غلبتونى يا بنات الفايس بــوك

[البحر الصافي]

صديقتي ام امجد ربي يكون في عونك يا اختي ويهدي زوجك
كنت دائما في عيني المراة القوية المجاهدة نحبك تبقاي هكذاك وماتتخليش على دارك وعلى وليداتك لانهم من حقك والزوج ربي يهديه كثري الدعاء والاستغفار ووكلي امرك لله تعالى هو عالم بحالك وهو احن منا جميعا ولانملك لك سوى الدعاء لك باصلاح احوالك وهداية زوجك ربي يكون معاك

[متمنية]

خدوجة والله انا نقرى ونبكى ما لقيت مانقولك الا عليكى بسورة البقرة والله عن تجربة تنحى سحر وتنحى شيطان من دار دومى عليها وقريها بقلب خاشع ربى معاك وتاكدى من انو الحرام لا يزول وانتى وليا وراكى مظلومة وظلم ظلمات ربى يرجعلك زوجك

[hodayena]

عيشي لنفسك اسعيدي نفسك البسي لنفسك حتى لو يرا اهمليه باهماله ارميه
متحليهش مدام درتي كل ولا تنسي الصدقة والدعاء ا
اهتمي بنفسك اشري ملابس اصبغي شعرك اهتمي باولادك خلي ضحكتك في البيت متخليش ولادك يحسو خلي يشوفو السعادة فيك اياكي وتطلقي
اياكي وتطلقي خليه لبنات الفيس تفو عليك دوك يشبعو منو ويرموه رمية الكلاب استحفضي على صحتك اولادك يسحقوك وانتي تستحقي نفسك البسي في الدار العبي مع اولاد بدلي اهتمامك بيه لاتمامك بنفسك اعملي صنعة متخليش روحك للفبد كون قوية حتى ل كنتي مقطعة من الداخل تكبري عليه انفخي روحك عليه وخليه للزبالة تع البنات الي مثلو

[ام ايمان16]

ربي يفرج عليك أختي

[لينة71]

كيما تقول جداتي الله يرحمها الغربال يمشي عند لعباد كامل ومنبعد يرجع لاصلو. يروح يروح ويرجع لبلاصة ماتخميش ما تجسسيه عليه راكي تمرضي في روحك وتعبئة في روحك وديري روحك ماعلبالمش بيه رآه صرالي كيما نتي ومرضت وشبين وليت في حالة كي نتفكر يحكمني لوجع دوك وليت ماعلبالمش بيه ما مدوخة رأسي بيه ماوالو عاد يجري مور ايا دوك والحمد لله الصبر والدعاء احسن حل التاي بولادك وكبرياء نهار غدوة تشوفيهم حاجة شابة وتفرحي بيهم وتنساي الهم عيشي وقتك مع اولادك والله تلقاي نعمة كبيرة وراحة
نقولك كبري بالك وتوسعي خاطرك خليه في خاطرة رآه يخدم لقبرو ونتي ساعة على ساعة نبهيه
كان الله في عونك

[شمس 15]

ربي يجيب لهاد الفايسبوك فكة يا رب دماااار اكثر منو منفعة خاصة على المتزوجااات العفيفات لي شايدين ديورهم و قاريين لامان في رجالتهم و هوما خاربينها في الفايس...
الحمد لله مانعني راجلي منو لكن حتى انا منعتو منو ماشي حرام عليا حلال عليه....
ام امجد نصيحتي ليك و لنفسي درت روحي في بلاصتك و خرجت بحل و هو
اني نخرج جدو(راجلي)من راسي لانو بكل بساطة ما يستاهلش دقيقة نخمم فيه يا ربي راهو دخل للزنا و هو محصن راكي قلتي درت لي في بالكم و لي مافي بالكمش يروح يزمر ديري ولادك هوما كلش لانهم هوما يستاهلوك وعلابالي ولادك كبار ربي يعوضك فيهم خير وراني شبه متاكدة ربي يعوضك...
و زيدي ما تطلبي الطلاق ما والو اقعدي في دارك يا لعزيزة و هو لي يخرج خليه يتزوج بفايسبوكة كي هو و يشبع بها و بخلايعها لانو الكلام ماشي كي الحقيقة نقصد المعيشة الزوجية
و متنسايش يديرلك تعهد كتابي بحق النفقة و ترك المنزل لانو هو لي يخرج براسو ماشي 6 يخرجو للشارع...
انا هدا رايي يخليك انتي و الدراري بكل بساطة في دارك و يروح يتزوج خيرلو في لحلال(و علابالي و الله غير يندم لانو ذاق بزاف تصعب عليه يرتاح مع وحدة)و راح يرجع يبوس راسك و يترجاك تسامحيه...

