بطاقة تعريف خياطات امنتدى الجلفة

sarra5 · 2013-03-17, 14:58

السلام عليكم

اليوم ما جاياش باه نعاتب او نلوم هههه

اليوم حابة نعمل تصفية

ماشي تصفية مياه ههههه

يعني classement باه نعرفو بعضانا مليح

كل واحدة تدخل وتقرا موضوعي امانة عليها ترد

تغيضني كي نلقا عدد المشاهدات اكثر من عدد الردود

لا للانااااااااااااااانية

المهم

كل واحد تدخل تعمر ال dossier

خياطة ماهرة

خياطة محترفة

خياطة مبتدئة

او مشروع خياطة قادمة كيفي هههه

متى بداتي مشوار الخياطة؟

ماهي الصعوبات الي واجهتكي فيها؟؟

ماهي الصعوبات الي مازالت تواجهك لحد الان في هذا المجال؟؟

ماهو اول شيء قمتي بخياطته؟؟

كيف كان اول ماقمتي بخياطته _ جيد ام سيء؟؟

واخيرا نصيحة للي حابين ينضمو لهذا المجال مثلي ؟؟؟

لازم كامل تجاوبو sinon ماكان لا سكنة ولا خدمة ههههه

انواع رائعة ومنتقاة خاصة باعضاء منتدى الجلفة
https://www.gulfup.com/?j9bA9I

Oum danIne · 2013-03-17, 15:10

سلام ختي، أنا غير كما بديت و الحاجة الأولى لي درتها هو كول كروشي تع الأخت amira و تفصيل القماش تع الأخت ghalemm ربي يبارك فيهم و خرجت لي لا بأس المهم merci pour tt vos efforts les filles

sarra5 · 2013-03-17, 15:59

اقتباس:

المشاركة الأصلية كتبت بواسطة oum danine

سلام ختي، أنا غير كما بديت و الحاجة الأولى لي درتها هو كول كروشي تع الأخت amira و تفصيل القماش تع الأخت ghalemm ربي يبارك فيهم و خرجت لي لا بأس المهم merci pour tt vos efforts les filles

الله يبارك عليك

انا ماعملت والوا حتة نتعلم اكثر

بصح ماتديش السكنة ماجاوبتيش على الاسئلة هههه

LAMIA TEFFAL · 2013-03-17, 16:35

السلام عليكم
اول حاجة شكرا لك على الموضوع لانها فكرة مليحة باش تستفيد من بعض
اما عن تصنيفي والله انا الان اعتبر نفسي مبتدئة في مجال الخياطة قبل كنت مع امي وهي لي كانت تفصلي وانا خيط كما اني نخدم البلوزة اي صدر واحيانا نرشم وحدي ابتكار هههههههه وكنت كي يعجبني قفطان او بدعية او اي مودال نرسمه على ورقة المهم انا نحب نخيط ولكن عندي عقدة المقص وتاني جاحة انا تعلمت كروشي الحمد لله والسموك واشغال يدوية ,والان راني نتعلم سموك الملابس راح نحط موضوع ان شاء الله عنه اما عن انجازات فكتيرة بدعبات بلايز طبليات بيجامات مخايد
الكروشي قبعات قفازات وجوارب ومفارش كيما قلت عن الصعوبات عندي عقدة المقص يعني حاليا راني نفصل وحدي ولكن لي فقط ههههه
انا الحمد لله عندي سكنة خصني خدمة وراك شفت c v تاعي ههههههههههههههه

بالتوفيق للجميع

wafaachal · 2013-03-17, 17:50

السلام عليكم عجبتني الفكرة اختي شكرا
1انا خياطة ماهرة
2 بدءة اتعلم في سنة 1998
3 لم اجد المال لشراء القماش لاتعلم لكن ساعدتني استاذتي في الخياطة ***كنزة*** ولها الف شكر
4 الحمد لله ليس عندي صعوبات
5 خيطة سروال بادي ليفو لاختي
6 جيد
7 تعلمي الاتقان من الاول باش تمشي عليه يدك وكرري العمل حتى تصلي اليه.
حبيت نضيف حاجة انا هوايتي الخياطة تحصلة على ديبلوم في الطرز هو الاول ومن بعد ديبلوم في الخياطة المختلطة وبعدو ديبلوم في الخياطة الجاهزة.

