زوجي يريد الزواج بحبيبته السابقة

[ام رضوان]

السلام عليكم
ربي يفرج كربك ويزيل همك
شوفي اختي
نقولك خمي مليييييييح في قضيتك
صح راكي مصدومة ومكويييية بصح ردي بالك تخمي في الطلاق
لاه صبرتي معاه على الحلوة والمرة وذرك تخليها واجدة لامراة اخرى؟
حب يتزوج الله يسهل عليه
كون حب يعدد بحكم الشرع والله كامل نستسلمو هذا امر الله
بصح فسدها كي قاعد يخون وانت معاه
انت ابقاي في بيتك وماتشرديش بنتك خليه يصرف عليك وعليها
وزيد الحاجة اللي في قلبك وساخفة عليها انت وبنتك اطلبيها منو
ماتزيديش تشفقي عليه خلاص
واذا راكي خدامة خبي شهريتك لزمان مادرا واش راه مخبيلنا
انت عيشي حياتك ونقولك وماتستغربيش من كلامي
عمري دارك اولاد خلي اولادك ينسوك في الصدمة اللي مريتي بيها
وخليه يصرف على2ديار
خليه مايكفيهش الوقت يحك راسو
وخلي العشيقة والخيانة والحبيبة الاولى تنفعو
راه يجي الوقت اللي يندم عليها خاصة اذا كنت ماكيش مقصرة معاه باي شيء
ونزيد نقولك وكلي ربي عليه في كل وقت
وتاكدي انت اللي راكي صح وهو الخاطىء
انت صاينة عرضو
وهو يعصي في ربي مع امراة اجنبية عليه
واش نزيدك
اكثري من الدعاء والاستغفار ووكلي امرك لربي
ربي يهنيك اميييين

[KING STAR]

الله يفرج كربك اختي
لكن ما أود قوله ان فكرة الطلاق إنزعيها من رأسك لانها ليست بالفكرة الجيدة حاولي حل المشكل بطريقة أخرى
وبالتي هي أحسن
الله يفرج كربك

[ايمان4]

نحكيلك قصة من الواقع ممكن تساعدك
وحدة ام صحبتي راجلها امام كانت وحدة تجي ترقي عنده بغى يتزوج بيها قاتله اكتبلي الدار بحكم هيا كان عندها 4 دراري معاه قاتله اكتبلي و اتزوج على روحك بدى يقلها انت البشرة نتاعك قريب سوداء و انا ابيض انت ماشي شابة هي خير انت ما تعرفيش تلبسي و انت و انت ... المهم جبدلها كامل عيوب الدنيا و الاخرى رجعلها على انها ماشي غير شابة قمر زمان و فيها كامل الصفات الحسنة ....
كيما كان الحال اكتب عليها الدار كانت مزالها ارض داك الوقت و تم عقد الزواج جاب بنت منها ... و بداو المشاكل مع الثانية غيرة هستيرية و رجع يشتكي للاولى و قالها باغي نرجع ما شجعاتهش هي في الحقيقة ولدها الكبير مرض بسبب ضحك الناس عليه كان ممتاز رجع الاخير في المتوسطة ما داش الباك رجع يكره باه ...خاطرش كان كبير يفهم قيس لي باه اتزوج على امه و صراله رهاب اجتماعي امرض مرض نفسي .... خاطرش كان بزاف يبغي باه دايما يضل معاه مين اتزوج ضحى ما يجيش و لا نهار بنهار هو موالف يقصر معاه اتاثر بالغياب نتاعه المتكرر .... و الام ما تقدرش تعوض الاب .... اخرتها الثانية طلب الطلاق خاطرش الماديات الشهرية ما تكفيش ما قدرتش تصبر معاه قاتله انا قبلت بيكك زوجة ثانية باش تتهلى فيا ماديا ماش باش نعيش هاد الميزيرية مع انها عادي كاريلها و تاكل و تشرب بغات تدي هي الدار و تطلقه ممبعد طلبت الطلاق بغا يدي البن ما مدتهالهش عاودت الواج هي و هو رجع غير مع الاولى و ندم و لدرما ما زاله يجري على ولده لي ضيعه يضل يجري بيه عند الاطباء النفسانيين ندم اشد ندم خاطرش ظلم المرا الاولى ...

