خايفة ربي يستركم ادخلو عاجل عاااجل

[مشكلتي]

السلام عليكم
قاعدة نكتب و نبكي و جسمي كامل يرجف
اولا نحكيلكم حادثة صرات الاسبوع الماضي اثرت في نفسيتي لدرجة كبيرة

كاينة وحدة تخدم معانا انسانة رزينة و متدينة و نعرفها مليح انتحرت شنقا في سكنها الوظيفي بالمكان اللدي اعمل فيه و دلك بعد ان عرفت انو زوجها تزوج عليها و الله يا خاوتي صورتها مازالت بين عينيا بقات 5 ساعات معلقة المهم الدنيا اسودت في عينيا وليت نرقد بيها وننوض بيها
نرجع لمشكلتي
عندي مشاكل مع خطيبي و عندنا 5 اشهر تقريبا غير في المشاكل بسبب عصبيتو و ميعرفش يحاور و كي يقلق يولي يسب و كي يكون هادي يكون خيار الناس لكن الله غالب و صلت معاه لدرجة كرهت كرهت كرهت وليت ما نحس بوالو جيهتو و شايفاتو كابوس والله مررررضت
صارحتو و قلتلو راح نحبس معاه و خبرت دارنا و ايدوني في قراري مشكلتي من يوم لي قتلو راح يهبل ساعة يقلي خلاص كلشي بمكتوب ربي و ساعة يعود يخلط في الهدرة بطريقة تاع انسان مجنون و يعيطلي الف مرة في التيليفون نهار كامل بلا توقف
انا منكدبش عليكم كي قررت نحبس معاه اررررتحت حاسة بروحي طايرة من الفرحة غمة و تنحات من قلبي كي البيبي لي ولد جديد
المهم الجديدة عيطلي قالي كون متعطينيش فرصة راح ننتحر و يحلف قالي والله نديرها و نقتل روحي و هدرتو تاع واحد يحكي صح
انا مازلت مخلوعة كي قالها تصدمت وليت غير نبكي ونرجف
قولولي واش ندير ؟ صدقوني مانيش قادرة حتى نسمع صوتو كرهتو كرهتو بزااااااااااااف و كل مانستخير ربي نلقا روحي كارهاتو اكثر خابفة لا يدير حاجة في روحو

[أمل94]

وانتي علاه كرهتيه ياختي عندك حجة باش كرهتيه ولا سماط وحدو ......كفاه السيد يقولك اعطيني فرصة ولا ننتحر وانتي تقولي كرهتو واش دارلك مسكين.....ايا ساعفي الراجل وكملي معاه خلينا مالسمير......صحبتك شنقت روحها الله يسهل عليها ربي يرحمها وخطيبك واش ذنبو تسمحي فيه .....الله يصلح الاحوال

[ميما اللئيمة]

معليش اعطيلو اخر فرصة اذا اصلح حالو مليح اذا مازاا بطلي ، خيرما تبطلي دك و كشما يدير و تندمي ، المهم اذا نتبدلش روحي شوفي حياتك ، و هو ربي يجيبلو

[سيف الدين الطيار]

تندمي عليه تفكري هدرتي مليح ملييييييييييييييح و قولي قالها سيف الدين الطيار ...تندمي...تندمي

[mhd]

الإنتحار حرية شخصية ومسؤولية شخصية (( بينه وبين مولاه ))
ليس لك عليه أية مسؤولية
مادام أنت تقولين أنك كرهتيه وهو غير ثابت على رأي
خلاص أنتهت المشكلة وهو حر في روحو

وهذا رأيي الشخصي و لا يلزم أحدا

[AMINA.Z]

ما يخلعك ما والو
واحد يسبك واش تستناي منو
و الزواج ماش بالسيف ..هو اللي كرهك في روحو
اتوكلي على ربي ..ما ضيعيش حياتك مع واحد ما يحتارمكش.
شكون يضمنلك ماهوش يمثل عليك ..و كي ترجعيلو ...يكرهلك حياتك.
بدلي رقم الهاتف و اتهناي.

[malikdz01]

اديها من عندي والله ما ينتحر ما والو .... ومادام قالك هكذا هذا ضعيف الشخصية ....اخطيه ماهوش راجل

[عثمان الجزائري.]