هي صعيبة في الاول خير ماتتطلقي و تخرجي من دارك لي تعبتي عليها سنين و زيد تربحي صحتك بزااف عليك عنك نفسك اولادك يسحقوك...
وربي يهديه هبلونا الرجال هادو مالقينا سلاك...

[fadila34]

يالعزيزة مالقيت مانقول غير ربي يفرج عليك عن قريب ان شاء الله
والله الهدرة والتعبير راحولي خلاص

[oum radja]

السلام عليكم
والله والله غير حسيت قلبي اتقسم كي شفت موضوعك
هبلتي تطلبي الطلاق
وين بغيتي تروحي ب5؟
وسقسيتي روحك اذا تقدري عليهم ؟
وبغيتي تخليله الطريق يزيد يدير رايه اكثر ؟
واذا طلقتي راح تتهني زعما ؟
رح تحبس المشاكل والتخمام ؟
رح تضمني انك ماتمرضيش كيما راكي تقولي ؟
رايحة تقعدي تخممي فيه لانو بيناتكم عشرة عمر مش بالساهل تقدري تنسيه وتريحي ؟
استهدي بالله واقعدي في دويرتك وصلي وقومي الليل وابكي واشكي لربي سبحانه هو الوحيد لي يقدر يهديه

[غفران 2]

ربي يقويك ويعطيك الصبر على هاد الابتلاء
والله كلامك قطعلى قلبي
اصبري على وليداتك ما تطلقيش وين تروحي بيهم
وهدا النوع من الرجال مايتهناش في حياتو حتى يجيبلو ربي ضربة يا يتكاكا يا تديه

[anfal10]

واش نقوللك اختي راهي بلاوي في الفايس الرجال ولاو ما يحشموا ما يعرقوا عازبين فهمنا طيش الشباب مي مزوج بولادوا الله المستعان لبنات تاع دوك ما يخافوش ربي هاشا لي ما يستاهلهاش مي و الله الاغلبية راهم في هاد المشكل ادا ما شي انترنات قصرة او كام او تلفون تروح للعظمى و العياذ بالله هادوا لبنات واش احوسوا يبروفيتوا يصرفوا عليهم يشرولهم لبسة احوسوا معاهم عاديك هي حباتهم عندهم نورمال
ديري ربي في قلبك او ما تخرجيش من دارك ما يحشمش لوكان جا راجل وحدة يتيمة يحطها فوق راسوا حقار عندك ربي حنونة او عندك ولادك انا نقول ديري شومبرا وحدك او خليه اخلط يمرض وحدوا ادا حب ماشي زعاف او زيد المرض خليه كي الكلب ما تقربي منوا ما اطيبيلوا كل واحد في حد و لا حب اطلق نورمال راكي ام حاضنة يخرج هو من الدار ليسونسيال ماشي نتي لي تطلبي الطلاق تخشري قاع حقوقك او ما تعبريه ما اديريلوا قصة عيشي كي القاوريات لتاي بروحك او ولادك ديري فورماسيوا و لا خدامة خير او خير ما تحناجبهش المهم كيما قالولك لبنات عمري وقتك ما تتحسريش على حالك درتي لي عليك او اكثر ادعي ربي كل يوم ربي يهديه واش نقولوا ناس يكري اروحوا يخدموا في فرنسا او بعاد على نساهم مي ما كاش تخلاط اخافوا الروميات او المرض دوكا بنات بلادهم او ما سلكوش تليقلوا الحبس لوكان تشديه في لاقروند ديلي او جيبي لابوليس و الله يستاهال ما كثر شافوا نسا ساكتين علاش لمرا كي اديرها اديروا حالة يهبلوا او يدخلوها للحبس ربي اجيب الخير اختي ما تعمرش راسك

[،،ايمان،،]

منلي قريت موضوعك و انا غير نخمم فيك

الغدر و الخيانة واعرة

واعرة تعيشي مع خائن و واعرة تروحي تطلقي وين تدي ولادك
ربي يكتبلك الخير وين مكان و ادعي ربي يربط على قلبك خاطر حتى و لو ولى تقعد هاديك النقطة السوداء

كون كبرت فيه غير خدمتك لدارهم و والديه و صبرك عليه المرة الاولى

حسبنا الله و نعم الوكيل في هاد البنات

[oum radja]

ام امجد وين راكي على بالي راكي تقولي الهدرة جاتهم ساهلة
نتي صعيب عليك الحال
بصح بالاك بالك تتطلقي اقعدي في دارك وتلهي بعمرك وبوليداتك واسكتي وخليه ماتلوميه ماتعانديه ديريه كلي ماكانش هو رح يحس بسكاتك ويرجع يحوس عليك
حتى اذا بغا يتزوج خليه صدقيني نعرف قاع لي عاودو الزواج رجعو كي الكلاب للمرا اللولا
انا مانقولك والو غير استحفظي على روحك صحتك اذا فقدتيها ماينفعك لا راجل ولا ولاد
واذا دخلتي كونطاكتيني نحتاجك

[زيان.]

