ملف الأخطاء المطبخية les erreurs culinaires - الصفحة 6

السوسن ا · 2016-10-25, 20:57

تفضلي هذه الهدية قالالنبي صلى الله عليه وسلم قال: أحب الناس إلى الله أنفعهم، وأحب الأعمال إلى الله عز وجل سرور تدخله على مسلم، أو تكشف عنه كربة، أوتقضي عنه ديناً، أوتطرد عنه جوعاً، ولأن أمشي مع أخي المسلم في حاجة أحب إلي من أن أعتكف في المسجد شهراً، ومن كف غضبه ستر الله عورته، ومن كظم غيظاً، ولو شاء أن يمضيه أمضاه، ملأ الله قلبه رضى يوم القيامة، ومن مشى مع أخيه المسلم في حاجته حتى يثبتها له، أثبت الله تعالى قدمه يوم تزل الأقدام، وإن سوء الخلق ليفسد العمل، كما يفسد الخل العسل. والحديث حسنه الألباني -رحمه الله-

zokhrofa · 2016-10-25, 21:54

معلومة هايلة شكرا اختي سوسن

اللهم اني اعوذ بك من علم لا ينفع

مرحبا بيك في كل وقت

انتي اطلبي و انا و الاخوات نشوفو اذا نقدرو نعاونوك في مجالات اخرى اذا ربي حب

فاصلة · 2016-10-25, 22:04

اقتباس:

المشاركة الأصلية كتبت بواسطة qaraqo

اختي اسمحيلي مقريتش هذا الرد والله منتبهتلو اسمحيلي بزاف

1- تفوير الكسكس بدون مايتغطى ضرووووووري يبقى معري باش ما يتعجنش

2- 1 ك 5 مغارف اختي انا نص كيلو ندير 2

3- الطريقة الصحيحة لأكل البطاطا هي عدم القلي .... لتفادي القلي نقيها و قطعيها كيما حابة و بعد ما تبرد تمااااااااااااااما ؤأكد ترد قليها فالزيت او حمريها فالكوشة

اذا ولا بد البطاطا تتقلى ملازمش تفوت حرارة الزيت 180 درجة و الا حتاكلي سم و ليس بطاطا (تسبب السرطانات مع الوقت) معدل اكلها مرة في الشهر فقط

الزيت كي يسخن ارمي فيه البطاطا و نقسي للنار متوسطة باش مطيبش من الخارج و تبقى خضرة من الداخل

انا شخصيا ضد التملاح مقبل خاطش الملح يخرج الماء من البطاطا (او اي شيء الملح يخرج الماء ) و الزيت تتخلط بالماء و تجيك البطاطا محرحرا و كيشغل مغليا

ضيفي الملح مباشرة بعد ما تخرجيها من المقلات

أنا نملح البطاطا فقط الجزء لي نبغي نطيبو يعني ما نملحهاش قاع كل مقلى نملحها وحدها تجي بنينة وما تطلقش الماء والزيت ما يطايش

zokhrofa · 2016-10-25, 22:06

اقتباس:

المشاركة الأصلية كتبت بواسطة فاصلة

أنا نملح البطاطا فقط الجزء لي نبغي نطيبو يعني ما نملحهاش قاع كل مقلى نملحها وحدها تجي بنينة وما تطلقش الماء والزيت ما يطايش

مليح لكن ارجو انك متقليش اكثر من مرة او مرتين في الشهر ؟

فاصلة · 2016-10-25, 22:14

نقلي بزاف من زوج الى تلاث خطرات. عندي ولدي ما ياكلش كثير من الامأكولات معناها في الاسبوع نطيب الشكشوكة والحريرة واللوبيا ماشطو والشوربة. والكسكس فاني نطيبو بزاف راجلي يبغيه هو وولدي ومرات الكرانتيكة والبركوكس وأنا نبغي الدنجال بلصوص تاع الطماطم حب ومرات ندير الروز انا ما ناكلوش هاذا هو الموني تاع الاسبوع هههههه وهاذو الايام تاع البرد ضوك ندخل العدس واللوبيا هههه

zokhrofa · 2016-10-25, 22:53

اقتباس:

المشاركة الأصلية كتبت بواسطة فاصلة

نقلي بزاف من زوج الى تلاث خطرات. عندي ولدي ما ياكلش كثير من الامأكولات معناها في الاسبوع نطيب الشكشوكة والحريرة واللوبيا ماشطو والشوربة. والكسكس فاني نطيبو بزاف راجلي يبغيه هو وولدي ومرات الكرانتيكة والبركوكس وأنا نبغي الدنجال بلصوص تاع الطماطم حب ومرات ندير الروز انا ما ناكلوش هاذا هو الموني تاع الاسبوع هههههه وهاذو الايام تاع البرد ضوك ندخل العدس واللوبيا هههه

ههههههه هايل طيابك

و الباذنجال متقليهاش نتمنى ههههه

zokhrofa · 2016-10-27, 21:32

شكون عندها مشكل ؟؟؟؟؟؟؟؟؟؟؟؟؟؟

تاج الهناء · 2016-11-02, 17:47

اقتباس:

المشاركة الأصلية كتبت بواسطة qaraqo

شكون عندها مشكل ؟؟؟؟؟؟؟؟؟؟؟؟؟؟

يا اختي كراكو وشراكي وش احوالك مع الدار و الخدمة انا الخدمة قتلتني كرهت روحي
وعندي سؤال على نوعية الفرماج الي نديروه في البيتزا ويكون بنين انا ديما نشري اجبان لا علاقة مع البنة

السوسن ا · 2016-11-02, 20:18

حتى لا ننسى جزاكم الله خيرا على ماقدمتموه من عون ويد مساعدة

*أم سجى* · 2016-11-03, 14:49

الاخت كراكو حابة نسخسيك قوليلي اللوبيا شحال نديرلها من سنة ثوم واذا البصل يغلب علا الثوم ولا العكس؟ وكي نحمس فتوابل نحمس في زيت برك ولا ندير فنجال ماء ومبعد نمرق يارب دايمن نسقسي الاخوات علا هذالشي وميفهمونيش مليح يعطوني اجابة وحد اخرى فهميني فهذالنقطة اخت كراكو بليييييز

الامل الجديد · 2016-11-03, 20:19

هادو نصائح للطبخ
1: باش يجيك الطياب بنين اوتكون كنتيتي كبير او فيه براكة قبل ما تبداي قولي بسم الله
2:سر الطياب باش يجى بنين هى انك ترابى البصل و تقليه مليح مع اللحم و الطماطم عاد تزيدى الماء الساخن
3: باش البقول الجافة تطيب مليح و بسرعة لا تضبفى الملح و الطماطم الا فى الاخير و ضعى ملعقة فى الكوكوت
4:سر المقروط يجيك يذوب في الفم
امبعد ماتذوبي المارغرين زيدها 4مغارف زيت.رشه زعفران يجيك لونه اصفر شباب.امحريه مليح يدخل السمن في السميد وخليه يبات.وغدوی ثاني زيدي امحريه
5:باش اطيب الحمص او اللوبيا بسرعة في الماء، أضيفي القليل من الخميرة الكيميائية
6:طريقه طيبي العدس في20دقيقه ويجيك بنين يهبل وخاثر
دوزني كلشي كيما مالفه(ثوم.بصل.فلفل اسود.كمون.زيت .طماطم مصبره.حبات طماطم مرابيه.فلفل احمر.خليهم يتقلاو فوق النار 5دقايق .وحطي العدس امبعد مانقيتيه وشللتيه مليح.وامرقي بالماء السخون+مغرف ص خميره الحلوی .واقفلي عليه الكوكوط 20د يكون طاب زيديلو ورقات رند وكسبر اخضر.وجامبوا حسب الذوق
اذا عندك اللحم حطي طرف ثاني يجيك بنين
جربووووه هايل
7:باش البيض يطيب بلخف زيدي الملح ف الما
8: لو احتجت الى حمص مشمخ ومكاش عندك فرغي حمص. فى ترموسه مع ماء سخن زيزدديلو كربونات وبعد ساعه تلقايه واجد طريقة سريعة
9:كي طيبي الارز حركيه بالفرشيطة مش بالملعقة باه ميدقدقش الارز ويحافظ على قوام
10:قبل ماترش الطعام بالماء يرطب حطي أولا 2مغارف زيت حكي الطعام م يتخلط من بعد ديري الماء عادي وكي يفور كل حبة تجي وحدها
11: اذا طيبتي مرقة و جاتك خفيفة ديري مغرف فرينة و لا مايزينة في شوية ما و زيديهم فالطياب تعقدلك عن تجربة
12: تحبى يجيك القريوش خفيف وبنين زيدي للعجينه مغرف كبيرة نشاء واعجنيها بالحليب العادي
11: صابلي باش يبقى طري حليه فوق سيلوفان و ديما استعملي فلوريال و متحليهش بالفرينة
12:كي تتحرق الكيك من فوق نحي الطبقة المحروقة بسكين و رشي سكر قلاصي في بلاصتها و رجعيها للفور رح تتشكل طبقة اخرى لذيذة
13: قبل ماتقلي البطاطا ديري شوي خل في الزيت دوك ماتجيكش مزيتة
14: باش تجي طيابك بنين كل مرقة خصيلها لعقاقر تاوعها مثلا الجاج يحب الزنجبيل الجلبانة تحب القرفة البصل ولكركم وراس حانوت مخلط الوبيا موشطو تحب البصل والقرفة والزيت ولا سمن بزاف الزيتون يحب الرند اللحم والمرقة الحمرا تحب الكمون والثوم والحشايش لحريرة تحب لكرافس وكل وحدة ولمستها
15: كي تفرغو بطاطا و كورجات تاع دولما قبل ما ديرو الحشو اطليوها بالملح ما جيش صامطة
16: باش اجيك الرشتة العاصمية بنينة اسكرفجي حبة لفت مع البصل للتقلية
17 :باش يجيك اللحم المرحي نتاع المتوّم طري زيديلو مغرفة سميد
18: باش ماتروحلكش لافورم نتاع الحلويات خاصة نتاع اللوز خليهم يرتاحو ليلة في البلاطوات قبل الطهي
19: باش يجيك الكيك والمسكوتشو خفيف ديري الياوورت في بلاصة الحليب
20: باش تجي الطبخة بنينة لازم تطيب على نار هادئة و ما تقوعديش غير تزيدي فالماء لأن لبنة تاع الماكلة تروح كامل يعني لازم تجي الماكلة مجمرة
21 :حتى تتحصلو على عجين سهل العجن بلوه بالماء فقط وخلوه يرتاح ومن يعد اعجنوه مليييح رايحين تلاحظو انه العجين تعجن تم تم، من بعد زيدي الملح وعاودي اعجني
22: غلي البيض في الماء وشويا خل باه مايتكسرش قشر البيضة و يخرج البياض وهو يغلي
23: للحصول على عجين طايب واحمر اضيفو الحليب غبرة
24: باه تتحصلي على زيتون طري لاستعماله في طاجين الزيتون غلي الزيتون ربع ساعة ومن يعد صفيه و غليه للمرة الثانية مع قليل من الخميرة الكيميائية بشرط يكون لما سخون بزاف وخليه يغلي مدة 20د ومن بعد صفيه وحطيه في ما عادي ليلة كاملة مع اضافة مغرف كبيرة نشا لازالة الملوحة والمرورة منو وغدوا صفيه ويحمص في قليل من الزبدة ويرمى في المرق
25: الزيتون وباه تحافضي على اللون ترقديه من قبل في شوي ماء وفرينة ومن بعد تغليه مع شوي سكر
26 : كي تحطي اللوبيا تتشمخ حطي معاها حبة بطاطا مقشرة هكذا الوبيا ما تضركش و يحكموكش لا غازات و لا وجع و كولي لوبيا كيما تحبي خصوصا اللي عندهم القولون مساكن محرومين منها
27: باش يجيك الدجاج عندو بنة كيما الي عند الطباخين ديري توابل خاصة للدجاج تشريها من عند العشاب و ماتنسايش الثوم المرحي
28:إذا كان اللحم شارف و محبش اطيب، حطي قلب تمر في الطنجرة (وما تنسيش تنحيه كطيب الاكل
29: لإزالة رواءح الأكل من الفرن و خاصة راءحة السمك، بعد ان تخرجي الطعام من الفرن ضعي نصف ليمونة ستمتص كل الروائح )أكيد بعد إطفاء الفرن
30:اذا بغيتي الروز المفور وعندك غير العادي واش ديري؟؟؟؟؟؟
نقي الروز العادي ورشيه بالزيت وحدوا بلا ماء وفوريه فوره واحده وامبعد لوحيه بالماء سخون مع رشه ملح 10دقايق وقطريه وفوريه الفوره الاخيره ديرولوا الزبده
يجيك فوررررر كل حبه وحدها كيما المفور والبنه احسن منه
31 : حلي عجينة البيتزا دايما بالنشا بدل الفرينة تجي خفيفة
32: قبل ما طيب الزيتون أضيفي له الفرينة واتركيه ليلة كاملة ومن بعد شليه بالماء خدي منه المقدار الذي تحتاجينه والباقي خزنيه في البراد لاستعماله عند الضرورة هذه الطريقة تخليه يحافظ على لونه وتاكلوا بالصحة و الهناء.
33 : باه تكسري لحماضة نتاع صوص طماطم زيدي مغرفة سكر
34:باه تروح ريحة الحوت من الكوزينة ديري في كسرولة ماء وعود قرفة ونص ليمونة حطيهم على النار يغلو.