إذا أمكن قولي له إتصل بالأخ عثمان الجزائري عبر منتدى الجلفة راهوا محتاجك:cool: من الأخير سأعطيه كلمات ذهبية عنوانها " يا داخل مصر منك ألوف " و سأبحث له عن زوجة تقبله بيه بخنونتوا... و منذ متى أصبح الرجال ينتظرون الصفح من كائن حي آخر... و هذه رسالة إليك : "من قال لك أنك بلا عيوب ؟ لوكان نشوفوا نلقاوه هو لي صبر عليك رغم كل العيوب لي فيك، المهم إذا لم تستطيعي تغيره أو بالأحرى وضع لمستكِ عليه...فالعيب فيك"

[ام كنوز]

انا نقلك هاذا الانسان راكي مزلت على باب ربي معاه وراهو يتقلق عليك ويسب اتخلي كي تدخليلو واش يدير انا نضن يول يمد ايدو عليك كي قلتي بلي هو كي كون هادئ يكون خيار الناس انا انضن بلي خيار الناس هو الي يقدر يسطر على روحو في وقت الغضب خمي في روحك برك وصلي صلات الاستخارة وخليها للربي وعلى تهديدو بالانتحار شوفو واحد من كبر عايلتكم يروح خبر عايلتو بهادي التهديدات يجريو به لكشمة طبيب نفسي ولاعدتي تحوسي تحبسي معاه صح متزيديش تهزي التيليفون عليه ولا بدلي اللابيس طول

[muhibbat rrasoul sws]

اختي مترو الحساد
أرقي إنتي و إياه و شوفو
بصح تبعوا برنامج جدي
ما تحبسيش رامي تندمي

[khiro07]

ياطفلة السيد يحبك والمثل يقول ادي الي بحبك ماشي اللي تحبو
اعطيه فرصة اخيرة
واذا ما تسقمش
ما كتبش المكتوب انفاصلو بالتراضي
بالتوفيق اختي

[وَحْـــ القلَمْ ـــيُ]

اذا كان سمع بموضوع الفتاة التي انتحرت وبانك خفت اظنه يخدعك
من الافضل انك تحبسي وان شاء الله ربي يرزقك واحد خير منو .....لانو واحد يسب عليك وانت لعاد في داركم ما تضمنيش بلي يخدم لي كتر منبعد
المهم صلي صلاة الاستخارة وربي يهديك للصواب
بصح ختي بزاف ضحاو وقالو بالاك مع الوقت يتغيرو بعد الزواج ووالو....خطيك لي هداك ليه قلبك هاداك هو
اللي راه يزعف هاكدا شر الناس

[ابراهيم داود]

هذا الرجل ليس ناضجا فكريا اظن: ما زال ذراري...... وإلا لما هددك بالانتحار.... حتى يجلب اهتمامك....... اذا ما عدلش سلوكو طيشي عليك لان رجالا مثل هؤلاء يعييو بزاف

[غزلانْ]

السلام عليكم

بدأتِ الموضوع

بقضية " انتحار لامرأة"

و منه الموقف أثّر فيك و في نفسيتكِ و خصوصا بمشاهدتك

للحالة أعانك الله


( مهما حدث لا ينبغي و لو مجرد التفكير في فكرة الانتحار )

لا تربطي مستقبلكِ مع شخص " لا تريدينه" و "بابتعادكِ عنه تكون راحة لكِ"

من خلال كلامك لا

ان حدث و نقلتِ الحادثة و بكل احساس و تأثر و خوف " لخطيبكِ"

هناااا قدمتِ له " نقطة ضعف له و استغل " من الانتحاااااار'' انتحار المرأة " وسيلة ليتمسك بكِ "

خصوصا اذا تبادر لذهنك أن زوج المنتحرة " يعيش تأنيب الضمير لما فعلته كردت فعل "

المسألة لا تعود لارتباط زوجها ربما سبب آخر فهذا لا يستدعي قتل النفس


و أنتِ " تخافين من أن يحدث لخطيبك ما حدث لهده المرأة " و تصبحين في دوامة تفكير زوج المرأة المنتحرة