sarra5 · 2013-03-17, 17:59

الله يبارك عليكم انا مانبانش في وسطكم

ان شاء الله نتعلم كيما نتوما

wafaachal · 2013-03-17, 18:23

واش وانا تمديلي السكنا ولا لا لا الووووووووووووووووووووووو هههههههههه

ام معتز21 · 2013-03-17, 18:35

انا خياطة مبتدئة _اول حاجة خيطتها قندورة ليا وكانت مقبولة مع الاستادة تاعي حدى ربي يحفضها و عندي طموحات كبيرة في هاد المجال ولكن تواجهني بعض الصعوبات (في اول الامر كنت نسكن في منطقة معزولة ماقدرتش نطور الخدمة تاعي وبعدها تزوجت اانجبت والتربية والزواج اداو معضم وقتي . المهم انا عني موهبة حقيقية اعطاهالي ربي نحمدو اعليها والان انا نعاني كي نشوف بزاف حوايج نعرف نخدمهم وما نقدرش خاصة وانا ماكثة بالبيت و ما نخرج ما نحتك بالناس بزاف المهم مانطولش الكلام عليكم و نقول سبع صنايع االبخت ضايع في ما يخص الموهبة طبعا )

sarra5 · 2013-03-17, 18:56

وفاء راني ندرس في السيفي تاعك هههه

ام معتز ماحقش عليك تدفني موهبتك

ماتقوليش الوقت والدراري

والله ماتخلاص معاهم

ديري خرجة كل اسبوعين اشري فيها واش حابة من مستلزمات الخياطة واذا ماعرفتيش البنات هنا يقولولك على كلشي سقسيهم برك

wafaachal · 2013-03-17, 19:13

بتوفيق اختي نحب نقول للاخت ام معتز موهيبتك عمرها ما تموت او تروح انت متزوجة و العائلة هي الاهم لكن حاولي تنظمي وقتك واذا خصوك حوايج باش تخدمي وصي اي شخص تشوفيه يعرف او كي تروحي لداركم اشري انا لا اعرف ضروفك لكن الموهبة تتحدا كل شيييييييييييي
انا مانيش متزوجة لكن ما نحبش نخرج كرهت الخرجة كي تخصني حاجة نبعث كاش وحدة تشريلي

fifiarch · 2013-03-17, 21:23

مساء الخير اختنا سارة

خفت من تهديداتك

جيت نجري نعمر في الاستمارة

وان شاء الله نفيدكم باجاباتي

انا عن نفسي مشروع خياطة قادمة

متى بداتي مشوار الخياطة؟

كنت صغيرة نخيط للدمية نتاعي والخياطة صح مارستها بعد التخرج نتاعي من الجامعة

ماهي الصعوبات الي واجهتكي فيها؟؟

صعوباتي في القياسات دايما ماتكونش مضبوطة صح
وتان في التعامل مع مشينة الخياطة
نتقلق ياسر كي تبدا تعند معاي

ماهي الصعوبات الي مازالت تواجهك لحد الان في هذا المجال؟؟

مشينة الخياطة ماتخيطش كل انواع القماش لازمها تصليح

ماهو اول شيء قمتي بخياطته؟؟

اول حاجة خيطتها هي قندورة نتاع صيف

كيف كان اول ماقمتي بخياطته _ جيد ام سيء؟؟

اول شيء كان ممتاز فقط غلطت في وسع الرقبة وسعتها ياسر مي تداركت الامر وصلحتها وبقيت نلبس في القندورة صيف كامل

واخيرا نصيحة للي حابين ينضمو لهذا المجال مثلي ؟؟؟

نصيحتي لكل اخت تحب تتعلم الخياطة
انو تكون صبورة
ويكون عندها خيال باه تقدر تدير الباترون في راسها لاي مودال شافاتو
لانو الكثيرات ما يقدروش يقراو الخياطة في مراكز متخصصة
مالا لازم يكونو مجتهدات شوي

وتانا اتقان الخدمة احد اهم العوامل في نجاح العمل

ماننساوش التروي باه تخرج الخدمة مليحة

بالتوفيق ليكم جميعا

kamilia-18 · 2013-03-17, 22:08

السلام عليكم اخواتي الاعزاء

مشكورة اخت سارة على هذا المبادرة الطيبة اللي تخلي كل وحدة تحكي على تجربتها مع الشيء الي تحبو سابدأ بملئ الاستمارة على بركة الله

