الورشه السابعه و العشرون ...سطايفيه

[stayfiya]

السلام عليكم ورحمة الله و بركاته
اليوم راح ننزل ورشة من مجموعة الروبات الشتويه لي حطيتها
https://www.djelfa.info/vb/showthread.php?t=1710099
كي العاده الاصداء ما بقاتش كيما في الماضي راح النشاط و التفاعل اصبح منتدى ((للمصالح))
مكانش روح العطاء غير لي يدخل ياخذ واش يساعدو... ماحبستش هنا وصل البخل حتى لكلمات الشكر
والله كانت مهونه علينا ايقونات الشكر الاجحاف في الردود
كلامي موجه لفئه تعرف نفسها مليح و ديري في بالك لوكان تبقاي غير تدي بلاما تعطي راح يجف البئر

نرجعو لموضوعنا
روبة اليوم تشبه للورشه 24
على هاذيك ميش راح نعاود القياسات. فقط هنا الرقبه دائريه
و طول المونش اقصر 40سم

هنا طبقنا لقماش كي العاده على اربعه و فصلنا روبتنا

اكيد عملنا زيادات من اجل البانسات لي في الصدر و الخصر
ازحنا الامام على الخلف و خدمنا بنسة الظهر من اعلى لاسفل الروبه

و من امام عملت ديكوب للصدر على الجهتين حبست البانس عند الحوض


من بعد بديت نخيط جملت البنسات كيما نقولكم ديما البنس تبداي من اسفل و تطلعي
راح تلاحظي فرق صغير و هذا حنا عملنا حسابو يعني ما يقلقكش راح نوزنها فيما بعد


نولي للامام
حبيت نرسم على القماش موتيف
انا خيرت الشمس

و كان عندي قماش معدس و انتي حره تقدري ديري في بلاصتو
فولور من لون مغاير
المهمه تاعنا راح تكون صعيبه في تلصاق هذا لقماش و كيفية التحكم فيه
انا اول حاجه رسمت الشكل لي باغياتو
و جبت الجرايه تاعي

و فرشت الجرنان تحت الامام تاعي بالظبط تحت الرشمه
و فوتها على حواف الرسم

من بعد تحصلت على الاشكال

قطعتها و حطيتها على لقماش و فصلت

من بعد عاودت ستفتها. فوق الرسم في اماكنها انا رقمتها باش ماتتخلطليش

و خيطتها بيدي على طول الحواف خاطر المشينه راح تقلقني في لخياطه
وكاين لي ما تصلحلهمش اصلاً باش يخيطو

من بعد هاذ العمليه قلبت الروبه وين لعدس يجي من اسفل و عاودت ثبتت الخياطه بالمشينه
هاني تحصلت على الشكل لي حبيتو

بقاو ليمونش عملت حافه 5سم و مشيتها على حاشيه المونش

هذا مكان نروح نخدم السجاف للرقبه بعدما نخيطو ليبانس
من امام و الخلف


نعاود نوزن روبتي في عرض الكتف و فتحة الذراع الامام مع الخلف

و نلصق المونش

و هاي ليكم واجده

واش رايكم
دعواتكم

سلام

[stayfiya]

.ندى قدور هبطت ب 18سم

اختي طايفية ادا كان القماش تع المس قماش نورمال يعني بدو عدس هل نستطيع وضعه على ثقماش القندورة رسم الشمش عليه تم خياطتها تم قصها
هل نتحصل على خدمة متقونة شكرا

من الافضل تخمي زيقراق مشبوح على لي الحواف جيخ خدمتقونه و من بعد تقطعي الزوائد

يعطيك الصحة


حابة نسقسيك

مافهمتش مليح كيفاش لصقتي هاديك الشمس

بالضبط كي قلبتي القماش يعني حطيتيه على الجهة المقلوبة ولا كيفاش

وحتجة اخرى هذا واش اسمو ومتى يستعملوه

الظاهر ياختي شفتي التصويره برك ماقريتيش عاودي اقراي تفهمي واش اسمها و واش دير

[ندى قدور]

