مساؤكنَّ سعيد حبيباتي ،،
صح فطوركم ... و سحوركم
إن شاء الله كاااامل تكونوا بصحة و سلامة ياااااارب .....
كنت وعدتكم في موضوعي السابق : سلسلة حلويات مميزة .. موضوع يخص المبتدئات و حتّى المحترفات بموضوع خاص بحلويات عيد الفطر لسنة 2014
و علابالي تأخرت عليكم .... بصح الحمد لله الحمد لله الحمد لله راني جيت و جبت معايا بعض الوصفات الي ان شاء الله تفيديكم ... وتعجبكم و نشوفهم ضمن تطبيقاتكم 
...
حاليا نحطلكم مجموعة وصفات ، مرفوقة كالعادة بأسرار الفشل 
و مجموعة نصائح نوصييييييي و نعاود تقيدوووو بيها تماما 
يعني ... الشكل أنتم أحراااااار اخترعوا اختراااااااع 
،، لكن الوصفة ماتغيرو فيها وااااااالو 
راهي كاملة مكملة ، واجدة للتطبيق ، و النتيجة مضموووونة بإذن الله
يا سيدي الي ماعجبتهاش حاجة ، ولا مانجحتلهاش تبعثهالي ^^ نرومبورسيلها المقادير 
ملاحظة : هذا الكلام موجه للمبتدئات ..... المعلمات تع المنتدى الله يبارك عليهم ،، ماشي أنا الي نجي ننصحهم
المهم ،
ملخص هذا الموضوع :
وصفات إقتصادية .....
سهلة .....
بسيطة ....
و الأكييييييد لذيذة
منتدانا ماشاء الله عليه راه معمممممممممر وصفات
كاين الي شفتها و جربتها ، و كاين الي ماحصليش الشرف اني نشوفها 
و طبعا .... كاين الي جربتها و نجحت ، و كاين الي 
عليه العوض و منو العوض
و انا والله مانشك في مصداقية حتى واحدة ، بالاك انا الي ماتقيدتش بالوصفة 
شفتو علاش دايما نقولكم اتقيدو بالوصفة
و منه ، رايحة نحطلكم ان شاء الله خلاصة تجاربي ، مرفوقة بالصور و النصائح " كالعادة " 
نتمنى تجربووووو ... لأنها كلها وصفات سهلة و اقتصادية و ماتديش وقت ، لكن بنتها خطيرة
يالله نبدااااو ، راني هدرت بزااااااااااااااف
قولوا بسم الله و تبعوني .....
الوصفة الأولى : أعتقد أنو ماكاش واحدة حطتها فالمنتدى من قبل .... إسمها :
هليلات الجوز
شكلها بسييييط جدا ، و لا يوحي أنها مميزة
لكن رايح يكون ذوقها مفاجأة
أنا مازينتهاش ، لأني جربتها من فترة طوييييلة و احتفظت بالصور
لكن نتوما إذا باش تديريوها فالعيد .0... غير ابدعوا
و ظوك نعطيكم مجموعة أفكار ....
المقادير :
- 250 ع مارغرين لابال أو ماني طرية " يعني بايتة خااارج الثلاجة (( مارغرين أخرى ماتعطيكش نفس النتيجة ))
- 2 ملاعق كبار سكر ناعم
- ملعقة كبيرة فانيليا ( استعملوا تع الميزان )
- 6 ملاعق كبيرة ماء الزهر
- 3 ملاعق كبيرة خل ذوق الليمون ( ماتستغربوش ، ماتحسوش بطعمو ، لكن يعطي هشاشة خيالية ... و ماتعوضوهش بالليمون
))
- نصف كيس خميرة كيميائية
- من 420 - حتى لـ 500 غ فرينة (( ممكن ماتلحقيش لل 500 غ ، بمجرد ماتتشكل عندك عجينة طرية مثل عجينة الصابلي حبسي الفرينة ..... ))
الحشو :
- معجون فراولة ( ممكن تستعملي المحضر في البيت ، أكيييييد طعمو أروع بكثييير من الي يتباع )
- جوز مدشش (( يعني مكسر فقط ، ماشي مرحي كيما الي فالصورة ))
التزيين :
- سكر ناعم .
طريقة التحضير :
بواسطة ملعقة ، أو مضرب يدوي أو كهربائي خلطي الزبدة مع السكر مليييييح ، زيديلهم ماء الزهر .و خلطي ، ثم الخل و خلطي ، ثم لافاني ، الفرينة و الخميرة مع بعض بالشوية حتى تتلم ، و تولي مثل عجينة الصابلي تماما
بااالالالاكو تعجنوها ..... لموها برك (( شوفو فالصورة ، لميتها برك ، و هاذيك الشقوق عادي .... بعد ماتحلو العجينة رايحة تختفي ))
الآن نجو للتشكيل .....
حليها بالحلال كيما الصابلي تماما ..... السمك متوسط ، ماتديريها خشينة بزاف حتى تتكسرلك ، ماتديريها رقيييييقة حتى الجوز ممبعد يخرج منها
ديري ملعقة صغيييرة معجون الفراولة .... قتلكم يفضل يكون مصنوع فالبيت ، أو هاذاك الي يتباع في علب زجاجية تاني فيه حبات الفراولة .....
