حسبي الله و نعم الوكيل

[مشكلتي]

السلام عليكم سلاما طويلا مديدا
جيت نشكيلكم و معلاباليش منين غادي نبدا الدنيا مغلوقة في وجهي
هاهي مشاكل اختي و طلاقها
هاهي مشاكل خويا و خطيبتو وزواجو
ماما مسكينة تجري منا و من لهيه
و بابا مع الخدمة
و انا كي الحيط في الدار غير هم الباك ما بقالوش زمان و انا كل يوم في مشكلة جديدة مش عارفة وش ندير واللهه كل يوم مشاكل ما تخلاصش و انا ولات دمعتي غير عند شفرة عيني
ما لقيت وش ندير غير نجي نشكي همي هنا
ادعولي ربي يفرجها و نحقق طموحي و يخفف علينا شوية و كل المومنين

[مراد سابقا10]

واش دخلك انت في مشاكل الأخرين حوسي على روحك برك

علابالك شهادة البكالوريا مفصلية في حياتك يا تكوني حاجة يا تقعدي والوا

حذار خاصة البكالوريا متضيعيش نفسك اقراي قرايتك

[طالبة لها هدف]

يا اختي الباك شي و مشاكل الدار شي تان حاولي تفصلي بيناتهم
ما تحطميش روحك نتي و مستقبلك على جال مشاكل عائلية
ديجا في وقتنا مكاش دار بلا مشاكل
وش نقلك ربي يفرج همك و هم جميع الناس

[هـــدوء]

مشكل طلاق ختك يخصها وحدها .
مشكل خوك و خطيبتو يخصهم وحدهم .
طولو و لا قصروا مشاكلهم راح توصل لنهاية .
انتي اقراي قرايتك خاطر تخصك وحدك .

[siliine]

اعملي بجد حتى تعيدي لعاءلتك الفرحة بنجاحك انشاء الله وهدا باهتمامك بدراستك وفقط

[toulay]

وعليكم السلام ورحمة الله وبركاته
انت ماعندك حتى علاقة بالمشاكل هاذي لقاعدة تصرا من الاحسن تهتم بقرايتك هي الصح
ربي ينجحك ان شاء الله ويفرج عليك امين يارب العالمين
بالتوفيق

[زعترة]

نصيحة لوجه الله اختي
عيشي حياتك وعيشي اللحظة لي راكي فيها
من تفشلي فلباك واحد مايجي حذاك الا فشلك
ختك كبيرة وتعرف صلاحها وخوك خطب ربي يسهلو
نتي غابنا روحك بلا حتى فايدة

[رندة.]

اهتمي بقرايتك وخلاص، كل واحد مسؤول على نفسه، وانتي مسؤولة على قرايتك وشهادة البكالوريا الي راهي قريب.
كي يكونو يهدرو على المشاكل في الدار ما تقعديش معاهم باش ما تتأثريش بكلامهم وتبقاي تخممي فيه بدل قرايتك، أخرجي من الغرفة الي راهم فيها، حاولي تشغلي روحك في المطبخ مثلا او أي هواية لأنو ماهوش وقت ملائم للدراسة، وكي يكون الجو هادئ راجعي دروسك وتماريناتك.
ربي يوفقك ان شاء الله

[الحياة بسمة]

عيش حياتي وخلي تخلى ،في النهاية كل واحد يشوف مصلحته ،عن تجربة

[زايدي أمحمد]

ركزي في الباك ومشاكل لخرين ربي يفرج عليكم

[noursm]

ربي يفرج همك و يفكها عليكم اختي
اكثري من الصلاة على النبي محمد صلى الله عليه و سلم و الاستغفار .
و كذلك اشكي همك لله السميع المجيب لانه هو الواحد القادر على فك همك.

[محمد...عبد النور]

السلام عليكم و رحمة الله و بركاته
كان الله في عونك...طبعا الانسان يتأثر حتما بمن يحيط به...خاصة عائلته و يفرحه فرحهم و يؤرقه حزنهم...لكن لا بد له من التأقلم مع كل وضع و ان يقف في المكان الصحيح و الا تأثر سلبا خاصة وقت المشاكل
انت تعانين في اسرة بها مشاكل ...تتأسفين لوضع أختك المطلقة ...اخوك الخاطب...امك التي انهكها التعب مع والد ....غلبتك دموعك...الله يبارك فيك على شعورك النبيل ...لكن بدل أن يكون دورك سلبيا في هاته الاسرة....حاولي تبديله الى الايجابية ...كفكفي دموعك...احرصي على دراستك و خاصة انك مقبلة على امتحان مصيري...لابد لك من نيل الشهادة و اجعلي نجاحك بسمة امل و متنفس للاسرة و اشراقة للخير في بيتكم...حاولي مواساة اختك و ليس طلاقها نهاية العالم...ربما بداية حياة اجمل...ربما الله قد نجاها من شخص لا يليق بها...و هل لختك هي الوحيدة التي طلقت ...هناك من طلقت فأعتق روحها و سمت و ربما التقت بالشخص الذي يناسبها و قد تعيش معه في راحة بال...مشاكل اخوك ...حري به يحلها بنفسه ...و ان كان غير مستعد للزواج فليؤجله لحين استعداده ....فلا تشغلي نفسك بحروب اخيك الجانبية ....امك الغالية حفظها الله ...كوني عونا لها فيما تقدؤين عليها ...خاصة من ناحية برها و طاعة اوامرها ..فهي السعادة ...الاب حفظه الله كوني بارة به و كوني عند حسن ظنه و ايك ان تشتكي او تبكي امام والديك فهما حساسان جدا عندما يرونك محبطة ...و لتجعلي لسانط دائما طيب الكلام و خلقك حسن و حاولي ان تتلطفي مع الجميع..فالدنيا و ان اشتدت علينا فلابد ان ترق و تتبدل الى الاحسن ...مرات نحزن و نظن ان حظنا عاثر...و نتقلب بين النكبات ...لكن و الله اننا نتقلب في الرحمات ....علمناها ام جهلناها ....قد يبتلينا الله تعالى بأمور قد تضيق انفسنا بها لكن ما تلبث ان تذهب و ربما تزيد رصيدنا ببعض التجارب و لولاها لما قدرنا معرفة امور كانت مخفية عنا ....فليكن سيرنا في هاته الدنيا يعتريه تفاؤل و حسن ظن بالله فوالله هو لن يضيعنا ...و لنحرص على معرفة ناس معادنهم من ذهب لا اولائك المتلونين او من يزيدون مصائبنا يسوء تقديرهم و تصرفهم ...فمرات لا يذهب عن أحدنا بعد الله عز و جل الا صديق قريب ننتفع بنصحه و كلامك...لا تقلقي و ادرسي جيدا فكل مشكل حل و اول الحلول هو ان تحرصي على ما ينفعك بعد التوكل على الله عز و جل...
بارك الله فيك و أبدلك الله و اسرتك بالفرح و السعادة و الامور التي تفرح قلوبكم و جميع المسلمين
ســــــــلام