انا اعتبر نفسي خياطة مبتدئة

متى بداتي مشوار الخياطة؟

من ايام قليلة

ماهي الصعوبات الي واجهتكي فيها؟؟

المشكل الاول في المشينة كل منجي نخيط القدام ترجعلي الخياطة للوراء طولت باش تعودت ههههههه متضحكوش عليا هذي الخياطة الجديدة

ماهي الصعوبات الي مازالت تواجهك لحد الان في هذا المجال؟؟

مازلت منعرف والوا راني غير وحدة وحدة بصح ربي يخليلنا عضوات المنتدى الي مهمش مقصرين في تعليم المبتدئات اللي كيما حالتي

ماهو اول شيء قمتي بخياطته؟؟

مخايد

كيف كان اول ماقمتي بخياطته _ جيد ام سيء؟؟

لاباس مع انو شيء سهل جدا بالنسبة للخياطة العادية

واخيرا نصيحة للي حابين ينضمو لهذا المجال مثلي ؟؟؟

والله ننصحهم يواصلوا وميملوش لأنو كي تكمل الحاجة اللي تخيطيها تفرحي بيها وتنساي التعب حتى ولو منجحتيش في خياطتها لكن تحسي انك انجزتي وهذا واش نحس انا

stayfiya · 2013-03-18, 00:03

السلام عليكم

صحيتو يا لبنات واش هذا بحث في فائدة العائلات ولاَّ هههههههه
باسم الله نداو في تعما استمارة لجنة السكن ههههه
اولها نحيي ختي ساره كل مرة تخرجلنا خرجة تحرك فيها العضوات كامل

اليوم ما جاياش باه نعاتب او نلوم هههه

لا للانااااااااااااااانية عجبتني هاذي
خياطة ماهرة

خياطة محترفة

خياطة مبتدئة
الجواب مكانش ربع خياطة يعني ماني مبتدئة و ماني ماهرة ولا محترفة

او مشروع خياطة قادمة كيفي هههه ويي تقدري تقولي

متى بداتي مشوار الخياطة؟ اوووو زدت على حس المشينة و كنت نقعد دايماً في طرف مّا و هي تخيط و كي كبرت شوي وليت نخيط للبوبيات و كي زدت كبرت وليت نحب نصمم من راسي و كل مرة كنت نحاول نفصل و نخيط الروب لي نرسمهم صح ما كانوش يجيو حاجة بصح كنت نجرب برك و كنت نبدل روبة نتاع كبار نقلبها صغيرة و سروال نقلبو جيب ههههه و الله كانو يحطو الحاجة نطير بيها و كي زدت كبرت و دخلت للجامعة حبيت ندخل نتعلمها في وقت الفراغ و دخلت قريت بصح ماكملتش وشراولي مشينة ليا اووووو درت فيها رايي و بقيت نلم في لي كاتالوغ و الدروس نتاع لخياطة و ندور على الخياطات نقرعج ههههه و زدت شريت وحدة اندوسترياال واش نقلكم و مازالني للضك و سيرتو زدت لقيت المنتدى هذا لصقت فيه هههه و الله نحب لخياطة و مهبولة بيها واش تحبو
ماهي الصعوبات الي واجهتكي فيها؟؟ وااالو الحمدلله
المشينة حبيبتي و نتفاهم معاها مليح و ماتشيطنيش مسكينة و نموووت على لمقص حتى هو يحبني
ماهي الصعوبات الي مازالت تواجهك لحد الان في هذا المجال؟؟ ماكان حتى صعوبة غير الوقت لي خايني
نسخف نحط نخيط و عندي غير يوم في السمانة برك قعاد
ماهو اول شيء قمتي بخياطته؟؟ ممكن تكون روبه نتاع دار ماشفيتش مليح

كيف كان اول ماقمتي بخياطته _ جيد ام سيء؟؟ هههههه مانكذبش اكيييييد كان ...يــــبهدل

