~« °🎀📙طريقتي الخاصة في تحضير راس الحانوت و البهارات📙🎀 °»~

سمراء الدنيا · 2017-05-16, 22:54

السلام عليكم و صح عواشيركم و كل عام و انتم بخير *اللهم بلغنا رمضان....تحية خاصة لكل رائدات قسم الطبخ و المأكولات

جيبتليكم اليوم طريقتي ااخاصة في تحضير راس الحانوت ... كل سنة نوعد صديقاتي اني نحط الطريقة و ربي ما يكتبش
ان شاء الله اليوم نتوفق في وضع الموضوع و تستفيد اكبر عدد من العضوات

اولا نشري التوابل حب

هاذو للخبز جنجلان و حبة حلاوة و سانوج

250 غ زريعة قصبر و هنا تقدري تقولي للعطار يرميلك فيها قليلا من كل المواد للي تبغي انتي ضيفيها
انا هنا شريت كل حاجة وحدها
كمون ...كروية ...فلفل اسود ...سكين جبير ... قرفة ...لحية الشيخ .... كبابة ....عود اصفر او كركم ... نجمة الارض او نجمة يونس ...جوزة الطيب ....عود قرني ....حبة حلاوة ...بسباس ...رند... الخ

اذا اقتضى الأمر نقوم بغسل التوابل و تجفيفها
ثم تمريرها في الغربال لتسقط الشوائب الرقيقة و التراب

ثم نفضها في الطبق (الطبg) للتخلص من الاعواد و الشوائب الخفيفة ... و هكذا سيسهل كثيرا تنقيتها

بالنسبة للفلفل الاسود نقوم بالضغط عليه بحجرة او بالمهراز ذهابا و ايابا للتخلص من القشر و نفضه

يجب ان نتخلص من الاوساخ فقط

اما الحب المفيد يكون بهذا الشكل داخله ابيض

سكين جبير

نخدمو بهاذ الطريقة الرائعة التي تعطيه طعم و رائحة هايلين
احضر رمل صافي و نسخنو في طاجين لمسمن جيدا ثم نطفي النار

و ندخل فيه اعواد الزنجبيل الجاف و نتركه حتى يبرد الرمل

انظرو بعد حوالي نصف ساعة تنتفخ الحبات و تفوح الرائحة الجميلة

و هنا يسهل دقه من اول دقة

بعدها نحمص زريعة القصبر و الكمون و الكروية في مقلاة ثقيلة قليلا فقط حتى تصبح النكهة و الرائحة قوية

لحية الشيخ ايضا يجب تحميصها لانها لا تطحن بسهولة الا اذا حمصت

ثم نبدا بالخلط
200 غ زريعة قصبر نضيف اليها ملعقتين كمون و ملعقتين كروية ( هنا لا اضيف البسباس و حبة حلاوة اضيفهم في لحشايش و هذا موضوع اخر ان شاء الله ) .. لانو هاذ راس الحانوت نقدر نعملو في اطباق اخرى غير لحريرة مثل الطعام و المردود و بعض الطواجين + ملعقة واحدة فلفل اسود ...نخلط كل شيء حب و نطحنهم مع بعض

نضع عود كبير او عودين صغيرين قرفة ... 3 اعواد كركم و 3 سكين جبير 4 حبات كبابة قليلا من لحية الشيخ و 4 اعواد عود قرني ورقتين رند رشة خفيفة جدا جوزة الطيب ...ندق الجميع في المهراز ثم نطحنهم في المطحنة الكهربائية و نغربلهم ثم نضيفهم الى الخليط الاول

هنا يوجد كثير من الاضافات فالاذواق تختلف .... مثلا اختي تضيف رشة من قشور البرتقال و هناك من يضيف قاع قلة (الهيل) و نجمة الارض انا العائلة لا تحب ذوقهما في الاكل
و ايضا الورد المجفف يمكن اضافة بتلة او اثنين و من يحب الحار يضيف فلفل ادريس او كما نقولو في منطقتنا ساسافيندا و هوحار جدا
لا اشتري راس الحانوت المخلوط لانو فيه هاذ الحار بكثرة و فيه ايضا لانجبار الذي طعمه يفسد الاكل لذلك اطلب من العطار ان يخلط لي كل شيء امامي

