طريقتي في صنع المحاجب + شرح لعجينة الكيس المبلل

الوهرانية 1 · 2012-11-20, 17:46

السلام عليكن حبيباتي الغاليات نتمنىيلقاكم موضوعي هدا وانتن في كامل الصحة والعافية
اليوم خيرت لكن المحاجب بطريقتي ونتمنى تساعدكن
المعروف ان حبة المحاجب متقدريش تتحكمي فيها اكثر او تشكليها بحرية والسبب الحشو الي بداخلها لان العجينة ادا تشمخت تنثقب ليك والحشو يصبح في خبر كان والحبة تجيك مستطيلة مثلثة لكن مربعة مستحيل واحيانا تحشمي تقدميها بسبب شكلها لعوج
المهم حبيبتي اليوم نقدملك هاد الحل ونتمنى يساعدك تابعي معايا

قبل كل شيء كنت حطيت لكن طريقة الكيس المبلل الدي نعتمد عليه في كل المعجنات وبعض الاخوات ما فهموهش اليوم صورت لكن بطريقة اوضح
تابعي اختي
حطي في قصعة سميد رقيق مع شوية فرينة وملح وماء دافيء

اعجني بيدك حتى تتلم مع اضافة الماء تدريجيا حتى تصبح هكدا

الاخوات الي سالوني عن الكيس وكيفية تبليله هو كيس عادي

وهنا تابعي كيفاش نشمخوه نغطسوه كامل في صحن به ماء فاتر

ومباشرة وهو يقطر نديرو فيه العجينة

ونغلقه مليح

هاهو كيفاش يصبح

نقلعو الكيس ونعجن من جديد يعني نلقاو العجينة مبللة ندخلو ليها هاداك الماء

ونرجعو نديروها في الكيس لكن المرة هادي نعصرو الكيس

وشوفيها كي تولي من غير دلك وتعب

نقطعوهم كويرات صغيرة وكويرات كبيرة
ولكل كرة كبيرة كرتين صغيرتين
يعني 10 كريات كبيرة= 20 كرة صغيرة
بالصور

الكرات الصغيرة نحلها ونخدمها رقاق او تريد هاهو

نبدو الان تحضير المحاجب
انا استعملت حشوة البصل الطاطم المصبرة الزيتون مقطع الجبن فلفل اسود وملح
البصل قطعته في الربو يجي رقيق احسن

كي طاب زدت عليه الزيتون والطماطم

في الاخير درت الجبن

نفتح كرة عجينة بالزيت نحط فوقها ورقة تريد او رقاق ونحط الحشو

نحط ورقة اخرى من الفوق

نغلقها بهدا الشكل

نحطها في الطاجين كيما راكي تشوفي اختي تصبح ساهلة تتحكمي فيها والحبة تجي كبيرة

كي تنشف من الفوق اقلبيها

وها هي الحبات جاهزة

وسهلة باش تطويها كيما تحبي

وتجي مورقة من الداخل

ربما طولت في الشرح لكن في الواقع هي سهلة وخاصة ادا حضري الرقاق من قبل
صحة وعافية عليكن

terrou · 2012-11-20, 17:53

Meeeeeeerciiiiiiiii

oumraja · 2012-11-20, 18:06

ya3tik 1000 3afia oukhti rw3a

تالا تسنيم · 2012-11-20, 18:27

ربي يسترك و يحفظك حنونة..................... بارك الله فيكي .................. طريقة و لا أسهل.............

سعاذ · 2012-11-20, 19:53

بارك الله فيك

أم ياسين الزهراء · 2012-11-20, 20:33

ماشاء الله عليك حنونة فنانة وممتازة الله يخليك اتهلاي برك فينا وين تتفكري عفسى ازربيلنا بيها الله ينورك ويفتحها في وجهك

ام انفال 12 · 2012-11-20, 20:48

formidable

natacabell · 2012-11-20, 21:01

choukran laki charak mafhoum wana nhab charh kima hada doka fhamtak khire rahi hakmatli ala lamhajab asoukti bark nchalah njarab tarika taak baraka lahou fik hanouna

*أم كوثر* · 2012-11-20, 21:23

اممممممممممممم اشهي
وافكارك روووووعة والعفسة تع الكيس المبلل ولات متخطينيش كلما نديرها ندعيلك
للتثبيت

صفاء الرووح · 2012-11-20, 21:41

يعطيك الصحة وهرانية1 تعلمنا حوايج بزاف منك
حبين نسقسيك علي الكريات الصغار غير نحلوهم نحطوهم شوية فالطاجين ومبعد نحوهم ولا نخلوهم يشيحو فالهوا فهميني في هدي النقطة ربي يحفضك ان شاء الله من كل الشئ

الحركاتية · 2012-11-20, 21:55

[quote=صفاء الرووح;12224283]يعطيك الصحة وهرانية1 تعلمنا حوايج بزاف منك
حبين نسقسيك علي الكريات الصغار غير نحلوهم نحطوهم شوية فالطاجين ومبعد نحوهم ولا نخلوهم يشيحو فالهوا فهميني في هدي النقطة ربي يحفضك ان شاء الله من كل الشئ[/quote
أولا كل الشكر للأخت الوهرانية على الشرح وعلى طرقها المبسطة في تقديم وتعليم الأخوات الكريمات
ثانيا أجيبك أختي صفاء الروح بدلا من الأخت الوهرانية لحين يصلك ردها : نعم الكرات الصغيرة ترقق وتطهى على الطاجن مثل الثريد تماما والباقي الصور توضحه بشكل جيد
وللأخت الوهرانية حبيت نقول المحاجب بلا الشحم والحار ما يشفوش الغليل ولا واش رايك؟
لكن خالص التحايا .