واخيرا نصيحة للي حابين ينضمو لهذا المجال مثلي ؟؟؟
نصيحتي لاكنتي تحبيها كملي حتي لافان وما تتراجعيش من اول مشكل يواجهك كيما يقولو لي يخاف من الطيحات عمرو و لا يركب و زيد كيما تقول مَّا اخدم خدمة وانساها يدور العام و تلقاها الحرفة مليحة في اليد لقراية سلاح بصح الحرفة خبزة و ماتدريش بلاك تقولي انا قريت و وصلت و الحرفة مايديرها غير لي ماعندوش نيفو ماتغلطيش روحك حاجة ماراهي مضمونة في الدنيا كيما بالنسبة ليا اني قارية و مخلصة و خدامةولاباس عليا ماديا و لخياطة راهي هواية بصح ممكن في المستقبل تولي هي مصدر رزقي واحد ماو ضامن روحو
وبالنسبة للي مزوجة و تربي تقدر تنقص بيها ماصاريف على زوجها
اااوه عيييت على حساب الجرنان لي كتبتو رايحة تمديلي شاطو نسكن فيه هههههه هيا راني طولت سلاام

هندة السوفية · 2013-03-18, 06:57

[QUOTE=sarra5;13340467][COLOR="Red" ]السلام عليكم
وعليكم السلام
اليوم ما جاياش باه نعاتب او نلوم هههه

اليوم حابة نعمل تصفية

ماشي تصفية مياه ههههه

يعني classement باه نعرفو بعضانا مليح

كل واحدة تدخل وتقرا موضوعي امانة عليها ترد

تغيضني كي نلقا عدد المشاهدات اكثر من عدد الردود

لا للانااااااااااااااانية

المهم

كل واحد تدخل تعمر ال dossier

خياطة ماهرة
ولله الحمد

خياطة محترفة

خياطة مبتدئة

او مشروع خياطة قادمة كيفي هههه

متى بداتي مشوار الخياطة؟
عام 1996كان عمري وقتها 16سنة
ماهي الصعوبات الي واجهتكي فيها؟؟
عام2001عندما بابا حب ايدخلني نقرأ أستاذة خياطة وأمي عارضة بشدة لان المكان بعيد علينا جدا
تقريب 20كلم
ماهي الصعوبات الي مازالت تواجهك لحد الان في هذا المجال؟؟
صعوبة التعامل مع بعض الزبائن لان العقول مختلفة اضافة الى عدم وجود عمل مستقر في التكوين المهني
ماهو اول شيء قمتي بخياطته؟؟
فستان تركواز ازرق فيه دوائر سوداء
وقتها كنت نقرأ في الليسي ولبسته تحت الحجاب اورحت انا او صاحبتي للمرحاض حاشاكم باش اتشوف الابداع
هعهعهعهعهعع
هوكان فستان بالقصة في الصدر كيف العجايز لكن بالنسبة لي كان اخمل فستان

كيف كان اول ماقمتي بخياطته _ جيد ام سيء؟؟
ويهبل هععهععهههههههههههههههههه

واخيرا نصيحة للي حابين ينضمو لهذا المجال مثلي ؟؟؟

الاصرار والتحدي لان العثرات فيه اكثر من النجاح
لازم كامل تجاوبو sinon ماكان لا سكنة ولا خدمة ههههه

موفقين
بحول الله
لكن وقتاش تخرج نتيجة الامتحان هععههههههههههههههههههههههههههه

scorpionoir · 2013-03-18, 07:55

اف اف اوف قلبي خرج سمعت جيت نجرييييييييييييي الحراير دات السكنة وانا روطاااااااااار

موضوع حطة ههههههههههههه

1- راني مبتداة برك .
2- عندي 4 شهر ملي شريت المشينة وبديت .
مي نفحة الخياطة عندها مدة في بالي
3- ماكان حتى صعوبات لحد الان والحمد لله.
-4من اوجاي مانعلافش مي كي نحصل الحراير تسلكني.
5- اول حاجة des housses pour matelat
6-جااااااااااااااااو يشبهو ملاح راني مدايرتهم على العموم.
7-نصيحتي لازم تكوني تحبي الخياطة و تتقنيها وماتعوديش تتقلقي على مكانش كي تفسد حاجة عادي حلي وعاودي .
هاااه عمرت الدوسي اكل وزتلك حتى ورقة المعريفة هي الاولى يعني ماعندك ما تقولي السكنة نديها نديها ههههههههههه .
السكنة لا لا انا عندي دار كون تعطيلي غير شالي نفوت فيه لي فاكونس برك .

سلامي وتحياتي للجميع.