نجمة ليل · 2016-11-03, 20:48

انا عندي اخطاء في تتبيل اي شيئ دائما كاين حاجة اكثر من حاجة
لذلك نطلب منكم نصيحة مفيدة لهذه المشكلة و شكرا

أم إساف · 2016-11-03, 23:21

نعطيكم نصيحة ومجربة وناجحة سر نجاح المسكوتشو او جينواز او الكيكة لازم طيبيها على نار قليلة اقل من150 مثلا من 120 الى 180 ومن الاحسن ونتي ولكويزبنيار تاعك ولازم ماتفتحيش عليها خلاص حتى تشمي ريحة طيابهامن بعد طلي عليها المهم اكثر من 45 دقيقة باش طيبلك وكل فرن وكيفاه وفالاخير تلقاي نتيجة هايلة مسكوتشو خفيفو وهشة ومثقبة دخلاني اممممم روعة

فاصلة · 2016-11-03, 23:47

اقتباس:

المشاركة الأصلية كتبت بواسطة qaraqo

اهلا فاصلة واش من نوع زبدة تعيشي تستعملي؟

سلام. نسيت ما رديتش على سؤالك نستعمل أي زيدة عادي صول ولا لابال ولا المدينة ولا المرجان ويلا استعملتي أحسنهم يكون أفضل

تاج الهناء · 2016-11-04, 11:27

شكرا اختي امل على النصائح القيمة جزاكي الله كل خير