وش ندير

[مشكلتي]

السلام عليكم ورحمة الله
يا خاوتي منذ مدة زمنية اكتشفت بللي ختي الصغيرة ذات ال15 سنة تعمل في علاقات فالفايسسبوك و فاالمدرسة اللي تقرى فيها حكمتها مرة-زوج...وفي كل مرة نضربها ونوبخها و نفهمها باللي هاد الشيءاللي راهي دير فيه حرام و عيب ويوسخلها الشرف ديالها فالمستقبل و لوكان حكمها خويا و لا بابا يقتلوها و يخلطوني معاها بصح الله غالب ماتفهمش ما بغيتش نقول لبابا قلت بالاك تتربى وتنحي من صنايعها ضرك تفيق على روحها باسكو اذا قلت لبابا علابالي راح يقتلها و نروح أنا فالجرة معاها و أنا عندي الباك هاد العام أني حابة ننجح و ندير مستقبلي (أدعولي ننجح) و الي زاد الطين بلة البارح و حنا قاعدين جاو 2 ولاد مانيش عارفة شكون و يعيطو باسمها قدام لباب مالقيت ماندير ضربتها بكف وقلتلها راحت عليك هاد المرة نقول للدار و هوما يديرولك حل طيحتي بينا لدرجة ماولاوش يديرو حسابهم بلي كاين رجال فالدار خفت عليها و خفت على روحي و كلما فهمتها تقول راني نزيدلها فليسونس
يرحم والديكم قوللي وآش ندير معاها هاد الطفلة ماش حابتها تضيع ؟؟؟

[مراد سابقا]

في مثل هذه الأمور لا بد من التصرف بشدة وقسوة مع الفتاة

اخبري امك ولو استلزم الأمر ان تضربها

ولو استلزم ان تقول الأم للأب لا حرج المهم ايقاف الكاثرة التي تقوم بها

[ام ايمان16]

وهي وين عندها الفايسبوك في الدار في الميكرو ولاعندها تيليفون
اذا تيليفون نحيهولها او كسريهلها
اذا في الميكرو حاولي ماتخليهاش تحل الميكرو او حطي الميكرو في مكان يشوفو لي رايح ولي جاي في الدار باش ماتقدرش تلقى راحتها وتحل الفايسبوك وحدها
واذالزم الامر وشفتي روحك ماتحتاجوش الفايسبوك في الدار نهائيا اعمليلو حجب للموقع ماتقدرش تزيد تدخلو

واذا شفتيها تهدر مع ولاد في المدرسة او برا هديها بللي تقولي لباباك يحبسها من لقراية بالصح مالازمش تشوفك خايفة تروحي في جرتها وماتخليلهاش فرصة تهدك ايضا وتعطل دراستك
يعني كاين انتوما برك زوج بنات في الدار ولاكاينة اخت كبرى معاكم
اذا ايه قوليللها هي تهدر مع امك على اختك باش ماتكونيش طرف في المشكل مع باباك
جيل نتاع ضرك صعيب
ونضن بللي كي بديتي معاها من الاول بالعنف زادت تمردت عليك ولات ماتسمعلكش

هاذو نتاع المراهقة يحسبو رواحهم راهم صح وكي تنصحيهم يقولولك تكرهينا او تغاري منا

لو من الاول جربتي تسايريها شوية باش تعرفي تخمامها ومن بعد في وسط كلامك معاها تخليها تقعد قدامك وتسمعك وهي ساكتة وهادئة و تقوليللها بللي هاذو تصرفات نتاع بنات موش متربين ومايخموش على والديهم
واعطيلها امثلة نتاع قصص لاشتى من خيالك
قوليللها مرة سمعتي على وحدة كانت تعرف واحد في الفايسبوك (او برا) وكانت تخرج معاه بالدرقة حتى خمجها وكي سمع باباها راه قتلها او ممكن تقوليللها كي سمع باباها مسكين حكماتو جلطة حتى اصبح مشلول راقد في السرير ؟وقوليللها ترضاي يصرى لباباك ولاامك هاكذا كون يسمعو بيك واش راكي تديري ؟مايغيضوكش وهما راهم يتعبو ويقريو فيك ويوكلو فيك وانتي تجازيهم بحاجة نهار يسمعهوها تهبطلهم ريسانهم او ممكن يروحو فيها هوما او انتي كاشما يديرو فيك