[nadine0159]

انا بنت خالتي صرالها كيفك مي هي هاداك الوقت ب5اطفال و هو ماهو قادر ماوالو على التعدد المهم جاب المراة الثانية و هي كانت مصممة على الطلاق و مباعد مالقاتش وين تروح و قبلت و رجعت للدار قسملهم الدار اللي ماهي دار و بصح هاديك الثانية بعد شهرين قالها روحي لدار والديك وطلقها كانت تما حامل المهم رجع لبنت خالتي صح هو رجل لعوب و مايخافش الله بصح كي هي مسكينة دارت معاه غلنية شوفي دركا هو ما يخدمش و مرتو الثانية يمدلها النفقة بصح ولادو ضايعين بالشر و تاني زاد عرف وحدة اخرى بعدها و كان حاب يعاود الكرة مي وقفوه عند حدو باباه و خاوتو و نسابو دركا هي قاعدة معاه علاجال ولادها بنتها دارت 14عام هربت من الدار لمزية طاحت في عايلة ناس ملاح ستروها و زوجوها لولدهم وولدت لكن راهي مذلولة كيما يدير لبنات النس شوفي خرجها ربي في بنتو ماما قالتلها علاش راكي تتحملي فيه ماجاك من عندو غير الشر و النتيجة بنتك وقالتلها طلقيه و الدار تبقى ليك و النفقة تاع ولادو على الاقل تعيشو بيها خير من هاد الميزيرية المهم قصتها طويلة هادا عبرة كيما يديرو الحرام راح تعود حياتهم جحيم انا من رايي مادام عندك غير بنت روحي شوفي حياتك في بلاصة اخرى لانني نضمنلك بلي مايتوقفش عند هاد الحد صح التعدد مشروع مي ماشي في وقتنا بصح حاولي تبعديه عليها بلاك سحر و شوفي اهلك و اهله و قوليلو مانسمحلكش و اليوم قبل غدوا لانو على حساب واش فهمت ماكيش كبيرة او ماشي شابة باه يبدلك هو لعوب و كرشو كبيرة وواش يضمنلك ماتعيشيش ف الهم و المشاكل هي باينة مخططة مليح مالقاتش اللي يتزوجها حابة تلصق و خلاص وهادي مصيبة راح تجيبيها لدارك وواش يضمن مباعد ينساك انت نهائيا و يبقى غير معاها راني قلتلك خمي في روحك بنتك صغيرة و اخرتها تكبر مي انت اذا ضحيتي و كبرتي كل الفرص تروحلك

[سفيان01]

[font="courier new"][/font]

السلام عليكم.....اختي الكريمة من خلال اطلاعي على موضوعك تبين لي بأن زوجك يرغب في التعدد وهذا أمر مشروع...لكن العلاقة مع امراة اجنبية عليه لاتجوز ...المهم نقلك حاجة أختي متسمعيش للنساء اللائي يسعين لخراب بيتك ويدبرو عليك دبارات تع خراب بيوت وشر والعياذ بالله...ريحي في دارك مع بنتك ومايهمكش ...اذا رغب في الزواج خليه يتزوج أحسن من أنو يعيش في الحرام...المهم أن يعدل بيناتكم ومايظلمكش في حقوقك الشرعية أنت وبنتك ربي يحفضها....شوفي لبنتك ترضايها تعيش يتيمة ومتشردة؟؟؟؟وخاصة انها صغيرة...ترضايها تتعقد وسط صحاباتها؟؟؟؟لاأضن...احكمي دارك ومتسمعي حتى لوحدة...على خاطر مايحس بالجمرة غير اللي عافس عليها....كما أضن ربما تكون نزوة عابرة فقط...المهم مهما كان أختي الكريمة حافظي على عش زوجيتك وصوني بيتك ومايهمكش في القيل والقال....وخاصة أنو زوجك مهوش مفرط فيك .....ربي يهنيك وربي يفرج عليك...سلام

[محارب الحمق]

كيما كاين حكايات تاع تعدد فاشلة, كاين حكايات تاع تعدد ناجحة. وكيما كاين حكايات تاع زواج بامرأة واحدة ناجحة, كاين حالات تاع طلاق الامرأة الواحدة !!!!! حاجة وحدة ننصحك بيها: تبعي لحلال ولحرام ولتذهب نظرة و عرف المجتمع الذي لا يتماشى مع الدين الى الجحيم

[زيان.]

أختي أتضامن معك قلبا وقالبا
ليس بالأمر السهل ولا الهيّن القبول بالثانية على هذا النّحو
إن كان بالمعايير والمقاييس أو كما يقال بـ : القمنة ماعليش
أما أن تكون خيانة زوجية وتنتهي بعلاقة زواج فلا أرضى لك ذلك
وانا أعي ما أقول
عموما حافضي على زوجك وعلى بيتك و حاولي تجميع واِحضار الأشخاض الذين حضرو في خطيتك أول يوم سواء من أهلك أو من أهله واعرضي عليهم حالتك
وحينها ستكون لكل حادثة حديث

[زيان.]

