحدة قدمت وصفة صحية.
اخيييرا قررت نغير نمط تغذيتي..اطلعت على الموضوع باكمله و اقتنعت.
ما حبيتش ندخل خالية الوفاض راح نحط وصفة نبوية الا و هي التلبينة لها فوائد عظيمة و كاين بزاف ناس اخذو الوصفة و زادو فيها بهارات على حساب اذواقهم.
الوصفية كما نعملها نجيب التشيشة نغسلها مليح و ناخذ كمية حسب احتياجي نضعها نكون وضعت طنجرة بها ماء و القلييييييل فقط من الملح .بعد ما يغلي الماء نضيف التشيشة و نخليها حتى تطهى مليح.نطفي عليها و نضيف كاس مملوء حليب.
عند التقديم اكيد بعد ما نعاودو نسخنوها.نضعها في مشربة و نحط فيها ملعقة عسل حر.و بالصحة.
يمكن الاطلاع فالنت على الفوائد و مختلف وصفاتها.

[ام سلسبيل البليدية]

السلام عليكم عجبتني الفكرة بزاف و حبيت نشارك الاخت زخرفة زعفران الشعرة غالي بزاف او ماينصابش انا نستعمل الكركم فهو مفيد ذوقه جيد خاصة في الارز و الطواجن البيضاء،

[ام سلسبيل البليدية]

انا اشجع الاكل الصحي خاصة للرضع فمثلا عصيدة السميد او عصيدة البشنة مفيدة و صحية و تعوض فرينة الرضع التي تباع و تكون في مكوناتها مواد كيماوية
نبداو بسم الله في كسرونة نحطو كاس ماء نزيدولو 3ملاعق سميد رقيق او بشنة و نخلطو مليح ثم نحطوه فوق النار يعقد كي يطيب نزيدلو شوية بودرة حليب الرضع و ملعقة زيت زيتون عند التقديم

[rimaas]

انا اشجع الاكل الصحي خاصة للرضع فمثلا عصيدة السميد او عصيدة البشنة مفيدة و صحية و تعوض فرينة الرضع التي تباع و تكون في مكوناتها مواد كيماوية
نبداو بسم الله في كسرونة نحطو كاس ماء نزيدولو 3ملاعق سميد رقيق او بشنة و نخلطو مليح ثم نحطوه فوق النار يعقد كي يطيب نزيدلو شوية بودرة حليب الرضع و ملعقة زيت زيتون عند التقديم

نزيدلك اضافة انا كي كان وليدي صغير كنت نعملو العصيدة لكن الماء ندير فيه تلاث حبات تمر كي يغلي نصفيه و نعاود نرجعو فوق النار و نزيدلو السميد يجي بنين و فيه طاقة و اكيد صحي.

[zokhrofa]

شكرا جزيلا ريماس و ام سلسبيل على الاضافات

غير كيما حكاتلي وحدة على التلبينة و قلت ان شاء الله نشريها ياك هي تيشة المرمز ياك ؟

[rimaas]

شكرا جزيلا ريماس و ام سلسبيل على الاضافات

غير كيما حكاتلي وحدة على التلبينة و قلت ان شاء الله نشريها ياك هي تيشة المرمز ياك ؟

انا جربتها بتشيشة الشعير...هديك البيضاء .المرمز ربي عالم

[zokhrofa]

اه اوكي فهمتك من بعد نجربها و نقولك كيفاش خرجت بالمرمز هههه

[rimaas]

اه اوكي فهمتك من بعد نجربها و نقولك كيفاش خرجت بالمرمز هههه

في الانتظار جربي و رديلي الخبر.و بصحتك مسبقا.