هكذا اختي حاولي تخوفيها بهاذي الطريقة وان شاء الله ربي يرجعها للطريق الصواب

[mina2015]

السلام عليكم يا أختاه ، هذه راهي حاجة طبيعية في شخصية البنات فكل أنثى توصل لهذا السن تحب أن تثبت لنفسها و لغيرها بأنها جميلة و مرغوب فيها من الرجال فهو سن مراهقة وهذا السن خطير جدا ، فحاولي يا أختي العزيزة أن تعالجي الموضوع بحكمة و ليونة بينكم لأنك قريبة منها في السن و تقريبا من نفس الجيل و ربما جربتي هذا الإحساس لكنك ربما انت لديك وعي كبير فلم تقومي بهذه التصرفات ، وساعديها على التخلص من هذه التصرفات ووعيها من النتائج التي يمكن أن تنتج من هذا الطريق و قولي لها بأن هذه الفترة أتة لا محال .

[كايميرا1322]

الرسمي ... لن تستطيعي ارجاعها للصواب وحدك .. يجب ان تعرف العائلة بالأمر -- تخبري الأم اولا وهي من تخبر الأب وسيعرفان كيفية التصرف معها حتى ولو بالقسوة فالامر عادي مقارنة اذا تورطت اكثر .. كما يجب ان تطلبي من احدى صديقاتها ان تطلعك بكل تحركاتها

[نور لاتراه]

المشاركة الأصلية كتبت بواسطة مشكلتي

السلام عليكم ورحمة الله
يا خاوتي منذ مدة زمنية اكتشفت بللي ختي الصغيرة ذات ال15 سنة تعمل في علاقات فالفايسسبوك و فاالمدرسة اللي تقرى فيها حكمتها مرة-زوج...وفي كل مرة نضربها ونوبخها و نفهمها باللي هاد الشيءاللي راهي دير فيه حرام و عيب ويوسخلها الشرف ديالها فالمستقبل و لوكان حكمها خويا و لا بابا يقتلوها و يخلطوني معاها بصح الله غالب ماتفهمش ما بغيتش نقول لبابا قلت بالاك تتربى وتنحي من صنايعها ضرك تفيق على روحها باسكو اذا قلت لبابا علابالي راح يقتلها و نروح أنا فالجرة معاها و أنا عندي الباك هاد العام أني حابة ننجح و ندير مستقبلي (أدعولي ننجح) و الي زاد الطين بلة البارح و حنا قاعدين جاو 2 ولاد مانيش عارفة شكون و يعيطو باسمها قدام لباب مالقيت ماندير ضربتها بكف وقلتلها راحت عليك هاد المرة نقول للدار و هوما يديرولك حل طيحتي بينا لدرجة ماولاوش يديرو حسابهم بلي كاين رجال فالدار خفت عليها و خفت على روحي و كلما فهمتها تقول راني نزيدلها فليسونس
يرحم والديكم قوللي وآش ندير معاها هاد الطفلة ماش حابتها تضيع ؟؟؟

الضرب ليس حلا بل سيزيد من اصرارها
هذا نتيجة اهمال الاباء في هذه السن الحساسة للوالدين
حاولي التقرب اليها بالحسنة
عامليها بلطف واهدي لها هدايا
وقولي لها كلام جميل
لتبعديها عن الفراغ العاطفي اللذي تعيشه
فستقترب منك تدريجيا عندما تحس بالامان

[زبدة ذايبة]

ياابنتي

هذه المشكلة صعبة نوعا ما ولكنها ليست مستحيلة

رايحة نجاوبك بالدارجة الجزائرية

شوفي ياابنتي

من المحتمل جدا جدا أن اأختك ماتلقاش الرعاية والاهتمام تاع والديك

الدليل طفلة تاع 15 سنة عندها علاقات في الفيسبوك ؟؟؟؟؟؟؟

وتتجسد هذ العلاقات في الواقع مع اللي يقراو معاها ومع أولاد الجيران

أختك الصغيرة مراهقة وصغيرة بزاف باش تعرف أبعاد هذ التصرفات

لوكان تبقاي حتى للصباح وانت تشرحي وتعاودي ماراحاش تفهم وماراحاش تستوعب نهائيا.