عموما الذوق واحد
و قلنا احنا حلوياتنا اقتصادية 100/100
بعدها ديري كمشة صغييييييييرة تع الجوز .... شوفو شحال
علابالي يبانلكم قليل ، بصح صدقوني هذه هي الكمية المطلوبة
لوكان تكثري قادر يثقبلك الحبة ، و ظوك تشوفو الدليل ..... أنا مكراشة بسلامتي
قلت خلي نزيد الجوز و المعجون
بعد ما طاب خرجلي كااامل من الجناب .... و هاذي واحدة من اسرار الفشل
و ماشي تديرو فتيييييييتة
حتى يخرج صابلي مكربع
و اطويو بهاذ الطريقة
هنا ... ادهنوا أطراف الحبة كااامل ببياض البيض باش كي تطويو يلصقو مع بعض و ماتحتاجوش تضغطو عليهم باش يحافظو على شكلهم
شوفو و ماتضحكوش
انا هنا درتهم للدار .... ماشي فالعيد
يعني كور و مد للعور
و جربت بزاف أشكااااال " من باب التجربة ^^ " لكن الشكل الي عجبني هو الهليلات
و زيد .... قتلكم شارجيتهم حتى حبو بترطقو ههههه .... هذه هي نهاية المكراشين
طيبيهم على فرن مسخن مسبقا على حرارة 180 درجة (( و كيما نقوللكم دااايما ..... كي تشعلو الكوشة ديروها فال 180 درجة .... و خلوها تسخن مدة 10-15 د باش تحطو فيها الحلوى ، ماشي تزيدولها كااامل اومبعد تنقصو .... مفهوووووووم ؟
))
مدة الطهي تقريبا 10 د .... عسيهم حتى يتحمرو شوية ، انا نحبهم محمرين شوية
الي يحبهم بيوضا ... يخرجهم بيوضا
عموما اللون مايهمش
في كل الحالات رايح يتغطى
شوفوهم بعد ما طابو ...
نحيهم من السنيوة .... و بالصفاية ذري عليهم السكر الناعم " كمية مليحة "
تجنبي مسكهم من الجوانب ... كيما راكم تشوفو فالصورة صباعتيا واااضحين
أنت ارفديهم بفورشيطة أو موس .... و قدميها فلي كيسات
ملاحظة :
الوصفة كما تبدو فالصورة ماتوهيش كيما نقولو .... يعني ماتوحيش بحاجة كبيرة ، لكن كيما قلتلكم .... الطعم لا يصدق
هش جدااااااااا ، و طعم الجوز مع معجون الفراولة رووووووعة روووعة رووووعة و هذا الي خلاني نحط الوصفة رغم فضاعة الصور
حتى تجربوها باش تفهموني
الكمية هاذي تقطعلك حوالي 25 حبة ....
إقتراحات :
ممكن تلوني السكر الناعم ... استعملي شوية ملون بودرة مع كيمة سكر ناعم ... و اخدميه مليح بيديك كيما تخدمي الطعام " الكسكس "
مارايحش يتلون كامل .... بصح يخرج لونو شباااب ...
ممكن تستعملي أشكال أخرى غير الي اسعملتها انا اكييييد ... لكن ماتكثريش الحشو كيما قتلك ... و ماتركزيش على الشكل بزاااف لأنو فالأخير رايح يتغطى
ممكن تستبدلي الحشو ب : معجون المشمش مع كاوكاو مدشش .... الجوز يمشي مع معجون الفراولة و التوت البري
إذا استعملتي معجون المشمش استعملي الكاوكاو
- ممكن تستعملي عصير البرتقال الحلو بدل الخل .
أسرار الفشل :
1 - تكثري الفرينة .... تييسلك العجينة و تولي تتكسر ، و كي تطويها توقعي أنها تتكسر و ماتتطواش .
2 - تكثري الحشو .... يخرجلك من الحبات و مايخرجش الشكل شباب .
3- إستعمالك لمعجون المشماش مارايحش يعطيك نفس النتيجة
.
4 - استعمالك لعصير الليمون بدل الخل ... رايح يعطي طعم حامض ... و يخرب كاااامل طعم الجوز و المعجون .
5- ماء الزهر أحسن نوعية هي " الزاينة " ..... طعمو ماشي قوي ... و رائع في كل الحلويات حاولوا تستخدموه .
نوغمالمو هاذو هوما أهم النصائح ، و بيهم تضمني نجاح الوصفة ان شاء الله
جربووووووها ، و ابدعوووووا فيها
و نتمنى تنال إعجابكم .....
أستناوني في القريب العاجل ان شاء الله مع وصفات أخرى .... في نفس الموضوع
صح سحوركم و فطوركم
، و تقبل الله منا و منكم صالح الأعمال ان شاء الله
( تقرير عن مشاركة سيئة )، و الموجودة أسفل كل مشاركة .
2014-07-20, 03:18
سلسلة حلويات العيد .... موضوع متجدد خاص بعيد الفطر 2014
العرض العادي
