أهلا بيكم في موضوعي البسيط
رخسيـــس في الفرن مختلف شوي على نتاع الطاجين وسهل اكثر خاصة من حيث الحرارة نتاع الطاجين يااااااااااويلي
بسم الله راح نحتاج :
انا موالفة ندير عيني ميزاني في المقادير لكن راح نكيل باش يكون كلش مضبووووط ، درت قرصتين ونعطيلك مقادير قرصة وحدة
لكل قرصة واحدة نحتاج
- كأس وثلث كأس سميد رقيق ممتاز
- ربع كأس زيت
- بيضة كاملة
- م ص ملح
- نصف م ص سكر
- نصف م ص خميرة الخبز
- شوي من الجلجلانية
- ماء دافي
في جفنة راح نبسس السميد بالزيت ونحك بكف اليد ونلم العجين بجهة ونحط المكونات الجافة في العجين ، ونكسر البيضة ونخلطها بشوي ماء ونلم العجين ملييييح ونضيف الماء بالشوي حسب العجين حتى تتكون عندي عجينة طرية
نديرها في كيس بلاستيكي نظيف نخليها ترتاح
نشعل الفرن 250° والرف يكون اسفل نخليه يسخن ملييح
بعد 15د هكذاك يكون العجين رتاح خلاص ماشي نخليه يتخمر لالا يرتاح برك ونعجنو شوي وندير رشة من خميرة الحلوى ( تقدري تستغناي عليها )
هنا بعد العجن
نحل القرصة بالحلال ( ماترقيهاش بزاف لان كي طيب الاطراف يطلعوا هههه ) ونثقبها بالشوكة او سكين ونحطها في الصينية ونزيد نديرلها غير شوي زين من فوق باليد برك
ونحطها طيب مباشرة بعد مانقرصها لازم الفرن يكون سخون هنا بدات تتنفخ
لما طيب من تحت وتتحمر نطفي ، ونشعل من فوق كذلك
وهاهي واجدة ومحمرة ممممم
نتمنى تجربوها وترتاحو شوي من الطاجين هههههههه
لقيت فكرتك هذه زدت عليها واش ناقص وطيبتها جاتني هايلللللللللللللللللللة 