هذي محاولة منها باش تجلب انتباه الأب والأم ليها لأنهم يهملوها.

الإهمال ماشي فقط في الأكل والشرب واللباس بل في العاطفة والمشاعر

وهي تبحث عن شخص يوفرلها هذ الأشياء.

تبحث في الفيسبوك في الشارع !!!!!!

وحتى وضربتيها وهددتيها مانفعش معاها.

هي تحوس على اهتمام الأب والأم ليها

نعطيك نصيحة وتوجيه

خليها حتى تشدي عليها حاجة ملموسة واضحة

ومارانيش نقصد الغلطات الكبار. مثل الرسائل في الفيسبوك

أنا مارانيش عارفة تصرفاتها بالضبط بالتالي انت قادرة تحكم في هذا الموضوع

في هذاك الوقت

بلغي الأب والأم في نفس الوقت عن تصرفاتها المشبوهة وعلاقاتها

انت ماراكيش مسؤولة على تربيتها كاين اللي يربيها

وحتى ماتروحيش انت في الرجلين ماعليك غير الدليل المادي على تصرفاتها غير المسؤولة

هي راهي تحوس باش يهتمو بيها ساعديها في تحقيق هذا المطلب بكل بساطة

وباش ماتزيدش تغلط أكثر وترجع للطريق الصحيح

رب يوفقك يا ابنتي وبارك الله فيك على غيرتك على أختك

[blanche rose]

أسلوبك خاطئ عزيزتي
ضربك لها سيزيدها اصرارا وعنادا

كان يفترض أن تنصحيها بحب

فقد تظن أنك تغارين منها وهو سبب ضربك لها
يجب أن يكون لديك أسلوب مقنع ولن يكون كذلك إلا إن نبع كلامك من قلبك

اسأليها ماذا ستستفيد من ذلك؟
احكي لها قصص الفتيات اللواتي ضيعن سمعتهن وشرفهن
القصص كثيرة عبر الانترنت

اسأليها هل تريد أن تكون مرغوبة من كل الرجال أم لعبة يلعب بها كل الرجال ويرمونها بعد أن يملوا؟؟

اسأليها..هل تريد أن يقال عنها كلام جميل ام كلام سيء؟؟
قولي لها حافظي على سمعتك فيتمناك كل رجل زوجة له وأما لأولاده
حذريها من تشويه سمعتها

كلميها من قلبك وبحنان..

هذا النوع غالبا فاقد لحنان الوالدين وخصوصا حنان الأب..

ربي ينجحك ويهدي أختك

[*جزائرية مسلمة*]

وعليكم السلام ورحمة الله وبركاته
هذا الاسلوب لا ينفع ولا يزيدها الّا اصرارا
عليك أن تصاحبيها اجعليها صديقتك المقربة
علّميها الحلال من الحرام
بيّني لها أن هذه الصداقات دخيلة على مجتمعنا المحافظ
ولن تجلب الا الخزي والعار للعائلة
قولي لها علينا أن نحافظ على سمعتنا
وفقكما الله لكل خير وستركما وجميع نساء المسلمين

[minaflower]

احسن حل تعلمي العايلة بالتصرفات قبل ما تضيع اختك و تندمي وهنا صح تروحي في الجرة
ربي يهديها و يوفقك في قرايتك

[صهيب رائع]

صهيب رائع: هذا المشكل يتكرر ذكره في هذا القسم والاجابة بسيطة لكن قبل الاشارة اليها يجب اولا ان اعيد ما قلته من قبل, هذا الموضوع لا يستشار فيه النسوة التي اغلب نصائحهن عبارة عن اطالة للازمة لا قطعا لها, الاجابة: هذا الامر يجب ان يعلم به الاب قبل الام, النساء لايردعن النساء وهذا معلوم, بل حتى في نصائحهن كما هو ملاحظ يعمدن الى التسويف والمماطلة وحتى التهوين, الاب هو المسؤول الاول عن البنت ويجب ان يعلم ان لم ترتدع اختك بعد تهديدها باخباره, وان يعلم منك خير من ان يعلم من شخص لا ينتمي الى الاسرة

[خالد عنابي2]

و الي زاد الطين بلة البارح و حنا قاعدين جاو 2 ولاد مانيش عارفة شكون و يعيطو باسمها قدام لباب

ههههههههههههههه اسمحيلي

!!!!!!!!!!!!!!!!!!!!!!!!!!!!!!!!!!!!!!!