واش انقولك يا الحرة ربي يباركلك في صحتك ويناولك اللي في بالك ............ورشة في القمة كلش مفهوم ربي يخليك لينا بووووووووسة من عندي على الجبينسؤال قداش حبطت في الرقبة

[ام كوكو]

يعطيك الصحة سطايفية انا ما نحبش العدس لكن الروبة خرجت هايلة ما شاء الله

[تقوى اماني]

شكرا شكرا والله الصفحة بلا بيك صامتة

[crono]

الله يبارك ويزيد
لبرنتي الله يحفضلك هذوك اليدين...اللي تعجبني في ورشاتك انها تتميز بالبساطة ..

[mimimouni]

هايييييلة يعطيك الصحة

[سواد داكن]

يعطيك الصحة


حابة نسقسيك

مافهمتش مليح كيفاش لصقتي هاديك الشمس

بالضبط كي قلبتي القماش يعني حطيتيه على الجهة المقلوبة ولا كيفاش

وحتجة اخرى هذا واش اسمو ومتى يستعملوه

[aryèm]

سلام اختي سطايفية يسلمو الايادي
لوكان نقولك باللي انا منعرف حتى حاجة في الخياطة
اصلا الابرة و الخيط منعرفش نخيط بيهم
لكن من اللي نشوف حوايجك و كيفاش تتقنى و ابداعاتك في عالم الخياطة
راني خممت نشري ماشينة و نبدى نتعلم
لهذا حبيت نسقسيت
اذا نقدر نتعلم من النت و من المنتدى الخياطة و الا لازم مركز التكوين و وحدة تقريني
لاني منعرف والو لكن مصرة نتعلم

[مونيا غنية]

سطوفة بارك الله قيك 44444444444444444

[hope of life]

بارك الله فيك سطوفة....اعمالك وطريقة الشرح ديرنا الحرارة...باش نخيطو....انا عن نفسي مشاغل البيت لا تنتهي...ومازال مالقيتش بروغرام باش ندير رايي فيهم في زوج ...الدار والاولاد.....والخياطة....انا عن نفسي جد مبتدئة...نحاول نتعلم...ومانقدرش نحط مواضيع...بالاضافة الى اني كينبدا ندير في حاجة نطول معاها....حتى نبغا نفرطس....واكيد ماش رايحة نقدر نصور مع هذيك القلقة والتعقيدات....وكاينين حوايج بديتهم عندهم وقت...ومازال ماكماتهمش...ههههه....على كل حال الانسانة الي تحط موضوع بتفاصيلو وتتعب عليه لوجه الله......اكييييييد هي انسانة طيبة...

[عاشقة الخياطة73]

ربي يحفظك ياسطايفية ويخليك لينا يارب وبمناسبة المولد كل عام وانتي بخير وعايلتك الكريمة

[abassia81]

السلام عليكم حبيبتي سطوفة

شكرا لك على كل شيء و الله يجعل كل حرف تكتبيه مضاعف في حسناتك

لي يشوف ورشاتك يلزم عليه يغير و يتعلم و أنا وحدة من لي غاروا

قررت باش نشري مشينة و نبدأ في الخياطة ...علابالي بلي في البداية عادي تجيني صعيبة بصح ماعليش راني قابلة التحدي


ربي يحفظك و يعطيك كل خير

[ام رشدى]

ربي يجازيك الخير وكل حرف تكتبيه يرجعلك حسن وبمناسبة المولد نتمنى انشاء الله ربي يعطيك على قد نيتك اللهم صلي على محمد صلى الله عليه وسلم والله يرحم الوالد العزيز والللللللللف شكر ليك

[*منى*]

اللهم صلي وسلم وبارك على محمد نبينا الكريم
عمل رائع سطايفية في منتهى الاتقان انا نضم صوتي ل hope of life ونقول لازم ندير بروقرام بين الدار والعايلة والخدمة والخياطة باه نعود عضو فعال ميش مشاهد فقط
الله يجازيك ويحفظك ويسترك
قبلاتي الحارة