[zokhrofa]

شكرا جزيلا

و اذا كاش ما تعرفي قوليلي حاجات جدد

ايه قوليلي واش عندك اواني طيبي فيهم ؟ راح تغيريهم ؟

[rimaas]

شكرا جزيلا

و اذا كاش ما تعرفي قوليلي حاجات جدد

ايه قوليلي واش عندك اواني طيبي فيهم ؟ راح تغيريهم ؟

يا الحنونة راني في وحد العامين غيرت كلش الحمد لله نصحتني صديقة و عملت بنصيحتها.الان حابة نشري تاع ليزيبيس محتارة بين الزجاج و الاينوكس اذا عندك فكرة افيديني.:rolleyes:

[zokhrofa]

بصحتك بصحتك تعيشي و تزيدي تشري

شوفي البهارات من الاحسن اشري تع الخشب ولا اخدميهم عند النجار

خاطش الخشب يشرب الرطوبة

[سارة حمداوي]

أشكركي الشكر الجزيل على الجهد المبذول جعله الله في ميزان حسناتك

[zokhrofa]

شكرا اهلا وسهلا بيكم في كل وقت

[majdo line]

شككككككككرااا في انتظار وصفات جديدة

[zokhrofa]

شكرا على مرورك

[بسكوته]

اختي يعطيكي الصحه على الوصفات بلعموم جداتنا زمان كانوا يطبخوا الاكل بطرق بسيطه وما كانوا يستخدموا اي منكهات مث شوربه مكعبات ادجاج والكثير من انواع المنكهات الصناعيه
واكلهم كان كله من الارض والارض تسمد بسماد طبيعي اورجانك لهيك بفضل الله وطبيعه اكلهم ما كان فيه لا كانسر لا كليسترول لا سمنه الخ من الامراض العصيريه
مشكوره اختي على الاكل الصحي مره اخرى

[zokhrofa]

شكرا على مروركم الطيب

[سهر النجوم]

هل يوجد جزء ثاني اعجبني الموضوع شكرا

[fati sara]

شكرا الأخت زخرفة فكرة رائعة تستحق التجربة

[lila2007]

مرحبا خواتاتي

https://www.up.djelfa.info/uploads/1493109451341.png

مرحباً بالصّحابات و المعارف لحباب

كوزينة صحية فيها صحب كرام

فيها جمع الامهات و العازبات العدرات

من زيارات حسان ودروس طياب بالتفنين و التدبير

واحة الخير أختي تبتغي لقيا النساء

فيها وصفات و صور فيها ما لذّ وطاب يا سلام

والتآخي المستطب


ان شاء الله تكون عجبتكم المقدّمة خواتاتي

هذي الكوزينة حليتها باقتراح من اختي العزيزة faci samia حيث اعطاتني الفكرة انو تكون هذي الكوزينة خاصة بالاكل الصحي

بقولي أكل صحي هذا لا يعني انني اتكلّم عن الريجيم

الأكل الصحي هو الأكل لي ابتعد عليه الانسان بعدما ظهر ما يسمى بالأكل السريع بمكونات جد مضرة للانسان

اكل صحي يعني كل الأطباق البنينة تاع جدودنا لي الله يبارك عليهم رانا لحقنا بيهم وشفناهم كيفاش الصحة و العافية ماليتهم

و كيفاش احنا صغار و كل مرض حكمنا بعيد الشر عليكم

الأكل الصحي يتميّز باستعمال مواد طبيعية بنسبة 99% الى 100%

يعني راح نتشاركو أطباق يا اما فيها غير المواد الطبيعية يا اما مسموح واحد مكوّن يكون غير طبيعي مثلا لي ما عندهاش زيت الزيتون تاع الطياب معليش تستعمل الزيت النباتي من صنع الانسان هذا مثال بسيط

حسنا هذا هو تقديمي للموضوع نتمنى الفكرة تنال اعجابكم و ترحبو بيها في انتضار تفاعلكم مع الفكرة تقبلو مني فائق الاحترام و التقدير

ملاحظة : ارجوكن خواتاتي كاين بنات راهم يدخلو ب 100دج انترنت لذلك لا تقتابسو الردود باش ما تخلاصلهمش الأنترنت تم تم



ورد في هذا الموضوع :

انقري هنا : طريقة حفظ الزيوت و العسل (https://www.djelfa.info/vb/showpost.php?p=3996798607&postcount=122)

انقري هنا : وليدك علاش ما يقراش مليح (https://www.djelfa.info/vb/showpost.php?p=3996798851&postcount=124)