وصل بهم الامر الى انهم ينادونها من امام الدار هكذا جهارا نهارا وما يديروش حساب لا لخوها ولا لابوها ؟

عفوا عفوا

اعتقد انهم عاقدين عليها وانها مدايرة روحها عاهرة عمومية لمن هب ودب لدرجة انهم يعتقدون كل عائلتها ديوثين ويستطيعون مناداتها نورمال

الامر يبدو اكبر من فيسبوك وعلاقات عابرة

الامر اعمق بكثير

الحل هو اخبار الاب بتصرفاتها

تبا لها من حقيرة رح تجر على العائلة بكالمها بعهرها

وما يجي حتى واحد يقلي كلام جارح ومنعرف وش هذه ليس لها حل سوى طريحة وتبطال القراية والحبس فالمنزل

[ام ايمان16]

المشاركة الأصلية كتبت بواسطة صهيب رائع

صهيب رائع: هذا المشكل يتكرر ذكره في هذا القسم والاجابة بسيطة لكن قبل الاشارة اليها يجب اولا ان اعيد ما قلته من قبل, هذا الموضوع لا يستشار فيه النسوة التي اغلب نصائحهن عبارة عن اطالة للازمة لا قطعا لها, الاجابة: هذا الامر يجب ان يعلم به الاب قبل الام, النساء لايردعن النساء وهذا معلوم, بل حتى في نصائحهن كما هو ملاحظ يعمدن الى التسويف والمماطلة وحتى التهوين, الاب هو المسؤول الاول عن البنت ويجب ان يعلم ان لم ترتدع اختك بعد تهديدها باخباره, وان يعلم منك خير من ان يعلم من شخص لا ينتمي الى الاسرة

نحن النساء نحب ان تعالج الامور اولا دون اسماع الرجال خصوصا لو كنا نعرف انهم لوسمعو مثل هذاالامر قد يصرفو فيه دون وعين مثل قتل الفتاة او التسبب لها في عاهة مستديمة مثلا من جراء ضربها
فاي نصيحة في العالم يجب ان تبدا بالكلام فان لم تنفع نجرب طرق اخرى اقسى منها تدريجيا وليس معناه انه تسويف في نضرك
فكما هو معروف ان عقلية وطبيعة الانسان لايمكن ان تغير سلوكها بين ليلة وضحاها بل يكون وقت كاف للاقناع بعكس تفكير ذلك الشخص

لكن حضرتك تدعو مباشرة لاستعمال العنف وتدخل الاب الذي لانعرف اسلوب تفكيره ؟هل حضاري متعقل وعندو الحكمة في التصرف؟ام هو عشوائي وممكن يحمل سكين ويذبح ابته
هل ترضى ان تسمع غدا ان الاخت اخبرت والدها وقام بقتل اختها بسبب رايك الذي نصحتها به بان تقول لابوها واخوها؟
طبعا لانريد ان نكون سبب في حدوث شر للفتاة بسبب راينا لاننا بعيدين عن الحدث العائلي واسلوبهم في التعامل

فلهاذا ننصح الاخت ببذل قصارى جهدها في انقاذ اختها مما هي فيه وان عجزت عن ذلك تدخل والداها في الموضوع للانه خارج عن سيطرتها

[اميرة باخلاقي 00]

اخبري امك ولو استلزم الأمر ان تضربها

ولو استلزم ان تقول الأم للأب لا حرج المهم ايقاف الكاثرة التي تقوم بها

عليك أن تصاحبيها اجعليها صديقتك المقربة
علّميها الحلال من الحرام
بيّني لها أن هذه الصداقات دخيلة على مجتمعنا المحافظ
ولن تجلب الا الخزي والعار للعائلة
قولي لها علينا أن نحافظ على سمعتنا
وفقكما الله لكل خير وستركما وجميع نساء المسلمين

[sidra2014]

ربي يهديها يا ختي ويسترها ويستر بناتنا كامل رهو مديها الزف بصح انشالله تفيق قبل ما يفوت الحال وتطفر