هاهو راس الحانوت بعد خلط جميع المواد و غربلتها

ممكن اضافة الفلفل العكري و هاذي طريقة تحضيرو
تغسلي الفلفل الاحمر و تقطعيه بالطول و تجففيه و تطحنيه مع قطرة زيت الزيتو ن

هاذ العام حضرت كمية قليلة لانو ثمنو غالي و غير متوفر حاليا في الاسواق وقتو في اكتوبر ان شاء الله و راح نحضر منو كمية كبيرة باذن الله

اتمنى الموضوع يكون مفيد للجميع و لو بالقليل و الحمد لله اني وفيت بوعدي للي طلبو مني الوصفة

تصومو بالصحة و لهنا ان شاء الله و الى اللقاء في وصفة لحشايش و بزار القهوة

سمراء الدنيا · 2017-05-16, 22:56

حشايش لحريرة

هاذ لحشايش خاصة بمنطقتنا منطقة الجنوب الغربي نحضروها مرة في السنة و هي عبارة عن دواء اكثر منها منكه
نديروها في لحريرة خصوصا في الشتاء نديرو لحريرة كفطور صباحي
و ايضا نفتلو بيها المردود للنافسة و للمرضى خصوصا للي رايحين للحمامات المعدنية ضروري يدوه معاهم
و مؤخرا اصبح مردود لحشايش حاضر في كل المناسبات السعيدة مثل نجاحات التلاميذ و الختان و حتى النجاح في رخصة السياقة
وين ما رحتي تباركي تلقاي المردود هههه

المهم المكونات الاساسية هي
قرطوفة + بسباس + حبة حلاوة + ازير مر
و الاضافات .... زعتر + فليو + الال
هاذي قرطوفة نحيتها من بستان امي و غسلتها و يبستها و نقيتها و طحنتها

و هذا فليو تاني غسلتو و يبستو و طحنتو

نظفوهم جيدا و نرحوهم

نديرو 3 كيلات قرطوفة و كيلة بسباس و كيلة حبة حلاوة

و الباقي ملعقة ملعقة لانو طعمهم قوي و مر

و هاهي لحشايش واجدة

&ام ايوب& · 2017-05-16, 23:01

بارك الله فيك على هاد الشرح الوافي
جعله الله في ميزان حسناتك

kacimo.samy · 2017-05-16, 23:55

بارك الله فيك
^ ^!

أم البراء 2017 · 2017-05-17, 00:41

ربي يعطيك صحتك ويبارك فى عمرك اختي سمراء الدنيا
فقط عندى ملاحظة على جوزة الطيب اذا تطلعي عالحكم تاعها

نور الصباح · 2017-05-17, 08:22

بارك الله فيك

متمنية · 2017-05-18, 14:38

بارك الله فيك سمرا

oum radja · 2017-05-21, 14:53

يعطيك الصحة سمورة دايما متميزة بمواضيعك

سمراء الدنيا · 2017-05-23, 08:46

بارك الله فيكن على الردود الطيبة
و شكرا للمشرفات على التثبيت

فايزة1207 · 2017-05-23, 20:28

ما شاء الله

سحابة باردة · 2017-05-23, 21:28

باينة توابل بنينة من صورها الجميلة
الله يحفضك أختي

الماسة النادرة · 2017-05-23, 22:45

والله غير هايل مي معرفتش معضم الاعشاب

حياة نور الدين · 2017-05-25, 22:30

بارك الله فيك موضوع في القمة

ام شمسو محمد · 2017-05-26, 18:16

عمل رااااائع و اصييييييييل ...فيه روايح الفاحااااااات و رمضااااان و امهاااااتنا ....و الذكرياااااااات ....يشبه كثيييييرا توابل منطقتنا ...متالقة دائما يا سمراااااء الدنيا

Machallah · 2017-05-26, 18:55

بارك الله فيك
وزادك من فضله