من يريد الانتحااار فلينتحر تبقى نفسه و يُحاسب عليها أمام الله

لا لتتحملي تهوّره

بين طريقة تفكيره لا تتسرعي و ابتعدي عن طريقة تفكيره للانتحار فلربما

انتِ من زرعتِها في مخيّلته بحديثك عن المرأة و خوفك من مَا جرى و موضوع كافي لخوفك الشديد من الحادثة لكِ الاختيار





و تبقى وجهة نظري لكِ

بالتوفيق لكِ

[بنت النخلة]

السلام عليكم
العصبي صحيح صعب المعاشرة ولاكنه اذا كانت له ايجابيات في اخلاقه وشخصيته واذا كنت هادئة الطبع فيمكن ان تتفادي ذالك
فهاذا ليس سببا كافي لتتركيه ..
اما ما يدعوا للحيرة هو طريقته في اقناعك وهو ان يهددك بالانتحار ...
فحاولي ان تسالي نفسك لماذا قبلت به اصلا اذا كان سيئا كل هاذا السوء وان يكون تقييمك منطقي وعقلاني
واعطي لنفسك فرصة فتكون لك لا له...
لانك لن تتزوجيه بدافع الشفقة كي لا ينتحر بل ان تقبلي به شريك حياتك ورفيق دربك
والله المستعان

[samou71]

المسكينة الاولى انتحرت من اجل زوجها و المسكينة الثانية خايفة ينتحر خطيبها على جالها و الحل ساهل كل واحد يمضي في حياتو كما تخرج عليه واحد ما هو ضامن الاخر و الكل مسوؤل عن نفسه. و الاعمار بيد الله و حتى الرجل الى انتحرت زوجته ما عندو حتى دنب و انت كدلك.
ادا صح كرهتيه والله ابدا ماتزيدي تحبيه و ماتسيفيهش على روحك راكي تغلطي في حياتك غلطة ماتتصلحش مبعد.
كما لاحضت البعض يعطيك الحق و البعض يقولك راكي غالطة و لكن ننصحك ماتسمعي غير لروحك و ادا قررت تولي ليه اساءلي نفسك و علاش :
هل لانك تحبيه و قادرة تضحي رغم ضعف شخصيته, راهو يعييك بزاف في حياتك
و هل لانك تخافي عليه من الانتحار و هدا اصلا من الحب و الا واش همك يتحرق و لا يتفلق

و الا غير باش ترضي ضميرك بصح رايحة تعيش معه و هنا تطيحي في الفخ ودوامة الحياة خاطر كل مايغلط اولي يغنيهالك
و ربي يوفقك الى مافيه الخير

[ايمان4]

اديها من عندي مينتحر ما والو زيد هذا مشي راجل شخصيته ضعييفة طيشي علييك بدلي كلش و يلا انتحر بينه بين موااه انتي ختطيك

[naimori]

نتي ممكن فيك عيوب كثيرة وراهو راضي بيك
وزيد علاش كرهتيه تزعفيه يولي عصبي هدي اكيد مكانش واحد يزعف وحدو اما انتحار صديقتك دارلك صدمة روحي عالجي روحك وماديريش عل الي قالولك راه يتمسخر لانو ممكن يحبك بزاااف ويتهور ويديرها ترفدي ذنوبو وزيد رقي نفسك

[alhor72]

نصيحتي لك أيتها الأخت أن تتقي الله ولا تكلميه ولا يكلمك وغيري شريحة الهاتف تماما ما دام قد استقر رأيك وقلبك على قرار الابتعاد وأنا أؤيد قرارك فماذا تنتظرين من سباب شتام وهذه صفة من صفات النفاق هذا رأيي وأنت اختاري بين انتحاره أو انتحارك أنت فالحل في طاعة الله والابتعاد عن المحرمات فما ساقك لهذا الحال إلا معصية الله تبارك وتعالى إذن فباب التوبة ممفتوح فتوبي إلى ربك وابتعدي عنه كلية بنية طاعة الله فسيعوضك الله خيرا منه وإن هو انتحر فكل نفس بما كسبت رهينة ولا تزر وازرة وزر أخرى والسلام عليكم

[لمسة ابداع]

السلام عليكم ورحمة الله و بركاته
خطيبك هذا عندو شخصية متزعزعة على ما اظن و ضعيف شخصية
ويسب قدامك ثقيلة شوية هادي الاساس تاع الزواج المودة
خممي ملليح من بعد قرري و توكلي على ربي ياتكملي يا لا لا