موضوع مميز ♠⊱⋛⋋الدرس الاول من تعليم فنون الطبخ...مقبلات البطاطا..♠⊱⋛⋋ - الصفحة 11

تغرينية · 2016-02-07, 10:29

ماشاء الله عليك

جازيا ام البنات · 2016-02-07, 18:32

اقتباس:

المشاركة الأصلية كتبت بواسطة زينب 83

اهلًا بكم غالياتي في اول درس لنا في هذه المدرسة
بما انه اليوم اول درس و مازال ماوالفتوش ريتم المدرسة ، فكرت اني نقدم درس خفيف و أفكاره سهلة و خفيفة و تقدر اي ربة بيت ديرها و اخترت مكون بسيط و متوفر في اغلب البيوت الجزائرية ،

و تعمدت اني نحط عدة افكار باه ماتتقيدوش و تكون عندكم حرية الاختيار
يعني الإلزامي هو وصفة واحدة فقط و الباقي اختياري كل واحدة و إمكانياتها

هيا نبدأ بسم الله

أعشاش البطاطا

هذه مقبلة سهلة و لذيذة و غير مكلفة و صحية

نغسل البطاطا و نرابيها و مباعد نعصرها مليح من الماء بواسطة مصفاة و لا بيدينا ، نزيدولها شوي ملح ،ثوم ،بيض، فلفل ابيض و نرصوها في المول يكون مدهون بالزبدة و نديرو فجوة في النص ، طبقة البطاطا ماتكونش سميكة
ندخلوها فرن سخوووون شاهل من تحت و نخليوها حتى تقرب طيب
كي قريب يطيب نجبدوه و نعمروه

ببيض مخفوق مع جبن ملح بهارات دبشة مقطعة و ممكن اضافة تونة ،فطر ،دجاج ،لحم مفروم

و نزيدو شوي جبن مبشور و ندخلوهم حتى يطيب البيض

ميني بيتزا البطاطا

هاذي وصفة سهلة جدا و لذييييذة و راح تعجب الاطفال

نقطعو البطاطا بالطول او بالعرض اذا حبات كبار ، السمك يكون حوال نصف سنتيمتر
نفوروها و نحطوا فوقها الصلصة ثم الجبن المبشور
الصلصة
سخنت بضع ملاعق حليب و ذوبت فيها جبن مثلثات و خلطت حتى عقدت و اضفتلها ثوم مرحي ، زعيترة، شوي لحم مفروم طايب قبل و قطع فطر و طماطم مقطعة قطع صغااااار
هاذو كامل نخلطو هم مع بعض و نحطوهم فوق البطاطا ، الصوص تكون عاااااقدة ماشي جارية
ندخلوها فرن سخووووووون شاعل من فوق حتى تتحمر و يذوب الجبن

ميلفاي البطاطا

هذي فكرة سهلة و لذيذة جدا ، انا حبات البطاطا لي عندي صغار ممكن ديروها اكبر حجما و راح تكون مرافق جيد للدجاج المحمر
نقعطعو البطاطا قطع رقاق على طريقة الشيبس و نطوهم فوق مناديل ورق تمتص الماء
نتبلو هم بشوي زبدة او زيت ملعقة او اثنين حسب الكمية و نزيدو ،ملح ،زعتر، ثوم مجفف، و شويييية جبن مبشور و نخلطو كلشي
مباعد نجيبو مول مدهون مليح بالزبدة و نستفو قطع البطاطا على طريقه الميلفاي و نرشو من فوق جبن مبشور و ندخلوها لفرن سخون حتى تتحمر و طيب
مقرمشة من برا و طرية من داخل اممممممممم

بينيي البطاطا

هاذو البينيي بنان ياسر ياسر
العجينة
كيلتين بطاطا مسلوقة و مهروسة ، انا غسلتها و سلقتها بالقشر و مباعد قشرتها
كيلة فرينة
ملعقة قهوة خميرة كيميايية
رشة ملح
ملعقتين جبن مبشور او قطعة جبن مثلثات
نخدمو العجينة بالباتور نحطو البطاطا اولا ثم الفرينة و باقي المكونات، و نخلطو حتى ترجع العجينة طرية و نخلوها عادي و نقصو اقراص نحشيوهم بالحشو لي نحبو
انا حشيتهم بلحم مفروم مقلي مع بصل و ثوم و بهارات و شوية جبن احمر و نغطوهم بالأقراص الثانية
و نقليوهم في زيت سخوووون، راهم يطيبو بسرعة