انقري هنا : كسكس صحي ما يضرش في معدة
(https://www.djelfa.info/vb/showpost.php?p=3996794251&postcount=19)
انقري هان : طنجرة الضغط (الكوكوطة) (https://www.djelfa.info/vb/showpost.php?p=3996801113&postcount=154)

انقري هنا : الاكل الصحي في القرآن (https://www.djelfa.info/vb/showpost.php?p=3996794269&postcount=23)

انقري هنا : البطاطا المقلية الصحية les frites (https://www.djelfa.info/vb/showpost.php?p=3996794280&postcount=26)

انقري هنا : طريقة الصحيحة لتحضير السلق (https://www.djelfa.info/vb/showpost.php?p=3996794302&postcount=29)

انقري هنا : متى يشرب الماء قبل، اثناء، او بعد أكل الطعام (https://www.djelfa.info/vb/showpost.php?p=3996794302&postcount=29)

انقري هنا : كيف تتخلصين من القهوة (https://www.djelfa.info/vb/showpost.php?p=3996801828&postcount=161)

انقري هنا : فوائد و مضار الفلفل الحار (https://www.djelfa.info/vb/showpost.php?p=3996802195&postcount=166)

انقري هنا : متى نأكل اللحوم و الكمية (https://www.djelfa.info/vb/showpost.php?p=3996811171&postcount=198)

انقري هنا : لماذا زٌخْرُفَةٌ لا تأكل اللحم (https://www.djelfa.info/vb/showpost.php?p=3996817282&postcount=241)

انقري هنا : 1-نصائح في هامة من طرف اختنا انا هي رزيقة (https://www.djelfa.info/vb/showpost.php?p=3996817380&postcount=242)

انقري هنا : 2-نصائح في هامة من طرف اختنا انا هي رزيقة
(https://www.djelfa.info/vb/showpost.php?p=3996816639&postcount=240)

انقري هنا : الفلفل الحار لن يضرك اذا .... (https://www.djelfa.info/vb/showpost.php?p=3996817503&postcount=244)

انقري هنا : نصائح الى من تريد التخلص من الكوكوطة (https://www.djelfa.info/vb/showpost.php?p=3996843264&postcount=272)

انقري هنا : الفرق بين زيت الزيتون لي نشروها من المعصرة و زيت الزيتون لي نشروها في قارورات زجاجية من الحانوت تبيعها شركة ما (https://www.djelfa.info/vb/showpost.php?p=3996849098&postcount=280)

انقري هنا : طريقة تجميد اللحم الصحيحة (https://www.djelfa.info/vb/showpost.php?p=3996855978&postcount=317)

انقري هنا : بديل ورق الالمنيوم (https://www.djelfa.info/vb/showpost.php?p=3996856360&postcount=320)

انقري هنا : طريقة تحضير السلق بطريقة سهلة و صحية (https://www.djelfa.info/vb/showpost.php?p=3996862285&postcount=334)

انقري هنا : سلطة الفلفل الحلو (https://www.djelfa.info/vb/showpost.php?p=3996862373&postcount=335)

يعطيك الصحة على المجهوووووووود الله يبارك

[facebetter]

شكرا على موضوع

[zahra1999]

يعطيك صحة شكرا

[الاميرة سميرة]

هاذو من مطبخي

[yushino]

طبق الامس روووعة وصحي

[yushino]

صحية والبنة روووعة على ضمانتي

[yushino]

������������ روووهة و ذوق هاايل

[yushino]

اتمنى لو تجرب!وه ءوق رائععع

[طارق 2019]

شكراً على المعلومات المفيدة، صحى فطوركم

[zokhrofa]

أهلا في كل وقت

رمضان مبارك

[قاف سين]

شكراً جزيلا على الموضوع الرائع. جزاكم الله خيرا ��
.

[Ibtissam bl]

موضوع رائع،* شكرا*

[ahmedselim]

بارك الله فيكم

[zokhrofa]

ربي يلاقينا في سوايع الخير

طمنوني عليكم هل انتم بخير ؟

[Mrchouaib23]

بارك الله فيك

[shababdotcom]

ماشاء الله موضوع رائع