المشاركة الأصلية كتبت بواسطة ام امجد14

للاسف كيما قريتو فى العنوان غلبونى بنات الفايسبوك
قبل 4 سنوات دخلت حساب زوجى بعدما لاحضت عليه اهمال عايلتو و الاورلادو و عادى جدا حسى كمراة و يا للاسف دفعنى لاغضب ربى و اتجسس على زوجى
وجته يكلمه هاته و يداعب هاته و احسست انه دئب يجلس امام النات ليستاد فريسته واجهته فاخدتو نصيبى من الشتم و السب ووصلت الى الطلاف فخفت و تراجعت لان مطلقة مرتين
قراات ان البس لباس المراة المثالية و رفعت شعار سوف اعيدك يا زوجى لاحضانى و وويلكم منى يا بنات الفايسبوك

الحمد لله رزقنى الله بنصيب من الجمال و الرشاقة و خفة الدم لا غرور و لكنها الحقيقة

فقمت بكل شئ يخطر على بالكم و ما لا يخطر على بالكم لاحافظ على بيتى و زوجى خاصة اننى يتيمة الابوين و عندى 5 اولاد
الان طفح الكيل وصلت الى علاقات جنسية و انا ما زلت صابرة احس ان جسمى بكامله يؤلمنى احس الان بامراض عضوية نهيكا على النفسية

الان حطيت الراية و هنئا لكم انتصرتم عليا


الى كل من يقرا هته السطور ارجو منك الدعاء او نصيحة مادا افعل مع هدا الزوج هل اصبر و بعد شهور او سنين نلقى روحى ام مصابة بمرض

لا قدر الله و لادى ما مصيرهم من بعدى
هل اطلب الطلاق هل حقا للمراة فى الجزائر حقوق

هل ساعيش حيات كريمة من بعد الطلاق و انا عندى 5 اولاد

السلام عليكم ورحمة الله وبركاته أختي ..
بإذن الله ستكون لي عودة لموضوعك حتى أردّ عليك بما أحسبه وأراه صائبا ... فمسألتك جدية وحساسة
...

[الأمنيات]

الاخوات الي راهم يقولوا لها ما تطلقش هي اصلا ما حاباش تطلق لانها مطلقه مرتين من قبل
كان يطلقها لاتفه الاسباب ربي يهديه لهاذا هي خائفة من الثالثه مع خمس. اطفال. وين تروح بيهم
الوالدين ماكانش ربي يرحمهم لا مسكن لا عمل لا دخل لا شهادات. واش تعمل غير تصبر ماعندهاش حل اخر
وتغير المعامله معاه
الاخت الي قالت يخرج هو من دار الدار تاعه وفيها والديه ظني يخرج ويخلي والديه ،،، لا اظن حتى والديه هي قايمه بيهم من اكل وغسل
انا رديت نيابة عنها نعرف مشكلتها من اساسها حاليا ماعندهاش النت باش تدخل وترد عليكم وديما في اتصال معاها ربي يفرج عليها وهو ربي يهديه

[dede2000]

السلام عليكم ،اولا اقول لاختي الكريمة كان الله في عونك، هذا بلاء ولا بد من الصبر والاحتساب ،ويجب التعامل مع الوضع بذكاء،هنا انا لا انصحك بالمواجهة لان زوجك سيحس نفسه محاصر وصغير عند المواجهة وستكون له ردود افعال غير محمودة،انصحك ان تتجاهلي الامر ولو امامه ودفعي بالتي هي احسن ، مع التحدث في امور الدين ،والاستماع لمواعظ العلماء عبر التلفزة اوالنت دون ان تحسسه بانك فعلت هذا لاجله،لان ضميره شبه ميت ولا بد من عملية انعاش قلبي،عبر ارجاعه الي الله،وانا متاكد ان شاء الله رايح يجي نهار ويندم.والله المستعان،ودعواتنا ليك ولزوجك