المشاركة الأصلية كتبت بواسطة oum sohaib

عندما يقضي وطره منها ويعرف ان الامر سيان سيعود اليك ذليلا (شوية صبر فقط)

أتفق معك ... يدا في يد
حينها سيعلم أنّه مجرّد زيادة في هرمون التيستيستيرون ليس أكثر ولا أقل
وبعدها سيستيقض على صدى أقدام المغادرة
حينها سيبكي حسرة طول العمر كما هو الحال مع أحد الأشخاص ممن صادفتهم في أحد سفرياتي

[ع.عيسى]

الله يهديه ويصلحه .......التعدد له شورطه وله احكامه .....المهم : الصبر ثم الصبر ، لن ينفعك الطلاق ، ولا تستمعي لمن يحرضك على زوجك ويدعوك للانفصال ، ...لا تتتخذي قرارات مصيرية بناء على نصائح اناس لن يتاثرواا بنتائج قرارتك ......كوني حكبمة في ارجاع زوجك اليك . وان شاء الله تفرج في القريب العاجل

[مسلمة بالفطرة]

ما تخليش دارك ابدا و ما تطلقيش راح تكوني نتي الخاسرة و راح تعاني بزاف ناي و بنتك استعيني بكبار العايلة و ربي يفرج عليك اختي و ادعي لزوجك بالهداية

[امرأة]

اشكركم اخ اني اخواتي بارك الله فيكم واحترم كل الارا ء و وجهات النظر. جزاكم الله الجنة. لقد تحدتث كثيرا مع زوجي اليوم. فرغت فيه قلبي..... لكن في النهاية رضخت للامر واحسست بطمأنينة و سكينة. . وسامحته وطلبت ان يتقي الله حتى لا يمحق له البركة من هذا الزواج وامليت عليه شروطا قبل بها. مشكلتي الوحيدة ان تعاودني الكآبة والهم كلما تذكرت بعض الخصوصيات الزوجية. لكن حين علمت انها اكبر مني وسنة فقط بينها وبين زوجي احسست ببعض الطمأنينة التي تسود النساء حيال مشكل الغيرة. اسأل الله ان يثبتني ويربط على قلبي ويقويني في الظروف الصعبة. مجددا بارك الله فيكم ودعواتكم لي في هذا الشهر الفضيل

[ابو سليمان10]

ملاحظة جانبية...حاولت من خلال التعليقات فهم النساء كيف يفكرن في الامر
اظن تخلف مجتمعنا في قضايا علاقة الرجل و المراة بشكل عام هو من رسخ مفاهيم مغلوطة عن الامر اضافة الى الغيرة الطبيعية لدى النساء و التي لا تكفي بمفردها فهي موجودة في النساء منذ القدم
المجتمع يرى الامر على ان الثانية افضل من الاولى و اجمل لانها جائت بعدها و الامر ليس كذلك..اضف الى ذلك ان الرجال ايضا يميلون الى الجديدة و هذا حرام

ملاحظة اخرى...مجتمعنا وصل اسفل سافلين....كنا في الشباب غير المتزوج...لان حتى المتزوجيين يخونون و ينظرون الى ما حرم الله و يقيمون العلاقات لاحول و لاقوة الا بالله

الرجل العاقل في هذا الزمان يتمنى امراة واحدة المهم ان تعتني به و تحبه و ان تكون طيبة و لاتزرع الفتنة في العائلة ...لا يوجد اكثر من هدا

[قرويجة]

أختي الكريمة من خلال الردود السابقة لاحظت بأن الأعضاء غفلو ان يسألوك ماهو سبب عدم زواجه بحبيبته الأولى على زعمه و تزوجكي فمن خلال معرفة السبب يمكن أن انصحك ماذا تفعلين

[بالقران نرتقي]

اختي ربي يهديه وربي يصلح احوالكما اوصيك اختي بالدعاء خلصة ونحن في هدا الشهر الفضيل ادعي تضرعي لله الواحد الاحد فهو القادر على كل شيئ بصح انساي فكرة الطلاق ماشي تعبتي باه تتخليلها كلش ليها وهدا راجللك ربي يهد يه جاه التعدد غير كي شاف صاحبتو الاولى لوكان جات بنت ناس وفيها ذرة تربية ماديرش هادو الحوايج المهم هو الخاسر وكي جا حاب التعدد لوكان شاف وحدة تاع الدين ماشي تاع الفايسبوك

[محارب الحمق]

المشاركة الأصلية كتبت بواسطة امرأة

اشكركم اخ اني اخواتي بارك الله فيكم واحترم كل الارا ء و وجهات النظر. جزاكم الله الجنة. لقد تحدتث كثيرا مع زوجي اليوم. فرغت فيه قلبي..... لكن في النهاية رضخت للامر واحسست بطمأنينة و سكينة. . وسامحته وطلبت ان يتقي الله حتى لا يمحق له البركة من هذا الزواج وامليت عليه شروطا قبل بها. مشكلتي الوحيدة ان تعاودني الكآبة والهم كلما تذكرت بعض الخصوصيات الزوجية. لكن حين علمت انها اكبر مني وسنة فقط بينها وبين زوجي احسست ببعض الطمأنينة التي تسود النساء حيال مشكل الغيرة. اسأل الله ان يثبتني ويربط على قلبي ويقويني في الظروف الصعبة. مجددا بارك الله فيكم ودعواتكم لي في هذا الشهر الفضيل

أسأل الله العظيم رب العرش العظيم أن يثيبك على صبرك جنة النعيم, نعم المرأة والزوجة أنت