الدرس الواحد و العشرون من دورة تعليم الحلويات

*أم كوثر* · 2012-03-15, 08:18

السلام عليكم و رحمة الله و بركاته
اولا اعتذر عن الاطالة في تنزيل الدرس و ذلك لاسباب خارجة عن ارادتي
الدرس عبارة عن بقلاوة بعجينة الفيلو اللي لقيت الكثير من الاخوات يتساألن عنها

نبداو بعجينة الفيلو
4 كيلان فرينة مع نصف كيلة سمن او زبدة دايبة و باااردة و ملح و نبل بماء زهر و نخليها ترتاح نصفف ساعة

من بعد نقسم العجينة لى 4 خبزات صغار كل خبزة نقطع منها 6 كويرات صغيرة

في المجموع نتحصل على 24 كرية نديرهم في بلاستيك و نشتغل بالواحدة

نفرد اول كرة و نغمرها بالنشاء

و نفرد التانية و نضعها فوقها و نغمرها ايضا بالنشاء و هكدا حتى نصل سادس كرية

نفردهم مع بعض و نرجعهم قرصة وحدة كبيرة و رقيقة تفوت حوا ف الصينية

ندهن صينية فرن ملييييييح بالسمن و الحواف ايضا و نحط الطبقةالاولى وندهنها بالسمن

تم نحل ال 6 كويرات بنفس الطريقة و نحطهم فوق هد الطبقة

نحضر الحشو اللي هو اي نوع من المكسرات عندك لوز او جوز او كوكاو او خليط بينهم
3 كيلات مكسرات بكيلة سكر و قرفة وماء زهر و نخلطهم مليح و نحطهم فوق الطبقة التانية

و نكمل مع 6 كريات الاخرين نفردهم فوق بعض بوضع النشاء و نغطي بيهم
وندهن بالسمن تم ال6 كريات الاخيرة و نغطي الطبقة الاخيرة ونقطع البقلاوة بالشكل و الحجم المرغوب و نرشقها بالبيستاش او حسب الموجود حتى اعواد القرنل

نسقيها بالسمن الدئب او بمعنى اصح نغرقها بالسمن لازم يكون بزيادة لا نو هدا هو السر اللي يخليها تطيب و تبقى بيضاء

و الخطوة الاهم هي الطياب
نسخن الفرن مليح ومن بعد نحطها تطيب و نخفف النار الى 175 درجة في الرف الاعلى
تاخذ حوالي ساعة الا ربع مع الانتباه لانو كل وحدة و الفرن تاعها
لااازم تطيب من داخل ومن برا تبقى بيضاء كما رح تشوفو الصورة
و نعرف انها طابت مليح لما نلاحظ انتفاخ الحبات و دك تشوفو الفرق في الصورة قبل الطياب و بعده

نعسلها و هي سخونة زنرش عليها بيستاش و اكيد تبات ومن بعد تتقطع

ارجو ان اكون قد وفقت
اي سؤال لا تترددوا
فقط دعوة بظهر الغيب ان يحقق الله ما ببالي و يحفظ لي زوجي و اولادي

حلم جميل · 2012-03-15, 08:45

دائما متميزة عزيزتي
ربي يعطيك وش متمنية

looona · 2012-03-15, 09:02

الله يبارك روعة شهتيني مع الصباح
دائما متميزة

ghorba · 2012-03-15, 10:10

يعطيك الصحة اختي السمن كيلة ام نصف كيلة لانك في لابات افيلو موالفة نحط نصف كيلة هل هي تختلف والعجن بماءالزهر وحدو ام معه الماء

سَلْسَبِيّلْ · 2012-03-15, 10:35

بارك الله فيك ربي يحققلك كل ماتتمناي يارب قولو امين

لولو1000 · 2012-03-15, 10:40

ربى احققلك ما فى بالك ويحفضللك زوجك واولادك امين
بصح شحال قطر الصينية وشكرا

mounafam · 2012-03-15, 10:59

رائعة والله غير شهتيني أنا نموت عليها بارك الله فيك دائما متألقة حبيت نسقسيك في الاخير نطيبوها من الفوق أو لا وشكرا

remadna · 2012-03-15, 11:04

الله يبارك فيك و في عائلتك
الله يحقق لك ما في بالك آمين رب العالمين

miro1508 · 2012-03-15, 11:33

يعطيك الصحة بصح جاتني بيضاء نقدرو نحمروها مل الفوق او لا ? شكرا على الوصفة

faizarbh · 2012-03-15, 11:38

شكرا بزاااااااااااااااف ام كوثر و ربي يوفقك و يعطيك واش تتمناي و ربي يحفظلك زوجك و اولادك و يستركم و يبعد عليكم كا اذى ان شاء الله يا رب

بنت غليزان · 2012-03-15, 11:40

شكرا لك ام كوثر دائما متالقة

أم ياسين الزهراء · 2012-03-15, 11:49

بارك الله فيك دايما موفقة في الشرح الممتاز

اختي كنت درت موضوع نطلب فيه منك ديسار اللي يجي بالجينواز تعيشي ديريلنا درس في هذا الموضوع

ربي يكملك ويوفقك

*أم كوثر* · 2012-03-15, 12:10

اقتباس:

المشاركة الأصلية كتبت بواسطة ghorba

يعطيك الصحة اختي السمن كيلة ام نصف كيلة لانك في لابات افيلو موالفة نحط نصف كيلة هل هي تختلف والعجن بماءالزهر وحدو ام معه الماء

الله يسلمك اختي نعم نصف كيلة راني عدلتها الف شكر

و العجن انا نعجن بماء زهر وحدو و اللي يحب يخلط معاه الماء
نعجن بيه وحدو لانو يخلي فيها رائحة طيبة

و هي تطيب مدة طويلة و على نار هااااادية و تطيب غير من تحت لانو مالازمش تتحمر من فوق لان اي نوع حلوى بهد العجينة مايكونش محمر من فوق
تبقى بيضاء و في نفس الوقت طايبة ومقرمشة
وماتخافوش لان مدة ساعة الا ربع تخليها تطيب مليح من تحت ومن الوسط ومن فوق مع مراعاة كل مرة ندورو الصينية

اختي ام ياسين ان شاء الله نديرلك الديسار اللي حبيتي
نورتوني حبيباتي و اثلج صدري دعاءكم
بارك الله فيكم وحدة بوحدة
والف شكر مرة اخرى

BACHIRA2 · 2012-03-15, 13:06

بارك الله فيك عزيزتي ام كوثر و الله دائما ندعيلك الله يحقق امانيك و يبعد عنك و عن اسرتك كل سوء امين

lamiak1 · 2012-03-15, 13:07

شكرا لك ام كوثر ان شا الله يتحقق واش في بالك والله يخليلك زوجك