و اللذة مانحكيش ذوقو و أحكموا مع رشة عصير ليمون اممممممممم

ميني همبورغر البطاطا

هذي طريقة سهلة و لذيذة لتقديم الهمبورغر و في نفس الوقت لذيذة و ممكن تتحكمو في الحجم كيما تحبو
و نقدرو نديروها بالبطاطا او بالكورجيت

نرابيو البطاطا و نعصروها من الماء مليح و نتبلوها بملح ، فلفل ابيض، ثوم ، دبشة مقطعة ، و بيض ونخلطوه

نسخنو مقلة ماتلصقش و اذا تلصق ندهنوها بالزيت و نحطو مول مدور و نحطو في وسطو الحشو و نخليوه يطيب على نار هادئة من الجيهتين
على فكرة غير يحكم الشكل نحيو المول و نحطو قرص تاني

بصح ما يطيبو نشكلوه على شكل همبورغر بإضافة أقراص اللحم و السلطة و الجبن و الطماطم

لي ماعندهاش اللحم ممكن دير أقراص بيض داخل المول

اصابع البطاطا بالمرغاز
هذه وصفة لذيذة جدا جدا

نقطعو البطاطا و نفوروها و نرحيوها بالفرشيطة او الرحاية اليدوية ضروري بالروبو تولي مطاطية و ماتقدروش تخدم بيها و نزيدولها ثوم ، بهارات ، ملح ، صفار بيض ، دبشة او معدنوس مقطع

نطيبو المرغاز و نفرغوه من كامل الزيت تاعو بعد ما نثقبوه

نغلفو حبة المرغاز بالبطاطا و نشكلوها على شكل أصبع بمساعدة عمود الشواء نحطوه يرتاح شوي في الثلاجة ،نمرروه في بيض ثم فرينة
و نقليوه في زيت سخووووون
و البنة اممممممممم،
صحاب الريجيم هاذي خاطيتكم ههههههه

ورود البطاطا

مذاق لذيذ و شكل ألذ

للعجينة انا درت عجينتي لي معتامدتها
كاس حليب دافئ
ملعقة خميرة
ملعقة سكر
فرينة
نطلعوا اولا الخميرة مع الحليب و السكر و نضيف الفرينة تدريجيا و اخيراً نزيدو الزبدة حتى نتحصلوا على عجينة طريقة و تلصق لاااااازم
نخليوها تخمر كي تضاعف الحجم نهبطوها و نشكلوها

البطاطا نقصوها قطع دائرية رقيقة نقليوها او نرشوها بشوي زيت و نطيبوها في الفرن

نطرحو العجينة فوق جلجلانية مرشوشة و نقصوها شرائح رقاق نستفو قطع البطاطا و نرشو شوي جبن مبشور و نلفوها على شكل وردة ندهنوها بحليب و نخليوها تخمر و مباعد نطيبوها في فرن سخوووووون مسبقا بعد ما ندخلهم نقصي لو شوي باه طيب من داخل مليح و اذا عندكم المروحة شغلوها
و هذي النتيجة

هذا الدرس الاول يا رب تكونو استفدتو منو و اذا ماعجبكمش ، ان شاء الله الدروس القادمة تكون احسن
بانتظار تطبيقاتكم غالياتي و لكم حرية الإبداع

شكرا ليك اختي زينب على المجهود المبذول سؤالي حول كمية الزبدة في العجينة ياريت تراجعي الوصفة وتقولينا انا بالانتظار شكرا مرة اخرى

nadiatlemcenia · 2016-02-07, 22:07

ماشاء الله مبدعة كالعادة
جزاك الله خيرا وزادك من فضله

ليليا25 · 2016-02-08, 10:07

الف الف شكر اكيد جاري التجريب 444444444444444444444444

fatisousou · 2016-02-08, 11:54

ماشاء الله وبارك الله فيك ربي يحفضلك وليداتك

انا هي رزيقة · 2016-02-08, 13:41

جازاك الله خيرا على هذا المجهود اختي زينب و االله ابداع هذي غير البطاطا خرجتي منها كل هذ التحف ...خخخ ماشاء االله عليك اختي . بصح للاسف منقدرش نسجل في هذ المدرسة الجميلة لاني منقدرش نلتزم بالتطبيقات كما ينبغي . انا نخدم طوال الاسبوع حتى السبت و عندي فقط الجمعة لقضاء كل اشغالي المنزلية بصح هذا ميمنعش اني اكيد رايحة نطبق بعض من هذ الاكلات الشهية لي راكم تحطوها لكن حسب ريتمي الخاص . ربي يوفقك اختي